1 Pɩyɛ 2
2
1Pʋ-yɔɔ lɛ, iyele kɩwɛɛkɩm tɩŋa payɩ labʋ: kañatʋ nɛ cɛtʋʋ nɛ tɛɛ nɛ pʋ-yɔɔ lakasɩ nɛ ɛsɩsɛmɩyɛ nɛ lɛlaa tɔm ɛzaɣ́tʋ yɔɔdʋʋ. 2Ɛsɔtɔm ɛlabɩ-mɩ liu tam ɛzɩ hɩlɩm lakʋʋ piya ajamaa liu yɔ nɛ pɩtɩŋnɩ tɩ-yɔɔ nɛ ɩtɛzɩ pɩʋ nɛ pʋkɔɔ pɩya mɩ-ñʋʋ. 3Mbʋ́ pʋyɔɔ yɔ, ɩtɛm naʋ se Kɩpaɣlʋ lɛ kɩbanʋ.
Mbá pɛwɛnɩ lidaʋ yɔ, ḿbá lɛ Ɛsɔ ñɩma
4Ɩkpɩtɩnɩ-ɩ. Ɛnʋ lɛ pɩyɛ nɖɩ́ ɖɩhaɣ wezuu yɔ, ɛyáa kizi-ɖɩ se ɖɩɩwazɩɣ pʋyʋ. Ɛlɛ́, Ɛsɔ ñalɩzɩ-ɖɩ se ńɖɩ́ kɩlɩnɩ wazaɣ ɛ-ɛsɩndaa. 5Pʋwɛɛ se ɩwɛɛ ɛzɩ pɛɛ wena awɛ wezuu yɔ. Ana Ɛsɔ kpakɩɣ nɛ ɛtɩŋnɩ e-Fezuu Kiɖeɖeu yɔɔ nɛ ɛmanɩ ɛ-ɖɩɣa. Peeɖe ɩkɛɣ cɔjɔnaa mbá ɛlɩzɩ-wɛ nɛ patɩŋɩɣnɩ Yesu Krɩstʋ yɔɔ nɛ palaɣ-ɩ kɩlaŋ weyi paanaɣ nɛ e-liu wɛɛ-ɩ yɔ. 6Pʋwɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Ɩnaɣ!
Malɩzɩ pɩyɛ nɖɩ́ ɖɩkɩlɩ wazaɣ yɔ nɛ
mansɩɩ-ɖɩ Siiyɔɔ tɛtʋ taa
se ɖɩkɛ pɩyɛ sɔsɔɖɛ.
Weyi ɛwɛɣnɩ lidaʋ ɖɩ-yɔɔ yɔ,
ɛɛkaɣ fɛyɛ tɔɔʋ.»
7Mbá mɩ ɩwɛnɩ lidaʋ Kɩpaɣlʋ yɔɔ yɔ, ɖɩwɛ-mɩ wazaɣ siŋŋ. Piyele mbá pɛfɛyɩnɩ lidaʋ ɛ-yɔɔ yɔ, pʋwɛ-wɛ ɛzɩ pamaʋ Ɛsɔtɔm Takayaɣ taa yɔ. Pamawa se:
«Pɩyɛ nɖɩ́ kuduyiŋ mayaa kpaɣaɣ pɔlɔ yɔ,
ńɖɩ́ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ.»
8Pamawa ɖɔɖɔ se:
«Ńɖɩ́ tuuluuni ɛyáa,
ńɖɩ́ lɛ ɛwaɣ ŋgá kɛpɛɖɩɣ-wɛ yɔ.» Đituuli-wɛ, mbʋ́ pʋyɔɔ yɔ, paatisiɣ Ɛsɔtɔm. Ḿbʋ́ pɩɩtɩɩɖʋ ɖooo lɔŋ se pɩlabɩ-wɛ.
9Piyele mɩ yɔ, mɩ lɛ liɖe nɖɩ́ Ɛsɔ lɩzaa yɔ ɖɩ-taa ñɩma. Ɩkɛ wiyaʋ sɔsɔ cɔjɔnaa. Mɩ lɛ Ɛsɔ ɛjaɖɛ taa ñɩma, mɩ-ñʋʋ ɛyaba. Mɩ ɛlɩzɩ cɩkpɛndʋʋ taa nɛ ewoni ɛ-ñalɩmɩyɛ nɖɩ́ ɖɩkɩlɩ pɩtɩŋa payɩ yɔ ɖɩ-taa se isusi ɛ-tʋma sɔsɔna tɔm. 10Đooo mbá mɩ ɩtaakɛ liɖe kʋɖʋmɖɩyɛ taa ñɩma yɔ, lɛɛlɛɛyɔ, ɩpɩsɩ ɛ-ñɩma. Đooo mbá mɩ Ɛsɔ taana mɩ-pʋtɔdɩyɛ yɔ, lɛɛlɛɛyɔ, ɛna mɩ-pʋtɔdɩyɛ.
Ɖɩwɛɛ ɖe-wezuu caɣʋ taa ɛzɩ Ɛsɔ tʋmlaɖaa yɔ
11Mɛ-ɛgbaɣdɩnaa! Ɩkɛ agɔmaa nɛ nʋmɔɖɔnaa kedeŋa yɔɔ cɩnɛ. Pʋ-yɔɔ lɛ, ɩñaɣ pana nɛ ɩɖɔkɩ mɩ-tɩ nɛ mɩ-maɣmaɣ mɩ-wɛtʋ ɛtaahɔm-mɩ nɛ ɩla mbʋ́ ɩtaasɔɔlɩ yɔ. 12Ɩwɛnɩ wɛtʋ kɩbandʋ mbá paañaŋ Ɛsɔ yɔ pɔ-cɔlɔ. Yee ɩlabɩ ḿbʋ́ yɔ, paa pakʋyʋʋ mɩ-yɔɔ se ɩkɛ kɩdɛkɛdɩm laɖaa yɔ, pɩkɛɣnɩ-wɛ kɩcɛyʋʋ nɛ pɔyɔɔdɩnɩ pɔ-nɔɔ se ɩlabɩ camɩyɛ nɛ pasa Ɛsɔ kɩyakʋ ŋgʋ́ ɛkɔŋ yɔ.
13Kɩpaɣlʋ yɔɔ lɛ, pʋwɛɛ se ɩña mbá patɩŋa payɩ pɔcɔŋnɩ mɩ-yɔɔ yɔ. Kajalaɣ lɛ, ɩña ɛjaɖɛ ñʋʋdʋ. Ɛnʋ cɔŋnɩnɩ pɩtɩŋa payɩ pʋ-yɔɔ. 14Ɩña ɖɔɖɔ ageeta ñʋndɩnaa mbá ɛlɩzaa se pɔhɔ kɩdɛkɛdɩm laɖaa nɩŋgbaaŋ nɛ payɩɣyɩ mbá palakɩ camɩyɛ yɔ. 15Mbʋ́ pʋyɔɔ yɔ, Ɛsɔ liu wɛɛ se ɩwɛnɩ wɛtʋ kɩbandʋ. Peeɖe kɩmɛlɛmɩŋ, ñʋʋ taa fɛyɩ tɩnaa mbá pɔhɔŋnɩ-mɩ tɔm yɔ, panaɣ-tʋ nɛ posu pe-ɖeɖe ɖiɣ ɖiɣ. 16Ɩwɛɛ ɛzɩ ɛyáa mbá pɛwɛ pa-tɩ yɔɔ yɔ. Ɩtaawanɩ mɩ-tɩ yɔɔ wɛʋ ḿbʋ́ nɛ ɩla ɛzaɣ́tʋ, ɛlɛ́, pʋwɛɛ se ɩwɛɛ ɛzɩ Ɛsɔ yomaa yɔ. 17Ɩɖʋ ɛyáa tɩŋa payɩ hɩɖɛ. Ɩsɔɔlɩ mɩ-taabalaa Krɩstʋ ñɩma. Ɩña Ɛsɔ. Ɩɖʋ ɛjaɖɛ ñʋʋdʋ hɩɖɛ.
Ɖɩla ɛzɩ Krɩstʋ labʋ yɔ
18Mɩ tʋmlaɖaa lɛ, pʋwɛɛ se iluzi mɩ-tɩ mɩ-caanaa tɛɛ nɛ ɩñam-wɛ siŋŋ. Ɩtaaña mbá pɛwɛ ɖeu nɛ pɔ-tɔm fɛyɩ kaɖɛ yɔ pe-ɖeke. Ɛlɛ́, ɩña ɖɔɖɔ mbá pɔ-tɔm wɛ kaɖɛ yɔ. 19Ɛsɔ ñam yɔɔ lɛ, pʋwɛ ɖeu se ɛyʋ etisi nɛ ɛtɔɔ kʋñɔŋ ɖulum. 20Yee ɩlabɩ kɩdɛkɛdɩm nɛ pamakɩ-mɩ lɛ, ɛbɛ pɩsɛɣ-mɩ? Ɛlɛ́, yee ɩlakɩ mbʋ́ Ɛsɔ liu wɛɛ yɔ nɛ pamakɩ-mɩ ɖulum nɛ iikiziɣ yɔ, pɩkɛdɩɣnɩ-ɩ. 21Ḿbʋ́ Ɛsɔ ɖʋwa se ɩla. Mbʋ́ pʋyɔɔ yɔ, Krɩstʋ ñalabɩ kʋñɔŋ ɖɔɖɔ mɩ-yɔɔ nɛ ɛwɩlɩ-mɩ se ɩla ɛzɩ ɛnʋ yɔ nɛ ɩtɩŋ ɛ-nʋmɔʋ taa. 22Ɛtala kɩwɛɛkɩm nabʋyʋ. Wiɖiyi patanɩɩ ɛ-nɔɔ taa cɛtɩm tɔm natʋyʋ. 23Patʋwaɣ-ɩ, ɛlɛ́, ɛtatʋʋ nɔɔyʋ. Panazaɣ-ɩ, ɛlɛ́, etoholini nɔɔyʋ. Ɛsɔ weyi ɛhʋʋ tɔm nɛ toovenim yɔ, e-nesi taa ɛɖʋzɩ ɛ-tɩ. 24Pakam-ɩ kaamaŋkaɣ yɔɔ lɛ, ɛmʋ ɖa-kɩwɛɛkɩm nɛ pʋwɛɛ ɛ-yɔɔ. Ɛlabɩ ḿbʋ́ se ɖɩsɩ ɖa-kɩwɛɛkɩm labʋ taa nɛ ɖɩwɛɛ wezuu nɛ ɖɩla mbʋ́ pʋtʋʋzaa yɔ. Ɛ-kɩcɩkpɩŋ yɔɔ pɩtɩŋnaa nɛ mɩ-yɔɔ cɛ. 25Đooo lɛ, ɩɩwɛ ɛzɩ heŋ weyi ileba yɔ. Ɛlɛ́, lɛɛlɛɛyɔ ɩpɩsaa ɩkɔɔ Krɩstʋ ɛnʋ ɛ-cɔlɔ. Ɛnʋ lɛ ɖiyiyu weyi ɛcɔŋnɩ mɩ-yɔɔ yɔ.
Currently Selected:
1 Pɩyɛ 2: KABI
Highlight
Share
Copy
Want to have your highlights saved across all your devices? Sign up or sign in
