Tʋma Labʋ 21

Pɔɔlɩ woki Yeruusalɛm

1Đa nɛ mbá pasɩ Pɔɔlɩ yɔ ɖɩyasɩ ɖama lɛ, ɖɩsʋʋ mɛlɛ nɛ ɖɩɖɛɛ Kɔɔsɩ ɛjaɖɛ taa kpaagbaa. Kifema lɛ, ɖɩkʋyɩ peeɖe nɛ ɖiwolo Roodi ñɩnɖɛ taa nɛ ɖɩkʋyɩ ɖɩɖɩ taa nɛ ɖiwolo Pataraa tɛtʋ taa. 2Đɩtalɩ peeɖe lɛ, ɖɩmaɣnɩ mɛlɛ ŋgʋ́ kuwoki Fenisii ɛjaɖɛ taa yɔ nɛ ɖɩsʋʋ-kʋ nɛ ɖɩɖɛɛ. 3Đɩkɔm ɖɩtalɩ Ciiprɩ ɛjaɖɛ nɖɩ́ lɩm cɔ-ɖɩ pɩta yɔ ɖɩ-hadɛ kiŋ lɛ, ɖiyebi-ɖɩ nɩmɩyɛ yɔɔ nɛ ɖiwolo Tiiri tɛtʋ taa Siirii ɛjaɖɛ taa. Mbʋ́ pʋyɔɔ yɔ, peeɖe pʋwɛɛ se palɩzɩ mɛlɛ taa wondu. 4Đɩtalaa lɛ, ɖɩmaɣnɩ Krɩstʋ wayɩ tɩŋɩyaa nɛ ɖa nɛ wɛ ɖɩcaɣ kpɩtaʋ nɛ kɩ-tɛɛ. Alɩwaatʋ ńdʋ́ tɩ-taa Fezuu Kiɖeɖeu yɔɔdɩnɩ-wɛ nɛ peheyi Pɔɔlɩ se ɛtaatasɩ pɩsʋʋ Yeruusalɛm. 5Ɛlɛ́, kpɩtaʋ ŋ́gʋ́ kʋkɔm kɩɖɛɛ lɛ, ɖɩɖaɣnɩ ɖa-nʋmɔʋ pazʋʋ. Đɩɖɛɣaɣ lɛ, pasɩɩ-ɖʋ patɩŋa, pa nɛ pa-halaa nɛ pe-piya nɛ palɩnɩ-ɖʋ tɛtʋ wayɩ. Peeɖe ɖiluŋ ɖa-nʋmbɔla yɔɔ teŋgu nɔɔ nɛ ɖɩsɛɛ Ɛsɔ. 6Pʋwayɩ lɛ, ɖa nɛ wɛ ɖɩsɛɛ ɖama nɛ ɖa ɖasʋʋ mɛlɛ nɛ piyele ḿbá ñapɩsɩ pɛ-tɛ.

7Đɩkʋyɩ Tiiri peeɖe lɛ, ɖɩtɛzɩ ɖa-nʋmɔʋ teŋgu yɔɔ nɛ ɖɩkɔɔ ɖɩtalɩ Pitolemayisi tɛtʋ taa. Đɩtalaa lɛ, ɖɩsɛɛ taabalaa nɛ ɖa nɛ wɛ ɖɩcaɣ kɩyakʋ nɛ kɩ-tɛɛ. 8Kifema lɛ, ɖɩkpaɣ nʋmɔʋ nɛ ɖɩkɔɔ ɖɩtalɩ Sezaaree. Peeɖe ɖiwoba ɖɩwɛɛ Laŋhɛzɩyɛ Tɔm susiyu Filiipu tɛ. Abalʋ ɛnʋ, ɛɛkɛ ɛyáa lʋbɛ mbá palɩzɩ Yeruusalɛm se pɛkɛ Krɩstʋ ŋgbɛyɛ taa tayɩyaa yɔ pa-taa lɛlʋ. 9Ɛwɛnɩ pɛlaa naanza, patawalɩda, pɛkɛ náyaa. 10Đɩɩwɛ peeɖe kɩyakɩŋ cabɩ ḿbʋ́ lɛ, nakʋyʋ wiye náyʋ weyi payaɣ se Agaabusi yɔ, ɛlɩɩnɩ Yudee egeetiye taa nɛ ɛkɔɔ ɖɔ-cɔlɔ. 11Ɛtalaa lɛ, ɛkpaɣ Pɔɔlɩ tambaɖɛ nɛ ɛhɔkɩ ɛ-naŋgbanzɩ nɛ e-nesi pa-taa nɛ ɛtɔ se: «Iwelesi nɛ ɩnɩɩ ndʋ́ Fezuu Kiɖeɖeu tiyi-m se mɔnkɔɔ meheyi-mɩ yɔ. Ńdʋ́ lɛ se: weyi ɛtɩnɩ tambaɖɛ ɖɩnɛ yɔ, ɛzʋnɔ Yuda ñɩma kɔŋ-ɩ hɔkʋʋ Yeruusalɛm nɛ paɖʋzɩ-ɩ mbá pɛtɛkɛ Yuda ñɩma yɔ pe-nesi taa.» 12Đa nɛ Sezaaree ñɩma ɖɩnɩ ḿbʋ́ lɛ, ɖitendi Pɔɔlɩ se ɛtaatasɩ pɩsʋʋ Yeruusalɛm. 13Peeɖe ɛ́lɛ́ kitini-ɖʋ se: «Pɩlabɩ ɛzɩma nɛ iwiliɣ nɛ ɩñɩnɩɣ se itisi mon-toma taa ḿbʋ́? Ma lɛ, pɩtɛkɛ hɔkʋʋ yɔɔ ɖeke mɔñɔɔzɩ man-tɩ nɛ manɖaŋ. Ɛlɛ́, manɖaŋaa ɖɔɖɔ se paa sɩm yɔ, mansɩ Kɩpaɣlʋ Yesu yɔɔ Yeruusalɛm.» 14Đɩtapɩzɩ ɛ-tɔm lɛ, ɖɩtɛzɩ-ɩ yebu nɛ ɖɩtɔ se: «Mbʋ́ Kɩpaɣlʋ liu wɛɛ yɔ, ḿbʋ́ ɛlabɩna!»

15Đɩcaɣ Sezaaree peeɖe kɩyakɩŋ cabɩ lɛ, ɖɩñɔɔzɩ ɖa-tɩ se ɖiwoki Yeruusalɛm. 16Đɩɖɛɣaɣ lɛ, Krɩstʋ wayɩ tɩŋɩyaa nabɛyɛ sɩɩ-ɖʋ nɛ powoni-ɖʋ Yeruusalɛm peeɖe Ciiprɩ tʋ weyi ɛ-tɛ paaɖʋwa se ɖɩsʋʋ yɔ ɛ-tɛ. Payaɣ-ɩ se Mɩnaasɔɔ, ɛkɛ Krɩstʋ wayɩ tɩŋɩyʋ ɖooo lɔŋ.

Pɔɔlɩ katɩ Yeruusalɛm Krɩstʋ ŋgbɛyɛ taa sɔsaa

17Đɩtalɩ Yeruusalɛm lɛ, taabalaa mʋ-ɖʋ nɛ laŋhʋlʋmɩyɛ. 18Kifema lɛ, ɖa nɛ Pɔɔlɩ ɖiwolo Yakubu tɛ. Krɩstʋ ŋgbɛyɛ taa sɔsaa lɛlaa tɩŋa kekpeɣli peeɖe. 19Đɩtalaa lɛ, Pɔɔlɩ sɛɛ-wɛ nɛ ɛkɛdɩ-wɛ mbʋ́ Ɛsɔ tɩŋnɩ ɛ-yɔɔ nɛ ɛla mbá pɛtɛkɛ Yuda ñɩma yɔ pɛ-hɛkʋ taa yɔ pɩtɩŋa pʋ-tɔm piye piye. 20Panɩ-tʋ lɛ, pasa Ɛsɔ pɩŋŋ. Pʋwayɩ lɛ, peheyi-i se: «Taabalʋ! Ŋnaɣ, Yuda ñɩma ɛgbaŋ ɛgbaŋ mbá pɛwɛnɩ lidaʋ Yesu yɔɔ yɔ, patɩŋa payɩ pɔɖɔkɩ paɣtʋ nesi naalɛ kpam. 21Ŋgʋ́, peheyi-wɛ se ŋwɩlɩɣ Yuda ñɩma mbá pɛwɛ mbá pɛtɛkɛ Yuda ñɩma yɔ pɛ-tɛ se paha Mooyiizi paɣtʋ siɣ́ye nɛ ŋheyiɣ-wɛ se pataapɛlɩ pe-piya nɛ pataaɖɔ pɔ-sɔnzɩ yɔɔ ɖɔɖɔ. 22Ɛzɩma ɖɩlakɩ yɔ? Paa pɩɩla ɛzɩma ɛyáa nɩɣ se ŋkɔma. 23Pʋ-yɔɔ lɛ, la mbʋ́ ɖiheyiɣ-ŋ yɔ. Abalaa naanza nabɛyɛ wɛ ɖɛ-hɛkʋ taa cɩnɛ. Pa nɛ Ɛsɔ paapɛlɩ ñɩyʋʋ. 24Kpaɣ-wɛ nɛ ña nɛ wɛ iwolo ɩla cɩɖɩcɩɖɩ wɛtʋ sɔnzɩ nɛ ŋhɛyɩ liidiye pɔ-yɔɔ nɛ papɩzɩ powolo pahʋ pa-ñʋŋ. Pʋbʋ, pɩwɩlɩɣ se ña ɖɔɖɔ ŋɖɔŋ Mooyiizi paɣtʋ yɔɔ. Peeɖe ɛyáa tɩŋa ɖiɣziɣni se ñɔ-tɔm ndʋ́ pɔyɔɔdaɣ yɔ, tɩtɛkɛ toovenim. 25Piyele mbá pɛtɛkɛ Yuda ñɩma nɛ pɛwɛnɩ lidaʋ Yesu yɔɔ yɔ, ɖɩma-wɛ takayaɣ nɛ ɖiheyi-wɛ mbʋ́ ɖɩɖʋwa yɔ. Ḿbʋ́ lɛ se pataatɔɔ kɩlaʋ nandʋ yaa calɩm yaa kpɩna wena pɛtɛcɛ a-liŋ tɛɛ yɔ a-nandʋ. Peyele ɖɔɖɔ acɛyɛ.»

26Pɔyɔɔdɩ ḿbʋ́ nɛ kife lɛ, Pɔɔlɩ kpaɣ-wɛ nɛ ɛ nɛ wɛ powolo nɛ palakɩ sɔnzɩ ńzɩ́. Pʋwayɩ lɛ, ewolo Ɛsɔ ɖɩɣa taa nɛ eheyi ɛyáa alɩwaatʋ ndʋ́ sɔnzɩ ńzɩ́ sɩtɛŋ yɔ. Pʋ-tɔbʋʋ se alɩwaatʋ ndʋ́ papɩzɩɣ palaa paa pa-taa weyi ɛ-yɔɔ yɔ.

Pakpa Pɔɔlɩ Ɛsɔ ɖɩɣa taa

27Kɩyakɩŋ lʋbɛ palakɩnɩ sɔnzɩ ńzɩ́. Kɩyakɩŋ ɩnʋ ɩkɔm se ɩɖɛɣ, ŋgʋ́, Yuda ñɩma nabɛyɛ kɛwɛ peeɖe. Palɩnɩ Aazii egeetiye taa. Pana Pɔɔlɩ Ɛsɔ ɖɩɣa taa ḿbʋ́ lɛ, pasazɩ ɛyáa samaɣ tɩŋa se kakpa-ɩ. 28Paawɛɛ pamakɩ kubusi se: «Izrɛɛlɩ ñɩma, ɩkɔɔ ɩsɩnɩ-ɖʋ! Ɛyʋ weyi esusuu ɛyáa tɩŋa paa le se pataaɖɔ Mooyiizi paɣtʋ yɔɔ nɛ ɛyɔɔdʋʋ Izrɛɛlɩ ñɩma nɛ Ɛsɔ ɖɩɣa pɔ-yɔɔ tɔm ɛzaɣ́tʋ yɔ, ɛnʋ yɔ. Halɩ ɛkpaɣ mbá pɛtɛkɛ Yuda ñɩma yɔ nɛ ewoni Ɛsɔ ɖɩɣa taa nɛ pepisi-kɛ!» 29Pɔyɔɔdɩ ḿbʋ́, mbʋ́ pʋyɔɔ yɔ, paana ɛ nɛ Efɛɛzɩ tʋ Trofim tɛtʋ taa nɛ pamaɣzɩ se paa pɩɩla ɛzɩma, ɛsʋnɩ-ɩ Ɛsɔ ɖɩɣa taa. 30Piiseɣti ɛyáa tɩŋa payɩ tɛtʋ hɔɔlɩŋ tɩŋa taa nɛ pese powolo pakpa Pɔɔlɩ ɛnʋ Ɛsɔ ɖɩɣa taa peeɖe nɛ pɔhɔm-ɩ palɩzɩnɩ awayɩ nɛ patɩɖɩʋ nɔnɔsɩ. 31Pañɩnaɣ se pakʋ-ɩ. Ɛlɛ́, nɔɔyʋ wolo eheyi Room sɔɔjanaa ñʋʋdʋ se pɩsa miŋ Yeruusalɛm tɛtʋ tɩŋa. 32Kpaagbaa ḿbʋ́ lɛ, ɛ́lɛ́ kpaɣ ɛ-sɔɔjanaa nabɛyɛ nɛ paba ñʋndɩnaa nɛ ɛ nɛ wɛ pese powolo ɛyáa ḿbá pa-wayɩ. Paba na-wɛ lɛ, peyele Pɔɔlɩ mabʋ. 33Peeɖe sɔɔjanaa ñʋʋdʋ ɛnʋ etuzi ɛ-tɩ Pɔɔlɩ cɔlɔ nɛ ɛha nɔɔ se pakpa-ɩ pɔhɔkɩ-ɩ yoŋgbasɩ naalɛ. Pɛtɛm-ɩ hɔkʋʋ lɛ, ɛpɔzɩ se: ɛnʋ lɛ anɩ? Ɛbɛ ɛlaba? 34Alɩwaatʋ ńdʋ́ lɛ, ɛyáa samaɣ wɛɛ kokou yem: paa weyi nɛ ɛ-ñɩndʋ. Sɔɔjanaa ñʋʋdʋ ɛnʋ, ɛtapɩzɩɣ se ɛnɩɩ natʋyʋ kɔkɔɖɛ ńɖɩ́ ɖɩ-taa. Peeɖe eheyi ɛ-sɔɔjanaa se powoni Pɔɔlɩ pa-pɩlɩʋ taa. 35Patalɩ tendemee yɔɔ lɛ, pʋpɔzɩ se sɔɔjanaa ɛkpaɣ-ɩ ɛyáa samaɣ helu helu lakasɩ yɔɔ. 36Mbʋ́ pʋyɔɔ yɔ, katɩŋaɣ ɛ-wayɩ nɛ kamakɩ kubusi se: «Pʋwɛɛ se pakʋ-ɩ!»

Pɔɔlɩ yɔɔdɩnɩ ɛ-ñɩma Yuda ñɩma

37Pasʋwaɣnɩ Pɔɔlɩ pɩlʋʋ ŋ́gʋ́ kɩ-taa lɛ, ɛpɔzɩ sɔɔjanaa ñʋʋdʋ ɛnʋ nɛ Grɛɛkɩ taa se: «Manpɩzɩɣ mɔyɔɔdɩ tɔm natʋyʋ yaa we?» Peeɖe ɛ́lɛ́ ñɔpɔzɩ-ɩ se: «Naze ŋnɩɣ Grɛɛkɩ tɔm nɩɩ? 38Yee ḿbʋ́ pɩtɛkɛ ña lɛ Ejiptɩ tʋ weyi ɛkɔm kɩyakɩŋ ɩnɛ ɩ-taa nɛ ɛlɩzɩ ñaɖʋʋ nɛ ɛkpaɣ ɛyáa kʋyaa kutokiŋ naanza nɛ ewoni lakʋ taa yɔ?» 39Pɔɔlɩ cosi-i se: «Ma mɛnkɛ Yuda tʋ, palʋlɩ-m Taarsɩ tɛtʋ taa Siliisii ɛjaɖɛ taa, tɩ-hɩɖɛ sɛwa, mɛnkɛ tɩ-taa tʋ. Mentendiɣ-ŋ se ŋha-m nʋmɔʋ nɛ mɔyɔɔdɩnɩ samaɣ.» 40Peeɖe ɛ́lɛ́ ha-ɩ nʋmɔʋ se ɛyɔɔdɩ. Ɛlɛ́, Pɔɔlɩ sɩŋ tendene yɔɔ nɛ ɛñɩɣ samaɣ nesi se kosu. Kosum ɖiɣ ɖiɣ lɛ, ɛpazɩ-wɛ yɔɔdɩnaʋ nɛ pɛ-tɛ Ebree taa. Ndʋ́ ɛyɔɔdaa yɔ, ńdʋ́ lɛ se:

Currently Selected:

Tʋma Labʋ 21: KABI

Highlight

Copy