Taitasi 1
1
1Ndime Paulo musebenshi wakwe Lesa alimwi mutumwi wakwe Jesu Klistu. Ndakasalwa kwaamba ayi njumye lushomo lwa baabo Lesa mbwaakasala akubatanjilila mukwishiba shalushinisho isho shiletela buumi bwa buLesa. 2Lushinisho ulu luliimfwi pakulangila buumi butamaani ubo Lesa utabeci mbwaakatushomesha kale kale. 3Mpeeke paciindi ceelete wakayubulula kushomesha uko mumakani akwe. Makani ayo wakaabika mumaansaangu, aboobo ndaashimikila kweelana aLesa Mupulushi wesu mbwaakandwiita.
4Ntoolembela ndiwe Taitasi omwanaangu wancinencine mulushomo ndotucite.
Luse aluumuno shibe awebo kuswa kuli Lesa Ishiwesu aKlistu Jesu Mupulushi wesu.#2 Koli 8:23; Gala 2:3; 2 Timo 4:10
Milimo yakwe Taitasi kuKileti
5Ncendakakushiila kuKileti nkwaamba ayi ululike shoonse shakalinga kuyandika kubamba akubika bamatanjilili ba shoonde mumandabala oonse kweelana ambondakakulwiita. 6Mutanjilili ulyeelete kuba muntu utacite kampenda, weebetebo mwanakashi womwi alimwi bana bakwe balyeelete kuba bashomi kuteshi bacite mpuwo yakucita shintu shibiibi nabi kutanyumfwa. 7Ono ceebo mutanjilili wa coonde utokweendelesha mulimo wakwe Lesa, ulyeelete kubula kampenda. Taaelete kuba muntu ulyuuma mucaamba, ufwambaana kukalala, cakolwa, mukali nabi usunishi buboni. 8Ulyeelete kuba muntu utambula beensu alimwi uyanda kucita shibotu, ulitibuka, ululeme, usalalite alimwi ulilama. 9Ulyeelete kucata camaansa obilo kumakani ashomeka kweelana ambwaakeeishikwa, ayi ayumyeyumye bamwi kwiinda mulushinisho alimwi akululika baabo balupikisha.#1 Timo 3:2-7
10Ceebo mbaanji baashu abo beshikwaambabo akubeca bantu, bunene bunene abo bamulikoto lya baabo beshikupalulwa. 11Aba balyeelete kukashikwa mukwiinga batoonyonyonganya bamumaanda boonse mbobapolela kwiinda mukwiisha shintu isho nshebateelete. Balacita boobo kwaamba ayi babilile mpawo. 12Umwi mulaluki wabo beene wakaamba ayi, “Lyoonsebo bene Kileti mbabeshi, mbabiibi anga mbanyama, mbalyabi alimwi mbatolo.” 13Bukamboni bwakwe mbwalushinisho. Paceebo ceeco ubakalalile cankusu kwaamba ayi balulame mulushomo 14alimwi ayi bacileeke kukutika shatushiyashiya twa baJuda amilawo iswa kubantu bakaka shalushinisho. 15Shintu shoonse shilisalalite kubantu basalalite, sombi kubaabo batasalalite akutashoma, shintu shoonse tashisalalite, mukwiinga miyeeyo amyoyo yabo njibiibi. 16Balaamba ayi Lesa balimwishi, sombi micito yabo ilakaka sheesho nshebaamba. Balafundoosha kumoyo alimwi tabanyumfwili Lesa, aboobo tabeeleli kucita cintu cibotu nabi comwi.
Currently Selected:
Taitasi 1: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
