Tʋma Labʋ 19

Pɔɔlɩ woba Efɛɛzɩ

1Apoloosi wɛ Kɔrɛntɩ ḿbʋ́ lɛ, Pɔɔlɩ ñatɩŋnɩ pʋŋ hɔɔlɩŋ taa nɛ ɛkɔɔ ɛtalɩ Efɛɛzɩ. Peeɖe ɛkatɩ Krɩstʋ wayɩ tɩŋɩyaa nabɛyɛ 2nɛ ɛpɔzɩ-wɛ se: «Ɛsɔ ha-mɩ e-Fezuu Kiɖeɖeu alɩwaatʋ ndʋ́ ɩwɛnɩ lidaʋ Krɩstʋ yɔɔ yɔ yaa we?» Paba cosi-i se: «Aayɩ! Wiɖiyi ɖɩtanɩɩ se Fezuu Kiɖeɖeu nakʋyʋ wɛɛ.» 3Ɛlɛ́, Pɔɔlɩ tasɩ-wɛ pɔzʋʋ se: «Sɔnzɩ nzɩ́ palabɩ-mɩ yɔ?» Pocosi-i se: «Yohanɛɛsɩ lɩm sɔʋ sɔnzɩ palabɩ-ɖʋ.» 4Peeɖe eheyi-wɛ se: «Toovenim lɛ, Yohanɛɛsɩ ñalakaɣ Izrɛɛlɩ ñɩma lɩm sɔʋ sɔnzɩ se pɩwɩlɩ se pɛlɛɣzɩ wɛtʋ. Eeheyi-wɛ se ɛ-wayɩ lɛ, nɔɔyʋ kɔŋ, pɛwɛnɩ lidaʋ ɛ-yɔɔ. Ɛnʋ lɛ Yesu.» 5Pɔɔlɩ yɔɔdɩ ḿbʋ́ nɛ panɩɩ lɛ, peyele nɛ palabɩ-wɛ lɩm sɔʋ sɔnzɩ Kɩpaɣlʋ Yesu hɩɖɛ taa. 6Peeɖe Pɔɔlɩ tɩnɩ pɔ-yɔɔ nesi nɛ Fezuu Kiɖeɖeu tii pɔ-yɔɔ nɛ papazɩ yɔɔdʋʋ kʋnʋmɩŋ ndɩ ndɩ nɛ tɔm ndʋ́ tɩlɩnɩ Ɛsɔ cɔlɔ yɔ. 7Paatalɩ ɛzɩ ɛyáa hiu nɛ naalɛ yɔ.

8Pʋwayɩ lɛ, Pɔɔlɩ wolo Yuda ñɩma Ɛsɔ ɖɩsɛyɛ taa nɛ esusi Ɛsɔtɔm kaalɛyɩtʋ. Fenasɩ naadozo ɛɛlaba ḿbʋ́. Eheyaɣ-wɛ Ɛsɔ Kewiyaɣ tɔm nɛ ɛñɩnɩɣ ɛzɩma mbʋ́ ɛɛla nɛ petisi-tʋ yɔ. 9Ɛlɛ́, pa-taa sakɩyɛ la laŋa kpɩzɩŋ nɛ pekizi-tʋ faŋŋ nɛ peniɣziɣ Kɩpaɣlʋ wayɩ tɩŋʋʋ tɔm ɛyáa tɩŋa ɛsɩndaa. Peeɖe Pɔɔlɩ nɛ Krɩstʋ wayɩ tɩŋɩyaa peyebi-wɛ nɛ pekpeɣliɣ ɖama abalʋ weyi payaɣ se Tiraanuusi yɔ e-sukuli taa nɛ esusuu ɛyáa Kɩpaɣlʋ tɔm kɩyakɩŋ tɩŋa. 10Ɛlabɩ ḿbʋ́ pɩnzɩ naalɛ. Pʋ-yɔɔ Yuda ñɩma nɛ Grɛɛkɩ ñɩma mbá paawɛ Aazii egeetiye taa yɔ, patɩŋa payɩ panɩ tɔm ńdʋ́.

Seva pɩyalaa tɔm

11Alɩwaatʋ ńdʋ́ lɛ, Ɛsɔ tɩŋaɣnɩ Pɔɔlɩ yɔɔ nɛ ɛlakɩ hama lakasɩ sɔsɔsɩ. 12Halɩ pakpakɩɣ tokonaa nɛ kɛdɛɛkasɩ mbá potukuni-i yɔ nɛ potukuuni kʋdɔndɩnaa nɛ pɔ-yɔɔ cɛkɩ nɛ aleewaa seɣ pa-wayɩ. 13Peeɖe Yuda ñɩma mbá pɔcɔwaɣ nɛ pɔɖɔɔnʋʋ aleewaa ɛyáa wayɩ yɔ, pakʋyaa ɖɔɖɔ se payaɣ Kɩpaɣlʋ Yesu hɩɖɛ nɛ pɔɖɔɔnɩnɩ aleewaa ɛyáa wayɩ nɛ pɔtɔŋ se: «Yesu weyi Pɔɔlɩ susuu ɛ-tɔm yɔ ɛ-hɩɖɛ taa lɛ, aleewaa mɩ! Điheyiɣ-mɩ se ise ɛyáa panɛ pa-wayɩ!» 14Yuda ñɩma cɔjɔnaa sɔsaa taa lɛlʋ weyi payaɣ se Seva yɔ, ɛ-pɩyalaa lʋbɛ lakaɣnɩ tʋmɩyɛ ńɖɩ́. 15Patalɩ eliikenu nɔɔyʋ tɛ lɛ, ɛ́lɛ́ pɩsɩnɩ-wɛ se: «Yesu lɛ, mansɩm-ɩ nɛ mantɩlɩ mbʋ́ Pɔɔlɩ kɛnaa yɔ. Mɩ yɔ, mɩ lɛ mbá kpem?» 16Peeɖe ekpibi-wɛ nɛ ɛwɩlɩ patɩŋa tɔɔzɩm taañam nɛ pamʋ heŋ nɛ pese yem yem nɛ palɩɩ ndaakpela. 17Efɛɛzɩ ñɩma tɩŋa nɛ Yuda ñɩma nɛ mbá pɛtɛkɛ Yuda ñɩma yɔ panɩ tɔm ńdʋ́ patɩŋa payɩ ḿbʋ́ lɛ, sɔɔndʋ kpa-wɛ nɛ peyele Kɩpaɣlʋ Yesu hɩɖɛ sɛɛ. 18Pa-taa mbá paapazɩ wɛnaʋ lidaʋ Krɩstʋ yɔɔ yɔ, pa-taa sakɩyɛ heyaɣ pa-kɩwɛɛkɩm ɛyáa ɛsɩndaa keɣlee 19nɛ fadɩŋ laɖaa taa sakɩyɛ ñɔkɔnɩ pa-fadɩŋ takayɩsɩ nɛ pañaɣzɩ-sɩ miŋ ɛyáa ɛsɩndaa. Patʋʋzɩ si-liidiye lɛ, ɖɩɖɔwa pɩtɩɩfɛyɩ: ɖɩɩtalɩ ɛzɩ pe-liidiye pɔɔyɩsɩ kutokiŋ nɩɩnʋwa yɔ. 20Ḿbʋ́ pɩtɩŋnɩ Kɩpaɣlʋ ɖoŋ yɔɔ nɛ ɛ-tɔm tɛzɩ cɔʋ siŋŋ.

Ñaɖʋʋ ŋgʋ́ kɩlɩ Efɛɛzɩ yɔ

21Pʋwayɩ lɛ, Pɔɔlɩ la lɩmaɣza se ɛkʋyʋʋ ɛtɩŋnɩ Masedonii nɛ Akayɩ pa-ageeta taa nɛ ewolo Yeruusalɛm. Ɛtɔm se ɛtalaa yɔ, pʋwɛɛ se ewolo ɖɔɖɔ Room nɛ ɛna. 22Peeɖe ɛkʋsɩ mbá pasɩŋaɣnɩ-ɩ tʋmɩyɛ yɔ pa-taa ɛyáa naalɛ nɛ etiyi-wɛ Masedonii nɛ piyele ɛtasɩ caɣʋ alɩwaatʋ cabɩ Aazii egeetiye taa. Ḿbá lɛ Timootee nɛ Eraastɩ.

23Alɩwaatʋ ndʋ́ Pɔɔlɩ wɛ Efɛɛzɩ tɛtʋ taa ḿbʋ́ yɔ, pɩɩkɔnɩ ñaɖʋʋ sɔsɔʋ nakʋyʋ Kɩpaɣlʋ wayɩ tɩŋʋʋ nʋmɔʋ yɔɔ. 24Abalʋ nɔɔyʋ kɛwɛ peeɖe, payaɣ-ɩ se Demetriyuusi, ɛkɛ nɩŋgbacaɣlɩnaa luɖu. Elukaɣ ɛgɔlɩmɩyɛ halɩñɩnɖɛ nɖɩ́ payaɣ se Artemiisi yɔ ɖɩ-ɖɩɣa lɛzɩŋ cikpeŋ nɛ liidiye ñɩ́ɣ́yʋ́ʋ nɛ ɛpɛdɩɣ. Ḿbʋ́ yebina nɛ ɛ nɛ ɛ-tʋmlaɖaa pehiɣ pa-tɩ siŋŋ. 25Nakʋyʋ wiye lɛ, ekpeɣli pa nɛ mbá palakɩ tʋmɩyɛ ńɖɩ́ ɖɩ-lɛzʋʋ yɔ nɛ eheyi-wɛ se: «Taabalaa! Ɩtɛm sɩm se ɖa-tʋmɩyɛ yɔɔ ɖihikiɣ ɖa-tɩ. 26Lɛɛlɛɛyɔ, mɩ-maɣmaɣ ɩnaɣ nɛ ɩnɩɣ nɛ mɩ-nɩŋgbaaŋ ndʋ́ mɩ-Pɔɔlɩ ɛnʋ ɛwɛɛ esusuu Efɛɛzɩ nɛ pɩkpɛndɩnɩ Aazii egeetiye hɔɔlɩŋ sakɩyɛ taa yɔ. Ńdʋ́ lɛ se agɔlɩma wena ɛyáa manɩ pe-nesi yɔ, atɛkɛ pʋyʋ kpem. Tɔm ńdʋ́ ɛcɛtɩɣnɩ ɛyáa sakɩyɛ nɛ paba tisiɣ-tʋ ɖɔɖɔ. 27Manaʋ yɔ, yee ɖɩtakʋyɩ ɖɩsɩŋ tɔm ńdʋ́ tɩ-yɔɔ yɔ, ɖa-tʋmɩyɛ ɖɩnɛ ɖɩsɩɣ tɩnaɣ! Đɔɖɔ lɛ, ɖɛ-ɛgɔlɩmɩyɛ sɔsɔɖɛ Artemiisi nɖɩ́ Aazii ñɩma tɩŋa nɛ ajɛya kpeekpe ɛyáa poluŋuu ɖɩ-tɛɛ yɔ, peniɣziɣ ɖɩ-ɖɩɣa nɛ nɔɔyʋ ɛɛtasɩɣ-ɖɩ kpaɣʋ nɛ ɛ́yáa pʋyʋ!» 28Ɛyáa mbá paakpeɣlaa yɔ, panɩ tɔm ńdʋ́ ḿbʋ́ lɛ, pa-pana kpa siŋŋ nɛ pamakɩ kubusi se: «Efɛɛzɩ ñɩma ɛgɔlɩmɩyɛ Artemiisi kɩlɩnɩ pɩtɩŋa payɩ!» 29Peeɖe pɩñɩŋnɩ Efɛɛzɩ tɛtʋ tɩŋa. Ɛlɛ́, tɩ-taa ñɩma kpa Masedonii ñɩma naalɛ nabɛyɛ: Gayuusi nɛ Aristaarkɩ mbá pa nɛ Pɔɔlɩ pɔɖɔŋaɣ yɔ, nɛ pɔhɔm-wɛ ɖinɖa ɖinɖa nɛ powoni Efɛɛzɩ ñɩma ḿbá pa-ɖikpeɣliye ɖenɖe palakɩ aleɣya yɔ. 30Pɔɔlɩ caɣaɣ se ɛlɩɩ ɛyáa samaɣ ɛsɩndaa. Ɛlɛ́, Krɩstʋ wayɩ tɩŋɩyaa lɛlaa kizini-i. 31Halɩ pɩkpɛndɩnɩ Aazii karɩsɩ sɔsɔsɩ nasɩyɩ nzɩ́ sɩkɛ ɛ-ɛgbaɣdɩnaa yɔ nɛ sɩkʋsɩ ɛyáa se powolo peheyi-i se pɩtaacɩbɩ-ɩ se ewoki ɛyáa samaɣ ɖikpeɣliye taa peeɖe. 32Ɛyáa samaɣ kpeɣlaa lɛ, ɛyáa wɛɛ pokou yem: paa weyi nɛ ɛ-ñɩndʋ. Mbʋ́ pʋyɔɔ yɔ, piliɣtaɣ-wɛ. Pa-taa sakɩyɛ tatasɩ ɖiɣzinaʋ mbʋ́ pʋ-yɔɔ paakpeɣlaa yɔ. 33Peeɖe Yuda ñɩma nabɛyɛ lɩ ɛyáa samaɣ taa nɛ powolo pɛwɛɛtɩ weyi payaɣ se Alɛksandrɩ yɔ tɔm nɛ pɔhɔm-ɩ palɩzɩ ɛyáa tɩŋa ɛsɩndaa se ɛyɔɔdɩnɩ pɔ-nɔɔ. Pʋ-yɔɔ ɛ́lɛ́ kpazɩ nesi se paha-ɩ nʋmɔʋ nɛ ɛyɔɔdɩ. 34Ɛlɛ́, peɖiɣzini se Alɛksandrɩ ɛnʋ, ɛkɛ Yuda tʋ. Pʋ-yɔɔ ɛyáa samaɣ pazɩ kou katɩŋa payɩ se: «Efɛɛzɩ ñɩma ɛgɔlɩmɩyɛ Artemiisi kɩlɩnɩ pɩtɩŋa payɩ!» Pɛwɛɛ kou yɔɔ ḿbʋ́ nɛ pʋkɔɔ pɩtalɩ ɛzɩ ñɩɣtʋ naalɛ yɔ. 35Pɩkɛdaa lɛ, takayaɣ taa mayʋ susi-wɛ nɛ ɛpɔzɩ-wɛ se: «Efɛɛzɩ ñɩma mɩ! Anɩ pɩsɛɣ kedeŋa yɔɔ cɩnɛ se eteɖiɣzini se ɛgɔlɩmɩyɛ sɔsɔɖɛ Artemiisi nɛ ɖɩ-sɩʋ kpelaɣ ŋgá kalɩnɩ ɛsɔdaa nɛ ketii yɔ, ɖɛ-tɛ Efɛɛzɩ ñɩma cɔŋnɩnɩ pa-ɖɩɣa yɔɔ? 36Tɔm ńdʋ́ tɩfɛyɩ kpɛzʋʋ. Pʋ-yɔɔ lɛ, pʋwɛɛ se iyele nɛ mɩ-yɔɔ hɛɛ, ɩtaakpedesi nabʋyʋ taa kaʋ. 37Ɩkɔnɩ ɛyáa panɛ cɩnɛ, ŋgʋ́, patakpaɣ pʋyʋ ɖɛ-ɛgɔlɩmɩyɛ ɖɩɣa taa, pɔtɔyɔɔdɩ ɖɩ-yɔɔ tɔm ɛzaɣ́tʋ natʋyʋ ɖɔɖɔ. 38Yee nɩŋgbacaɣlɩnaa luɖu Demetriyuusi nɛ ɛ-tʋmlaɖaa pa-taa ɛwɛnɩ nɔɔyʋ yɔ, kɩyakɩŋ weyi paɖʋwa se pahʋʋ tɔm yɔ, ɩwɛɛ. Ñʋndɩnaa ñɛwɛɣ i-wiye ɖɔɖɔ. Ɩ-taa nakʋyʋ wiye papɩzɩɣ powolo payaa pʋdʋ! 39Yee ɩwɛnɩ natʋyʋ ɖɔɖɔ yɔ, ɩpɩzɩɣ iwoni-tʋ tɔm ɖɩhʋyɛ nɛ pɔñɔɔzɩ-mɩ-tʋ ɛzɩ paɖʋʋ ɖa-paɣtʋ taa yɔ. 40Pɩtɛkɛ ḿbʋ́, tɔm ndʋ́ tɩtɩŋa tɩlabɩ sɔnɔ yɔ, Room ñɩma kɔŋ pakʋyɩ ɖɔ-yɔɔ se ɖalɩzɩnɩ ñaɖʋʋ nɛ ɖɩkɔɔ ɖihiɣ tɔm sɔsɔtʋ natʋyʋ yem. Mbʋ́ pʋyɔɔ yɔ, ɖɩfɛyɩnɩ natʋyʋ se ɖiiheyi-wɛ mbʋ́ pʋ-yɔɔ ɖikpeɣlaa yɔ.» 41Ɛtɛm-wɛ yɔɔdɩnaʋ ḿbʋ́ lɛ, ɛɖɔɔnɩ ɛyáa samaɣ ŋ́gá.

Currently Selected:

Tʋma Labʋ 19: KABI

Highlight

Copy