Taitasi 2
2
Kwiisha kwalushinisho
1Sombi webo ulyeelete kwiisha sheesho sheendelana akwiisha kwalushinisho. 2Koambila basankwa bamanene ayi babe beshikucata myoyo, bacite kalango, balitibuka alimwi baluleme mulushomo lwabo, mulusuno alimwi amukutolelela. 3Mbweeke ubo banakashi bamanene kobaambila ayi banookala buumi busalalite. Tabeelete kuba bafuyishi nabi bacakolwa, sombi balyeelete kunokwiisha shintu shibotu. 4Lyalo inga bakonsha kwiisha banakashi bacanike kusuna bameebaabo abaana, 5kuba balitibuka, batacite kampenda, bapisooka paŋanda, bacite nkumbu, banyumfwila bameebaabo kwaamba ayi maswi akwe Lesa atacobolwi.
6Mbweeke ubo abalo basankwa bacanike kobayuminisha kuba bantu balitibuka. 7Mushintu shoonse webo ulyeelete kuba citondesho mukucita milimo ibotu. Koiisha cakushomeka abulemu. 8Kosebensesha maswi abotu atakoonshi kutongookwa, kwaamba ayi abo bakupikisha banyumfwe nsoni mukubula cibiibi cakwaamba pali ndiswe.
9Basha balyeelete kunyumfwila bamaami babo akubakondelesha mushintu shoonse. Tabeelete kupikishanyaabo, 10nabi kubeepila shintu. Sombi balyeelete kutondesha ayi balashomeka kwaamba ayi balemeke maswi akwe Lesa Mupulushi wesu mushintu shoonse.
11Ceebo Lesa wakayubulula luse lwakwe ayi bantu boonse bapulushikwe. 12Luse ulo lulatwiisha kuleka buumi buteshi bwabuLesa alunkumbwa lwa shintu sha pacishi ca panshi kwaamba ayi twikale buumi bwakulitibuka, bululeme alimwi bwabuLesa munshiku shino. 13Bulya nditutoolindila bushiku bwa coolwe, ubo bulemu bwakwe Lesa munene alimwi aMupulushi wesu Jesu Klistu, ndyeshi bukaboneke. 14Lakwe uyo wakalibenga kutufuna kububi boonse akutusalasha kwaamba ayi tube bantu bakwe beene abo balibambite kucita shibotu.#Kulu 130:8; Kulo 19:5; Duto 4:20; 7:6; 14:2; 1 Pita 2:9
15Koiisha shintu ishi alimwi akusebensesha nkusu nshoocite mukuyuminisha akululika baabo bakukutika. Kutabi muntu ukunyanshilisha.
Currently Selected:
Taitasi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.