Tʋma Labʋ 2
2
Fezuu Kiɖeɖeu tiki mbá petisi Yesu yɔ pɔ-yɔɔ
1Pɩtalɩ Yuda ñɩma Kʋmtʋ Kazandʋ wiye lɛ, taabalaa tɩŋa payɩ kpeɣli ɖama ɖɩɣa nakɛyɛ taa. 2Kpaagbaa ḿbʋ́ lɛ, kɔkɔɖɛ naɖɩyɛ lɩɩnɩ ɛsɔdaa ɛzɩ heɣlim sɔsɔm makʋʋ yɔ nɛ ɖisu ɖɩɣa ŋgá ka-taa paawɛɛ yɔ katɩŋa. 3Peeɖe pʋyʋ nɔɔyʋ lɩ pɔ-yɔɔ ɛzɩ miŋ nzʋlʋmɛɛ yɔ nɛ pɩmɩzɩ ɖama nɛ pɩcaɣ paa weyi ɛ-yɔɔ. 4Ɛlɛ́, Fezuu Kiɖeɖeu tii kɩwɛɛ patɩŋa pɔ-yɔɔ nɛ papazɩ yɔɔdʋʋ kʋnʋmɩŋ ndɩ ndɩ weyi kɩha-wɛ ɖoŋ se pɔyɔɔdɩ yɔ.
5Yuda ñɩma mbá palakɩ mbʋ́ Ɛsɔ liu wɛɛ yɔ, paalɩ ajɛya kpeekpe taa nɛ powolo kazandʋ ńdʋ́ ti-ɖeɖe Yeruusalɛm. 6Panɩ kɔkɔɖɛ ńɖɩ́ ḿbʋ́ lɛ, pacaŋ powolo. Patalaa lɛ, paanaɣ se pɔyɔɔdɩ se we, mbʋ́ pʋyɔɔ yɔ, paa weyi ɛnɩɣaɣ tɔm ndʋ́ taabalaa yɔɔdaɣ yɔ nɛ ɛ-tɛ taa. 7Peeɖe pɩɖɩɣzɩ-wɛ yem ɖɩɣ ɖɩɣ nɛ pɔtɔŋ se: «Ɛzɩ ɛyáa panɛ pɛtɛkɛ Galilee ñɩma patɩŋa na? 8Pɩlabɩ ɛzɩma nɛ paa ɖa-taa weyi lɛ, ɛnɩɣ ndʋ́ pɔyɔɔdʋʋ yɔ nɛ ɛ-tɛ taa? 9Ŋgʋ́, ɖa-taa cɩnɛ ɖɩnaɣ mbá palɩnɩ Partɩ nɛ Meedii nɛ Elam nɛ Mezoopotamii nɛ Yudee nɛ Kapaadoosi nɛ Pɔntɩ nɛ Aazii egeetiye taa 10nɛ Frijii nɛ Pamfilii nɛ Ejiptɩ nɛ Liibii hɔɔlʋʋ ŋgʋ́ kʋwɛ Siirɛɛnɩ yɔ nɛ Room. 11Yuda ñɩma maɣmaɣ nɛ mbá papɩsɩ Yuda ñɩma nɛ palakɩ pɔ-sɔnzɩ yɔ nɛ Krɛɛtɩ ñɩma nɛ Araabii ñɩma patɩŋa payɩ paawɛɛ ɖɔɖɔ. Ɛlɛ́, ɛ́yáa ḿbá, pɛkɛdɩɣ Ɛsɔ tʋma sɔsɔna tɔm nɛ ɖatɩŋa ɖɩnɩɣ ɖa-kʋnʋmɩŋ ndɩ ndɩ taa!»
12Peeɖe pɩɖɩɣzɩ patɩŋa yem ɖɩɣ ɖɩɣ, paanaɣ se pɔyɔɔdɩ se we nɛ pɔpɔzʋʋ ɖama se: «Tɔm tʋnɛ, tɩ-tɔbʋʋ se we?» 13Ɛlɛ́, lɛlaa woŋuu-wɛ nɛ pɔtɔŋ se: «Sʋlʋm kʋʋ-wɛ kpem!»
Pɩyɛ yɔɔdʋʋnɩ samaɣ
14Alɩwaatʋ ńdʋ́ʋ́ Pɩyɛ nɛ tiyiyaa lɛlaa hiu nɛ kʋɖʋm pakʋyaa pasɩŋ nɛ ɛyɔɔdɩnɩ ɛyáa samaɣ se: «Yuda ñɩma nɛ mbá mɩ mɩtɩŋa payɩ ɩwɛ Yeruusalɛm cɩnɛ yɔ! Ɩma nɩŋgbaaŋ ɖeu nɛ ɩnɩɩ tɔm ndʋ́ meheyiɣ-mɩ yɔ. 15Ɛyáa panɛ, pɩtɛkɛ sʋlʋm kʋʋnɩ-wɛ ɛzɩ ɩyɔɔdʋʋ yɔ, mbʋ́ pʋyɔɔ yɔ, pɩkɩlɩ tanaŋ. 16Tɔm ndʋ́ náyʋ Yowɛɛlɩ kɔyɔɔdaa yɔ, ńdʋ́ lakɩnɩ lɛɛlɛɛyɔ yɔ. Ńdʋ́ lɛ se:
17‹Ɛsɔ yɔɔdaa se mɔnkɔŋ yebu nɛ
men-Fezuu Kiɖeɖeu tii paa weyi ɛ-yɔɔ kɛtɛzaɣ alɩwaatʋ taa.
Mɩ-pɩyalaa nɛ mɩ-pɛlaa pɔkɔŋ kɛʋ náyaa nɛ pɔyɔɔdɩ tɔm ma-hɩɖɛ taa.
Malakɩ nɛ mi-evebiya na wondu kɩfatʋ,
nɛ mɩ-akpadɩyaa lɛ, paba kɔŋ ɖozuu ɖozee.
18Toovenim lɛ, mɔnkɔŋ yebu kɩyakɩŋ ɩnʋ ɩ-taa nɛ,
men-Fezuu Kiɖeɖeu tii man-tʋmlaɖaa halaa ñɩma nɛ abalaa ñɩma pɔ-yɔɔ,
nɛ pɛkɛ náyaa nɛ pɔyɔɔdɩ tɔm ma-hɩɖɛ taa.
19Mɔnkɔŋ wɩlʋʋ kawɩlɩsɩ nasɩyɩ
ɛsɔdaa nɛ
mala hama lakasɩ tataa.
Calɩm kɔŋ kpɛdʋʋ nɛ
miŋ mʋ nɛ ñɔsɩ ñɛyɩ.
20Wɩsɩ kɔŋ pɩsʋʋ cɩkpɛndʋʋ nɛ
fenaɣ ñɛsɛɛ ɛzɩ calɩm yɔ
nɛ pʋcɔ ma Kɩpaɣlʋ man-kɩyakʋ
sɔsɔʋ ŋgʋ́ kɩfɛyɩ ɖaɣʋ yɔ, kɩtalɩ.
21Alɩwaatʋ ńdʋ́ lɛ, weyi etendiɣ-m yɔ,
ehikiɣ ñʋʋ yabʋ.› »
22Peeɖe Pɩyɛ tasɩ-wɛ heyuu se: «Izrɛɛlɩ ñɩma mɩ! Iwelesi nɛ ɩnɩɩ ndʋ́ meheyiɣ-mɩ yɔ: mɩ-maɣmaɣ ɩtɛm sɩm ḿbʋ́ se Nazarɛɛtɩ tʋ Yesu lɛ weyi Ɛsɔ wɩlɩ-mɩ e-ɖoŋ yɔ. Mbʋ́ pʋyɔɔ yɔ, ɛtɩŋnɩ ɛ-yɔɔ nɛ ɛla hama lakasɩ ndɩ ndɩ nɛ ɛwɩlɩ kawɩlɩsɩ mɩ-hɛkʋ taa. 23Ɛnʋ paɖʋzɩ mi-nesi taa ɛzɩ Ɛsɔ kamaɣzʋʋ nɛ ɛɖʋ ɖooo lɔŋ yɔ nɛ ɩtɩŋnɩ mbá paaɖɔŋ paɣtʋ yɔɔ nɛ pakam-ɩ kaamaŋkaɣ yɔɔ yɔ pɔ-yɔɔ nɛ ɩkʋ-ɩ nɛ ɛsɩ. 24Ɛlɛ́, Ɛsɔ fezi-i nɛ ɛlɩzɩ-ɩ nɛ sɩm nesi taa. Mbʋ́ pʋyɔɔ yɔ, pɩtaapɩzɩɣ se pʋɖɔkɩ-ɩ tam. 25Daaviidi yɔɔdɩ Yesu tɔm se:
‹Mɔncɔŋaɣnɩ Kɩpaɣlʋ tam.
Toovenim, ɛwɛɣ mɔn-cɔlɔ lɛ,
maatɔlʋʋ.
26Pʋ-yɔɔ man-taa hʋlʋmaa nɛ
mɔ-nɔɔ taa tɔm wɛɛ leleŋ nɛ halɩ
nɛ paa man-pɩlaʋ taa yɔ,
mantaɣ man-tɩ liu.
27Mbʋ́ pʋyɔɔ yɔ, ña Kɩpaɣlʋ ŋŋyeki-m
sɩɖaa taa nɛ mɛntɛŋɛlɩ.
Ŋŋyeki ma ña-ñɩnʋ
nɛ manɖazɩ.
28Ŋwɩlɩ-m
wezuu nʋmɔʋ,
ŋkɔŋ yebu nɛ man-taa wɛɛ leleŋ. Mbʋ́ pʋyɔɔ yɔ, ŋwɛ mɔn-cɔlɔ tam.› »
29Pɩyɛ tasɩ-wɛ heyuu ɖɔɖɔ se: «Man-taabalaa! Iyele mayasɩ-mɩ ɖɔ-cɔzɔ Daaviidi tɔm taa kpayɩ nɛ ɩnɩɩ: ɛsɩba nɛ pepim-i nɛ ɛ-pɩlaʋ wɛɛ halɩ nɛ sɔnɔ nɛ ɖɩnaɣ-kʋ. 30Ɛɛkɛ náyʋ nɛ ɛna se Ɛsɔ ɖuwaa se ɛ-sayɩnaa taa nɔɔyʋ kɔŋnɩ tɔɔʋ e-kewiyaɣ. 31Ɛɛnawa se Krɩstʋ kaɣ fem nɛ ɛlɩɩnɩ sɩɖaa taa. Pʋ-yɔɔ ɛyɔɔdaa se:
‹Ɛsɔ ɛɛkaɣ-ɩ yebu nɛ ɛtɛŋɛlɩ
sɩɖaa taa,
e-tomnaɣ ɛɛkaɣ ɖazʋʋ
pɩlaʋ taa.›
32Yesu weyi mɔyɔɔdʋʋ ɛ-tɔm ɛzʋnɔ yɔ, Ɛsɔ fezi-i nɛ ɖa ɖana-ɩ nɛ ɖɛ-ɛsɛ ɖatɩŋa. 33Caa Ɛsɔ kpazɩ-ɩ ɛ-cɔlɔ lone kɩbanɖɛ taa nɛ ɛcɛlɩ-ɩ e-Fezuu Kiɖeɖeu ŋgʋ́ ɛɖʋwa se ɛhaɣ ɛyáa yɔ: etisi-kʋ ɖɔ-yɔɔ. Ḿbʋ́ ɩnaɣ nɛ ɩnɩɣ lɛɛlɛɛyɔ. 34Daaviidi lɛ, ɛ-maɣmaɣ ɛtakpa ɛsɔdaa. Ɛlɛ́, ɛyɔɔdaa se:
‹Kɩpaɣlʋ Ɛsɔ heyi man-Kɩpaɣlʋ se:
caɣ mɔn-cɔlɔ lone kɩbanɖɛ taa
35nɛ pʋkɔɔ pɩsɩɩnɩ alɩwaatʋ ndʋ́ mankpa ño-koyindinaa nɛ moluzi-wɛ ñɛ-tɛɛ yɔ.›
36Pʋ-yɔɔ lɛ, pʋwɛɛ se Izrɛɛlɩ ñɩma mɩ mɩtɩŋa, ɩnɩɩ ɖeu se: Yesu weyi ɩkam-ɩ kaamaŋkaɣ yɔɔ yɔ, ɛnʋ lɛ Weyi Ɛsɔ Lɩzaa nɛ ɛkɛ Kɩpaɣlʋ yɔ!»
Ɛyáa kudokiŋ naadozo sɔzɩ pa-tɩ mbá pɛwɛnɩ lidaʋ Yesu yɔɔ yɔ pɔ-yɔɔ
37Panɩ tɔm ńdʋ́ lɛ, pitili-wɛ yem yɔɔɔ. Peeɖe pɔpɔzɩ Pɩyɛ nɛ tiyiyaa lɛlaa se: «Taabalaa! Ɛbɛ pʋwɛɛ se ɖɩla yɔ?» 38Ɛ́lɛ́ cosi-wɛ se: «Ɩlɛɣzɩ wɛtʋ nɛ pala paa mɩ-taa weyi lɩm sɔʋ sɔnzɩ Yesu Krɩstʋ hɩɖɛ taa nɛ pekpeɣ-mɩ mɩ-kɩwɛɛkɩm. Peeɖe Ɛsɔ haɣ-mɩ e-Fezuu Kiɖeɖeu. 39Mbʋ́ pʋyɔɔ yɔ, mɩ nɛ mi-piya nɛ mbá patɩŋa pɛwɛ poliŋ yɔ: mɩtɩŋa payɩ mbá Kɩpaɣlʋ Ɛsɔ kɔŋ yaʋ yɔ, ɛɖʋwa se ɛlakɩ kʋjɔʋ ŋ́gʋ́.»
40Pɩyɛ tasɩ-wɛ tɔm ndɩ ndɩ heyuu se ɛwɩlɩnɩ-wɛ se pɩkɛ toovenim nɛ pɩlabɩ-wɛ hʋnʋm. Eheyi-wɛ se palɩzɩ pa-tɩ kɩdɛkɛdɩŋ ɩnʋ ɩ-hɛkʋ taa nɛ Ɛsɔ ya pa-ñʋʋ.
41Peeɖe ɛyáa sakɩyɛ tisi Pɩyɛ tɔm nɛ palabɩ-wɛ lɩm sɔʋ sɔnzɩ. Mbá pɔsɔzɩ taabalaa yɔɔ puwiye ńɖɩ́ yɔ, patalɩ ɛzɩ kutokiŋ naadozo yɔ.
Krɩstʋ ñɩma wezuu caɣʋ tɔm
42Ɛyáa ḿbá, pɛ-ɛsɩyɛ sɛnɩ tiyiyaa tɔm welesuu nɛ pa nɛ wɛ panɩɣnɩ ɖama nɛ palakɩ tindine tayʋʋ sɔnzɩ nɛ pɛsɛɣ Ɛsɔ. 43Paa pa-taa weyi ɛñaŋaɣ Ɛsɔ nɛ tiyiyaa ñalakɩ hama lakasɩ sakɩyɛ nɛ pawɩlɩɣ kawɩlɩsɩ sakɩyɛ. 44Mbá patɩŋa paawɛnɩ lidaʋ Yesu yɔɔ yɔ, paalabɩ nɔɔ kʋɖʋmaɣ nɛ patayɩɣ ɖama mbʋ́ mbʋ́ pɛwɛna yɔ. 45Pɛpɛdaɣ mbʋ́ paawɛna yɔ nɛ patɩŋa patayɩɣ ɖama pi-liidiye nɛ paa weyi ehikiɣ mbʋ́ pʋpɔzʋʋ nɛ ɛwazɩnɩ ɛ-kʋñɔŋ yɔ. 46Panɩɣaɣnɩ ɖama kɩyakɩŋ tɩŋa nɛ papaŋ ɖama kpeɣluu Ɛsɔ ɖɩɣa taa. Pɔcɔwaɣ ɖama tɛ nɛ pɔtɔkɩ nɛ palakɩ tindine tayʋʋ sɔnzɩ nɛ laŋhʋlʋmɩyɛ yem fɛɛɛ. 47Pasaŋaɣ Ɛsɔ nɛ ɛyáa tɩŋa laŋa hɛɣnɩ-wɛ. Mbá Kɩpaɣlʋ yabɩ pa-ñʋʋ yɔ, pɔsɔzaɣ pɔ-yɔɔ kɩyakɩŋ tɩŋa.
Currently Selected:
Tʋma Labʋ 2: KABI
Highlight
Share
Copy
Want to have your highlights saved across all your devices? Sign up or sign in
