Maatiyee 28
28
Yesu femnɩ sɩm taa
(Mrk 16.1-8; Luk 24.1-12; Yoh 20.1-10)
1Kɩyakʋ kɩhɛzʋʋ ɖɛwa nɛ kife kujuka lɛ, Magdala Maarɩɩ nɛ Maarɩɩ lɛlʋ pakʋyɩ tanaŋ cu nɛ powolo se pana Yesu pɩlaʋ. 2Kpaagbaa ḿbʋ́ lɛ, tɛtʋ ñamsɩ siŋŋ nɛ Kɩpaɣlʋ tiyiyu nɔɔyʋ lɩɩnɩ ɛsɔdaa nɛ etii epilisi pɩlaʋ nɔɔ pɩyɛ nɛ ɛsɩɩ kɩjaʋ nɛ ɛcaɣ ɖɩ-yɔɔ. 3Ɛñɩlɩsaɣ ɛzɩ tɛʋ ñɩlɩsʋʋ yɔ nɛ e-wondu hʋlʋmɩ layɩ layɩ. 4Peeɖe sɔɔndʋ kpa mbá paaɖaŋ kʋ-yɔɔ yɔ siŋŋ nɛ peseli yem kpa kpa kpa nɛ pe-feziŋ li. 5Ɛlɛ́, Ɛsɔ tiyiyu heyi halaa ḿbá se: «Mɩ lɛ, sɔɔndʋ ɛtaakpa-mɩ. Manawa se Yesu weyi paakam kaamaŋkaɣ yɔɔ yɔ, ɛnʋ ɩñɩnɩɣ. 6Ɛfɛyɩ cɩnɛ, efema ɛzɩ ɛɛyɔɔdʋʋ yɔ. Ɩkɔɔ ɩna ɖenɖe paahɛzɩ-ɩ yɔ 7nɛ iwolo lɔŋ iheyi ɛ-tɔmkpɛlɩkɩyaa se efema nɛ ɛlɩɩnɩ sɩɖaa taa. Ewoki Galilee nɛ ɛɖaŋ-wɛ, peeɖe pakaɣ-ɩ naʋ. Ńdʋ́ maawɛna se meheyiɣ-mɩ.»
8Peeɖe patɩkʋyɩ pɩlaʋ yɔɔ nɛ sɔɔndʋ nɛ laŋhʋlʋmɩyɛ siŋŋ nɛ peseɣ se powoki peheyi ɛ-tɔmkpɛlɩkɩyaa. 9Pɩkɛdaa lɛ, Yesu katɩ-wɛ nɛ ɛtɔ se: «Mɛnsɛ-mɩ!» Peeɖe powobi poluŋ ɛ-tɛɛ nɛ pakpa ɛ-naŋgbanzɩ nɛ paɖʋ-ɩ hɩɖɛ. 10Ɛlɛ́, Yesu heyi-wɛ se: «Sɔɔndʋ ɛtaakpa-mɩ. Iwolo iheyi man-taabalaa se powolo Galilee, peeɖe pakaɣ-m naʋ.»
Sɔɔjanaa kɛdɩɣ mbʋ́ panawa yɔ
11Halaa ḿbá pakʋyɩ pɩlaʋ yɔɔ nɛ pɛɖɛɣ lɛ, sɔɔjanaa mbá paɖaŋ kʋ-yɔɔ yɔ, pa-taa lɛlaa wolo tɛtʋ taa nɛ pɛkɛdɩ cɔjɔnaa sɔsaa mbʋ́ pɩtɩŋa pɩlaba yɔ. 12Peeɖe paba nɛ ŋgbɛyɛ taa sɔsaa pekpeɣli ɖama nɛ pɔyɔɔdɩ nɛ pañɩnɩ liidiye sakɩyɛ nɛ pɛcɛlɩ-wɛ 13nɛ paka pa-ñʋŋ taa se: «Iheyi ɛyáa se iɖowaɣ ɖoó taa nɛ ɛ-tɔmkpɛlɩkɩyaa kɔɔ pamɩlɩ-ɩ. 14Yee wiyaʋ sɔsɔ ɛnɩ ḿbʋ́ lɛ, ɖɩtɩlɩ mbʋ́ ɖɩɩla nɛ ɖɩhɛzɩ ɛ-laŋɩyɛ nɛ ɛtaalabɩ-mɩ pʋyʋ yɔ.» 15Ɛlɛ́, sɔɔjanaa ḿbá pamʋ liidiye ńɖɩ́ nɛ pala ɛzɩ peheyuu-wɛ yɔ. Pʋ-yɔɔ tɔm ńdʋ́ tɩwɛɛ tɩcɔʋ Yuda ñɩma cɔlɔ halɩ nɛ sɔnɔ.
Yesu wɩlɩ ɛ-tɩ ɛ-tɔmkpɛlɩkɩyaa
(Mrk 16.14-18; Luk 24.36-49; Yoh 20.19-23; Tʋma 1.6-8)
16Yesu tɔmkpɛlɩkɩyaa hiu nɛ kʋɖʋm kowobi Galilee pʋʋ ŋgʋ́ ɛɛwɩlɩ-wɛ yɔ kʋ-yɔɔ nɛ paɖaŋ-ɩ peeɖe. 17Pɩkɛdaa lɛ, pana-ɩ nɛ poluŋ ɛ-tɛɛ nɛ paɖʋ-ɩ hɩɖɛ. Ɛlɛ́, pa-taa lɛlaa wɛɛ nɛ papʋtʋʋ pa-taa. 18Peeɖe Yesu woba pɔ-cɔlɔ nɛ eheyi-wɛ se: «Ɛsɔ ha-m ɖoŋ tɩŋa payɩ ɛsɔdaa nɛ tataa. 19Iwolo ajɛya kpeekpe taa ɛyáa cɔlɔ nɛ ɩla nɛ papɩsɩ mɔn-tɔmkpɛlɩkɩyaa nɛ ɩlabɩ-wɛ lɩm sɔʋ sɔnzɩ Caa Ɛsɔ nɛ ɛ-Pɩyalʋ nɛ e-Fezuu Kiɖeɖeu pa-hɩɖɛ taa. 20Ɩkpɛlɩkɩ-wɛ nɛ pɔɖɔ mbʋ́ pɩtɩŋa payɩ maaɖʋ-mɩ yɔ pʋ-yɔɔ. Ɩtɩlɩ se mɛwɛɣ mɩ-cɔlɔ kɩyakɩŋ tɩŋa nɛ pʋkɔɔ pɩsɩɩnɩ kedeŋa tɛm wiye.»
Currently Selected:
Maatiyee 28: KABI
Highlight
Share
Copy
Want to have your highlights saved across all your devices? Sign up or sign in
