Tʋma Labʋ 18

Pɔɔlɩ woba Kɔrɛntɩ

1Pʋwayɩ lɛ, Pɔɔlɩ kʋyɩ Atɛɛnɩ nɛ ewolo Kɔrɛntɩ tɛtʋ taa. 2Peeɖe ɛkatɩ Yuda tʋ nɔɔyʋ, palʋlɩ-ɩ Pɔntɩ egeetiye taa. Payaɣ-ɩ se Akilaasɩ. Ɛ nɛ ɛ-halʋ Prisiili patalʋʋ peeɖe yɔ, piteleɖida. Itaalii ɛjaɖɛ taa palɩnaa, mbʋ́ pʋyɔɔ yɔ, Room wiyaʋ sɔsɔ weyi payaɣ se Kloodi yɔ ɛɛha nɔɔ se pataatasɩ naʋ Yuda tʋ nɔɔyʋ Room tɛtʋ taa. Pɔɔlɩ na-wɛ ḿbʋ́ lɛ, ewolo pɔ-cɔlɔ 3nɛ ɛ nɛ wɛ pɛwɛɛ nɛ palakɩ tʋmɩyɛ. Mbʋ́ pʋyɔɔ yɔ, paakɛ kɩɖanɖɩŋ laɖaa ɖɔɖɔ ɛzɩ ɛnʋ yɔ. 4Paa kɩyakʋ kɩhɛzʋʋ ŋgʋ́ lɛ, Pɔɔlɩ wokaɣ Yuda ñɩma Ɛsɔ ɖɩsɛyɛ taa nɛ ɛ nɛ wɛ nɛ Grɛɛkɩ ñɩma palakɩ lɩmaɣza Yesu tɔm yɔɔ nɛ ɛñɩnɩɣ se petisi-tʋ.

5Silaasɩ nɛ ɛ-taabalʋ Timootee pɔkɔm palɩɩnɩ Masedonii nɛ patalɩ Pɔɔlɩ cɔlɔ Kɔrɛntɩ lɛ, pɩha-ɩ waɖɛ nɛ esusuu Laŋhɛzɩyɛ Tɔm alɩwaatʋ kpeekpe nɛ eheyiɣ Yuda ñɩma ḿbá se Yesu lɛ Weyi Ɛsɔ Lɩzaa Yɔ. 6Ɛlɛ́, paba ñakʋyʋʋ ɛ-yɔɔ nɛ patʋʋ-ɩ. Pʋ-yɔɔ ekpizi-wɛ e-wondu yɔɔ mʋzʋʋ nɛ pɩwɩlɩ se ɛkɔɔlɩ-wɛ nɛ eyebi-wɛ nɛ pa-sʋʋtʋ nɛ eheyi-wɛ se: «Yee ɩkɔm ile yɔ, ɩtɩlɩ ɖeu se mɩ-maɣmaɣ mɩ-cɔlɔ pɩlɩnaa, pɩtatasɩ kɛʋ ma-ñɩndʋ. Pɩkpaɣʋnɩ lɛɛlɛɛyɔ yɔ, mɛnkɛɣnɩ mbá pɛtɛkɛ Yuda ñɩma yɔ pɔ-yɔɔ.»

7Peeɖe ɛkʋyɩ pɔ-cɔlɔ nɛ ewolo abalʋ weyi payaɣ se Tiitiyuusi Yustuusi yɔ ɛ-tɛ. Pɩɩñɔtɩnɩ Yuda ñɩma Ɛsɔ ɖɩsɛyɛ kpam, abalʋ ɛnʋ eluŋaɣ Ɛsɔ tɛɛ. 8Krispuusi weyi ɛkɛ Ɛsɔ ɖɩsɛyɛ taa ñʋʋdʋ yɔ, ɛɛwɛnɩ lidaʋ Kɩpaɣlʋ yɔɔ nɛ pɩkpɛndɩnɩ ɛ-ñɩma tɩŋa payɩ. Kɔrɛntɩ ñɩma sakɩyɛ mbá pewelesaɣ Pɔɔlɩ tɔm yɔ, paawɛnɩ ɖɔɖɔ lidaʋ Kɩpaɣlʋ yɔɔ nɛ palabɩ-wɛ lɩm sɔʋ sɔnzɩ.

9Đoo naayɛ taa lɛ, Kɩpaɣlʋ heyi Pɔɔlɩ ɖoziye taa se: «Taasɔɔndɩ, wɛɛ ŋyɔɔdʋʋ, taasu. 10Mbʋ́ pʋyɔɔ yɔ, ma-maɣmaɣ mɛwɛ ñɔ-cɔlɔ. Nɔɔyʋ ɛɛpɩzɩɣ ɛkpa-ŋ nɛ ɛlabɩ-ŋ kɩdɛkɛdɩm nabʋyʋ. Mbá pɔkɔŋ kɛʋ ma-ñɩma yɔ, pɔɖɔ tɛtʋ tʋnɛ tɩ-taa.» 11Ḿbʋ́ labɩna nɛ Pɔɔlɩ caɣ Kɔrɛntɩ peeɖe pɩnaɣ nɛ hɔɔlʋʋ nɛ ɛwɩlɩɣ ɛyáa Ɛsɔtɔm.

Powoni Pɔɔlɩ wiyaʋ Galiyɔɔ tɛ

12Alɩwaatʋ ndʋ́ Room tʋ weyi payaɣ se Galiyɔɔ yɔ ɛtɔɔ kewiyaɣ Akayɩ egeetiye taa yɔ, tɩ-taa Yuda ñɩma tam nɔɔ nɛ pakʋyɩ Pɔɔlɩ yɔɔ nɛ pakpa-ɩ se powokini-i tɔm ɖɩhʋyɛ. 13Patanɩ-ɩ lɛ, pɔtɔ se: «Abalʋ ɛnɛ, ɛwɩlɩɣ ɛyáa se poluŋ Ɛsɔ tɛɛ luŋuu mbʋ́ yɔ, pɩtɛkɛ ḿbʋ́ paɖʋ paɣtʋ taa.» 14Pɔɔlɩ caɣaɣ se ekuli ɛ-nɔɔ lɛ, Galiyɔɔ maɣmaɣ cosi-wɛ se: «Yuda ñɩma mɩ! Yee ɛzaɣ́tʋ yaa kɩwɛɛkɩm sɔsɔm nabʋyʋ ɛɛlaba yɔ, pʋbʋ, maaɖɔkɩ mɔ-hɔyɛ nɛ mewelesini-mɩ ɛzɩ pʋmʋnaʋ yɔ. 15Ɛlɛ́, ɖenɖe pɩkɛnɩ tɔm hɔm yem tɔm pee nɛ hɩla nɛ mɩ-maɣmaɣ mɩ-paɣtʋ pɔ-yɔɔ yɔ, mɩ-cɔlɔ lɛ. Maahʋʋ pɩtɛ tɔm ńdʋ́!» 16Eheyi-wɛ ḿbʋ́ lɛ, ɛɖɔɔnɩ-wɛ tɔm ɖɩhʋyɛ. 17Peeɖe patɩŋa pakpa pɛ-Ɛsɔ ɖɩsɛyɛ taa ñʋʋdʋ Sɔstɛɛnɩ tɔm ɖɩhʋyɛ peeɖe nɛ papazɩ-ɩ mabʋ. Ɛlɛ́, piteheyi wiyaʋ Galiyɔɔ natʋyʋ.

Pɔɔlɩ kiti Antɩyɔɔsɩ Siirii ɛjaɖɛ taa

18Pɔɔlɩ katasɩ caɣʋ Kɔrɛntɩ peeɖe alɩwaatʋ sakɩyɛ. Pʋwayɩ lɛ, ɛkʋyɩ taabalaa cɔlɔ nɛ ɛ nɛ Prisiili nɛ ɛ-walʋ Akilaasɩ pasʋʋ mɛlɛ se powoki Siirii ɛjaɖɛ taa. Pʋcɔ pɛɖɛɛ lɛ, Pɔɔlɩ kahʋm ɛ-ñʋʋ Sankree, mbʋ́ eɖuuni Ɛsɔ se ɛlakɩ yɔ pʋ-yɔɔ. 19Pɔkɔm patalɩ Efɛɛzɩ tɛtʋ taa lɛ, Pɔɔlɩ yebi-wɛ nɛ ewolo Yuda ñɩma cɔlɔ pɛ-Ɛsɔ ɖɩsɛyɛ taa nɛ ɛ nɛ wɛ palakɩ lɩmaɣza Yesu tɔm yɔɔ. 20Peeɖe paba tendi-i se ɛtasɩ caɣʋ pɔ-cɔlɔ. Ɛlɛ́, ekizi. 21Ɛkʋyɩ pɔ-cɔlɔ se ɛɖɛɣ lɛ, eheyi-wɛ se: «Yee Ɛsɔ etisaa yɔ, manpɩsɩɣ mɩ-cɔlɔ.» Ɛtɛm-wɛ heyuu ḿbʋ́ lɛ, ɛsʋʋ mɛlɛ peeɖe nɛ ɛɖɛɛ. 22Ɛkɔm ɛtalɩ Sezaaree nɛ etii lɛ, ɛkpaɣ nʋmɔʋ nɛ ewolo Yeruusalɛm nɛ ɛsɛɛ Krɩstʋ ŋgbɛyɛ taa ñɩma. Pʋwayɩ lɛ, ewolo Antɩyɔɔsɩ. 23Ɛcaɣ peeɖe alɩwaatʋ cabɩ lɛ, ɛkʋyɩ ɛtɩŋnɩ Galaasii nɛ Frijii pa-ageeta taa nɛ eyele nɛ a-taa Krɩstʋ wayɩ tɩŋɩyaa tɩŋa kpa ɖoŋ pe-lidaʋ wɛnaʋ taa.

Apoloosi woba Efɛɛzɩ nɛ Kɔrɛntɩ

24Nakʋyʋ wiye Yuda tʋ nɔɔyʋ woba Efɛɛzɩ. Paalʋlɩ-ɩ Alɛksandrii tɛtʋ taa, payaɣ-ɩ se Apoloosi. Ɛsɩm Ɛsɔtɔm Takayaɣ taa tɔm siŋŋ nɛ ɛsɩ yɔɔdʋʋ camɩyɛ. 25Ɛɛkpɛlɩkɩ Kɩpaɣlʋ wayɩ tɩŋʋʋ tɔm camɩyɛ nɛ ɛwɛnɩ kpekpeka nɛ esusuu Yesu tɔm nɛ ɛwɩlɩɣ-tʋ tɩ-nasɩ taa. Ɛlɛ́, Yohanɛɛsɩ lɩm sɔʋ sɔnzɩ ɖeke tɔm ɛɛsɩma. 26Ewobi peeɖe ḿbʋ́ lɛ, ɛsʋʋ Yuda ñɩma Ɛsɔ ɖɩsɛyɛ taa nɛ ɛpazɩ Ɛsɔtɔm susuu kaalɛyɩtʋ. Prisiili nɛ ɛ-walʋ Akilaasɩ panɩ ɛyɔɔdaɣ ḿbʋ́ lɛ, payaa-ɩ nɛ pɛkɛzɩ-ɩ hɔɔlʋʋ nɛ pɛtɛzɩ-ɩ kɛdʋʋ ɛzɩma mbʋ́ pʋwɛɛ se ɛyʋ ɛtɩŋ Ɛsɔ yɔ. 27Pʋwayɩ lɛ, ɛɖʋ se ewoki Akayɩ egeetiye taa. Ɛlɛ́, taabalaa yele nɛ pɩlabɩ-ɩ hʋnʋm nɛ pama egeetiye ńɖɩ́ ɖɩ-taa taabalaa takayaɣ se ɛtalaa lɛ, pamʋ-ɩ ɖeu. Ɛtalaa lɛ, ɛwɛɛ wazaɣ siŋŋ mbá pɩtɩŋnɩ Ɛsɔ lootiye yɔɔ nɛ pɛwɛnɩ lidaʋ Yesu yɔɔ yɔ. 28Mbʋ́ pʋyɔɔ yɔ, ekizini Yuda ñɩma tɔm nɛ abalɩtʋ ɛyáa tɩŋa ɛsɩndaa kaŋŋ nɛ ɛtɩŋnɩ Ɛsɔtɔm Takayaɣ taa tɔm yɔɔ nɛ ɛwɩlɩ-wɛ se Yesu lɛ Weyi Ɛsɔ Lɩzaa Yɔ.

Currently Selected:

Tʋma Labʋ 18: KABI

Highlight

Copy