Filiipu 4
4
Lɔŋ tasʋʋ
1Pʋ-yɔɔ lɛ, man-taabalaa kʋsɔɔlaa! Meheyiɣ-mɩ se ɩɖɔkɩ mɩ-tɩ kpam mɩ nɛ Kɩpaɣlʋ mɩ-kpɛndʋʋ taa. Mɩ-yɔɔ lɛ, ma-laŋɩyɛ hʋlʋmaa siŋŋ nɛ mankʋndʋʋnɩ-mɩ. Mɩ me-liu wɛɛ kpem se mana.
2Meheyiɣ Evoodi nɛ Sɛntiici se pɛwɛnɩ lɩmaɣza kʋɖʋmɛɛ pa nɛ Kɩpaɣlʋ pɛ-kpɛndʋʋ taa. 3Piyele weyi ña ŋkɛ man-taabalʋ siŋŋ tʋmɩyɛ taa yɔ, mentendiɣ-ŋ ɖɔɖɔ se ŋsɩnɩ-wɛ. Mbʋ́ pʋyɔɔ yɔ, ma nɛ wɛ ɖɩlʋbɩnɩ Laŋhɛzɩyɛ Tɔm yɔɔ nɛ pɩkpɛndɩnɩ Klemaɣ nɛ taabalaa lɛlaa mbá pa-hɩla wɛ wezuu takayaɣ taa yɔ patɩŋa payɩ.
4Mɩ-taa ɛhʋlʋmɩ tam se mɩ nɛ Kɩpaɣlʋ ɩkpɛndaa. Mantasɩɣ-mɩ heyuu se: mɩ-taa ɛhʋlʋmɩ!
5Iyele nɛ mɩ nɛ ɛyáa tɩŋa pʋwɛɛ leleŋ, Kɩpaɣlʋ wɩzɩ kɔm. 6Ɩtaanɩɣzɩ kaʋ. Ɛlɛ́, paa mbʋ́ pɩ-taa lɛ, ɩtɩŋnɩ Ɛsɔ sɛʋ nɛ e-tenduu pɔ-yɔɔ nɛ ɛpɔzɩ-ɩ nɛ ɛsɩmɩyɛ mbʋ́ pɩtɩŋa pɩtɛɖɩɣ-mɩ yɔ. 7Pʋbʋ, Ɛsɔ laŋhɛzɩyɛ nɖɩ́ ɖɩkɩlɩ ɛyáa lɛɣtʋ tɩŋa payɩ yɔ, pɩtɩŋɩɣnɩ Krɩstʋ Yesu yɔɔ nɛ ɖihuuzi mɩ-laŋa nɛ mɩ-lɩmaɣza pɔ-yɔɔ.
8Taabalaa! Ndʋ́ mɛntɛzɩɣnɩ-mɩ yɔ lɛ se: ɩmaɣzɩ mbʋ́ pʋwɛ ɖeu nɛ pʋmʋna se pasam-pʋ yɔ pʋ-yɔɔ. Ḿbʋ́ yɔ: mbʋ́ pɩtɩŋa payɩ pɩkɛ toovenim yɔ nɛ mbʋ́ pʋmʋnaa se pañam-pʋ yɔ nɛ mbʋ́ pʋtʋʋzaa yɔ nɛ mbʋ́ pʋwɛ cɩɖɩcɩɖɩ yɔ nɛ mbʋ́ pʋmʋnaa se pɔsɔɔlɩ-pʋ yɔ nɛ mbʋ́ pʋmʋnaa se payɩɣyɩ-pʋ yɔ nɛ mbʋ́ pʋmʋnaa se palabɩ-pʋ yɔ nɛ mbʋ́ pʋbʋ mʋnaa se paɖʋ-pʋ hɩɖɛ yɔ. Ɩmaɣzɩ pʋ-yɔɔ camɩyɛ. 9Mbʋ́ mɛnkpɛlɩkɩ-mɩ nɛ ndʋ́ mɔyɔɔdaa nɛ ɩnɩɩ nɛ mbʋ́ malaba nɛ ɩna yɔ, ɩɖɔ pɩtɩŋa payɩ pʋ-yɔɔ. Peeɖe Ɛsɔ laŋhɛzɩyɛ tʋ wɛɣ mɩ-cɔlɔ.
Pɔɔlɩ sɛɣ Filiipu ñɩma pa-haɖɛ yɔɔ
10Ma nɛ Kɩpaɣlʋ ɖɛ-kpɛndʋʋ yɔɔ lɛ, man-taa hʋlʋmaa siŋŋ. Man-taa hʋlʋmaa se pɩha-mɩ waɖɛ lɛɛlɛɛyɔ se ɩɖaɣnɩ mɔ-yɔɔ tɔzʋʋ. Maatɔŋ se iiyebi mɔ-yɔɔ maɣzʋʋ, ɛlɛ́, pɩtaaha-mɩ waɖɛ se ɩsɩnɩ-m. 11Pɩtɛkɛ se nabʋyʋ tɛɖɩɣ-m yɔɔ mɔyɔɔdʋʋ ḿbʋ́. Toovenim lɛ, mamalɩsɩ man-tɩ se paa ɛbɛ taa mɛwɛɛ yɔ, pɩtaacɛyɩ-m. 12Mɛwɛ tanɩm taa yaa mɛwɛnɩ sakɩyɛ yɔ, mansɩm man-tɩ ɖɔkʋʋ. Mamalɩsɩ man-tɩ pɩtɩŋa payɩ pɩ-taa: paa ñɔɔsɩ taa yaa haɣnaɣ taa yaa mɛwɛnɩ sakɩyɛ yaa pazɩ yɔ, mamalɩsɩ man-tɩ. 13Krɩstʋ haɣnɩ-m ɖoŋ, ɛ-yɔɔ manpɩzɩɣ malakɩ pɩtɩŋa payɩ. 14Paa ḿbʋ́ yɔ, ɩlabɩ ɖeu nɛ ɩsɩnɩ-m man-kʋñɔmɩŋ taa.
15Mɩ Filiipu Krɩstʋ ñɩma lɛ, mɩ-maɣmaɣ ɩtɛm naʋ se: alɩwaatʋ ndʋ́ papazɩ Laŋhɛzɩyɛ Tɔm susuu Masedonii nɛ mankʋyɩ se menkpeŋ yɔ, mɩ-ŋgbɛyɛ taa ñɩma ɖeke kasɩnɩnɩ-m. Yee ḿbʋ́, ma nɛ mɩ ɖe-ɖeke koŋ ɖɩsɩnɩnɩ ɖama. 16Maawɛ Tesalooniki lɛ, halɩ ɩtɛm-m tiyinaʋ tam naalɛ mbʋ́ pɩtɛɖaɣ-m yɔ. 17Pɩtɛkɛ se me-liu wɛ haɖɛ yɔɔ mɔyɔɔdʋʋ ḿbʋ́. Ɛlɛ́, mañɩnɩɣ se pɩsɛɛ-mɩ nɛ mɩ-ñɩm huúu Ɛsɔ cɔlɔ. 18Meheyiɣ-mɩ se mbʋ́ ɩcɛlɩ Epafroditi se ɛkɔnɩ-m yɔ, mamʋ pɩtɩŋa payɩ. Pʋɖɔwa pɩtɩɩfɛyɩ. Lɛɛlɛɛyɔ, mɛwɛnɩ mbʋ́ pɩtɩŋa payɩ pɩtɛɖaɣ-m yɔ nɛ halɩ pɩɖɛɛ pʋ-yɔɔ. Mɩ-haɖɛ ńɖɩ́ ɖɩwɛ ɛzɩ kɩlaʋ ŋgʋ́ kɩlɩɣ sɔzɩŋ camɩyɛ nɛ kɩkɛdɩnɩ Ɛsɔ siŋŋ yɔ. 19Ɛzɩma mbʋ́ mɛ-Ɛsɔ wɛnɩ ñɩm siŋŋ yɔ, ḿbʋ́ ɖɔɖɔ ɛtɩŋɩɣnɩ Krɩstʋ Yesu yɔɔ nɛ ɛha-mɩ mbʋ́ pɩtɩŋa payɩ pɩtɛɖɩɣ-m yɔ. 20Pasa ɖa-Caa Ɛsɔ weyi ɛwɛ koboyaɣ taa tam yɔ. Pɩla ḿbʋ́!
Sɛtʋ
21Ɩsɛɛ mbá patɩŋa payɩ pɛkɛ Ɛsɔ ñɩma pa nɛ Krɩstʋ Yesu pɛ-kpɛndʋʋ taa yɔ. Taabalaa mbá ma nɛ wɛ ɖɩwɛɛ yɔ, pɛsɛ-mɩ. 22Ɛsɔ ñɩma tɩŋa payɩ mbá pɛwɛ cɩnɛ yɔ, pɛsɛ-mɩ ɖɔɖɔ. Kɔzɩkɔzɩ Room wiyaʋ sɔsɔ ɖɩɣa taa ñɩma.
23Kɩpaɣlʋ Yesu Krɩstʋ ɛlabɩ-mɩ lootiye.
Currently Selected:
Filiipu 4: KABI
Highlight
Share
Copy
Want to have your highlights saved across all your devices? Sign up or sign in