Ebree 12
12
Pʋwɛɛ se ɖɩɖɔkɩ ɖa-tɩ kaɖɛ alɩwaatʋ taa
1Đa lɛ, ḿbʋ́ aseɣɖe tɩnaa samaɣ sɔsɔɔ ŋgá kɛwɛnɩ lidaʋ yɔ, kɔcɔ-ɖʋ kata. Pʋ-yɔɔ lɛ, ɖɩlɔ ɖa-sʋʋtʋ nɛ ɖa-kɩwɛɛkɩm patɩŋa payɩ nɛ ɖɩpɩzɩ ɖise seya wena paɖʋ-ɖʋ yɔ siŋŋ. Mbʋ́ pʋyɔɔ yɔ, ḿbá yekina se ɖɩtaala mbʋ́ pʋpɔzʋʋ-ɖʋ yɔ. 2Đɩkɛzɩ ɛsɛ nɛ Yesu yɔɔ: ɛnʋ sɩnɩ ɖe-lidaʋ kiɖe, ɛnʋ kɔŋnɩ-kʋ tɛzʋʋ. Etisaa nɛ pakam-ɩ kaamaŋkaɣ yɔɔ nɛ ɛsɩ. Ɛlɛ́, fɛyɛ takpa-ɩ nɛ kaamaŋkaɣ yɔɔ sɩm ḿbʋ́, mbʋ́ pʋyɔɔ yɔ, ɛnawa se ɛkɔŋ wɛʋ laŋhʋlʋmɩyɛ taa. Lɛɛlɛɛyɔ, ɛcaɣ Ɛsɔ kewiyaɣ kpelaɣ cɔlɔ lone kɩbanɖɛ taa.
3Ɩmaɣzɩ weyi etisaa nɛ ɛnɩɩ siziŋ pɩtɩɩfɛyɩ kɩwɛɛkɩm laɖaa nesi taa yɔ ɛ-yɔɔ. Pʋbʋ, piitisiɣ mi-toma taa nɛ ɩlɔ liu. 4Mbʋ́ pʋyɔɔ yɔ, ɩwɛɛ iyouni kɩwɛɛkɩm. Ɛlɛ́, mɩ-taa nɔɔyʋ calɩm tɛkpɛdɩdɩ you ŋ́gʋ́ kɩ-taa. 5Ɩtaasɔɔ tɔm ndʋ́ Ɛsɔ heyi-mɩ ɛzɩ e-piya se pɩlabɩ-mɩ hʋnʋm yɔ tɩ-yɔɔ. Ńdʋ́ lɛ se:
«Man-pɩɣa, Kɩpaɣlʋ ɛhɔŋ ña-nɩŋgbaŋʋʋ yɔ,
pɩtaakɛnɩ-ŋ aleɣya.
Pɩtaatisi ño-toma taa
alɩwaatʋ ndʋ́ ɛkalɩɣ-ŋ yɔ.
6Weyi Kɩpaɣlʋ sɔɔlɩ-ɩ yɔ, ɛ-nɩŋgbaŋʋʋ ɛhɔŋ,
weyi ɛsɩm-ɩ se ɛkɛ ɛ-pɩɣa yɔ, ɛnʋ ɛmakɩ.»
7Itisi nɛ Ɛsɔ hɔ mɩ-nɩŋgbaaŋ: pɩwɩlɩɣ se ɛlakɩ-mɩ ɛzɩ e-piya yɔ. Pɩɣa nakɛyɛ wɛɛ se ka-caa ɛɛhɔŋ ka-nɩŋgbaŋʋʋ naa we? 8Yee ɛɛhɔŋ mɩ-nɩŋgbaaŋ ɛzɩ piya lɛɛsɩ yɔ yɔ, pʋbʋ, ɩtɛkɛ ɛ-maɣmaɣ e-piya. Ɛlɛ́, habɩŋ taa piya ɩkɛnaa. 9Đɩtɔzɩ kedeŋa yɔɔ cɩnɛ ɖa-caanaa yɔɔ: pɔhɔŋaɣ ɖa-nɩŋgbaaŋ nɛ ɖɩñaŋ-wɛ. Yee ḿbʋ́ lɛ, ɛzɩma ɖɩɩpɩzɩɣ ɖitisi ɖa-tɩ ɖa-Caa weyi ɛwɛ ɛsɔdaa yɔ ɛ-tɛɛ nɛ ɖɩwɛɛ wezuu yɔ? 10Toovenim lɛ, ɖa-caanaa hɔŋaɣ ɖa-nɩŋgbaaŋ alɩwaatʋ pazɩ ɛzɩ pamaɣzʋʋ se pʋmʋnaa yɔ. Ɛlɛ́, Ɛsɔ ñɔhɔŋ-ɩ ɖɛ-kɛzɛɣa maɣmaɣ yɔɔ se ɖɩtɛzɩ wɛʋ ɛzɩ ɛnʋ yɔ. 11Kajalaɣ taa lɛ, nɩŋgbaŋʋʋ hɔm wɛ ɛzɩ ɛsɛñɩŋɩyɛ pʋyʋ yɔ, pɩfɛyɩ ɛzɩ laŋhʋlʋmɩyɛ pʋyʋ yɔ. Ɛlɛ́, mbá pɩsɩɣzɩ-wɛ lɔŋ yɔ, pʋkɔŋ-wɛ sɛʋ: pacakɩ wezuu ŋgʋ́ kʋtʋʋzaa yɔ laŋhɛzɩyɛ taa.
12Pʋ-yɔɔ lɛ, mbá mɩ pitibi mi-toma taa yɔ, ɩñaɣ pana. 13Ɩɖɔ nʋmɔŋ weyi ɩtʋʋzaa yɔ ɩ-taa nɛ ɛjandʋ ndʋ́ ɩwɛna yɔ tɩtaatɛzɩ ɖɔʋ, ɛlɛ́, tɩtɛ.
Lɛɣtʋ tasʋʋ nɛ paɣ́ʋ
14Ɩñaɣ pana nɛ mɩ nɛ paa weyi mɩ-laŋa hɛnɩ ɖama nɛ ɩcaɣ wezuu ɛzɩ Ɛsɔ liu wɛʋ yɔ. Pɩtɛkɛ ḿbʋ́, ɛyʋ ɛɛpɩzɩɣ ɛna Kɩpaɣlʋ. 15Ɩcɔnɩ ɖama yɔɔ camɩyɛ nɛ mɩ-taa nɔɔyʋ ɛtaakɔɔ ɛha lootiye nɖɩ́ Ɛsɔ labɩ-mɩ yɔ siɣ́ye. Mɩ-taa nɔɔyʋ ɛtaawɛɛ ɛzɩ tɩʋ ñaŋ ñɩŋgʋ ŋgʋ́ kɩwɛɛ nɛ kʋ-sɔtʋ ɖɛɣ ɛyáa sakɩyɛ nɛ tɩwɛɛkɩɣ-wɛ yɔ. 16Mɩ-taa nɔɔyʋ ɛtaala acɛyɛ yaa ɛtaakpaɣ Ɛsɔ ñɩm se pɩtɛkɛ pʋyʋ ɛzɩ Ezaayuu yɔ. Tam kʋɖʋm tɔɔnaɣ maɣmaɣ yɔɔ ɛɛpɛdɩ ɛ-sɔsɔtʋ. 17Ɩtɛm naʋ se pʋwayɩ lɛ, ɛɛñɩnaa ɖɔɖɔ se ɛ-caa ɛwazɩ ɛ-yɔɔ nɛ ɛ́lɛ́ ɖɔɔnɩ-ɩ. Ŋgʋ́, ɛñɩnaɣnɩ ɛsɩtɛɣlɩm kpem se ɛlɛɣzɩ mbʋ́ ɛlaba yɔ. Ɛlɛ́, pɩtaha-ɩ waɖɛ.
18Ɩtɔñɔtɩnɩ Ɛsɔ ɛzɩ Izrɛɛlɩ ñɩma yɔ. Paba kɔñɔtɩnɩ kedeŋa yɔɔ cɩnɛ pʋʋ nakʋyʋ: ŋ́gʋ́ lɛ Sinayii Pʋʋ. Alɩwaatʋ ńdʋ́ lɛ, miŋ sɔsɔŋ nɩɩyɩ mʋwaɣ kʋ-yɔɔ nɛ cɩkpɛndʋʋ yu kpemm nɛ heɣlim sɔsɔm nabʋyʋ makɩ. 19Panɩɣaɣ ɛgandɩyɛ naɖɩyɛ nɛ nɔɔ nakɛyɛ pa-taŋ. Mbá paanɩ nɔɔ ŋ́gá yɔ, pɔtɔm se pataatasɩ-wɛ natʋyʋ heyuu nɛ pɩtasɩnɩ ndʋ́ panɩwa yɔ, 20mbʋ́ pʋyɔɔ yɔ, tɩkɩlɩ-wɛ. Ńdʋ́ lɛ se: «Paa kpɩnɛ maɣmaɣ etukunini pʋʋ yɔ, ɩkʋ-ɖɩ nɛ pɛɛ.» 21Mbʋ́ pɩlabɩ peeɖe yɔ, pɩɩwɛ sɔɔndʋ siŋŋ. Pʋ-yɔɔ Mooyiizi tɔm se: «Sɔɔndʋ kɩlɩ-m kpem nɛ menseliɣ.»
22Ɛlɛ́, mɩ mɩñɔtɩnɩ Siiyɔɔ Pʋʋ nɛ Ɛsɔ wezuu tʋ tɛtʋ: ńdʋ́ lɛ ɛsɔdaa Yeruusalɛm, Ɛsɔ tiyiyaa ɛgbaŋ ɛgbaŋ wɛ tɩ-taa. 23Iwobi Ɛsɔ kajalaɣ piya nzɩ́ pama sɩ-hɩla ɛsɔdaa nɛ sikpeɣli ɖama nɛ sɩtɔkɩ kazanɖʋ yɔ sɩ-ŋgbɛyɛ taa. Iwobi Ɛsɔ cɔlɔ ɖɔɖɔ, ɛnʋ hʋʋnɩnɩ ɛyáa tɩŋa payɩ: toovenim tɩnaa mbá pasɩba nɛ ɛtɛzɩ-wɛ pɩsʋʋ mbá pamʋnaa yɔ. 24Iwobi Yesu nɛ ɛ-calɩm mbʋ́ pɩkpɛdaa nɛ pɩkɩlɩ wazaɣ Aabɛɛlɩ ñɩmbʋ yɔ pɔ-cɔlɔ. Ɛnʋ lɛ ceyiyu nɔɔ haʋ kɩfam mbʋ́ pʋwɛ Ɛsɔ nɛ ɛyáa pɛ-hɛkʋ taa yɔ pɩ-taa.
25Yee ḿbʋ́, ɩɖɔkɩ mɩ-tɩ! Ɩtaakizi se iiwelesiɣni Ɛsɔ weyi ɛyɔɔdʋʋnɩ-mɩ yɔ. Mbʋ́ pʋyɔɔ yɔ, Izrɛɛlɩ ñɩma kizaa se paawelesiɣni weyi eheyaɣ-wɛ kedeŋa yɔɔ cɩnɛ mbʋ́ ɛwɩlɩ-ɩ yɔ nɛ patatʋlɩ nɩŋgbaŋʋʋ hɔm taa. Pʋ-yɔɔ lɛ, yee ɖa ɖahaɣ siɣ́ye weyi ɛyɔɔdʋʋnɩ-ɖʋ nɛ ɛsɔdaa yɔ yɔ, ɖɩɩpɩzɩɣ ɖɩlɩɩ pɩ-taa ɖɔɖɔ. 26Ɛɛyɔɔdɩnɩ-wɛ nɛ tɛtʋ ñamsɩ, ɛlɛ́, lɛɛlɛɛyɔ eheyi-ɖʋ se: «Mɔnkɔŋ tasʋʋ tɛtʋ ñamsʋʋ. Ɛlɛ́, pɩɩsɩɣnɩ ti-ɖeke, mañamsɩɣ ɖɔɖɔ ɛsɔdaa.» 27Tɔm pee anɛ, atasɩɣ wɩlʋʋ se mbʋ́ ɛlaba yɔ, pɩñamsɩɣ-pʋ nɛ pʋmʋʋ nɛ piyele mbʋ́ pɩfɛyɩ ñamsʋʋ yɔ pʋwɛɛ.
28Pʋ-yɔɔ lɛ, ɖɩwɛnɩ Ɛsɔ yɔɔ ɛsɩmɩyɛ, mbʋ́ pʋyɔɔ yɔ, ɛha-ɖʋ kewiyaɣ ŋgá kɛfɛyɩ ñamsʋʋ yɔ: ɖiluŋ ɛ-tɛɛ ɛzɩ pɩkɛdɩnaʋ-ɩ yɔ nɛ ñamtʋ nɛ sɔɔndʋ. 29Mbʋ́ pʋyɔɔ yɔ, ɖɛ-Ɛsɔ kɛ ɖɔɖɔ miŋ weyi ɛñakɩ pɩtɩŋa payɩ yɔ.
Currently Selected:
Ebree 12: KABI
Highlight
Share
Copy
Want to have your highlights saved across all your devices? Sign up or sign in