Tʋma Labʋ 11
11
Pɩyɛ heyi Yeruusalɛm Krɩstʋ ñɩma mbʋ́ pɩlaba yɔ
1Krɩstʋ tiyiyaa nɛ taabalaa mbá pɛwɛ Yudee egeetiye taa yɔ, panɩwa se mbá pɛtɛkɛ Yuda ñɩma yɔ, petisi ɖɔɖɔ Ɛsɔtɔm. 2Pɩyɛ kɔm ɛpɩsɩ Yeruusalɛm lɛ, Yuda ñɩma mbá pɛwɛnɩ lidaʋ Krɩstʋ yɔɔ yɔ, pakʋyɩ ɛ-yɔɔ 3se: «Pɩlabɩ ɛzɩma nɛ ŋwolo mbá pɛtɛkɛ Yuda ñɩma yɔ pɛ-tɛ nɛ ña nɛ wɛ ɩtɔɔ?»
4Peeɖe Pɩyɛ lɩzɩ-wɛ mbʋ́ pɩtɩŋa payɩ pɩlaba yɔ pʋ-tɔbʋʋ piye piye se: 5«Nakʋyʋ wiye maawɛ Yopee nɛ mɛnsɛɣ Ɛsɔ. Pɩkɛdaa lɛ, monɖozuu se mana pʋyʋ nɔɔyʋ lɩnɩ ɛsɔdaa ɛzɩ pɩsaʋ sɔsɔʋ yɔ, patam pɩsaʋ ŋ́gʋ́ kɩ-pama naanza taa nɛ kitii mɔn-cɔlɔ. 6Mɔncɔnɩ kɩ-taa pɩŋŋ lɛ, manaɣ kpɩna ndɩ ndɩ: naŋgbanzɩ naanza tɩnaa nɛ ñɩtʋ taa kpɩna nɛ tɛtɛ ñɩtʋ nɛ sumasɩ. 7Peeɖe manɩ Pʋyɔɔdʋʋnɩ-m se: ‹Pɩyɛ! Kʋyɩ ŋkpa nɛ ŋkʋ nɛ ŋtɔɔ.› 8Ɛlɛ́, moncosi se: ‹Pɩlɩ! Kɩpaɣlʋ, wiɖiyi mɔntɔtɔɔda mbʋ́ ŋɖʋwa se pataatɔɔ yɔ yaa mbʋ́ pɩfɛyɩ cɩɖɩcɩɖɩ yɔ.› 9Peeɖe pɩtasɩ-m heyuu nɛ ɛsɔdaa se: ‹Taakpaɣ mbʋ́ Ɛsɔ tɔm se pʋwɛ cɩɖɩcɩɖɩ yɔ se pɩfɛyɩ cɩɖɩcɩɖɩ.› 10Pɩla ḿbʋ́ nɛ pʋɖʋ tozo nɛ pʋkʋsɩ pɩtɩŋa yem nɛ pɩkpazɩ ɛsɔdaa. 11Kpaagbaa ḿbʋ́ lɛ, ɛyáa naadozo nabɛyɛ talɩ pasɩŋ ɖɩɣa ŋgá maawɛ ka-taa yɔ kɔ-nɔnɔɔ taa. Petiyi-wɛ nɛ Sezaaree tɛtʋ taa mɔn-cɔlɔ. 12Ɛlɛ́, Fezuu Kiɖeɖeu heyi-m se mankʋyɩ nɛ ma nɛ ɛyáa ḿbá ɖɩɖɛɛ kpaagbaa, mantaahʋʋ man-taa natʋyʋ. Taabalaa loɖo mbá ɩnaɣ ɛzʋnɔ yɔ, ḿbá kʋyɩnɩ Yopee nɛ pasɩ-m nɛ ɖiwolo Kɔɔrnɛɛyɩ tɛ. 13Peeɖe ɛkɛdɩ-ɖʋ ɛzɩma mbʋ́ ɛna Ɛsɔ tiyiyu ɛ-tɛ nɛ ɛ́lɛ́ heyi-i se etiyi ɛyáa Yopee nɛ paya-m yɔ. 14Etiyi-wɛ se paya-m nɛ mowolo meheyi ɛ nɛ ɛ-hɔʋ taa ñɩma tɩŋa payɩ tɔm ndʋ́ tɩyakɩ pa-ñʋʋ yɔ. 15Manpazɩ yɔɔdʋʋ ḿbʋ́ lɛ, Fezuu Kiɖeɖeu tii ɛyáa mbá pewelesaɣnɩ-m yɔ patɩŋa pɔ-yɔɔ ɛzɩ kɩɩcalʋʋ tibu ɖa ɖɔ-yɔɔ yɔ. 16Peeɖe mɔntɔzɩ tɔm ndʋ́ Kɩpaɣlʋ yɔɔdaa yɔ tɩ-yɔɔ. Ńdʋ́ lɛ se: ‹Yohanɛɛsɩ labɩ ɛyáa lɩm sɔʋ sɔnzɩ. Ɛlɛ́, mɩ yɔ, Ɛsɔ kɔŋ-mɩ-sɩ labʋ nɛ e-Fezuu Kiɖeɖeu ɖoŋ.› 17Yee Ɛsɔ ɛlabɩ-wɛ kʋjɔʋ kʋɖʋmʋʋ ŋgʋ́ ɖɩwɛnɩ lidaʋ Kɩpaɣlʋ Yesu Krɩstʋ yɔɔ nɛ ɛlabɩ-ɖʋ yɔ lɛ, ma anɩ nɛ manɖɩkɩ-ɩ nʋmɔʋ?» 18Panɩ tɔm ńdʋ́ lɛ, pɛhɛzɩ pa-tɩ nɛ pasaŋ Ɛsɔ se: «Yee ḿbʋ́, Ɛsɔ yebi ɖɔɖɔ se halɩ mbá pɛtɛkɛ Yuda ñɩma yɔ, pɛlɛɣzɩ wɛtʋ nɛ pehiɣ wezuu!»
Siiri ɛjaɖɛ taa Antɩyɔɔsɩ egeetiye taa Krɩstʋ ñɩma tɔm
19Alɩwaatʋ ndʋ́ pakʋ Etiyɛɛnɩ yɔ, tɩ-taa papazɩ wɛʋ mbá pɛwɛnɩ lidaʋ Krɩstʋ yɔɔ yɔ pa-wayɩ kaŋ kaŋ. Pʋ-yɔɔ pa-taa lɛlaa sewa nɛ powolo Fenisii nɛ lɛlaa Ciiprɩ nɛ lɛlaa Antɩyɔɔsɩ nɛ posusuu Yuda ñɩma ɖeke Ɛsɔtɔm. 20Ɛlɛ́, Ciiprɩ nɛ Siirɛɛnɩ pɛ-tɛtʋ taa ñɩma nabɛyɛ kɛwɛ pa-taa. Paba ñaawobi ɖɔɖɔ Antɩyɔɔsɩ nɛ posusuu Kɩpaɣlʋ Yesu Laŋhɛzɩyɛ Tɔm nɛ pɛkpɛndɩnɩ mbá pɛtɛkɛ Yuda ñɩma yɔ. 21Ɛlɛ́, Fezuu Kiɖeɖeu ha patɩŋa Ɛsɔ ɖoŋ nɛ ɛyáa sakɩyɛ wɛnɩ lidaʋ ɛ-yɔɔ nɛ pɛlɛɣzɩ wɛtʋ.
22Pɩkɛdaa lɛ, Yeruusalɛm Krɩstʋ ŋgbɛyɛ taa ñɩma nɩɩ ḿbʋ́. Peeɖe pakʋsɩ Barnaabaasɩ nɛ petiyi-i Antɩyɔɔsɩ. 23Ɛtalaa lɛ, ɛna ɛzɩma mbʋ́ Ɛsɔ labɩ lootiye mbá pɛwɛnɩ lidaʋ Krɩstʋ yɔɔ yɔ nɛ ɛ-taa hʋlʋmɩ nɛ ɛsazɩ patɩŋa payɩ se pɔ́ɖɔ́kɩ Kɩpaɣlʋ nɛ laŋɩyɛ kʋɖʋmɖɩyɛ kpam. 24Barnaabaasɩ ɛnʋ, ɛɛkɛ ɛyʋ kɩbanʋ nɛ ɛwɛnɩ lidaʋ Ɛsɔ yɔɔ siŋŋ nɛ ɛ́lɛ́ Fezuu Kiɖeɖeu wɛɛ ɛ-yɔɔ. Alɩwaatʋ ńdʋ́ʋ́ ɛyáa sakɩyɛ sɔzɩ mbá pɛwɛnɩ lidaʋ Kɩpaɣlʋ yɔɔ yɔ pɔ-yɔɔ.
25Pʋwayɩ lɛ, Barnaabaasɩ kʋyɩ ewolo Taarsɩ tɛtʋ taa se ɛñɩnɩ Sɔɔlɩ. 26Ɛna-ɩ lɛ, ɛ nɛ ɩ papɩsɩ Antɩyɔɔsɩ nɛ pɛwɛɛ peeɖe pɩnaɣ nɛ kɛ-tɛɛ pilim Krɩstʋ ŋgbɛyɛ taa ñɩma cɔlɔ nɛ pawɩlɩɣ ɛyáa sakɩyɛ ɛzɩma mbʋ́ pɔɖɔ Ɛsɔ nʋmɔʋ taa yɔ. Antɩyɔɔsɩ peeɖe pacalɩ-wɛ kʋm hɩɖɛ se Krɩstʋ ñɩma.
27Alɩwaatʋ ńdʋ́ tɩ-taa náyaa nabɛyɛ kʋyɩ Yeruusalɛm nɛ powolo Antɩyɔɔsɩ. 28Peeɖe Fezuu Kiɖeɖeu kʋsɩ pa-taa lɛlʋ weyi payaɣ se Agaabusi yɔ nɛ eheyi-wɛ se ñɔɔsɩ sɔsɔsɩ nasɩyɩ kɔŋ lɩʋ ɛjaɖɛ kpeekpe yɔɔ.
Toovenim lɛ, meheyiɣ-mɩ se sɩlɩ alɩwaatʋ ndʋ́ Kloodi kɛ Room wiyaʋ sɔsɔ yɔ tɩ-taa. 29Pʋ-yɔɔ palabɩ lɩmaɣza se paa pa-taa weyi ɛha mbʋ́ ɛpɩzɩɣ yɔ nɛ pasɩnɩ taabalaa mbá pɛwɛ Yudee yɔ. 30Pala ḿbʋ́ ɖɔɖɔ nɛ pakpaɣ mbʋ́ pahawa yɔ nɛ paɖʋzɩ Barnaabaasɩ nɛ Sɔɔlɩ pe-nesi taa se powoni pɛcɛlɩ Yudee Krɩstʋ ŋgbɛyɛ taa sɔsaa.
Currently Selected:
Tʋma Labʋ 11: KABI
Highlight
Share
Copy
Want to have your highlights saved across all your devices? Sign up or sign in
