Filiipu 3
3
Yesu ɖeke koŋ Pɔɔlɩ taɣ liu
1Man-taabalaa! Ndʋ́ mɛntɛzɩɣnɩ-mɩ yɔ lɛ se mɩ-taa ɛhʋlʋmɩ se mɩ nɛ Kɩpaɣlʋ ɩkpɛndaa. Pɩɩcɛyɩɣ-m se mantasɩ-mɩ maʋ Laŋhʋlʋmɩyɛ Tɔm ńdʋ́. Piyele mɩ lɛ, pɩkɩlɩ wee wee se pama-mɩ ḿbʋ́. 2Ɩkpa mɩ-tɩ nɛ tʋmlaɖaa azaɣ́a, pɛkɛ hasɩ mancaaciwaa, pɛtɛpɛlɩ-wɛ siŋŋ. 3Mbʋ́ pʋyɔɔ yɔ, ɖɛkɛnɩ mbá pɛpɛlɩ-wɛ siŋŋ yɔ, pɩtɛkɛ ḿbá. Fezuu Kiɖeɖeu yɔɔ ɖɩtɩŋɩɣna nɛ ɖiluŋuu ɛ-tɛɛ nɛ ɖɩkʋndʋʋnɩ Yesu Krɩstʋ. Đɩɩtaɣ tomnaɣ yɔɔ pɛlʋʋ.
4Ŋgʋ́, ma ɖɔɖɔ manpɩzaɣ se mantaa ma-maɣmaɣ man-tɩ. Yee nabɛyɛ ɛmaɣzɩɣ se papɩzɩɣ pataa pa-maɣmaɣ pa-tɩ liu yɔ, mɛwɛnɩ waɖɛ nɛ pɩkɩlɩ-wɛ. 5Palʋlɩ-m nɛ kɩyakʋ sɩŋ lɛ, pɛpɛlɩ-m. Mɛnkɛ Izrɛɛlɩ tʋ, palʋlɩ-m Bɛnjamɛɛ liɖe taa. Mɛnkɛ Ebree tʋ, Ebree ñɩma lʋlɩnɩ-m. Mɔnɖɔŋaɣ Yuda ñɩma paɣtʋ yɔɔ ɖɔm mbʋ́ yɔ, maakɛ Farɩsɩ tʋ. 6Mɛ-ɛsɩyɛ kɛsɛnɩ Krɩstʋ ŋgbɛyɛ taa ñɩma wayɩ wɛʋ kaŋ kaŋ. Paɣtʋ yɔɔ ɖɔm lɛ, natʋyʋ fɛyɩ se paawanɩ-m.
7Ɛlɛ́, mbʋ́ pɩɩkɛnɩ-m kɛzɛɣa yɔ, Krɩstʋ yɔɔ lɛ, mankpakɩɣ-pʋ lɛɛlɛɛyɔ se pʋɖʋzɩ-m. 8-9Halɩ mankpakɩɣ pɩtɩŋa payɩ se pʋɖʋzɩ-m, mbʋ́ pʋyɔɔ yɔ, mansɩm man-Kɩpaɣlʋ Krɩstʋ Yesu yɔ, pɩkɩlɩ-m wazaɣ pɩtɩŋa payɩ. Ɛ-yɔɔ lɛ, mentisaa se melesi pɩtɩŋa payɩ. Mankpakɩɣ pɩtɩŋa ɛzɩ azuluma pʋyʋ yɔ se manpɩzɩ mehiɣ Krɩstʋ ɛnʋ. Malakɩ ḿbʋ́ se ma nɛ ɩ ɖɩwɛɛ ɖama taa. Yee ḿbʋ́ pɩtɛkɛ paɣtʋ yɔɔ ɖɔm yebina nɛ manpɩsɩ ɛyʋ kʋtʋʋzʋ. Ɛlɛ́, mɛwɛnɩ lidaʋ Krɩstʋ yɔɔ yɔɔ manpɩsɩ ɛyʋ kʋtʋʋzʋ. Ɛsɔ cɔlɔ pɩlɩnaa se pɩtɩŋnɩ lidaʋ yɔɔ nɛ ɛyʋ pɩsɩ kʋtʋʋzʋ ḿbʋ́. 10Mbʋ́ pɩtɩŋa me-liu wɛɛ yɔ lɛ se: me-wezuu caɣʋ taa lɛ, mantɩlɩ Krɩstʋ nɛ mana ɖoŋ weyi efemnaa yɔ, nɛ mɔntɔɔ kʋñɔŋ ŋgʋ́ ɛtɔwaa yɔ nɛ mansɩ ɛzɩ ɛnʋ yɔ, 11nɛ pʋwɛɛ yɔ, Ɛsɔ kefezi-m ɖɔɖɔ sɩɖaa taa.
Ɛyʋ lʋkʋʋ se ɛtalɩ tɩnaɣ yɔɔ yɔ
12Maatɔŋ se mɛntɛm hiɣu pɩtɩŋa payɩ yaa mɛntɛm kɛʋ weyi ɛmʋnaa yɔ. Ɛlɛ́, mɔnɖɔŋ ñaɣʋ pana se mantalɩ nɛ mamʋ man-kɩhɛyʋʋ. Mbʋ́ pʋyɔɔ yɔ, Krɩstʋ Yesu tɛm-m mʋ́ʋ. 13Taabalaa! Ma-maɣmaɣ maatɔŋ se mɛntɛm talʋʋ nɛ mamʋ man-kɩhɛyʋʋ. Ɛlɛ́, pʋyʋ kʋɖʋm koŋ weyi malakɩ yɔ lɛ se: mɔnsɔʋ mbʋ́ pɩtɛm ɖɛʋ yɔ pʋ-yɔɔ nɛ piyele mɔnɖɔɔnɩ mbʋ́ pʋwɛnɩ ɛsɩndaa yɔ. 14Pʋ-yɔɔ malʋkɩ se mantalɩ tɩnaɣ yɔɔ nɛ mamʋ kɩhɛyʋʋ ŋgʋ́ Ɛsɔ tɩŋnɩ Krɩstʋ Yesu yɔɔ nɛ ɛ́yáa-ɖʋ nɛ ɛsɔdaa se ɖɩmʋ yɔ.
15Mbá ɖa ɖɩtɛm kɛʋ mbá pamʋnaa yɔ, ɖɩmaɣzɩ ḿbʋ́. Ɛlɛ́, yee nabʋyʋ taa mɩ-lɩmaɣza ɛwɛ ndɩ yɔ, Ɛsɔ wɩlɩɣ-mɩ mbʋ́ pɩkɛ toovenim yɔ. 16Mbʋ́ pʋwɛɛ yɔ lɛ se: Ɛsɔ nʋmɔʋ ŋgʋ́ ɖɩɖɔŋ kɩ-taa yɔ, ɖɩwɛɛ kɩ-taa ḿbʋ́ nɛ pɩɖɛɛnɩ ɛsɩndaa.
17Taabalaa! Mɩtɩŋa payɩ ɩla ɛzɩ malakʋʋ yɔ. Ɩcɔnɩ mbá pɔɖɔŋ lidaʋ nʋmɔʋ taa ɛzɩ ɖa yɔ nɛ ɩɖɔ ḿbʋ́. 18Toovenim lɛ, tɔm ndʋ́ manpam-mɩ heyuu yɔ, ńdʋ́ mantasɩɣ-mɩ heyuu lɛɛlɛɛyɔ nɛ ɛsɩtɛɣlɩm. Ńdʋ́ lɛ se: ɛyáa sakɩyɛ wɛɛ nɛ pɔ-ɖɔnɛ wɩlɩɣ se pɛkɛ Krɩstʋ weyi pakam-ɩ kaamaŋkaɣ yɔɔ yɔ e-koyindinaa. 19Ɛyáa ḿbá, pɛtɛŋnɩ lebu, mbʋ́ pʋyɔɔ yɔ, po-lotu lɛ pɛ-Ɛsɔ. Mbʋ́ pɩɩwɛɛ se pɩkpa-wɛ fɛyɛ yɔ, papɩsaa pakʋndʋʋnɩ-pʋ nɛ pamaɣzɩɣ mbʋ́ pʋwɛ kedeŋa yɔɔ yɔ, pʋ-yɔɔ ɖeke. 20Đa lɛ, ɖɩkɛ ɛsɔdaa kewiyaɣ taa ñɩma. Peeɖe ɖɩɖaŋnɩ Kɩpaɣlʋ Yesu Krɩstʋ se ɛkɔɔ ɛya ɖa-ñʋʋ. 21Ɛnʋ kɔŋnɩ lɛɣzʋʋ ɖo-tomnaɣ pʋtɔdɩyɛ ñɩŋga ŋgá ɖɩwɛnɩ kedeŋa yɔɔ cɩnɛ yɔ nɛ kapɩsɩ koboyaɣ ñɩŋga ɛzɩ ɛ-ñɩŋga yɔ. E-ɖoŋ weyi ɛwakɩnɩ pɩtɩŋa payɩ yɔ ɛlakɩnɩ ḿbʋ́.
Currently Selected:
Filiipu 3: KABI
Highlight
Share
Copy
Want to have your highlights saved across all your devices? Sign up or sign in