Ebree 13
13
Krɩstʋ ŋgbɛyɛ kɩbanɖɛ tɔm
1Ɩwɛɛ ɖama sɔɔlʋʋ yɔɔ ɛzɩ pʋmʋnaʋ yɔ. 2Ɩtaasɔɔ ɛyáa mʋ́ʋ yɔɔ. Mbʋ́ pʋyɔɔ yɔ, nabɛyɛ mʋwaɣ ɛyáa nɛ pɔkɔɔ pamʋ Ɛsɔ tiyiyaa nabɛyɛ pɛ-tɛ nɛ patatɩlɩ. 3Ɩtɔzɩ salaka tɩnaa yɔɔ ɛzɩ mɩ nɛ wɛ ɩwɛnɩ ka-taa yɔ. Ɩtɔzɩ ɖɔɖɔ mbá panazɩɣ-wɛ yɔ pɔ-yɔɔ ɛzɩ mɩ nɛ wɛ panazɩɣ yɔ.
4Pʋwɛɛ se ɛyáa tɩŋa payɩ ɛɖʋ halɩkpaɣyɛ hɩɖɛ. Abalʋ ɛsʋnɩ ɛ-halʋ ɖeke nɛ halʋ ɖɔɖɔ ḿbʋ́. Mbʋ́ pʋyɔɔ yɔ, Ɛsɔ kɔŋ hʋnaʋ hayitu nɛ acɛyɛ pa-laɖaa.
5Ɩtaawɛnɩ liidiye laɣzaɣ mi-wezuu caɣʋ taa. Mɩ-laŋa ɛhʋlʋmɩnɩ ñɩm mbʋ́ ɩwɛnɩ lɛɛlɛɛyɔ yɔ, mbʋ́ pʋyɔɔ yɔ, Ɛsɔ maɣmaɣ yɔɔdaa se: «Maakaɣ-ŋ lɔʋ, maahaɣ-ŋ siɣ́ye kaʋ.» 6Pʋ-yɔɔ ɖɩpɩzɩɣ ɖɩyɔɔdɩnɩ lidaʋ se:
«Kɩpaɣlʋ lɛ weyi ɛsɩŋnɩ-m yɔ.
Sɔɔndʋ ɛɛkpaɣ-m kaʋ.
Ɛyʋ ɛɛpɩzɩɣ ɛlabɩ-m pʋyʋ!»
7Ɩtɔzɩ mɩ-ñʋndɩnaa mbá paasusi-mɩ Ɛsɔtɔm yɔ pɔ-yɔɔ. Ɩcɔnɩ ɛzɩma mbʋ́ pacaɣ wezuu nɛ pʋkɔɔ pɩsɩɩnɩ pa-sɩm wiye yɔ nɛ ɩwɛnɩ lidaʋ Ɛsɔ yɔɔ ɛzɩ ḿbá yɔ. 8Yesu Krɩstʋ wɛʋ yɔ, ɛɛlɛɣzɩɣ kaʋ. Ɛzɩma mbʋ́ ɛɛwɛ ɖooo lɔŋ yɔ, ḿbʋ́ ɛwɛɛ, ḿbʋ́ ɖɔɖɔ ɛwɛɣ tam. 9Ɛyáa lɩzɩ tɔm ndɩ ndɩ nɛ pawɩlɩɣ. Pʋ-yɔɔ lɛ, itaayele nɛ pepeɣzi-mɩ nɛ tʋ. Mbʋ́ pʋyɔɔ yɔ, pʋwɛ ɖeu se pɩtɩŋnɩ Ɛsɔ lootiye yɔɔ nɛ ɛyʋ kpa ɖoŋ. Ɛlɛ́, pɩtaatɩŋnɩ tɔɔnaɣ paɣtʋ yɔɔ. Mbá pɔɖɔm paɣtʋ ńdʋ́ tɩ-yɔɔ yɔ, pɩtawazɩ-wɛ pʋyʋ.
10Đɩwɛnɩ kɩlaʋ lone naɖɩyɛ. Pɩtaha nʋmɔʋ Yuda ñɩma cɔjɔnaa mbá palakɩ tʋmɩyɛ Ɛsɔ ɖɩɣa taa yɔ se pɔtɔɔ mbʋ́ pala ɖɩ-taa yɔ. 11Mbʋ́ pʋyɔɔ yɔ, kpɩna wena cɔjɔ sɔsɔ kpɛdɩ a-calɩm kɩwɛɛkɩm yɔɔ lone kaɖɛ ñɩnɖɛ taa yɔ, paɖʋʋ-yɛ miŋ nɛ tɛtʋ wayɩ. 12Pʋ-yɔɔ Yesu ñasɩbɩ tɛtʋ koloŋa wayɩ se ɛñalɩ ɛyáa kɩwɛɛkɩm nɛ ɛ-maɣmaɣ ɛ-calɩm nɛ pɛwɛɛ cɩɖɩcɩɖɩ. 13Pʋ-yɔɔ lɛ, ɖɩlɩɩ ɖiwolo ɛ-cɔlɔ tɛtʋ koloŋa wayɩ peeɖe nɛ ɖa nɛ ɩ ɖɩkpɛndɩ ɖɩtɔɔ ɛ-fɛyɛ. 14Mbʋ́ pʋyɔɔ yɔ, ɖɩfɛyɩnɩ tataa cɩnɛ tɛtʋ ndʋ́ tɩwɛɣ tam yɔ. Ɛlɛ́, ɖɩñɩnɩɣ ndʋ́ tɩkaɣ kɔm yɔ. 15Đɩtɩŋnɩ Yesu yɔɔ nɛ ɖɩsa Ɛsɔ tam. Samtʋ ndʋ́ tɩlɩɣnɩ ɖɔ-nɔɔ taa alɩwaatʋ ndʋ́ ɖɩyɔɔdʋʋ se ɛnʋ lɛ Kɩpaɣlʋ yɔ, tɩwɛ ɛzɩ kɩlaʋ yɔ. Pʋ-tɔbʋʋ se ɖɩsam-ɩ paa ɖooye. 16Ɛlɛ́, ɩtaasɔɔ camɩyɛ lakasɩ nɛ ɖama sɩnaʋ pɔ-yɔɔ. Mbʋ́ pʋyɔɔ yɔ, lakasɩ ńzɩ́ sɩwɛnɩ ɛzɩ kɩlaŋ weyi ɩkɛdɩnɩ Ɛsɔ yɔ.
17Ɩña mɩ-ñʋndɩnaa nɛ itisi mɩ-tɩ pɛ-tɛɛ. Mbʋ́ pʋyɔɔ yɔ, ḿbá cɔŋnɩnɩ mi-ciyamnaa yɔɔ. Ḿbá kɔŋnɩ Ɛsɔ heyuu ɛzɩma mbʋ́ pɔcɔnɩ mɩ-yɔɔ yɔ. Yee ɩñaŋ-wɛ yɔ, palakɩ pa-tʋmɩyɛ nɛ laŋhʋlʋmɩyɛ. Ɛlɛ́, yee ɩtañam-wɛ yɔ, palakɩ-ɖɩ nɛ hɔpɩsɩyɛ nɛ pɩɩwazɩɣ-mɩ pʋyʋ.
18Ɩsɛɣ Ɛsɔ ɖɔ-yɔɔ tam. Mbʋ́ pʋyɔɔ yɔ, ɖɩnawa se ɖa-taa wɛ ɖeu. Đe-liu wɛɛ se ɖɩɖɔ ɖɔnɛ kɩbanɖɛ pɩtɩŋa pɩ-taa. 19Mentendiɣ-mɩ se ɩsɛɛ-ɩ nɛ ɛha-m nʋmɔʋ nɛ manpɩsɩ mɩ-cɔlɔ lɔŋ.
Ɛsɔ sɛʋ
20Ɛsɔ lɛ laŋhɛzɩyɛ tʋ. Mentendiɣ-i se ɛtɩŋnɩ calɩm mbʋ́ ɖa-Kɩpaɣlʋ Yesu kpɛdaa nɛ piyele nɔɔ haʋ wɛɛ tam yɔ pʋ-yɔɔ nɛ efezi-i nɛ sɩɖaa taa. Yesu ɛnʋ lɛ heŋ ɖiyiyu sɔsɔ. 21Ɛsɔ ɛnʋ, eyele nɛ ɩpɩzɩ ɩla mbʋ́ pɩtɩŋa payɩ pʋwɛ ɖeu yɔ nɛ piyele ɩla mbʋ́ e-liu wɛɛ yɔ. Mentendiɣ-i ɖɔɖɔ se ɛtɩŋnɩ Yesu Krɩstʋ yɔɔ nɛ ɛñɔɔzɩ ɖa-laŋa taa ɛzɩ pɩkɛdɩnaʋ-ɩ yɔ. Yesu Krɩstʋ ɛwɛɛ koboyaɣ taa tam! Pɩla ḿbʋ́!
Kɛtɛzaɣ tɔm nɛ sɛtʋ
22Taabalaa, meheyiɣ-mɩ se ɩɖɔkɩ mɩ-hɔ nɛ itisi sazʋʋ tɔm tʋnɛ. Mbʋ́ pʋyɔɔ yɔ, tɔm tobi yem mama-mɩ. 23Ɩtɩlɩ se palɩzɩ ɖa-taabalʋ Timootee nɛ salaka taa. Yee ɛtalɩ lɔŋ yɔ, ma nɛ ɩ ɖɩkɔŋna nɛ ɖɩna-mɩ.
24Ɩsɛɛ mɩ-ñʋndɩnaa nɛ Ɛsɔ ñɩma patɩŋa payɩ. Itaalii taabalaa sɛ-mɩ.
25Ɛsɔ ɛla mɩtɩŋa payɩ lootiye!
Currently Selected:
Ebree 13: KABI
Highlight
Share
Copy
Want to have your highlights saved across all your devices? Sign up or sign in