Maako 15

Jesu mbwaakoomboloshekwa kuli Pilato

(Mate 27:1-2, 11-14; Luka 23:1-5; Joni 18:28-38)

1Ndibwakaca macuunsacuunsa, bamatanjilili ba bapailishi, bamaloba, bafundishi ba Milawo alimwi abamwi boonse beendelesha nkuta, bakalifuyafuya pantu pomwi. Mpeeke Jesu bakamwaanga akumutola mumaansa akwe Pilato. 2Mpomunyaawo Pilato wakeepusha Jesu ayi, “Sa ndiwe Mwaami wa baJuda?” Jesu wakamukumbula ayi, “Mwacaamba nobeene.”

3Lyalo bamatanjilili ba bapailishi bakabekesha Jesu shikani shiinji. 4Pilato wakamwiipusha alimwi ayi, “Sa webo tocite cakwaambaawo pamakani aya? Nyumfwa shikani kufula nshebatookwaambila.”

5Sombi Jesu taakwe kukumbulaawo alimwi, mpeeke Pilato wakacelemanabo.

Jesu mbwaakapingulwa kucaikwa

(Mate 27:15-26; Luka 23:13-25; Joni 18:39—19:16)

6Pabushiku bwa Pasika bwakwiibaluka kusotokela, Pilato lyoonse wakalinga kwaangulula kaili womwi uli woonse ngweenga basenga. 7Paciindi ico musankwa umwi wiitwa ayi Balabasi wakalinga muntolongo ababye bamwi abo bakabukila cishi akucaya bantu mucimfulunganya. 8Bantu baanji bakabungana akusenga Pilato ayi abacitile bweenka mbuli mbwaacita lyoonse pabushiku bwa Pasika. 9Lyalo Pilato wakabeepusha ayi, “Sa mulisuni ayi mwaangulwite Mwaami wa baJuda?” 10Mukwiinga Pilato wakalinga kwishi ayi bamatanjilili ba bapailishi bakatola Jesu kuli nguwe ceebo bakamufwita munyono.

11Sombi bamatanjilili ba bapailishi bakayungoola bantu kusenga Pilato ayi abaangulwite Balabasi mumusena wakwe Jesu. 12Pilato wakeepusha bantu alimwi ayi, “Ino ntoomucita buyani uyu ngomwiita ayi Mwaami wa baJuda?”

13Lyalo bantu boonse bakoolobesha ayi, “Aapopwe pamucilingano!”

14Pilato wakabeepusha ayi, “Ino ncibiibinshi ncaacita?” Lyalo bakeendilishaawo koolobesha ayi, “Aapopwe pamucilingano!”

15Ono Pilato mukusuna ayi asangalashe bantu, wakabaangulwita Balabasi. Mpeeke Pilato wakaamba ayi Jesu akwiipwe misako. Kuswawaawo, wakamwaaba kubashilumamba ayi apopwe pamucilingano.

Bashilumamba mbobakaseka akuweluluka Jesu

(Mate 27:27-31; Joni 19:2-3)

16Bashilumamba bakatola Jesu akumwinjisha muŋanda ya Mweendeleshi, akubunganya bashilumambanyinaabo bamwi boonse. 17Mpomunyaawo bakamufwalika cisani cifubelafubela, bapanga mushini wa myuumfwa akuubika pamutwi wakwe. 18Lyalo bakatalika kumwaansha anga nkumulemeka ayi, “Waboneka oMwaami wa baJuda!” 19Kuswawaawo bakatalika kumuuma mumutwi akasako, kumushipila mate alimwi akunoofukama panshi, kumulemeka cakubeca. 20Ndibakamana kumuseka akumuweluluka boobo, bakamufuula cisani cifubelafubela cilya akumufwalika shakufwala shakwe. Lyalo Jesu bakamutola kuya mukumupopa pamucilingano.

Jesu mbobakamupopa pamucilingano

(Mate 27:32-44; Luka 23:26-43; Joni 19:17-27)

21Ndibakalinga kuya munshila, bashilumamba bakakumanya musankwa umwi wiitwa ayi Simoni wa kuSailini kaaswa mumishi. Mpeeke bashilumamba bakamukakatisha ayi anyamune mucilingano wakwe Jesu. (Simoni wakalinga ngoishi Alekisanda aLufasi.) 22Lyalo Jesu bakamutola kumusena wiitwa ayi Gologota (nkokwaamba ayi musena wa cifuwa ca mutwi.) 23Bakeelesha kumupa waini ngobakasenkanya andulwe, sombi Jesu wakakaka kunwa. 24Mpomunyaawo bakamupopa pamucilingano akwaabana shisani shakwe mukuuma cisolo ayi babone womwi awomwi cisani nceshi atole.#Kulu 22:18 25Ndibakamupopa pamucilingano ciindi cakalinga 9 koloko macuunsa. 26Maswi akalinga kutondesha ncebakacaila Jesu akalinga kulembetwe ayi, “Mwaami wa baJuda.” 27Jesu bakamupopa pakati pamicilingano ya beepi bobilo, umwi kulyaansa lyalulyo aumwi kucipiko. [ 28Nkokwaamba ayi makani aya akacitika kweelana ambokulembetwe muMalembo akwe Lesa ayi, “Alakwe bakamubelengela pantu pomwi abamucita shibi.”]

29Mpeeke bantu bakalinga kwiindilaako, bakalinga kupukumunabo mitwi akunoocobola Jesu kabaamba ayi, “Amubone! Webo ndiwe wakalinga kwaamba ayi ulaakumwayulula Ŋanda yakwe Lesa akwiiyaka alimwi munshiku shotatwe.#Kulu 22:7; 109:25; Maako 14:58; Joni 2:19 30Ono lipulushe omwiine tubone. Seluka pamucilingano.”

31Abalo bamatanjilili ba bapailishi alimwi abafundishi ba Milawo bakatalika kumuseka, kabaambooshanya bene ayi, “Wakalinga kupulusha bamwi, sombi waalilwa kulipulusha mwiine. 32Atumubone Usalitwe wakwe Lesa, mwaami wa bene Isilaeli aseluke kuswa pamucilingano kwaamba ayi tushome.” Abalo abo mbwaakapopwaabo bakalinga kumutukana.

Jesu mbwaakafwa

(Mate 27:45-56; Luka 23:44-49; Joni 19:28-30)

33Lisuba ndilyakashika pakati ka mutwi, kwakaba munshinshe mucishi coonse kushikila 3 koloko malumwi. 34Paciindi ca 3 koloko peenka, Jesu wakoolobesha aliswi lya peculu ayi, “Eloi, Eloi, lama sabakatani?” Nkokwaamba ayi, “NobaLesa bangu, nobaLesa bangu, ino nciinshi ncemwandekeleshesha?”#Kulu 22:1

35Ono bamwi abo bakalingaawo, ndibakanyumfwa maswi aya, bakaamba ayi, “Amunyumfwe utokwiita Elija.” 36Umwi mulikoto lyabo wakacica akubwesa mweepu akuusumpa muwaini ulula usashite. Lyalo wakabwesa kasako akubikako mweepu kwaamba ayi ape Jesu anwe. Mpeeke wakaamba ayi, “Atulindile tubone na Elija utoosa mukumuselushaawo pamucilingano.”#Kulu 69:21 37Jesu wakoolobesha akutama aliswi lya peculu, watula moyo.

38Mpeeke cisani cakalinga kushitilisha muŊanda yakwe Lesa cakakwaamuka pakati, kuswa peculu tibili apanshi.#Kulo 26:31-33 39Munene wa bashilumamba mwaanda wakalinga kwiimfwi pafwaafwi kaalangene aJesu. Ndyaakabona mbuli mbwaakafwa, wakaamba ayi, “Ncakwiila uyu muntu wakalinga Mwanaakwe Lesa!”

40Pakalinga abanakashi bamwi bakalinga kweebela palaale. Mulikoto lyabo mwakalinga Maliya wa kuMagadala, Maliya banyina Jemusi mwanikebantu aJosesi alimwi aSalomi. 41Banakashi aba bakalinga kwisa cikonkela Jesu alimwi akumucafwa ndyaakalinga mucishi ca Galili. Pakalinga abamwi banakashi baanji mbaakesaabo kuJelusalemu.#Luka 8:2-3

Jesu mbwaakabikwa mucuumbwe

(Mate 27:57-61; Luka 23:50-56; Joni 19:38-42)

42Pabushiku bwakulibambila (nkokwaamba ayi ciilo mbushiku bwakookesha bwa Cibelu) macolesha, 43Josefu wa kuAlimateya, mweendeleshi ulemekwa munkuta ya baJuda, wakalinga kulangilabo Bweene bwakwe Lesa. Muntu uyu wakaya kuli Pilato cakubula boowa mukusenga mutuntu wakwe Jesu. 44Pilato wakakankamana pakunyumfwa ayi Jesu wafwa kale. Lyalo wakeeta munene wa bashilumamba mwaanda, akumwiipusha na Jesu wafwa kalekale. 45Ono ndyaakanyumfwa kumunene uyo ayi ncakwiila Jesu wafwa, Pilato wakasuminisha Josefu ayi aubwese mutuntu. 46Mpomunyaawo Josefu wakoola cisani cituba, waselusha mutuntu pamucilingano akuupombela acisani. Lyalo wakoobika mucuumbwe ncaakakabwa mulibwe, akukunkulushilawo libwe linene pamulyango wa cuumbwe. 47Maliya wa kuMagadala alimwi aMaliya banyina Josesi bakalingaawo akubona mbobakabika mutuntu wakwe Jesu.

Currently Selected:

Maako 15: BBBLI

Highlight

Copy