Hechos 14

Pablowan Bernabé Iconio llaqtapi willakusqankumanta

1Iconio llaqtapim Pablowan Bernabé yaykurqaku judiokunapa sinagoganman, chaypi willakuptinkum Jesucristoman achka judiokuna iñikurqaku, iñikurqataqmi mana judío kaqkunapas. 2Ichaqa Jesucristoman mana iñiq judiokunam, mana judío kaqkunata umacharuspanku iñiqkunapa contranpi hatarirachirqaku. 3Chaywanpas Pablowan Bernabeyqa unaymi chay llaqtapi karqaku, hinaspam Señorman hapipakuspanku mana manchakuspa Diospa kuyakuyninmanta willakurqaku. Señorñataqmi willakusqanku cheqap kasqanta qawachinanpaq, paykunaman atiyta qorqa admirakuypaq milagrokunatawan señalkunata ruwanankupaq. 4Chay llaqtapi runakunam iskayman rakinakururqaku, wakinmi judiokunawan karqaku, wakiqninñataq apostolkunawan. 5Hinaptinmi llapa judiokunawan mana judío kaqkuna kamachikuqkunawan kuska rimanakururqaku Pablotawan Bernabeyta maqaparuspanku rumikunawan choqaparunankupaq. 6Ichaqa Pablowan Bernabeymi yachakuruspanku ayqekurqaku Licaonia lawpi Listra hinaspa Derbe llaqtakunaman, chaynataq muyuriqninpi taksa llaqtakunamanpas. 7Tukuy chaykunapim Jesucristomanta allin noticiata willakurqaku.

Listra llaqtapi Pablota rumiwan choqaparusqankumanta

8Listra llaqtapim tiyachkarqa nacesqanmantapuni mana puriy atiq runa. 9Paymi Pablopa rimasqanta uyarichkarqa, hinaptinmi Pablo qawariykuspan musyarurqa sanoyananpaq iñiyniyuq kasqanta. 10Chaymi hatunmanta nirqa:

¡Hatarispa sayariy! nispa.

Hinaptinmi chay runaqa hukta pawarispa puriyta qallaykurqa. 11Pablopa ruwasqanta rikuruspankum llapa runakuna, Licaonia rimaypi qayaykachakurqaku:

¡Dioskunam runapa ayrinpi ñoqanchikman uraykaramunku! nispanku.

12Bernabeytam diosninku Jupiterwan suticharqaku, Pablotañataqmi willakusqanrayku Mercurio diosninkuwan suticharqaku. 13Chay llaqtaman yaykuykunapim Jupiterpa templon karqa, hinaptinmi Jupiterpa sacerdoten apamurqa torokunatawan waytakunata llaqtapa punkunman, hinaspam llapa runakunawan kuska sacrificiokunata paykunaman ofreceyta munarqaku. 14Chaymi apóstol Bernabeywan apóstol Pablo chayta uyariruspanku pachankuta llikiparqaku, hinaspam llapa runakunaman kuskanchakuruspanku qaparirqaku:

15¡Runamasillaykuna! ¿Imanasqataq kayta ruwachkankichik? Ñoqaykuqa qamkuna hina runallam kaniku, hamurqanikuqa cheqap kawsaq Diosmanta willakuqmi, chaynapi tukuy mana allin ruwaynikichikta saqespa kawsaq Diosman kutirikunaykichikpaq. Paymi unancharqa kay pachata, hanaq pachata, lamar qochata, hinaspa chaykunapi tukuy ima kaqkunatapas. 16Ñawpaq tiempokunapim llapa runakunata kachaykurqa munasqankupi purikunankupaq. 17Chaywanpas Diosqa runakunapaq allin kaqkunata ruwaspam pim kasqanta reqsichikurqa. Paymi parachimun, paytaqmi tarpuykunatapas allinta ruruchispa mikunanchikpaqpas chani-chaninta qowanchik, chaynapi kusisqa kawsananchikpaq, nispanku.

18Chaynata nispankum, paykunaman sacrificiokuna ofrecenankumanta ñaka-ñakayta harkakururqaku.

19Chayllamanmi Antioquía llaqtamantawan Iconio llaqtamanta judiokuna chayaramurqaku, paykunam llapa runakunata umacharuspanku, Pablota rumiwan choqaparurqaku, hinaspankum “wañurunñam” nispanku llaqtapa patankama aysarurqaku. 20Ichaqa iñiqkunam Pablopa muyuriqninpi huñunasqa kachkaptinku, Pablo hatarispan huktawan chay llaqtaman yaykurqa. Paqarinnintin punchawñataqmi Bernabeywan kuska Derbe llaqtaman pasakurqa.

21Jesucristomanta allin noticiata Derbe llaqtapi willakuspankum achkallataña iñichirqaku. Chaymantam kutirqaku Listra, Iconio hinaspa Antioquía llaqtakunaman. 22Chay llaqtakunapim Jesucristoman iñikuqkunata imam creesqankupi qaqa hina sayanankupaq kallpancharqaku:

Diospa munaychakuyninman yaykuqqa achka sasachakuytam ñakarinan, nispanku.

23Sapa iglesiapim ancianokunata churarqaku, hinaspankum ayunowan chaynataq Diosta mañakuspanku iñisqanku Señorpa makinman churarqaku.

Pablowan Bernabé Siria law Antioquiaman kutisqankumanta

24Pisidia lawninta pasaspankum Panfilia lawman chayarqaku. 25Hinaspankum Perge llaqtapi Diospa palabranta willakuruspanku Atalia llaqtaman uraykurqaku. 26Chaymantam Antioquiaman barcopi kutirqaku. Chay llaqtamantam Diospa kuyapayakuyninta mañakuspanku llapa iñiqkuna allin noticiata willakamunankupaq paykunata kacharqaku. 27Antioquiaman chayaruspankum llapa iñiqkunata huñururqaku, hinaspam willakurqaku payninkunatakama Diospa tukuy ima ruwamusqanta, chaynataq mana judío kaqkunamanpas iñikunankupaq punkuta Dios kichaykusqanmanta. 28Chaypim iñiqkunawan unay watakunata qeparqaku.

Currently Selected:

Hechos 14: RCHQ2

Highlight

Copy