Hechos 27

Pablota Roma llaqtaman pusachisqanmanta

1Italia lawmanmi barcopi pusachiwanankupaq rimanakururqaku, hinaspam Pablotawan wakin presokunata Augusto sutiyuq tropakunapa capitannin Julioman entregaykuwarqaku. 2Adramitio llaqtamanta barco Asia lawpi llaqtakunaman pasananpaq kaptinmi chay barcopi rirqaniku. Ñoqaykuwantaqmi rirqa Macedonia lawpi Tesalónica llaqtayuq Aristarcopas. 3Paqarinnintin punchawñataqmi Sidón llaqtaman chayarqaniku. Hinaptinmi Capitán Julioqa Pablota kuyapayasqanrayku, Pablopa reqsinakusqankuna watukamuspanku imallapipas yanapaykunankuta mana harkakurqachu. 4Sidón llaqtamanta pasaspaykum, contraykupi wayramusqanrayku Chipre islapa alleq lawninta rirqaniku. 5Cilicia lawpa hinaspa Panfilia lawpa chimpanta rispaykum Licia lawpi Mira llaqtaman chayarurqaniku.

6Chaypim soldadokunapa capitannin tarirurqa Alejandría llaqtamanta hamuspa Italia lawman riq barcota. Chaymanmi pusaykuwarqaku Italiakama apawanankupaq. 7Achka punchawmi allillamanta rirqaniku, hinaspaykum Gnido islapa chimpanman ñakayta chayarurqaniku. Contraykupi hinalla wayramuptinmi Salmón llaqtapa chimpanta pasaruspayku Creta islata muyurqaniku. 8Sasallataña chay islapa waqtanta rispaykum, Lasea llaqtapa hichpanpi “Buenos Puertos” nisqankuman chayarurqaniku.

9Llumpaytaña unaruptiykum, ayuno fiesta pasaruptin lamar qochanta rinapaq llumpay sasaña kasqanrayku Pablo nirqa:

10Taytakuna, kay illasqanchikpiqa llumpay sasallañam kanqa, barcopas cargantinmi chinkakuykunqa, hinaptinmi ñoqanchikpas wañuypa patanpiña kasunchik, nispa.

11Soldadokunapa capitanninñataqmi Pablopa nisqanta mana uyarispan barco manejaqpa hinaspa dueñonpa nisqanta kasukurqa. 12Para tiempo kasqanrayku barcopa samananpaq mana allin kaptinmi, yaqa lliwchanku tanteanakurqaku chay sitiomanta lloqsispa Fenice llaqtaman imanaypas chayaypi rinankupaq. Fenice llaqtaqa Africa lawtawan Grecia lawtam qawachkan, chaypim poqoy tiempota pasayta munarqaku.

Lamar qochapi llumpay wayra hatarirusqanmanta

13Sur lawmanta sumaqllataña wayrarimuptinmi, rinaykupaq allin hinaña kaptin lloqsispayku Creta islapa waqtallanta rirqaniku. 14Ichaqa manapas unaymantam, noreste lawmanta Euroclidón sutiyuq viento sinchita pukumuspan 15barcota kayman chayman apayta qallaykurqa, wayrapa contranpi mana riyta atispam hinataña apachikurqaniku. 16Clauda sutiyuq taksa islapa qepanta pasaruptiykuqa manañam llumpaytachu wayramurqa, hinaptinmi salvakunapaq boteta sasallataña churkurqaniku. 17Churkuruptiykum seguranankupaq barcota waskakunawan watarqaku. Ichaqa Sirte sutiyuq yakupa huñusqan aqoman mana chocarunaykupaqmi barcopa velankunata hurqorurqaniku llutanpiña rinaykupaq. 18Paqarinnintin punchawñataqmi aswan kallpawanraq wayra pukumuptin barcopi cargakunata yakuman wischurqaku. 19Kimsa punchawmantañataqmi kikiykuña barcopa llapa imankunata yakuman wischurqaniku. 20Achka punchawña intitapas nitaq chaskakunatapas mana rikuspam hinaspa wayra-para hinalla apawaptinkum, manaña imaraykupas librakuytaqa piensarqanikuñachu.

21Barcopi kaqkuna achka punchawña mana mikusqa kaptiykum, chawpiykupi sayaykuspan Pablo nirqa:

Riqmasillaykuna, nisqaypi hinapas Creta islamantaqa amapas lloqsimuchwanchu karqa, hinaptinqa manachá ñakarichwanchu nitaq imanchikunatapas yakuman wischuchkachwanchu karqa. 22Ichaqa ama hukmanyaspa kallpanchakuychik, manam hukllapas wañunkichikchu, barcollam chinkaykunqaqa. 23Chisi tutam rikuriykuwarqa servisqay Diospa angelnin. 24Paymi niwarqa: “Pablo ama manchakuychu, rey Cesarpa ñawpaqninmanqa chayankipunim, qamraykum lliw qanwan riqkunata wañunankumanta Dios salvanqa”, nispa. 25Chaynaqa, riqmasillaykuna, kallpanchakuychik, ñoqaqa Diospim hapipakuni, angelpa nisqanman hinam cheqaptapuni kawsasunchik. 26Chaywanpas hukkaqnin islamanmi wischusqa kasunchik, nispa.

27Iskay semanañam wayrapa apakachasqan kachkarqaniku Adriático sutiyuq lamar qochapi, hinaptinmi chawpi tutata barcopi llamkaqkuna musyarurqaku allpaman chayaykuchkasqaykutaña. 28Yakupa hondo kayninta tupuptinkum iskay chunka metrom kasqa, tumpa waklawpi tupuptinkuñataqmi chunka pichqayuqllaña kasqa. 29Hinaptinmi raqchikunaman takakurunanmanta manchakuspanku barcopa qepa lawninman wataruspanku tawa anclakunata yakuman wischurqaku, hinaspankum achikyamunantaña munarqaku. 30Barcopi llamkaqkunañataqmi rimanakururqaku chay barcomanta ayqekunankupaq, hinaspankum salvakunankupaq boteta uraykachiyta qallaykurqaku, chaytaqa ruwarqaku barcopa punta lawninta llasaq fierrokunata bajachiq tukuspallam. 31Ichaqa capitanmanwan soldadokunamanmi Pablo nirqa:

Kay barcopi llamkaqkuna ayqekuptinqa manam salvakuyta atiwaqchikchu, nispa.

32Chaynata willaykuptinmi chay botepa waskankunata soldadokuna kuchuruspa yakuman wischuykurqaku.

33Achikyaramuptinmi Pabloqa lliwchankuta kallpanchaspan imallatapas mikuykunankupaq nirqa:

Yaqa iskay semanañam mana puñusqa hinaspa mana mikusqa kachkankichik. 34Ruegakuykichikmi imallatapas mikuykunaykichikpaq. Mikunaykichikpunim kawsanaykichikpaq, manam pipapas huk chukchallanpas chinkanqachu, nispa.

35Chaynata niruspanmi tantata Pablo hapiykuspan lliwpa ñawpaqninpi Diosman graciasta qorqa, hinaspanmi partiykuspan mikuyta qallaykurqa.

36Chaymi kallpanchakuspanku lliwchanku mikurqaku. 37Chay barcopiqa karqaniku iskay pachak qanchis chunka soqtayuq runakunam. 38Saksanankukama mikuruspankum barcota sampayachinankupaq costalpi trigokunata yakuman wischuykurqaku.

Barcopa chinkaykusqanmanta

39Achikyaruptinñataqmi barcopi llamkaqkuna mana reqsirqakuchu maylaw allpapi kasqaykutapas, ichaqa rikururqakum qocha hina yaykuqpa patanpi aqollaña pampata, hinaspam rimanakurqaku atispankuqa barcota chayman chayachinankupaq.

40Barco takyachiq llasaq fierropa waskankunata kuchuruspankum hina yaku ukupiña saqerurqaku. Paskarqakutaqmi barcopa timonnin watasqanku waskakunatapas, barcopa ñawpaqninpi velata altoman hoqariykuptinkum barcoqa qochapa patan aqollaña pampaman riyta qallaykurqa. 41Aswanqa iskay lawmanta yakukunapa tupanakusqanman chayaruptiykum barcoqa aqopiña umanpa plantakururqa, chaynapim manaña kuyurirqachu. Barcopa qepa lawninta yaku nisyullataña laqyamuptinmi chitqakuytaña qallaykurqa.

42Soldadokunañataqmi presokuna wañurachiyta munarqaku, chaynapi mayqanninkupas nadeaspa ama lluptinankupaq.

43Ichaqa soldadokunapa capitanninmi Pablota salvayta munaspan harkakurqa ama pitapas wañuchinankupaq, hinaspam kamachirqa nadeay yachaqkuna puntata yakuman pawaykuspanku patanman lloqsinankupaq, 44chaynapi wakinñataq tablakunapi otaq barcopa imankunamanpas hapipakuspa lloqsinankupaq. Chaynapim patanman allinlla lliwchanku chayarurqaku.

Currently Selected:

Hechos 27: RCHQ2

Highlight

Copy