Tʋma Labʋ 3
3
Pɩyɛ nɛ Yohanɛɛsɩ palaba nɛ kalɩkalaɣ nakɛyɛ yɔɔ cɛ
1Nakʋyʋ wiye Pɩyɛ nɛ Yohanɛɛsɩ powokaɣ Ɛsɔ ɖɩɣa taa Ɛsɔ sɛʋ ɖanaɣ ñɩɣtʋ naadozo yɔɔ ɛzɩ patɩɩsɛɣʋ yɔ. 2Nabɛyɛ wokaɣnɩ abalʋ nɔɔyʋ paa ɖooye nɛ pacaɣzɩɣ Ɛsɔ ɖɩɣa nɔnɔɔ ŋgá payaɣ se Nɔnɔɔ Đeu Ñɩŋga yɔ ka-taa se ɛsʋlʋmɩ mbá pasʋʋ yɔ liidiye. Ɛkɛ kalɩkalaɣ, paalʋlɩ-ɩ ḿbʋ́. 3Kalɩkalaɣ ŋ́gá kana Pɩyɛ nɛ Yohanɛɛsɩ pasʋwaɣ Ɛsɔ ɖɩɣa taa lɛ, kasʋlʋmɩ-wɛ se paha-kɛ pʋyʋ. 4Peeɖe Paba cɔnɩ-kɛ pɩŋŋ nɛ Pɩyɛ heyi-kɛ se: «Cɔnɩ-ɖʋ.» 5Kaka ñɔcɔnɩ-wɛ pɩŋŋ nɛ kaɖaŋ se paaha-kɛ pʋyʋ. 6Ɛlɛ́, Pɩyɛ heyi-kɛ se: «Mɛnfɛyɩnɩ liidiye yaa sika, ɛlɛ́, mahaɣ-ŋ mbʋ́ mɛwɛna yɔ: Nazarɛɛtɩ tʋ Yesu Krɩstʋ ɖoŋ taa lɛ, kʋyɩ ŋɖɔ!»
7Ɛyɔɔdɩ ḿbʋ́ lɛ, esezi ɛ́ɖɔ́kɩ-kɛ nɛ ɛ-nɩwaŋ nɛ ɛkʋsɩ-kɛ. Kpaagbaa ḿbʋ́ lɛ, ka-naataŋ nɛ ka-naajʋwa pa-taa kpa ɖoŋ. 8Peeɖe kama ka-naŋgbanzɩ yɔɔ cim nɛ kapazɩ ɖɔm nɛ ka nɛ wɛ pɛkpɛndɩ pasʋʋ Ɛsɔ ɖɩɣa taa. Kɔɖɔŋaɣ nɛ kamaɣ nɛ kasaŋ Ɛsɔ. 9Samaɣ tɩŋa na ɛzɩma mbʋ́ kɔɖɔŋaɣ nɛ kasaŋ Ɛsɔ yɔ. 10Pɩkɛdaa lɛ, peɖiɣzini se abalʋ ɛnʋ ɛcakaɣnɩ Ɛsɔ ɖɩɣa Nɔnɔɔ Đeu Ñɩŋga taa nɛ ɛsʋlʋmʋʋ. Peeɖe pɩlabɩ patɩŋa piti nɛ pɩpazɩ pɩɖɩɣzɩ-wɛ se ɛkʋyaa nɛ ɛɖɔŋ.
Pɩyɛ yɔɔdʋʋnɩ samaɣ Ɛsɔ ɖɩɣa taa
11Abalʋ ɛnʋ, ɛwɛ Pɩyɛ nɛ Yohanɛɛsɩ pɔ-cɔlɔ ḿbʋ́ lɛ, samaɣ tɩŋa kpɛzɩ kowolo pɔ-cɔlɔ hɔɔlʋʋ ŋgʋ́ payaɣ se Salomɔɔ Hɔɔlʋʋ yɔ kɩ-taa, pɩɩɖɩɣzɩ-kɛ siŋŋ. 12Pɩyɛ na ḿbʋ́ lɛ, ɛpɔzɩ-kɛ se: «Izrɛɛlɩ ñɩma mɩ! Pɩlabɩ ɛzɩma pɩɖɩɣzɩɣ-mɩ nɛ abalʋ ɛnɛ ɛ-yɔɔ cɛbʋ tɔm ḿbʋ́? Ɛbɛ yɔɔ ɩcɔnɩ-ɖʋ ɛzɩ ɖa-maɣmaɣ ɖo-ɖoŋ ɖɩlabɩnaa, yaa ɖɩlakɩ mbʋ́ Ɛsɔ liu wɛɛ yɔ yɔɔ ɖɩlaba nɛ abalʋ ɛnɛ ɛkʋyɩ ɛɖɔŋ? 13Đɔ-cɔzɔnaa Abraham nɛ Izaakɩ nɛ Yakɔɔbʋ pɛ-Ɛsɔ ɖʋnɩ ɛ-tʋmlaɖʋ Yesu hɩɖɛ. Mɩ lɛ, ɩkpa-ɩ mɩ-maɣmaɣ nɛ ɩɖʋzɩ ñʋndɩnaa nesi taa. Wiyaʋ Pilaatɩ tɔm se eyeki-i, ɛlɛ́, ikizi. 14Ikizi Ɛsɔ Ɛyʋ Kʋtʋʋzʋ ɛnʋ nɛ ɩpɔzɩ Pilaatɩ se ɛlɩzɩ-mɩ ɛyáa kʋyʋ. 15Ḿbʋ́ ɩlaba nɛ iyele pakʋ Ɛyʋ Kʋtʋʋzʋ ɛnʋ, ŋgʋ́ ɛnʋ haɣnɩ wezuu. Ɛlɛ́, Ɛsɔ fezi-i nɛ ɖɩna-ɩ nɛ ɖɛ-ɛsɛ. 16Yesu ɛnʋ, e-ɖoŋ nɛ ɛ-yɔɔ lidaʋ wɛnaʋ peyebina nɛ abalʋ weyi ɩsɩm-ɩ nɛ ɩnaɣ-ɩ yɔ, ɛkpa ɖoŋ. Lidaʋ ŋgʋ́ ɛwɛnɩ Yesu yɔɔ yɔ kiyebina nɛ ɛ-yɔɔ cɛ camɩyɛ ɛzɩ mɩtɩŋa ɩnaɣʋ-ɩ ɛzʋnɔ yɔ.
17Taabalaa mɩ! Manawa se mɩ nɛ mɩ-awiya ɩtaasɩ mbʋ́ ɩlakaɣ yɔ yɔɔ ɩlabɩ Yesu ḿbʋ́. 18Tɔm ndʋ́ Ɛsɔ keheyi náyaa tɩŋa ɖooo lɔŋ yɔ, ńdʋ́ labɩnɩ ɛzʋnɔ yɔ. Ńdʋ́ lɛ se pʋwɛɛ se Weyi Ɛsɔ Lɩzaa Yɔ ɛtɔɔ kʋñɔŋ. 19Pʋ-yɔɔ lɛ, ɩlɛɣzɩ wɛtʋ nɛ ɩpɩsɩnɩ Ɛsɔ yɔɔ nɛ ekpeɣ-mɩ mɩ-kɩwɛɛkɩm. 20Peeɖe Kɩpaɣlʋ yeki nɛ ɩhɛzɩ alɩwaatʋ natʋyʋ nɛ etiyini-mɩ weyi ɛɛlɩzɩ ɖooo lɔŋ nɛ ɛsɩɩ-mɩ yɔ. Ɛnʋ lɛ Krɩstʋ Yesu. 21Pɩkpaɣʋnɩ lɛɛlɛɛyɔ yɔ, pʋwɛɛ se ɛcaɣ ɛsɔdaa nɛ pʋkɔɔ pɩsɩɩnɩ alɩwaatʋ ndʋ́ Ɛsɔ ɖaɣnɩ labʋ mbʋ́ pɩtɩŋa payɩ eeheyi ɛ-náyaa ɖooo lɔŋ nɛ pɔyɔɔdɩ yɔ. 22Pʋwɛ ɛzɩ Mooyiizi yɔɔdʋʋ yɔ. Ɛyɔɔdaa se: ‹Mɩ-Kɩpaɣlʋ Ɛsɔ kɔŋ-mɩ tiyinaʋ náyʋ nɔɔyʋ ɛzɩ ma yɔ, ɛkɛɣ mɩ-tɛ tʋ. Ɩkɔŋ welesuu ndʋ́ tɩtɩŋa eheyiɣ-mɩ yɔ. 23Ɛlɛ́, yee nɔɔyʋ etewelesini náyʋ ɛnʋ yɔ, palɩzɩɣ-ɩ Ɛsɔ ñɩma taa nɛ pakʋ-ɩ.› 24Náyaa mbá pɔyɔɔdɩ kpaɣ ɖooo náyʋ Samʋyɛɛlɩ alɩwaatʋ yɔ, patɩŋa payɩ pɔyɔɔdɩ kʋɖʋm kʋɖʋm kɩyakɩŋ ɩnʋ ɩ-tɔm ɖɔɖɔ. 25Mbʋ́ Ɛsɔ ɖʋwa se ɛtɩŋɩɣnɩ náyaa yɔɔ nɛ ɛla yɔ, mɩtɩnɩ-pʋ. Mbʋ́ ɛɖʋwa se ɛlakɩ mɩ-cɔzɔnaa alɩwaatʋ ndʋ́ ɛha-wɛ nɔɔ yɔ, mɩtɩnɩ-pʋ ɖɔɖɔ. Mbʋ́ pʋyɔɔ yɔ, eeheyi Abraham se: ‹Matɩŋɩɣnɩ ñe-liɖe taa ñɩma yɔɔ nɛ mawazɩ kedeŋa yɔɔ ɛyáa kpeekpe yɔɔ.› 26Ḿbʋ́ Ɛsɔ calɩ ɛ-tʋmlaɖʋ Yesu tiyuu mɩ-cɔlɔ se ɛkɔɔ ɛlɩzɩ-mɩ mɩ-kɩwɛɛkɩm taa nɛ pɩwɩlɩ se ɛwazɩ mɩtɩŋa payɩ mɩ-yɔɔ.»
Currently Selected:
Tʋma Labʋ 3: KABI
Highlight
Share
Copy
Want to have your highlights saved across all your devices? Sign up or sign in
