Tʋma Labʋ 10

Ɛsɔ tiyiyu nɔɔyʋ wɩlɩ ɛ-tɩ Kɔɔrnɛɛyɩ

1Abalʋ nɔɔyʋ kɛwɛ Sezaaree, payaɣ-ɩ se Kɔɔrnɛɛyɩ. Ɛɛkɛ Room sɔɔjanaa tikaɣ ŋgá payaɣ se Itaaliyɛɛ yɔ ka-ñʋʋdʋ. 2Ɛlakaɣ mbʋ́ Ɛsɔ liu wɛɛ yɔ nɛ ɛ nɛ ɛ-hɔʋ taa ñɩma tɩŋa payɩ pañaŋ Ɛsɔ. Ɛsɩŋaɣnɩ Yuda ñɩma kʋñɔndɩnaa siŋŋ nɛ ɛpaŋ Ɛsɔ sɛʋ. 3Nakʋyʋ wiye pʋkɔma ɛzɩ ɖanaɣ wɩsɩ wɛlʋʋ yɔ lɛ, eɖozi se ɛna Ɛsɔ tiyiyu nɔɔyʋ sʋ ɛ-tɛ nɛ ɛ́yáa-ɩ se: «Kɔɔrnɛɛyɩ!» 4Peeɖe ɛcɔnɩ tiyiyu ɛnʋ nɛ sɔɔndʋ kpa-ɩ nɛ ɛpɔzɩ-ɩ se: «Kɩpaɣlʋ! Alaafɩya lɛ?» Ɛ́lɛ́ cosi-i se: «Ɛsɔ nɩ ñe-tenduu nɛ ɛna sɩnaʋ mbʋ́ ŋsɩnɩ kʋñɔndɩnaa yɔ, ɛɛsɔʋ ñɔ-yɔɔ. 5Pʋ-yɔɔ lɛ, kʋsɩ ɛyáa lɛɛlɛɛyɔ nɛ ŋtiyi-wɛ Yopee nɛ powolo payaa abalʋ weyi payaɣ se Siimɔɔ nɛ pakʋm-ɩ hɩɖɛ se Pɩyɛ yɔ. 6Ɛwɛ naataŋgbala kanɖʋ weyi payaɣ se Siimɔɔ yɔ ɛ-ɖɩɣa taa teŋgu nɔɔ.»

7Ɛsɔ tiyiyu weyi ɛyɔɔdɩnɩ Kɔɔrnɛɛyɩ yɔ, ɛɖɛwa lɛ, ɛ́lɛ́ tɩkʋsɩ ɛ-tʋmlaɖaa naalɛ nɛ ɛ-sɔɔjanaa mbá ɛ nɛ wɛ pamalɩnɩ ɖama yɔ pa-taa lɛlʋ weyi ɛlakɩ mbʋ́ Ɛsɔ liu wɛɛ yɔ 8nɛ ɛkɛdɩ-wɛ mbʋ́ pɩtɩŋa payɩ pɩlaba yɔ nɛ etiyi-wɛ Yopee.

Fezuu Kiɖeɖeu paɣ́ Pɩyɛ

9Tɛʋ fem-wɛ nʋmɔʋ taa nɛ pɔkɔɔ pɔñɔtɩnɩ Yopee lɛ, Pɩyɛ ñaakpa kuduyuu ñʋʋ taa se ɛsɛɣ Ɛsɔ, pɩɩmaɣ ɛzɩ wɩsɩ siɣu yɔ. 10Pɩkɛdaa lɛ, ñɔɔsɩ kpa-ɩ nɛ ɛyɔɔdɩ se palabɩ-ɩ tɔɔnaɣ. Palakaɣ-kɛ lɛ, eɖozi se 11ɛna ɛsɔdaa tʋlaa nɛ pʋyʋ nɔɔyʋ lɩɩ ɛzɩ pɩsaʋ sɔsɔʋ nakʋyʋ yɔ nɛ pitiki tataa. Patam kɩ-pama naanza taa. 12Kpɩna wena awɛnɩ naŋgbanzɩ naanza naanza yɔ atɩŋa payɩ nɛ tɛtɛ ñɩtʋ tɩŋa nɛ sumasɩ ndɩ ndɩ paawɛnɩ kɩ-taa. 13Peeɖe ɛnɩ pʋyɔɔdʋʋnɩ-ɩ se: «Pɩyɛ! Kʋyɩ ŋkpa nɛ ŋkʋ nɛ ŋtɔɔ!» 14Ɛlɛ́, Pɩyɛ cosi se: «Pɩlɩ! Kɩpaɣlʋ, wiɖiyi mɔntɔtɔɔda mbʋ́ ŋɖʋwa se pataatɔɔ yɔ yaa mbʋ́ pɩfɛyɩ cɩɖɩcɩɖɩ yɔ.» 15Peeɖe pɩtasɩ-ɩ heyuu se: «Taakpaɣ mbʋ́ Ɛsɔ tɔm se pʋwɛ cɩɖɩcɩɖɩ yɔ se pɩfɛyɩ cɩɖɩcɩɖɩ.» 16Pɩla ḿbʋ́ nɛ pʋɖʋ tozo nɛ pɩtɩkʋsɩ pɩsaʋ ŋ́gʋ́ yem nɛ pɩkpazɩ-kʋ ɛsɔdaa.

17Pɩyɛ kɛwɛɛ ɛmaɣzɩɣ se ɛnɩɩ e-ɖoziye tɔbʋʋ. Alɩwaatʋ ńdʋ́ tɩ-taa ɛyáa mbá Kɔɔrnɛɛyɩ ketiyaa yɔ pɔpɔzɩ ka ka nɛ pɔkɔɔ patalɩ Siimɔɔ ɖɩɣa nɔnɔɔ taa. 18Patalaa lɛ, payaa nɛ pɔpɔzɩ se: «Weyi payaɣ se Siimɔɔ nɛ pakʋm-ɩ hɩɖɛ se Pɩyɛ yɔ, ɛ-tɛ lɛ cɩnɛ yaa we?»

19Pɩyɛ maɣzaɣ se ɛnɩɩ e-ɖoziye tɔbʋʋ ḿbʋ́ lɛ, Fezuu Kiɖeɖeu heyi-i se: «Na! Ɛyáa naadozo nabɛyɛ kɔm pañɩnɩɣ-ŋ. 20Kʋyɩ ŋtii nɛ ña nɛ wɛ ɩkpaɣ nʋmɔʋ, taahʋʋ natʋyʋ. Mbʋ́ pʋyɔɔ yɔ, mentiyini-wɛ ña-wayɩ.» 21Peeɖe Pɩyɛ tibi ɛyáa ḿbá pɔ-cɔlɔ nɛ eheyi-wɛ se: «Ma lɛ weyi ɩñɩnɩɣ yɔ. Alaafɩya lɛ?» 22Pocosi-i se: «Sɔɔjanaa ñʋʋdʋ Kɔɔrnɛɛyɩ tiyini-ɖʋ. Ɛkɛ ɛyʋ kʋtʋʋzʋ, ɛñaŋ Ɛsɔ nɛ Yuda ñɩma tɩŋa lɩzɩɣ aseɣɖe kɩbanɖɛ ɛ-yɔɔ. Ɛsɔ tiyiyu nɔɔyʋ heyi-i se ɛya-ŋ nɛ ŋwolo ɛ-tɛ nɛ ŋheyi-i ña-taa tɔm.» 23Peheyi Pɩyɛ ḿbʋ́ lɛ, ɛsʋnɩ-wɛ ɖɩɣa nɛ pasʋʋ ɛ-tɛ puwiye ńɖɩ́.

Pɩyɛ woba Kɔɔrnɛɛyɩ tɛ

Kifema lɛ, ɛ nɛ wɛ pakpaɣ nʋmɔʋ. Yopee taabalaa nabɛyɛ kasɩ-ɩ. 24Kɩyakʋ ŋ́gʋ́ ki-kifemuu patalɩ Sezaaree. Alɩwaatʋ ńdʋ́ lɛ, Kɔɔrnɛɛyɩ kaya ɛ-ñɩma nɛ ɛ-taabalaa nɛ pacaɣ paɖaŋ-wɛ. 25Pɩyɛ talaa se ɛsʋʋ lɛ, Kɔɔrnɛɛyɩ kʋyɩ ɛkatɩ-ɩ nɛ eluŋ ɛ-tɛɛ nɛ ɛsɛɛ-ɩ nɛ ñamtʋ siŋŋ. 26Ɛlɛ́, Pɩyɛ kʋsɩ-ɩ nɛ eheyi-i se: «Kʋyɩ, mɛnkɛ ɛyʋ ɛzɩ ña yɔ.» 27Ɛlɛ́, Kɔɔrnɛɛyɩ kʋyɩ nɛ ɛ nɛ Pɩyɛ papazɩ yɔɔdʋʋ nɛ pasʋʋ ɖɩɣa nɛ pamaɣnɩ ɛyáa sakɩyɛ kpeɣlaa. 28Peeɖe Pɩyɛ heyi-wɛ se: «Ɩtɛm sɩm se pɩtaha Yuda tʋ nʋmɔʋ se ɛ nɛ ɛgɔm nɔɔyʋ paɖʋ taabalɩyɛ yaa ɛsʋʋ pʋdʋ tɛ. Ɛlɛ́, Ɛsɔ ñeheyi-m se mantaakpaɣ nɔɔyʋ se ɛtɛkɛ kɩbanʋ yaa ɛfɛyɩ cɩɖɩcɩɖɩ se powolo ɛ-tɛ. 29Ḿbʋ́ labɩna nɛ itiyaa se paya-m lɛ, mankʋyɩ mɔnkɔɔ, mantapʋtɩ. Lɛɛlɛɛyɔ, mɔnpɔzʋʋ-mɩ se alaafɩya lɛ ɩya-m ḿbʋ́?» 30Ɛlɛ́, Kɔɔrnɛɛyɩ cosi-i se: «Pɩlabɩ kɩyakɩŋ naanza yɔ, maawɛ mɛn-tɛ nɛ mɛnsɛɣ Ɛsɔ, pɩɩmaɣ ɛzɩ ɖanaɣ wɩsɩ wɛlʋʋ yɔ. Pɩkɛdaa lɛ, abalʋ nɔɔyʋ tɩlɩʋ mɛ-ɛsɩndaa yem. Esu wondu nɛ tɩñɩlɩzɩɣ 31nɛ eheyi-m se: ‹Kɔɔrnɛɛyɩ! Ɛsɔ nɩ ñe-tenduu nɛ ɛna sɩnaʋ mbʋ́ ŋsɩŋnɩ kʋñɔndɩnaa yɔ. 32Pʋ-yɔɔ lɛ, tiyi nabɛyɛ Yopee nɛ payaa Siimɔɔ weyi pakʋm-ɩ hɩɖɛ se Pɩyɛ yɔ. Ɛwɛ naataŋgbala kanɖʋ weyi payaɣ-ɩ se Siimɔɔ yɔ ɛ-tɛ teŋgu nɔɔ.› 33Kpaagbaa ḿbʋ́ lɛ, mankʋsɩ ɛyáa se pɔkɔɔ paya-ŋ. Pɩlabɩ-m leleŋ se ŋkɔma. Lɛɛlɛɛyɔ, ɖatɩŋa ɖɩwɛ cɩnɛ Ɛsɔ ɛsɩndaa nɛ ɖiwelesiɣ se ɖɩnɩɩ ndʋ́ ɛnʋ Kɩpaɣlʋ etiyi-ŋ se ŋkɔɔ ŋheyi-ɖʋ yɔ.»

Pɩyɛ yɔɔdɩ tɔm Kɔɔrnɛɛyɩ tɛ

34Kɔɔrnɛɛyɩ yɔɔdɩ ḿbʋ́ lɛ, Pɩyɛ tɔ se: «Toovenim lɛ, lɛɛlɛɛyɔ manawa se Ɛsɔ tɔsɔɔlɩ nabɛyɛ nɛ eyele lɛlaa: 35paa anɩ, ɛtɩɩkɛ le tʋ nɛ ɛñaŋ-ɩ nɛ ɛlakɩ mbʋ́ pʋtʋʋzaa yɔ yɔ, pʋdʋ tɔm kɛdɩɣnɩ-ɩ. 36Ɩtɩlɩ se Ɛsɔ tiyini Yesu Krɩstʋ se ɛkɔɔ eheyi Izrɛɛlɩ ñɩma Laŋhɛzɩyɛ Tɔm. Yesu Krɩstʋ ɛnʋ lɛ ɛyáa tɩŋa payɩ Kɩpaɣlʋ. 37Paa pɩɩla ɛzɩma, ɩtɛm nɩʋ mbʋ́ pɩlabɩ Galilee egeetiye taa nɛ puwolo Yudee ñɩnɖɛ tɩŋa taa alɩwaatʋ ndʋ́ Yohanɛɛsɩ susi ɛyáa lɩm sɔʋ sɔnzɩ tɔm yɔ. 38Ɛsɔ kɛwɛ Nazarɛɛtɩ tʋ Yesu cɔlɔ nɛ eyele e-Fezuu Kiɖeɖeu tii ɛ-yɔɔ nɛ kɩha-ɩ ɖoŋ. Pʋ-yɔɔ ɛcɔwaɣ lona ndɩ ndɩ taa nɛ ɛlakɩ ɛyáa ɖeu nɛ eholuu mbá patɩŋa payɩ pɛwɛ Satanɩ nesi taa yɔ. 39Đɩkɛ mbʋ́ pɩtɩŋa payɩ ɛlabɩ Yeruusalɛm nɛ Yuda ñɩma ɛjaɖɛ tɩŋa taa yɔ pɩ-aseɣɖe tɩnaa. Pakpa-ɩ nɛ pakam-ɩ kaamaŋkaɣ yɔɔ nɛ ɛsɩ. 40Ɛlɛ́, Ɛsɔ fezi-i kɩyakʋ naadozo ñɩŋgʋ wiye nɛ eyele se ɛlɩzɩ ɛ-tɩ nɛ ɛwɩlɩ ɛyáa 41nɛ ɛwɩlɩ mbá Ɛsɔ ɛnʋ ɛɛlɩzaa se pɛkɛ pɩ-aseɣɖe tɩnaa yɔ pe-ɖeke koŋ. Efema lɛ, ɖa nɛ ɩ ɖɩtɔɔ nɛ ɖɩñɔɔ. 42Ɛnʋ ɖʋnɩ-ɖʋ se ɖɩcɔɔ ɖisusi ɛyáa nɛ ɖiheyi-wɛ kpayɩ se ɛ-maɣmaɣ Ɛsɔ lɩzaa se ɛhʋʋnɩ mbá pɛwɛnɩ pɛ-ɛsɛ yɔ nɛ pɩkpɛndɩnɩ sɩɖaa. 43Náyaa tɩŋa lɩzɩ ɛ-aseɣɖe se: weyi ɛwɛɣnɩ lidaʋ ɛ-yɔɔ yɔ, pɩtɩŋɩɣnɩ ɛ-yɔɔ nɛ Ɛsɔ kpeɣ pʋdʋ ɛ-kɩwɛɛkɩm.»

Fezuu Kiɖeɖeu tiba mbá pɛtɛkɛ Yuda ñɩma yɔ pɔ-yɔɔ

44Pɩyɛ tosulidi ɛ-nɔɔ lɛ, Fezuu Kiɖeɖeu tii ɛyáa mbá patɩŋa pewelesaɣnɩ-ɩ yɔ pɔ-yɔɔ. 45Peeɖe pɩlabɩ Yuda ñɩma mbá pɛwɛnɩ lidaʋ Krɩstʋ yɔɔ nɛ paatɩŋ Pɩyɛ wayɩ yɔ piti pɩŋŋ nɛ ɛzɩma mbʋ́ Ɛsɔ ha e-Fezuu Kiɖeɖeu mbá pɛtɛkɛ Yuda ñɩma nɛ eyele kitii pɔ-yɔɔ yɔ. 46Mbʋ́ pʋyɔɔ yɔ, panɩɣaɣ tɔm ndʋ́ ɛyáa mbá pɔyɔɔdaɣ kʋnʋmɩŋ lɛɛŋ nɛ pasaŋ Ɛsɔ yɔ, pɔyɔɔdaɣ yɔ. Pʋ-yɔɔ Pɩyɛ tɔm se: 47«Ɛzɩma papɩzɩɣ pekizini mbá Ɛsɔ ha-wɛ e-Fezuu Kiɖeɖeu ɖɔɖɔ ɛzɩ ɖa yɔ se pataalabɩ-wɛ lɩm sɔʋ sɔnzɩ?»

48Peeɖe ɛha nɔɔ se palabɩ-wɛ lɩm sɔʋ sɔnzɩ Yesu Krɩstʋ hɩɖɛ taa. Pʋwayɩ lɛ, petendi-i se ɛcaɣ pɔ-cɔlɔ kɩyakɩŋ cabɩ nɛ pʋcɔ ekpe.

Currently Selected:

Tʋma Labʋ 10: KABI

Highlight

Copy