1 Kɔrɛntɩ 9
9
Pɔɔlɩ heyi ɛyáa Ɛsɔtɔm heyuu mbʋ́ yɔ
1Ma yɔ, mɛnfɛyɩ man-tɩ yɔɔ yaa we? Mɛntɛkɛ Krɩstʋ tiyiyu naa we? Mantana ɖa-Kɩpaɣlʋ Yesu yaa we? Ɩtɛkɛ Kɩpaɣlʋ tʋmɩyɛ nɖɩ́ malaba yɔ ɖɩ-kɛzɛɣa naa we? 2Paa lɛlaa ɛtakpaɣ-m se mɛnkɛ Krɩstʋ tiyiyu yɔ, pʋwɛɛ se mɩ mɩkpaɣ-m se mɛnkɛ-ɩ. Mbʋ́ pʋyɔɔ yɔ, mɩ nɛ Kɩpaɣlʋ mɩ-kpɛndʋʋ taa lɛ, mɩ lɛ mbʋ́ pɩwɩlɩɣ toovenim se malabɩ Krɩstʋ tiyiyu tʋmɩyɛ yɔ.
3Mbá pɛkpɛzɩɣnɩ-m yɔ, mɔnpɔzʋʋ-wɛ se: 4pɩtamʋnɩ se ɩha-m mbʋ́ mɔntɔɔ nɛ mɔñɔɔ tʋmɩyɛ nɖɩ́ malakɩ yɔ ɖɩ-yɔɔ yaa we? 5Pɩtamʋnɩ se mankpaɣ Yesu ŋgbɛyɛ taa halʋ nɛ ma nɛ ɩ ɖɩɖɔŋ nʋmɔʋ ɛzɩ e-tiyiyaa lɛlaa nɛ Kɩpaɣlʋ newaa nɛ Pɩyɛ palakʋʋ yɔ yaa we? 6Ɛzɩ ma nɛ Barnaabaasɩ ɖe-ɖeke pɩwɛnɩ se ɖɩla tʋmɩyɛ nɛ ɖɩcɔnɩ ɖa-tɩ yɔɔ yaa we? 7Alakɩ sɔɔjatʋ nɛ paahɛyɩɣ-ɩ? Asɔʋ tɩʋ nɛ ɛɛtɔkɩ ki-pee? Aɖiyiɣ wondu nɛ ɛɛñɔʋ tɩ-naalɩm?
8Pɩtɛkɛ mbʋ́ ɛyáa lakɩ yɔ, pi-ɖeke pʋ-yɔɔ mɔyɔɔdʋʋ ḿbʋ́. Ɛlɛ́, paɖʋ Mooyiizi paɣtʋ taa ḿbʋ́ ɖɔɖɔ. 9Mbʋ́ pʋyɔɔ yɔ, paɖʋ tɩ-taa se: «Nɔ weyi ɛmakɩ mɩla yɔ#9.9 Nɔ weyi ɛmakɩ mɩla yɔ: Izrɛɛlɩ ñɩma tɛ lɛ, naŋ makɩnɩ mɩla. Ɩfɛyɩɣ a-yɔɔ nɛ pee lɩɣ. Ɩcɔnɩ pɩtɛ anjaʋ nɛ ɩna., paahɔkʋʋ ɛ-nɔɔ se ɛtaatɔɔ.» Naŋ yɔɔ Ɛsɔ maɣzaa nɛ ɛyɔɔdɩ yaa 10ɖɔ-yɔɔ ɖeke ɛmaɣzɩɣ nɛ ɛyɔɔdʋʋ ḿbʋ́? Toovenim lɛ, ɖɔ-yɔɔ pama-tʋ. Pʋwɛɛ se weyi ɛhayɩɣ nɛ weyi ɛmakɩ mɩla yɔ, pataa liu se pɔkɔŋ hiɣu pe-ɖeɖe. 11Đisusi-mɩ Ɛsɔtɔm nɛ tɩwɛɛ mɩ-taa ɛzɩ poɖuu ɖomaɣ hayɩm taa yɔ. Pʋ-yɔɔ lɛ, ɖɩɩɖɛlɛsɩɣ niye alɩwaatʋ ndʋ́ ɖɩpɔzʋʋ-mɩ se ɩha-ɖʋ mbʋ́ ɖɩcakɩnɩ wezuu yɔ. 12Yee Ɛsɔtɔm susiyaa lɛlaa ɩwɛnɩ waɖɛ se pɔtɔɔ pɛ-Ɛsɔtɔm susuu yɔɔ lɛ, ɖɩfɛyɩnɩ waɖɛ nɛ pɩkɩlɩ-wɛ yaa we?
Paa ḿbʋ́ yɔ, ɖɩtɔpɔzɩ-mɩ se ɩsɩnɩ-ɖʋ. Ɛlɛ́, ɖitisaa nɛ ɖɩla kʋñɔŋ pɩtɩŋa pɩ-taa se ɖa-lakasɩ nasɩyɩ ɛtaaɖɩɣ ɛyáa nʋmɔʋ se pataanɩɩ Krɩstʋ Laŋhɛzɩyɛ Tɔm. 13Ɩnawa se mbá palakɩ Ɛsɔ ɖɩɣa taa tʋmɩyɛ yɔ, pa-tʋmɩyɛ yɔɔ pɔtɔkɩ. Mbá paba ñalaɣ yɔ, kɩlaʋ ŋ́gʋ́ kɩ-taa pehikiɣ pɔtɔkɩ ɖɔɖɔ. 14Ḿbʋ́ ɖɔɖɔ Kɩpaɣlʋ ɖʋwa se mbá posusuu Laŋhɛzɩyɛ Tɔm yɔ, pɩtɩŋnɩ mbá posusuu-wɛ-tʋ yɔ pɔ-yɔɔ nɛ pehiɣ pɔtɔɔ.
15Paa ḿbʋ́ yɔ, mɔntɔpɔzɩ nɔɔyʋ pʋyʋ. Ndʋ́ mamawa yɔ, mantama se ɩha-m pʋyʋ. Mbʋ́ pʋyɔɔ yɔ, pɩkɩlɩ wee wee se mansɩ ɛzɩ maasʋlʋmɩ nɔɔyʋ pʋyʋ yɔ: nɔɔyʋ ɛɛkaɣ wɛɛkʋʋ mbʋ́ malabɩ falaa nɛ mankʋndʋʋnɩ-pʋ yɔ. 16Ŋgʋ́, Laŋhɛzɩyɛ Tɔm susuu tɛkɛnɩ-m mbʋ́ mankʋndʋʋna yɔ. Mbʋ́ pʋyɔɔ yɔ, Ɛsɔ ɖʋnɩ-m se monsusi-tʋ. Yee montosusi-tʋ yɔ, eyeki nɛ pɩnɩ-m siŋŋ. 17Yee ma-maɣmaɣ maasɔɔlɩna se malakɩ tʋmɩyɛ ńɖɩ́ yɔ, maaɖaŋaa se pɛhɛyɩ-m. Ɛlɛ́, ɛzɩma mbʋ́ paɖʋ-m-ɖɩ kʋɖʋʋ lɛ, pɩkɛnɩ-m kɩcɛyʋʋ se malabɩ-ɖɩ. 18Man-kɩhɛyʋʋ lɛ ŋgʋ́ yɔ? Ŋ́gʋ́ lɛ waɖɛ nɖɩ́ pɩha-m se monsusuu Laŋhɛzɩyɛ Tɔm falaa yɔ. Maapɔzʋʋ nɔɔyʋ se ɛlabɩ-m mbʋ́ pʋmʋnaa se palabɩ-m tɩ-yɔɔ yɔ.
19Paa mɛnkɛ weyi ɛwɛ ɛ-tɩ yɔɔ ɛyáa tɩŋa ɛsɩndaa yɔ, manpɩsɩ man-tɩ patɩŋa payɩ po-yom se manpɩzɩ mansɩnɩ ɛyáa sakɩyɛ nɛ pɛwɛnɩ lidaʋ Krɩstʋ yɔɔ. 20Mɛwɛɣ Yuda ñɩma cɔlɔ lɛ, mɛwɛ ɛzɩ ḿbá yɔ se manpɩzɩ mansɩnɩ-wɛ nɛ pɛwɛnɩ lidaʋ Krɩstʋ yɔɔ. Ma nɛ mbá pɔɖɔŋ Mooyiizi paɣtʋ yɔɔ yɔ ɖɩwɛɣ lɛ, mɛwɛ ɖɔɖɔ ɛzɩ ḿbá yɔ. Ŋgʋ́, pɩtɛkɛnɩ-m kɩcɛyʋʋ se mɔnɖɔ tɩ-yɔɔ. Ɛlɛ́, malakɩ ḿbʋ́ se manpɩzɩ mansɩnɩ mbá pɔɖɔŋ tɩ-yɔɔ yɔ nɛ pɛwɛnɩ lidaʋ Krɩstʋ yɔɔ. 21Mɛwɛɣ mbá patasɩ Mooyiizi paɣtʋ yɔ pɔ-cɔlɔ lɛ, mɛwɛ ɖɔɖɔ ɛzɩ ḿbá yɔ. Malakɩ ḿbʋ́ se manpɩzɩ mansɩnɩ-wɛ nɛ pɛwɛnɩ lidaʋ Krɩstʋ yɔɔ. Ŋgʋ́, ma-maɣmaɣ mɛntɛkɛ weyi ɛtasɩ Ɛsɔ paɣtʋ yɔ. Mbʋ́ pʋyɔɔ yɔ, mɔnɖɔŋ Krɩstʋ paɣtʋ yɔɔ. 22Ma nɛ mbá pɛkɛ ajamaa pe-lidaʋ wɛnaʋ taa yɔ ɖɩwɛɣ lɛ, mɛwɛ ɛzɩ ḿbá ɖɔɖɔ yɔ se manpɩzɩ mansɩnɩ-wɛ nɛ pɛwɛnɩ lidaʋ siŋŋ Krɩstʋ yɔɔ. Pʋ-yɔɔ manpɩsɩ man-tɩ ɛzɩ paa weyi yɔ se paa pɩɩla ɛzɩma yɔ, manpɩzɩ mansɩnɩ nabɛyɛ nɛ Ɛsɔ ya pa-ñʋʋ. 23Malakɩ pɩtɩŋa payɩ ḿbʋ́ Laŋhɛzɩyɛ Tɔm yɔɔ se mehiɣ ɖɔɖɔ ñɩm mbʋ́ pʋwɛ tɩ-taa yɔ.
Seyaa hayɩsʋʋ tɔm
24Ɩtatɩlɩ se mbá powoki seu yɔ, peseɣ patɩŋa payɩ, ɛlɛ́, weyi ɛwakɩ yɔ e-ɖeke koŋ palakɩ kʋjɔʋ naa we? Pʋ-yɔɔ lɛ, ɩñaɣ pana nɛ ise lidaʋ nʋmɔʋ taa nɛ ɩwa nɛ palabɩ-mɩ kʋjɔʋ ŋ́gʋ́. 25Mbá patɩŋa peseɣ yɔ, pɛpɛŋ pa-tɩ mbʋ́ pɩtɩŋa payɩ pʋwɛɛ se pɛpɛ pa-tɩ yɔ se papɩzɩ pese nɛ pawa nɛ pehiɣ kʋjɔʋ. Ɛlɛ́, kʋjɔʋ ŋ́gʋ́ kɩɩwɛɣ tam. Đa lɛ, ɖɩñɔɔzʋʋ ɖa-tɩ se ɖɩwa lidaʋ nʋmɔʋ taa nɛ palabɩ-ɖʋ kʋjɔʋ ŋgʋ́ kɩwɛɣ tam yɔ. 26Pʋ-yɔɔ menseɣ se mowolo ɖenɖe pʋwɛɛ se mowolo yɔ, maaseɣ yem. Mɛwɛ ɖɔɖɔ ɛzɩ weyi ɛlʋkɩ nɛ ɛɛlʋkɩ yem se pɔtɔm se palʋ yɔ. 27Mɛwɛɛ mankʋʋ man-tɩ se manpɩzɩ mɔnɖɔkɩ man-tɩ siŋŋ nɛ pɩtaakɔɔ pɩɖɩɣnɩ weyi ma monsusi lɛlaa Ɛsɔtɔm yɔ.
Currently Selected:
1 Kɔrɛntɩ 9: KABI
Highlight
Share
Copy
Want to have your highlights saved across all your devices? Sign up or sign in
