Maako 16

Jesu mbwaakabuka kuswa kubafu

(Mate 28:1-8; Luka 24:1-12; Joni 20:1-10)

1Ndibwakeenda bushiku bwakookesha bwa Cibelu, Maliya wa kuMagadala, Maliya banyina Jemusi alimwi aSalomi bakoola mafuta anunkila ayi bakananike mutuntu wakwe Jesu. 2Macuunsacuunsa paSondo, ndilyakaswabo lisuba, banakashi aba bakaya kucuumbwe. 3Kabacili munshila bakalinga kwiipushanya ayi, “Ino ngani eshi atupilimwiteko libwe lili pamulyango wa cuumbwe?” 4Bakeepushanya boobo mukwiinga libwe ilyo lyakalinga linene abuumbi. Sombi ndibakalanga kucuumbwe, bakabona ayi libwe balipilimunawo kale. 5Ndibakenjila mucuumbwe, bakabona musankwa kaashite kululyo lwabo, kaafwete cisani cituba. Mpeeke bakaloonda.

6Musankwa uyo wakabaambila ayi, “Mutaloondi. Ndishi kwaamba ayi mutooyandoola Jesu wa kuNasaleti, uyo ngobakapopa pamucilingano. Taamo muno, wabushikwa kale kuswa kubafu. Amubone, pamusena mpowaawa mpobakalinga bamooneka. 7Ono kamuya mukalwiite bashikwiiya bakwe pantu pomwi aPita ayi, ‘Lakwe watanjila kuya kuGalili, uko nkweshi muye mukamubonene, kweelana ambwaakamwaambila.’ ”#Mate 26:32; Maako 14:28

8Mpomunyaawo bakaswa mucuumbwe akutalika kucica. Miyeeyo yakapilingana, kabatutumabo. Aboobo taaku muntu nabi womwi ngobakalwiita makani aya munshila, mukwiinga bakalinga kucite boowa.

Jesu mbwaakaboneka kuli Maliya wa kuMagadala

(Mate 28:9-10; Joni 20:11-18)

[ 9Pabushiku butaanshi bwa nsondo macuunsacuunsa, Jesu ndyaakabuka kuswa kubafu, wakataanguna kubonekela kuli Maliya wa kuMagadala uyo ngwaakakusha bashikaswa bosanwe abobilo. 10Mpeeke alakwe Maliya wakanyamuka kuya mukulwiita baabo bakalinga kweenda aJesu, abo bakalinga kuungumene kabalila. 11Sombi balo ndibakanyumfwa ayi Jesu wabuka kuswa kubafu, alimwi ayi Maliya wamubona, tabakwe kushoma.

Jesu mbwaakaboneka kubashikwiiya bobilo

(Luka 24:13-35)

12Kuswawaawo, Jesu wakaboneka mumushobo umwi kubashikwiiya bakwe bamwi bobilo, ndibakalinga kuya bweenda munshila iya mumishi. 13Mpeeke bakaboolela kuya mukulwiita babyaabo. Sombi abalo tabakwe kubashoma.

Jesu mbwaakaboneka kubashikwiiya likumi awomwi

(Mate 28:16-20; Luka 24:36-49; Joni 20:19-23; Mili 1:6-8)

14Kumamanino, Jesu wakaboneka kubashikwiiya bali likumi awomwi kabalya. Wakabakalalila ceebo cakubula lushomo akuyuma myoyo, mukwiinga tabakwe kushoma baabo bakamubona kaabukite kuswa kubafu. 15Lyalo wakabaambila ayi, “Kamuya mucishi coonse, mukashimikile Makani Abotu kubantu boonse.#Mili 1:8 16Uyo woonse ushoma akubombekwa, ulaakupulushikwa. Sombi uyo utashomi, ulaakupekwa mulandu. 17Abo bashoma balaakuba ashitondesho ishi: Balaakunookusha bashikaswa muliina lyangu, balaakunokwaamba milaka imwi ipusenepusene. 18Na bakabwese nsoka teshi bakalumweewo, nabi na bakanwe musamu ukola, teshi ukabacaaye. Balaakubika maansaabo pabalwashi, abalo balaakuba kabotu.”

Jesu mbwaakatolwa kwiculu

(Luka 24:50-53; Mili 1:9-11)

19Mwaami Jesu ndyaakamana kwaambaabo, wakatolwa kwiculu akuya mukwikala kululyo lwakwe Lesa. 20Bashikwiiya bakaya cishimika Makani Abotu koonse koonse. Alakwe Mwaami wakabapa nkusu shakucita shaankamiko, kutondesha bantu ayi maswi akwe ngancinencine.]

Currently Selected:

Maako 16: BBBLI

Highlight

Copy