Tʋma Labʋ 20
20
Pɔɔlɩ woba Masedonii nɛ Grɛɛsɩ
1Ñaɖʋʋ cɛba Efɛɛzɩ peeɖe lɛ, Pɔɔlɩ kpeɣli Krɩstʋ wayɩ tɩŋɩyaa nɛ ɛyɔɔdɩnɩ-wɛ se pɩlabɩ-wɛ hʋnʋm. Pʋwayɩ lɛ, ɛsɛɛ-wɛ nɛ ɛcaŋ ɛɖɛɛ Masedonii ɛjaɖɛ taa. 2Ɛtalaa lɛ, ɛɖɔŋnɩ sɩŋʋʋ sɩŋʋʋ nɛ ɛkɛdɩɣ Ɛsɔtɔm sakɩyɛ nɛ pɩlakɩ ɛyáa hʋnʋm. Pʋwayɩ lɛ, ewolo Grɛɛsɩ ñɩnɖɛ taa 3nɛ ɛcaɣ peeɖe fenasɩ naadozo. Ɛkʋyaa lɛ, ewolo se ɛsʋʋ kpɩyʋʋ nɛ ɛɖɛɛ Siirii ɛjaɖɛ taa. Ɛlɛ́, ɛnɩɩ se Yuda ñɩma nabɛyɛ tam ɛ-yɔɔ nɔɔ se pakʋʋ-ɩ. Peeɖe ɛtɩlɛɣzɩ lɩmaɣza nɛ ekiti ɛtɩŋnɩ Masedonii. 4Ɛ nɛ mbá pɔɖɔŋaɣ yɔ, ḿbá yɔ: Beree abalʋ weyi payaɣ se Piruusi yɔ ɛ-pɩyalʋ Sopatɛɛrɩ nɛ Tesalooniki tɛtʋ taa ñɩma: Aristaarkɩ nɛ Sekundusi nɛ Dɛɛrbɩ tʋ Gayuusi nɛ Timootee nɛ Aazii ñɩma: Ticiiki nɛ Trofim. 5Ḿbá kɛɖɛnɩ ma nɛ ɩ nɔɔ nɛ powolo paɖaŋ-ɖʋ Trowaasɩ tɛtʋ taa. 6Kazandʋ ndʋ́ tɩ-yɔɔ pɔtɔkɩ tindine nɖɩ́ ɖɩ-taa fɛyɩ sɔsɔɔna yɔ tɩɖɛwa lɛ, ɖɩkʋyɩ ɖiwolo Filiipu nɛ ɖɩsʋʋ mɛlɛ. Kɩyakɩŋ kagbaanzɩ wayɩ lɛ, ɖɩtalɩ pɔ-cɔlɔ Trowaasɩ nɛ ɖa nɛ wɛ ɖɩcaɣ peeɖe kɩyakɩŋ lʋbɛ.
Pɔɔlɩ woba Trowaasɩ
7Kujuka wiye lɛ, ɖikpeɣli ɖama se ɖɩlakɩ tindine tayʋʋ sɔnzɩ. Kifeŋaɣ se Pɔɔlɩ ekpe. Pʋ-yɔɔ ɛɛwɛɛ nɛ ɛyɔɔdʋʋnɩ mbá pɛwɛ peeɖe yɔ nɛ pʋkɔɔ pɩtalɩ ɖoó hɛkʋ. 8Ɛsɔdaa kuduyuu nakʋyʋ taa ɖiikpeɣlaa. Paasɔbɩ kanɖʋnaa sakɩyɛ nɛ pasɩɩ kɩ-taa. 9Alɩwaatʋ ńdʋ́ lɛ, evebu weyi payaɣ se Eticii yɔ, ɛɛcaɣ mundoɖe yɔɔ. Pɔɔlɩ wɛɛ ɛyɔɔdʋʋ ka ka ḿbʋ́ lɛ, ɖom kpaɣ-ɩ. Pɩkɛdaa lɛ, pɩlabɩ-ɩ liii nɛ ɛlɩɩnɩ ɖɩ-yɔɔ ɖooo ɛsɔdaa kuduyuu naadozo ñɩŋgʋ taa nɛ etii ɛfalɩ tataa. Powobi pakʋsɩ-ɩ lɛ, e-fezuu tɛm ɖɛʋ. 10Peeɖe Pɔɔlɩ tɩlɩwa etii nɛ eluŋ ɛ-yɔɔ nɛ ɛkpaɣ-ɩ e-nesi taa nɛ ɛtɔ se: «Sɔɔndʋ ɛtaakpa-mɩ: ɛ nɛ ɛ-ɛsɛ!» 11Peeɖe Pɔɔlɩ pɩsaa ɛkpa nɛ ɛcɩyɩ tindine nɛ ɛtɔɔ. Pɛtɛm sɔnzɩ ńzɩ́ labʋ lɛ, ɛɖaɣnɩ yɔɔdʋʋ ka ka nɛ tɛʋ kɔɔ kife. Pʋwayɩ lɛ, ɛɖɛɛ. 12Ɛyɔɔdɩ ḿbʋ́ lɛ, evebu ɛnʋ efe nɛ pekpeni-i nɛ ɛ-alaafɩya tɩŋa. Ɛyáa na-ɩ ḿbʋ́ lɛ, patɩŋa pa-laŋa hɛɛ niɣ niɣ.
Pɔɔlɩ kʋyɩ Trowaasɩ nɛ ewolo Miilɛɛ
13Pɔɔlɩ ɖɛwa nɛ piyebi-ɖʋ lɛ, ɖɩsʋʋ mɛlɛ nɛ ɖɩɖɛɛ nɔɔ nɛ ɖiwolo ɖɩɖaŋ-ɩ Asoosi tɛtʋ taa. Ɛɛɖʋwa se ɛɖɔŋ naŋgbanzɩ nɛ ɖɩkatɩ-ɩ peeɖe. 14Ɛkatɩ-ɖʋ lɛ, ɛkpa ɖɔ-cɔlɔ mɛlɛ taa nɛ ɖiwolo Mitiilɛɛnɩ ñɩndʋ taa. 15Đɩkʋyɩ peeɖe lɛ, ɖɩtalɩ Ciyoo tɛtʋ cɔlɔ tɛʋ kifemuu. Tozo wiye lɛ, ɖɩtalɩ Samɔɔsɩ ñɩndʋ taa. Naza wiye lɛ, ɖɩtalɩ Miilɛɛ ñɩndʋ taa lɛ. 16Pɔɔlɩ kaɖʋwa se ɛɛsɩŋɩɣ Efɛɛzɩ Aazii egeetiye taa, pɩtɛkɛ ḿbʋ́, elesiɣ alɩwaatʋ yem. Ekpedesaɣ se pʋwɛɛ yɔ, ɛtalɩ Yeruusalɛm Fezuu Kiɖeɖeu tibu Kazandʋ wiye.
Pɔɔlɩ sɛɣ Efɛɛzɩ Krɩstʋ ŋgbɛyɛ taa sɔsaa se pʋcɔ ɛkʋyɩ
17Pɔɔlɩ talɩ Miilɛɛ lɛ, etiyi Efɛɛzɩ se payaa Krɩstʋ ŋgbɛyɛ taa sɔsaa. 18Paba talɩ ɛ-cɔlɔ lɛ, eheyi-wɛ se: «Man-taabalaa! Ɩtɛm sɩm mɔn-ɖɔnɛ alɩwaatʋ ndʋ́ ma nɛ mɩ ɖɩɩwɛɛ kpaɣ ɖooo kɩyakʋ ŋgʋ́ mancalɩ fɛyʋʋ mɩ-tɛ Aazii egeetiye taa yɔ. 19Mentisi man-tɩ nɛ mala Kɩpaɣlʋ tʋmɩyɛ nɛ ɛsɩtɛɣlɩm nɛ kʋñɔŋ ŋgʋ́ mɔntɔɔ Yuda ñɩma nesi taa yɔ kɩ-taa. Ḿbá kɔlɔnɩ mɔ-yɔɔ nɔɔ kɩdɛkɛdaɣ tam sakɩyɛ. 20Mɛntɛmɛsɩ-mɩ natʋyʋ. Maakɛdɩ-mɩ nɛ mawɩlɩ-mɩ mbʋ́ pɩtɩŋa payɩ pʋwɛ-mɩ wazaɣ yɔ samaɣ nɛ mɩ-ɖɩsɩ pa-taa. 21Meheyi Yuda ñɩma nɛ mbá pɛtɛkɛ Yuda ñɩma yɔ se pɛlɛɣzɩ wɛtʋ Ɛsɔ ɛsɩndaa nɛ pɛwɛnɩ lidaʋ ɖa-Kɩpaɣlʋ Yesu yɔɔ. 22Lɛɛlɛɛyɔ, pɩkɛnɩ-m kɩcɛyʋʋ se mowolo Yeruusalɛm ɛzɩ Fezuu Kiɖeɖeu heyuu-m yɔ. Ɛlɛ́, mantana mbʋ́ pɩkaɣ-m tɛmnaʋ peeɖe yɔ. 23Ndʋ́ manawa yɔ lɛ se: paa tɛtʋ ndʋ́ tɩ-taa mantalaa yɔ, Fezuu Kiɖeɖeu wɩlɩɣ-m nɛ kiheyiɣ-m se salaka nɛ kʋñɔŋ sɔsɔʋ pɩtɛŋnɩ-m. 24Ɛlɛ́, mañɩtaa mɛntɛ man-tʋmɩyɛ nɖɩ́ Kɩpaɣlʋ Yesu ɖʋ-m yɔ yɔ, me-wezuu tɛkɛnɩ-m pʋyʋ. Ńɖɩ́ lɛ se: monsusi Ɛsɔ lootiye Laŋhɛzɩyɛ Tɔm.
25Lɛɛlɛɛyɔ, manawa se mbá mɩ mɩtɩŋa payɩ mɔnkɔm mɩ-hɛkʋ taa nɛ monsusi Ɛsɔ Kewiyaɣ tɔm yɔ, mɩ-taa nɔɔyʋ ɛɛtasɩɣ naʋ mɛ-ɛsɩbiye taa kaʋ. 26Pʋ-yɔɔ mankaɖɩɣ-mɩ sɔnɔ kɩyakʋ kʋnɛ se: yee mɩ-taa nɔɔyʋ eleba yɔ, ma-ñɩndʋ natʋyʋ fɛyɩ pɩ-taa. 27Mbʋ́ pʋyɔɔ yɔ, meheyi-mɩ mbʋ́ Ɛsɔ ɖʋwa se ɛkɔŋ labʋ yɔ pɩtɩŋa payɩ, mɛntɛmɛsɩ-mɩ natʋyʋ. 28Fezuu Kiɖeɖeu lɩzɩnɩ-mɩ se ɩkɛ sɔsaa nɛ ɩcɔnɩ Krɩstʋ ŋgbɛyɛ taa ñɩma yɔɔ. Pʋ-yɔɔ meheyiɣ-mɩ se ɩcɔnɩ mɩ-maɣmaɣ mɩ-tɩ yɔɔ camɩyɛ nɛ ɩcɔnɩ ɖɔɖɔ mbá pɛwɛ ɖɩ-taa yɔ patɩŋa pɔ-yɔɔ ɛzɩ ninɖiɣyu cɔŋʋʋnɩ e-heŋ yɔɔ yɔ. Ɛsɔ tɩŋnɩnɩ ɛ-maɣmaɣ ɛ-Pɩyalʋ calɩm yɔɔ nɛ ɛpɩsɩ-wɛ ɛ-ñɩma. 29Ma Pɔɔlɩ mɛntɛm naʋ se ma-wayɩ lɛ, mbá pɛwɛ ɛzɩ kpemtɔɔyɩsɩ nzɩ́ ñɔɔsɩ wɩɣ-sɩ yɔ, pɔkɔŋ lɩʋ mɩ-ŋgbɛyɛ taa, paakaɣ sɔm nɔɔyʋ kaʋ. 30Halɩ mɩ-maɣmaɣ mɩ-taa lɛlaa kɔŋ pɩsʋʋ cɛtɩyaa nɛ pepeɣzi Krɩstʋ wayɩ tɩŋɩyaa nɛ paba tɩŋ-wɛ. 31Pʋ-yɔɔ lɛ, ɩcɔnɩ mɩ-tɩ yɔɔ nɛ ɩtɔzʋʋ se pɩnzɩ naadozo yɔ, menteyele mɩ-taa nɔɔyʋ paɣ́ʋ wɩsɩ nɛ ɖoó nɛ halɩ mentisi ɛsɩtɛɣlɩm.
32Lɛɛlɛɛyɔ, manɖʋzʋʋ mɩtɩŋa payɩ Ɛsɔ nɛ e-lootiye tɔm pe-nesi taa. Ɛlabɩ-mɩ lootiye. Ɛnʋ pɩzɩɣnɩ eyele nɛ ɩkpa ɖoŋ nɛ ɛha-mɩ ñɩm mbʋ́ ɛsɩwa se ɛhaɣ mbá patɩŋa payɩ eyeba nɛ papɩsɩ ɛ-ñɩma yɔ. 33Nɔɔyʋ liidiye yaa e-sika yaa e-wondu talabɩ-m liu. 34Mɩ-maɣmaɣ ɩnawa se malabɩ tʋmɩyɛ nɛ ma-maɣmaɣ me-nesi nɛ mehiɣ mbʋ́ pɩtɛɖaɣ ma nɛ man-taabalaa yɔ. 35Mawɩlɩ-mɩ pɩtɩŋa pɩ-taa se ḿbʋ́ pʋwɛɛ se ɩla tʋmɩyɛ nɛ ɩsɩnɩ kʋñɔndɩnaa nɛ ɖatɩŋa ɖɩtɔzɩ tɔm ndʋ́ Kɩpaɣlʋ Yesu maɣmaɣ yɔɔdaa yɔ tɩ-yɔɔ. Ńdʋ́ lɛ se: ‹Ɛyʋ haʋ lɛlʋ pʋyʋ yɔ, pɩlakɩ-ɩ leleŋ pɩŋŋ nɛ pɩkɩlɩ ɛzɩ pahaʋ ɛ-maɣmaɣ yɔ.› »
36Pɔɔlɩ tɛm ɛyáa yɔɔdɩnaʋ ḿbʋ́ lɛ, ɛ nɛ wɛ poluŋ pa-nʋmbɔla yɔɔ nɛ pɛsɛɛ Ɛsɔ. 37Pɛtɛma lɛ, patɩŋa pɛsɛɛ Pɔɔlɩ siŋŋ nesi naalɛ nɛ palabɩ-ɩ wele wele nɛ pɛ-ɛsɩtɛɣlɩm kpe cɔɔɔ. 38Mbʋ́ piyebi kpem nɛ pɛ-ɛsɛ ñɩŋ yɔ lɛ se: eheyi-wɛ se paatasɩɣ naʋ ɛ-ɛsɩbiye taa kaʋ. Pʋwayɩ pasɩ-ɩ nɛ patanɩ-ɩ mɛlɛ cɔlɔ.
Currently Selected:
Tʋma Labʋ 20: KABI
Highlight
Share
Copy
Want to have your highlights saved across all your devices? Sign up or sign in
