Efɛɛzɩ 6
6
Piya nɛ sɩ-ñɩma pɔ-tɔm
1Mɩ piya lɛ, ɩña mɩ-ñɩma ɛzɩ Kɩpaɣlʋ liu wɛʋ yɔ. Mbʋ́ pʋyɔɔ yɔ, pʋmʋnɩ ḿbʋ́. 2Ḿbʋ́ pamawa se: «Đʋ ña-caa nɛ ño-ɖoo hɩɖɛ.» Ńdʋ́ lɛ kajalaɣ paɣtʋ ndʋ́ Ɛsɔ tɔm se yee ŋɖɔm tɩ-yɔɔ yɔ, ɛlakɩ-ŋ pʋyʋ yɔ: 3«Ŋhikiɣ ña-tɩ nɛ ŋcaɣ wezuu kedeŋa yɔɔ cɩnɛ nɛ pileɖi.»
4Mɩ caanaa lɛ, ɩtaala nɛ mi-piya pana kpa. Ɛlɛ́, ɩɖɔkɩ-sɩ nɛ ɩsɩɣzɩ-sɩ lɔŋ nɛ ɩka sɩ-ñʋŋ taa ɛzɩ Kɩpaɣlʋ liu wɛʋ yɔ.
Yomaa nɛ pa-caanaa pɔ-tɔm
5Mɩ yomaa lɛ, ɩña kedeŋa yɔɔ cɩnɛ mɩ-caanaa camɩyɛ nɛ ɩsɔɔndɩ-wɛ toovenim taa, ñamtʋ ndʋ́ ɩñaŋ Krɩstʋ yɔ tɩ-yɔɔ. 6Ɩtaañam-wɛ alɩwaatʋ ndʋ́ pɛwɛ mɩ-cɔlɔ nɛ pɔcɔŋnɩ-mɩ yɔ ti-ɖeke se pasam-mɩ. Ɛlɛ́, ɩla ḿbʋ́ se ɩkɛ Krɩstʋ tʋmlaɖaa mbá palakɩ mbʋ́ Ɛsɔ liu wɛɛ yɔ nɛ pa-laŋɩyɛ tɩŋa pilim yɔ. 7Ɩlabɩ-wɛ tʋma nɛ laŋhʋlʋmɩyɛ ɛzɩ Kɩpaɣlʋ maɣmaɣ ɩlakɩ yɔ. Pɩtaakɛ se ɛyáa ɩlakɩ-yɛ. 8Ɩtɛm naʋ se paa pɩɩkɛ yom yaa weyi ɛwɛ ɛ-tɩ yɔɔ yɔ, ɖeu mbʋ́ ɛlaba yɔ, pʋ-yɔɔ Kɩpaɣlʋ hɛyɩɣ-ɩ.
9Piyele mɩ caanaa lɛ, ɩla mi-yomaa ɖɔɖɔ ḿbʋ́. Ɩɖɔkɩ mɩ-tɩ nɛ ɩtaañazɩ-wɛ. Mbʋ́ pʋyɔɔ yɔ, ɩtɛm sɩm se mɩ nɛ wɛ mɩ-Caa wɛ ɛsɔdaa. Ɛɛcɔŋnɩ nɔɔyʋ ɛsɩndaa nɛ pʋcɔ ɛlabɩ-ɩ pʋyʋ.
Ɖɩkpaɣ Ɛsɔ You wondu
10Tɔm ndʋ́ mɛntɛzɩɣna yɔ lɛ se: ɩkpa ɖoŋ mɩ nɛ Kɩpaɣlʋ mɩ-kpɛndʋʋ taa e-ɖoŋ sɔsɔŋ yɔɔ. 11Ɩkpaɣ you wondu ndʋ́ Ɛsɔ ha-mɩ yɔ tɩtɩŋa payɩ nɛ ɩpɩzɩ ɩkaɖɩnɩ eleeu alɩwaatʋ ndʋ́ ɛñɩkɩ-mɩ ɛ-kpacanaa yɔ. 12Pɩtɛkɛ ɛyáa pʋwɛɛ se ɖiyoona. Ɛlɛ́, ɛsɔdaa ɖoŋ tɩŋa payɩ nɛ kedeŋa yɔɔ cɩnɛ cɩkpɛndʋʋ tɛɛ awiya nɛ feziŋ kɩdɛkɛdɩŋ pʋwɛɛ se ɖiyoona. 13Pʋ-yɔɔ pʋwɛɛ se ɩkpaɣ Ɛsɔ you wondu tɩŋa payɩ nɛ ɩpɩzɩ ɩkaɖɩnɩ-wɛ kɩyakɩŋ kɩdɛkɛdɩŋ taa. Ḿbʋ́ yekina nɛ ɩwɛɛ mi-ɖeɖe ḿbʋ́ alɩwaatʋ ndʋ́ ɩtɛŋ patɩŋa payɩ yonaʋ yɔ.
14Pʋ-yɔɔ lɛ, ɩwɛɛ mi-ɖeɖe ḿbʋ́: ɩkpaɣ toovenim ɛzɩ tambaɖɛ nɖɩ́ sɔɔja tɔɔlʋʋ yɔ nɛ tʋʋzʋʋ ɛzɩ ñɩ́ɣ́yʋ́ʋ ŋgʋ́ ehuuzuu e-lotu yɔɔ yɔ. 15Ɩkpaɣ mi-kpekpeka ŋgá ɩwɛnɩ Laŋhɛzɩyɛ Tɔm ɖisusiye yɔ ɛzɩ naataŋgbala wena ɩlɛɣ yɔ. 16Pʋnɛ pɩtɩŋa pʋ-wayɩ lɛ, ɩkpaɣ mi-lidaʋ alɩwaatʋ kpeekpe ɛzɩ kpayʋʋ ŋgʋ́ ɩmʋʋnɩ ñɩma wena Satanɩ tɔʋ nɛ a-nɔsɩ taa nɛ miŋ sɔsɔŋ yɔ. 17Ɩkpaɣ ɖɔɖɔ mɩ-ñʋʋ yabʋ ɛzɩ you hulaɣ yɔ nɛ Ɛsɔtɔm ɛzɩ you sɩɣa ŋgá e-Fezuu Kiɖeɖeu cɛlɩ-mɩ yɔ. 18Đɔɖɔ lɛ, ɩtɩŋnɩ Fezuu Kiɖeɖeu yɔɔ nɛ ɩsɛɛ-ɩ nɛ itendi-i alɩwaatʋ tɩŋa pɩtɩŋa pɩ-taa. Ɩtaaɖoo pʋ-yɔɔ, ɩñaɣ pana nɛ itendi-i ɛ-ñɩma tɩŋa yɔɔ. 19Itendi-i ɖɔɖɔ mɔ-yɔɔ se eyele nɛ monkuli mɔ-nɔɔ lɛ, mantɩlɩ ndʋ́ maawɩlɩnɩ kaalɛyɩtʋ mbʋ́ pʋwɛ mɛsaɣ tɛɛ Laŋhɛzɩyɛ Tɔm taa yɔ. 20Ńdʋ́ Ɛsɔ tiyi-m se monsusi, tɩ-yɔɔ mɛwɛ salaka taa yɔ. Itendi-i nɛ manpɩzɩ monsusi-tʋ kaalɛyɩtʋ ɛzɩ pʋpɔzʋʋ yɔ.
Sɛtʋ
21Pʋcɔ mɩ ɖɔɖɔ ɩtɩlɩ mbʋ́ mɛnkɛnaa nɛ mbʋ́ malakɩ yɔ lɛ, taabalʋ kʋsɔɔlʋ Ticiiki weyi ɛkɛ Kɩpaɣlʋ tʋmlaɖʋ nɛ ɛlakɩ mbʋ́ ɛɖʋwa yɔ, ɛkɔŋnɩ-mɩ kɛdʋʋ pɩtɩŋa payɩ. 22Pɩ-maɣmaɣ pʋ-yɔɔ kpem mentiyi-i mɩ-cɔlɔ se ɛkɛdɩ-mɩ mbʋ́ pɩ-taa ɖɩwɛɛ yɔ nɛ ɛhɛzɩ mɩ-laŋa.
23Caa Ɛsɔ nɛ Kɩpaɣlʋ Yesu Krɩstʋ pɛhɛzɩ taabalaa tɩŋa laŋa nɛ peyele pɔsɔɔlɩ ɖama nɛ pɛwɛnɩ lidaʋ. 24Ɛsɔ ɛla mbá patɩŋa payɩ pɔsɔɔlɩ ɖa-Kɩpaɣlʋ Yesu Krɩstʋ kámaɣ́ fɛyɩ yɔ lootiye!
Currently Selected:
Efɛɛzɩ 6: KABI
Highlight
Share
Copy
Want to have your highlights saved across all your devices? Sign up or sign in