1 Pɩyɛ 3
3
Halaa nɛ pa-walaa pɔ-tɔm
1Mɩ halaa lɛ, pʋwɛɛ se paa mɩ-taa weyi ɛña ɛ-walʋ. Yee ɩlakɩ ḿbʋ́ yɔ, mɩ-taa mbá pa-walaa kiziɣ Ɛsɔtɔm yɔ, panaɣ mɩ-ɖɔnɛ kɩbanɖɛ ḿbʋ́ lɛ, pɛwɛnɩ lidaʋ Ɛsɔ yɔɔ, paa iteheyi-wɛ-tʋ. 2Mbʋ́ pʋyɔɔ yɔ, panaɣ ɛzɩma mbʋ́ mɩ-ɖɔnɛ wɛ ɖeu yɔ nɛ ɛzɩma mbʋ́ iseɣ Ɛsɔ yɔ. 3Ɩtaanɩɩnɩ tomnaɣ yɔɔ ajana ñɩlɩ ñɩlɩ. Ana lɛ ñɔsɩ hɔkʋʋ nɛ sika nɩŋgbacaɣlɩnaa nɛ sika lɩtʋ pɛ-lɛʋ nɛ wondu kɩbandʋ suu. 4Ɛlɛ́, ɩnɩɩnɩ mɩ-laŋa canʋʋ. Ajana ana, aacadɩɣ kaʋ. Ana lɛ mi-leleŋ nɛ mɩ-hɛɛ pɛ-wɛtʋ. Ḿbʋ́ wɛnɩ wazaɣ siŋŋ Ɛsɔ ɛsɩndaa. 5Ḿbʋ́ ɖooo lɔŋ taa halaa mbá paawɛnɩ lidaʋ Ɛsɔ yɔɔ nɛ pataɣ-ɩ liu yɔ, pacanaɣ pa-tɩ: pañaŋaɣ pa-walaa. 6Pa-taa lɛlʋ yɔ Saara. Ɛnɩɣaɣnɩ ɛ-walʋ Abraham nɛ ɛyaɣ-ɩ se ɛ-caa. Yee ɩlakɩ mbʋ́ pʋwɛ ɖeu yɔ nɛ nabʋyʋ ɛɛkpaɣ-mɩ sɔɔndʋ yɔ, ɩpɩsɩ e-liɖe taa ñɩma.
7Mɩ walaa lɛ, ḿbʋ́ ɖɔɖɔ pʋwɛnɩ-mɩ: pʋwɛɛ se paa weyi ɛ́ɖɔ́kɩ ɛ-halʋ camɩyɛ. Ɩtɩlɩ se halaa fɛyɩ ɖoŋ ɛzɩ mɩ yɔ. Ɩɖʋ-wɛ hɩɖɛ, mbʋ́ pʋyɔɔ yɔ, wezuu ŋgʋ́ Ɛsɔ ha-mɩ falaa yɔ, mɩ nɛ wɛ ɛha-kʋ. Yee ɩlakɩ ḿbʋ́ yɔ, nabʋyʋ ɛɛcɛyɩɣ-mɩ mɩ-Ɛsɔ sɛʋ taa.
Pʋwɛɛ se ɖɩla kɩbandʋ
8Ndʋ́ mɛntɛzɩɣnɩ yɔ lɛ se: mɩtɩŋa payɩ ɩwɛnɩ lɩmaɣza kʋɖʋma, ɩwɛnɩ ɖɔɖɔ hɔyɛ kʋɖʋmɖɩyɛ. Ɩsɔɔlɩ ɖama ɛzɩ Krɩstʋ ñɩma sɔɔlʋʋ ɖama yɔ. Ɩmaɣzɩ ɖama yɔɔ siŋŋ nɛ itisi mɩ-tɩ ɖama tɛɛ. 9Ɩtaakpa ɖama kɩmɩyɛ. Nɔɔyʋ ɛtʋ-mɩ lɛ, ɩtaatʋʋ-ɩ. Ɛlɛ́, itendi Ɛsɔ se ɛ́wazɩ pʋdʋ yɔɔ. Mbʋ́ pʋyɔɔ yɔ, ɛya-mɩ se ɩla ḿbʋ́ nɛ ɛ́wazɩ mɩ-yɔɔ ɛzɩ ɛɖʋʋ yɔ. 10Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Yee nɔɔyʋ ɛsɔɔlaa se ɛcaɣ wezuu camɩyɛ
nɛ ɛwɛɛ laŋhʋlʋmɩyɛ taa yɔ,
pʋwɛɛ se eyele ɛzaɣ́tʋ tɔm yɔɔdʋʋ lɛlaa yɔɔ
nɛ eyele ɖɔɖɔ cɛtʋʋ.
11Pʋwɛɛ se pʋdʋ ɛha ɛzaɣ́tʋ siɣ́ye nɛ ɛla mbʋ́ pʋwɛ ɖeu yɔ.
Ɛwɛɛ ñɩnʋʋ yɔɔ se ɛyáa ɛwɛɛ laŋhɛzɩyɛ taa.
12Mbʋ́ pʋyɔɔ yɔ, Kɩpaɣlʋ cɔŋnɩ mbá patʋʋzɩ ɛ-ɛsɩndaa yɔ pɔ-yɔɔ.
Ɛnɩɣnɩ-wɛ alɩwaatʋ ndʋ́ petendiɣ-i yɔ.
Ɛlɛ́, ɛɛnaɣ ɛzaɣ́tʋ laɖaa nɛ ɛsɩyɛ.»
13Yee mɩ-ɛsɛ ɛsɛnɩ mbʋ́ pʋwɛ ɖeu yɔ pɩ-labʋ lɛ, anazɩɣ-mɩ yɔ? Nɔɔyʋ fɛyɩ. 14Paa nɔɔyʋ ɛtɩɩɖʋʋ-mɩ kʋñɔŋ se ɩlakɩ mbʋ́ pʋtʋʋzaa yɔ yɔ, ɩkɔŋ hiɣu mɩ-tɩ! Sɔɔndʋ ɛtaakpa-mɩ nɛ ɛyáa. Pɩtaaliɣti-mɩ ɖɔɖɔ. 15Ɛlɛ́, ɩɖʋ mɩ-taa se Krɩstʋ lɛ Kɩpaɣlʋ nɛ ɩɖʋ-ɩ hɩɖɛ. Ɩɖaŋ kpam nɛ yee nabɛyɛ ɩpɔzɩ-mɩ se pɩlabɩ ɛzɩma nɛ ɩtaɣ-ɩ liu lɛ, 16icosi-wɛ nɛ nɔɔ kɩbaŋga nɛ ñamtʋ. Mɩ-taa ɛwɛɛ ɖeu nɛ fɛyɛ kpa mbá pakʋyʋʋ mɩ-yɔɔ nɛ pɛwɛɛkɩɣ mɩ-hɩla se mɩ nɛ Krɩstʋ ɩkpɛndaa yɔ. 17Yee Ɛsɔ ɛsɔɔlɩna se ɩtɔɔ kʋñɔŋ mɩ-camɩyɛ lakasɩ yɔɔ yɔ, pɩkɩlɩ wee wee se ɩtɔɔ-kʋ sɩ-yɔɔ ɛzɩ ɩɩtɔɔ-kʋ mɩ-kɩwɛɛkɩm yɔɔ yɔ.
Krɩstʋ wabɩyɛ tɔm
18Toovenim lɛ, Krɩstʋ maɣmaɣ sɩbɩ ɛyáa kɩwɛɛkɩm yɔɔ kpaagbaa sɩbʋ. Ɛnʋ weyi ɛtʋʋzaa yɔ, ɛsɩbɩ mbá ɖa ɖɩtatʋʋzɩ yɔ ɖɔ-yɔɔ se ɛpɩzɩ ewoni-ɖʋ Ɛsɔ cɔlɔ. Pakʋ-ɩ nɛ ɛsɩ ɛzɩ ɛyáa sɩkʋʋ yɔ. Ɛlɛ́, Fezuu Kiɖeɖeu fezi-i. 19Halɩ Fezuu ŋ́gʋ́ kʋ-yɔɔ ɛtɩŋnaa nɛ ewolo esusi Ɛsɔtɔm ɖɔɖɔ kalɩzasɩ nzɩ́ sɩɩwɛ salaka taa yɔ. 20Ńzɩ́ lɛ mbá pataaña Ɛsɔ alɩwaatʋ ndʋ́ tɩ-taa Nowee sakaɣ kpɩyʋʋ sɔsɔʋ yɔ pa-kalɩzasɩ. Alɩwaatʋ ńdʋ́ tɩ-taa Ɛsɔ kɔɖɔkɩ ɛ-hɔyɛ. Ɛlɛ́, ɛyáa pazɩ yem kasʋnɩ kɩ-taa nɛ pɛwɛɛ lɩm yɔɔ nɛ pɩya pa-ñʋʋ. Paakpɛndɩ ɛyáa lutozo. 21Pʋnɛ pɩtɩŋa payɩ pʋwɛ ɛzɩ lɩm sɔʋ sɔnzɩ nzɩ́ palabɩ-mɩ nɛ sɩya mɩ-ñʋʋ lɛɛlɛɛyɔ yɔ. Patalabɩ-mɩ-sɩ se sɩñalɩ mɩ-yɔɔ azuluma. Ɛlɛ́, sɩ-yɔɔ ɩtɩŋɩɣna nɛ itendi Ɛsɔ se eyele nɛ mɩ-taa wɛɛ ɖeu. Yesu Krɩstʋ fem yɔɔ Ɛsɔ tɩŋɩɣna nɛ ɛya mɩ-ñʋʋ. 22Ɛnʋ kpanɩ ɛsɔdaa nɛ ɛcaɣ Ɛsɔ cɔlɔ lone kɩbanɖɛ taa. E-nesi taa Ɛsɔ ɖʋzɩ e-tiyiyaa nɛ mbʋ́ pɩtɩŋa payɩ pʋwɛnɩ ɖoŋ ɛsɔdaa yɔ.
Currently Selected:
1 Pɩyɛ 3: KABI
Highlight
Share
Copy
Want to have your highlights saved across all your devices? Sign up or sign in
