Maatiyee 27

Powoni Yesu Room wiyaʋ Pilaatɩ tɛ

(Mrk 15.1; Luk 23.1-2; Yoh 18.28-32)

1Pakpa Yesu nɛ kife tanaŋ tɛɛ cu lɛ, Yuda ñɩma cɔjɔnaa sɔsaa nɛ pɛ-ŋgbɛyɛ taa sɔsaa pɔyɔɔdɩ patɩŋa payɩ se pakʋ-ɩ. 2Peeɖe pɔhɔkɩ-ɩ nɛ powoni-i Room wiyaʋ Pilaatɩ tɛ.

Yudaasɩ sɩm tɔm

(Tʋma 1.18-19)

3Yudaasɩ weyi ɛɖʋzɩ Yesu koyindinaa nesi taa yɔ, ɛnawa se pakʋʋ Yesu lɛ, ɛpazɩ kpiɖuu nɛ ɛkpaɣ liidiye pɔɔyɩsɩ niidozo nzɩ́ paahɛyɩ-ɩ yɔ se ɛpɩsɩɣna ɛcɛlɩ cɔjɔnaa sɔsaa nɛ pɛ-ŋgbɛyɛ taa sɔsaa. 4Ewoba lɛ, eheyi-wɛ se: «Malabɩ kɩwɛɛkɩm: mankpa ɛyʋ ɛnɛ ɖulum nɛ mɛncɛlɩ se pakʋ-ɩ.» Ɛlɛ́, pocosi-i se: «Ñɔ-cɔlɔ lɛ! Pɩtana-ɖʋ.» 5Peeɖe ɛkpaɣ liidiye ńɖɩ́ nɛ ɛmɩzɩ Ɛsɔ ɖɩɣa taa nɛ ewolo ɛɖɩ ɛ-tɩ nimiye nɛ ɛsɩ. 6Ɛlɛ́, cɔjɔnaa sɔsaa tɔzɩ liidiye ńɖɩ́ nɛ pɔtɔ se: «Đa-paɣtʋ taa lɛ, pɩtaha nʋmɔʋ se paɖʋ-ɖɩ Ɛsɔ ɖɩɣa koozaɣ taa, mbʋ́ pʋyɔɔ yɔ, pɩkɛnɩ ɛyʋ sɩm liidiye.» 7Panɩnɩ ɖama lɛ, pakpaɣ-ɖɩ nɛ payabɩnɩ tɛtʋ pɛŋ mayʋ cɔlɔ se pepi agɔmaa. 8Ḿbʋ́ yebina nɛ pɩkpaɣʋnɩ kɩyakʋ ŋ́gʋ́ yɔ, payaɣ tɛtʋ ńdʋ́ se: «Sɩm Tɛtʋ.» 9Pɩlabɩ ɛzɩ náyʋ Yereemii maʋ Yesu tɔm Ɛsɔtɔm Takayaɣ taa yɔ. Ɛmawa se: «Pakpaɣ liidiye pɔɔyɩsɩ niidozo nzɩ́ Izrɛɛlɩ ñɩma ɖʋ ɛ-yɔɔ yɔ 10nɛ payabɩnɩ tɛtʋ pɛŋ mayʋ cɔlɔ. Ḿbʋ́ Kɩpaɣlʋ kaɖʋwa se meheyi-wɛ.»

Yesu wɛ wiyaʋ Pilaatɩ ɛsɩndaa

(Mrk 15.2-5; Luk 23.3-5; Yoh 18.33-38)

11Powoni Yesu Room wiyaʋ Pilaatɩ cɔlɔ lɛ, ɛpɔzɩ-ɩ se: «Ña lɛ Yuda ñɩma wiyaʋ sɔsɔ naa we?» Yesu cosi-i se: «Ñɔyɔɔdʋʋnɩ ḿbʋ́.» 12Cɔjɔnaa sɔsaa nɛ pɛ-ŋgbɛyɛ taa sɔsaa pakʋyɩ ɛ-yɔɔ, ɛlɛ́, etocosi-wɛ natʋyʋ. 13Peeɖe Pilaatɩ pɔzɩ-ɩ se: «Ŋŋnɩɣ ɛzɩma mbʋ́ pakʋyʋʋ ñɔ-yɔɔ yɔ yaa we?» 14Ɛlɛ́, esuma, ɛtatasɩ cosuu natʋyʋ. Peeɖe pɩɖɩɣzɩ Pilaatɩ yem ɖɩɣ ɖɩɣ.

Pakʋ Yesu tɔm nɛ paɖʋ se pakʋʋ-ɩ

(Mrk 15.6-15; Luk 23.13-25; Yoh 18.39-19.16)

15Paa Yuda ñɩma Paska Kazandʋ ndʋ́ lɛ, Pilaatɩ lɩzɩɣ salaka tɩnaa taa kʋɖʋm weyi ɛyáa samaɣ sɔɔlaa se palɩzɩ-ɩ yɔ. 16Ŋgʋ́, alɩwaatʋ ńdʋ́ lɛ, abalʋ weyi payaɣ se [Yesu] Baraabaasɩ nɛ pasɩm-ɩ paa le yɔ, ɛɛwɛ salaka taa. 17Pʋ-yɔɔ Pilaatɩ pɔzɩ ɛyáa samaɣ ŋgá kekpeɣlaa yɔ se: «[Yesu] Baraabaasɩ nɛ Yesu weyi payaɣ se Krɩstʋ yɔ, pa-taa weyi mi-liu wɛɛ se meyele?» 18Ɛpɔzɩ-wɛ ḿbʋ́, mbʋ́ pʋyɔɔ yɔ, ɛnawa se paanaɣ Yesu nɛ ɛsɩyɛ yɔɔ pakpa-ɩ nɛ powoni ɛ-cɔlɔ.

19Pilaatɩ kacaɣ tɔm ɖɩhʋyɛ. Pɩkɛdaa lɛ, ɛ-halʋ tiyi se peheyi-i se: «Taaɖʋ ñɔ-nɔɔ ɛyʋ kʋtʋʋzʋ ɛnʋ ɛ-tɔm taa. Monɖozi-i ɖeɖe ɖoó taa nɛ ɛ-tɔm labɩ-m kʋñɔŋ pɩtɩɩfɛyɩ.» 20Peeɖe cɔjɔnaa sɔsaa nɛ pɛ-ŋgbɛyɛ taa sɔsaa peheyi ɛyáa samaɣ se keheyi Pilaatɩ se eyele Baraabaasɩ nɛ pɩkazɩ pakʋ Yesu. 21Ɛtasɩ-wɛ pɔzʋʋ se: «Anɩ mi-liu wɛɛ se meyele pa-naalɛ pa-taa?» Pocosi-i se: «Baraabaasɩ!» 22Ɛlɛ́, ɛpɔzɩ-wɛ se: «Mala Yesu weyi payaɣ se Krɩstʋ yɔ ɛzɩma?» Pocosi-i patɩŋa se: «Kam-ɩ kaamaŋkaɣ yɔɔ!» 23Peeɖe ɛtasɩ-wɛ pɔzʋʋ se: «Ɛlɛ́, kɩdɛkɛdɩm mbʋ́ kpem ɛlaba?» Pɛtɛzɩ kobusi mabʋ ɖoŋ se: «Kam-ɩ kaamaŋkaɣ yɔɔ!» 24Pilaatɩ nawa se paa ɛwɛɛ ɛyɔɔdʋʋ, pɩɩlɛɣzɩɣ pʋyʋ, ɛlɛ́, pɩtɛzɩɣ miŋ saʋ kɩsaʋ. Alɩwaatʋ ńdʋ́ʋ́ etiyaa se pɔkɔnɩ-ɩ lɩm. Pɔkɔnɩ-pʋ lɛ, ɛsɩŋ ɛyáa ɛsɩndaa nɛ ɛsaŋ e-nesi nɛ ɛtɔ se: «Pɩtɛkɛ mɔntɔmna se pakʋ ɛyʋ kʋtʋʋzʋ ɛnɛ! Mɩ-cɔlɔ lɛ!» 25Ɛlɛ́, ɛyáa samaɣ tɔ se: «Ɛ-sɩm sʋʋtʋ ɛpɩsɩ ɖa nɛ ɖe-piya ɖɔ-yɔɔ!» 26Pʋ-yɔɔ ɛlɩzɩ Baraabaasɩ nɛ eyele polu Yesu agbazɛɛ nɛ ɛkpaɣ-ɩ ɛcɛlɩ-wɛ se powoni-i pakam-ɩ kaamaŋkaɣ yɔɔ.

Sɔɔjanaa pɛŋ Yesu tɛtɛ

(Mrk 15.16-20; Yoh 19.2-3)

27Pʋwayɩ lɛ, sɔɔjanaa woni Yesu Pilaatɩ tɛ kadaɣ taa. Peeɖe powobi patɩŋa payɩ nɛ pekpeɣlini-i 28nɛ pɔhɔzɩ e-wondu nɛ posuu-i awiitoko kɩsɛmʋʋ waaa 29nɛ palʋʋ awiya hulaɣ nɛ sɔɔɔ nɛ papam-ɩ nɛ pɛcɛlɩ-ɩ ɖaʋ nɛ ɛ́ɖɔ́kɩ e-nesi kɩbanzɩ taa ɛzɩ wiyaʋ yɔ. Ɛlɛ́, papazɩ ɛ-tɛɛ luŋuu nɛ pɛsɛɣ-ɩ nɛ woŋa se: «Yuda ñɩma wiyaʋ sɔsɔ! Sɛɛ ɖeu!» 30Nɛ pɔtɔʋ ɛ-yɔɔ ndaatʋ nɛ pamʋʋ ɖaʋ ŋgʋ́ paacɛlɩ-ɩ yɔ nɛ pamakɩ ɛ-ñʋʋ taa. 31Pɛtɛm-ɩ tɛtɛ pɛŋʋʋ ḿbʋ́ lɛ, pɔhɔzɩ toko kɩsɛmʋʋ ŋ́gʋ́ nɛ papɩsɩnɩ e-wondu posuu-i nɛ powoni-i se pakam-ɩ kaamaŋkaɣ yɔɔ.

Sɔɔjanaa kam Yesu kaamaŋkaɣ yɔɔ

(Mrk 15.21-32; Luk 23.26-43; Yoh 19.17-27)

32Palɩɣaɣnɩ Yesu tɛtʋ wayɩ se pakam-ɩ lɛ, pakatɩ Siirɛɛnɩ abalʋ nɔɔyʋ nɛ pakpa-ɩ se ɛsɩɣlɩ Yesu kaamaŋkaɣ, payaɣ-ɩ se Siimɔɔ. 33Pɩkɛdaa lɛ, patalɩ ɖenɖe payaɣ se Goligota yɔ, pʋ-tɔbʋʋ se ñʋmbɔɔyaɣ lone. 34Ɛlɛ́, pɛcɛlɩ-ɩ sʋlʋm se ɛñɔɔ, paasidi pɩ-taa kɔyɛ nɖɩ́ ɖɩwɛ ñaŋ yɔ. Ɛɖɩŋ-pʋ lɛ, ekizi se ɛɛñɔʋ.

35Peeɖe sɔɔjanaa kpa-ɩ pakam-ɩ kaamaŋkaɣ yɔɔ nɛ pɩsɛɣ paɖʋ miika nɛ patayɩ ɖama e-wondu. 36Pɛtɛma lɛ, pacaɣ peeɖe nɛ paɖaŋ ɛ-yɔɔ. 37Paama kpata nakʋyʋ yɔɔ mbʋ́ pʋ-yɔɔ pakam-ɩ yɔ nɛ paka kaamaŋkaɣ yɔɔ ɛ-ñʋʋ taa. Pamawa se: «Ɛnɛ lɛ Yesu weyi ɛkɛ Yuda ñɩma wiyaʋ sɔsɔ yɔ.» 38Pʋwayɩ lɛ, paka ɖɔɖɔ mɩ́láa naalɛ nabɛyɛ ɛ-cɔlɔ: lɛlʋ ɛ-nɩwaŋ yɔɔ nɛ lɛlʋ ɛ-nɩmɩyɛ yɔɔ.

39Nʋmɔɖɔnaa mbá pɛɖɛɣaɣnɩ peeɖe yɔ, pekpiɣyaɣ ñʋŋ nɛ patʋʋ-ɩ 40se: «Weyi ña ŋtɔŋaɣ se ŋyɔkʋʋ Ɛsɔ ɖɩɣa nɛ ŋɖaɣnɩ-kɛ maʋ nɛ kɩyakɩŋ naadozo yɔ, ya ña-maɣmaɣ ña-ñʋʋ! Yee ŋkɛ Ɛsɔ Pɩyalʋ yɔ, tibini kaamaŋkaɣ yɔɔ nɛ ɖɩna!» 41Cɔjɔnaa sɔsaa nɛ paɣtʋ wɩlɩyaa nɛ Yuda ñɩma ŋgbɛyɛ taa sɔsaa pɛpɛŋaɣ Yesu tɛtɛ ḿbʋ́ ɖɔɖɔ nɛ pɔpɔzʋʋ se: 42«Ɛyabɩ lɛlaa ñʋŋ ɛzɩma tɛ, ɛɛpɩzɩɣ se ɛya ɛ-maɣmaɣ ɛ-ñɩŋgʋ! Pɩtɛkɛ ɛnʋ tɔmna se ɛnʋ lɛ Izrɛɛlɩ ñɩma wiyaʋ sɔsɔ naa we? Etibini kaamaŋkaɣ yɔɔ lɛɛlɛɛyɔ nɛ ɖɩwɛnɩ lidaʋ ɛ-yɔɔ! 43Ɛɛta Ɛsɔ liu nɛ ɛkaɖɩ se ɛnʋ lɛ Ɛsɔ Pɩyalʋ. Tɔɔ! Lɛɛlɛɛyɔ, ɖɩcɔna ɖɩna se Ɛsɔ liu wɛɛ se ɛya ɛ-ñʋʋ naa ɛɛyakɩ?» 44Halɩ pɩkpɛndɩnɩ mɩ́láa mbá paakam ɛ-cɔlɔ yɔ nɛ patʋʋ-ɩ ɖɔɖɔ ḿbʋ́.

Yesu sɩba

(Mrk 15.33-41; Luk 23.44-49; Yoh 19.28-30)

45Puwiye ńɖɩ́ wɩsɩ siɣaa lɛ, cɩkpɛndʋʋ yu ɛjaɖɛ tɩŋa kpemm nɛ pʋkɔɔ pɩsɩɩnɩ ɖanaɣ ñɩɣtʋ naadozo. 46Pʋkɔma ɛzɩ ɖanaɣ ñɩɣtʋ naadozo yɔ lɛ, Yesu ma kubuka ɖoŋ se: «Elii, Elii! Lamaa sapaktanɩɩ.» Pʋ-tɔbʋʋ se: «Mɛ-Ɛsɔ, Mɛ-Ɛsɔ! Pɩlabɩ ɛzɩma nɛ ŋlɔ-m?»

47Mbá paawɛ peeɖe yɔ, pa-taa lɛlaa nɩ ḿbʋ́ lɛ, pɔtɔŋ se: «Ɩnɩɩ ɛyaɣʋ Elii!» 48Peeɖe pa-taa lɛlʋ tisewa nɛ ewolo ɛkpaɣ kʋca nɛ ewona elii sʋlʋm kɩñɩŋɩm nabʋyʋ taa nɛ ɛtʋʋ ɖaʋ nɔɔ taa nɛ ɛwɩlɩɣ-ɩ se ɛmʋzɩ. 49Ɛlɛ́, pa-taa lɛlaa tɔ se: «Iyele ɖɩna se Elii kɔŋ nɛ ɛya ɛ-ñʋʋ naa we?»

50Peeɖe Yesu tasɩ mabʋ kubuka ɖoŋ nɛ ɛhɛɛ. 51Alɩwaatʋ ńdʋ́ tɩ-yɔɔ pɩsaʋ sɔsɔʋ ŋgʋ́ paakaɣ Ɛsɔ ɖɩɣa taa yɔ, kɩkpaɣnɩ ñʋʋ taa faɣʋ nɛ kitii kɩkaɖɩnɩ pɩ-tɛɛ hɔɔlɩŋ naalɛ. Tɛtʋ kañamsaa nɛ ɛwasɩ ya 52nɛ pɩlaŋ yɔɔ kuli nɛ Ɛsɔ ñɩma sakɩyɛ mbá paasɩba yɔ, pefe 53nɛ palɩɩnɩ pɩlaŋ taa. Yesu kɔma efe lɛ, powolo Yeruusalɛm#27.53 Yeruusalɛm: ɩcɔnɩ Mat 4.5. nɛ ɛyáa sakɩyɛ na-wɛ.

54Room sɔɔja sɔsɔ nɛ lɛlaa mbá ɛ nɛ wɛ paaɖaŋ Yesu yɔɔ yɔ, pana tɛtʋ ñamsʋʋ nɛ mbʋ́ pɩtɩŋa payɩ pɩlabɩ ḿbʋ́ yɔ lɛ, sɔɔndʋ kpa-wɛ siŋŋ nɛ pɔtɔ se: «Toovenim, ɛnɛ ɛɛkɛ Ɛsɔ Pɩyalʋ!» 55Halaa nabɛyɛ kɛwɛ poliŋ taa nɛ pɔcɔŋnɩ ɖɔɖɔ, pɔɖɔ sakɩyɛ. Ḿbá katɩŋnɩ-ɩ nɛ ɖooo Galilee nɛ pasɩŋnɩ-ɩ. 56Pa-taa lɛlaa yɔ: Magdala tɛtʋ taa Maarɩɩ nɛ Yakubu nɛ Yozɛɛfʋ po-ɖoo Maarɩɩ nɛ Zebedee pɩyalaa ɖoo.

Yozɛɛfʋ pim Yesu

(Mrk 15.42-47; Luk 23.50-56; Yoh 19.38-42)

57Đanaɣ ɖanaa lɛ, Ariimatee ñɩm tʋ weyi payaɣ se Yozɛɛfʋ nɛ ɛkɛ Yesu tɔmkpɛlɩkɩyʋ ɖɔɖɔ yɔ, 58ewolo Room wiyaʋ Pilaatɩ cɔlɔ. Ewoba lɛ, etendi-i se yee etisiɣ yɔ, ɛcɛlɩ-ɩ Yesu nɛ ewona epi. Ɛlɛ́, Pilaatɩ tisi nɛ ɛha nɔɔ se powolo pakpaɣ-ɩ nɛ pɛcɛlɩ-ɩ. 59Peeɖe ɛkpaɣ-ɩ nɛ ɛhɔkɩ-ɩ pɩsaʋ kɩfalʋʋ kʋhʋlʋmʋʋ nakʋyʋ taa 60nɛ ewona epi pɩlaʋ kɩfalʋ ŋgʋ́ eeyeba nɛ pɛcɛsɩ-ɩ ɛwaɣ taa yɔ kɩ-taa nɛ epilisi pɩyɛ sɔsɔɖɛ naɖɩyɛ nɛ ɛɖɩɣ kʋ-nɔɔ nɛ ɛcaŋ ɛɖɛɛ. 61Magdala Maarɩɩ nɛ Maarɩɩ lɛlʋ paacaɣ peeɖe nɛ patʋʋzɩnɩ ɖenɖe pɩlaʋ ŋ́gʋ́ kʋ-nɔɔ wɛna yɔ nɛ pɔcɔŋnɩ-kʋ.

Sɔɔjanaa ɖaŋ Yesu pɩlaʋ yɔɔ

62Kɩyakʋ ŋgʋ́ Yuda ñɩma ñɔɔzʋʋ pa-tɩ se pʋcɔ pɩtalɩ kɩyakʋ kɩhɛzʋʋ yɔ, kɩɖɛwa nɛ tɛʋ fe lɛ, cɔjɔnaa sɔsaa nɛ Farɩsɩ ñɩma powolo pekpeɣli Pilaatɩ tɛ 63nɛ peheyi-i se: «Đajaa! Đɩtɔzʋʋ se alɩwaatʋ ndʋ́ pɔbɔtʋ ɛnɛ ɛɛwɛnɩ ɛ-ɛsɛ yɔ, ɛtɔm se kɩyakɩŋ naadozo wayɩ lɛ, efeŋ. 64Pʋ-yɔɔ lɛ, ɖɩpɔzʋʋ-ŋ se ŋlɩzɩ sɔɔjanaa nɛ powolo paɖaŋ ɛ-pɩlaʋ yɔɔ nɛ pʋkɔɔ pɩsɩɩnɩ kɩyakɩŋ naadozo ɩnʋ. Pɩtɛkɛ ḿbʋ́, ɛ-tɔmkpɛlɩkɩyaa woki patʋlɩ kʋ-nɔɔ nɛ pamɩlɩ-ɩ nɛ pɔkɔɔ pɛcɛtɩ ɛyáa se efema nɛ ɛlɩɩnɩ sɩɖaa taa nɛ pɛ-cɛtɩm ñɔkɔɔ pɩkɩlɩ kajalaɣ ñɩmbʋ.» 65Peeɖe Pilaatɩ cosi-wɛ se: «Sɔɔjanaa yɔ! Ɩkpaɣ-wɛ nɛ powolo paɖaŋ pɩlaʋ yɔɔ ɛzɩ ɩsɔɔlʋʋ yɔ.» 66Peeɖe powobi pañɩ pɩyɛ nɖɩ́ paɖɩɣ pɩlaʋ ŋ́gʋ́ kʋ-nɔɔ yɔ ɖɩ-yɔɔ se nɔɔyʋ etukuni-ɖɩ lɛ, pana. Pɛtɛma lɛ, pasɩɩ sɔɔjanaa se paɖaŋ kpam.

Currently Selected:

Maatiyee 27: KABI

Highlight

Copy