Mateyo 7
7
Koombolosha bamwi
(Luka 6:37-38, 41-42)
1“Mutoomboloshi bamwi, kwaamba ayi amwebo Lesa atakamoomboloshi. 2Mukwiinga ubo bweenka mbomoombolosha bamwi alakwe Lesa mbweshi akamoomboloshe, amilawo njemusebensesha pakoombolosha bamwi, alakwe Lesa njeshi akasebenseshe pali ndimwe.#Maako 4:24 3Ino inga wabona buyani kapampaansha kali muliinso lya mubyo akushiya cisamu cili muliinso lyako? 4Inga waambila buyani mukwanu ayi, ‘Tubone nkukusheko kapampaansha muliinso,’ na muliinso lyako omwiine kamuli cisamu? 5Webo omuntu nowaamba nshootaciti, taanguna kusha cisamu cili muliinso lyako, ndyeshi ubone kabotu akukusha kapampaansha kali muliinso lya mubyo.
6“Mutapi bakabwa shintu shisalalite mukwiinga inga bamupilukila bamuluma. Mutapi nkumba shintu shamakwebo ceebo inga shalyatooloobo myeendo.
Kusenga, kulangoola akukonkoonsha
(Luka 11:9-13)
7“Amusenge mulaakupekwa, amulangoole mulaakucana alimwi mukonkoonshe mulaakucalwitwa. 8Ceebo uyo woonse usenga ulapekwa, awooyo ulangoola ulacana alakwe ukonkoonsha ulacalwitwa. 9Ngani weenga wapa libwe mwanaakwe na wasenga cakulya? 10Nabi weenga wamupa nsoka na wasenga nswi? 11Ono na mwebo, nobantu nobashishibi kamwishi kupa bana banu shintu shibotu, ino lakwe Ishiwanu wa kwiculu inga waalilwa buyani kupa baabo bamusenga?
12“Nkokwaamba ayi mushintu shoonse amucitile bantu bamwi bweenka mbomusuni ayi bamucitile. Anu uku nkokwiisha kwa Milawo yakwe Mose alimwi akwiisha kwa balaluki bakulukulu.#Luka 6:31
Mulyango ushaankene
(Luka 13:24)
13“Amwinjilile pamulyango ushaankene ceebo mulyango utola mukunyonyoolwa ngunene, ayalo nshila taishuupi. Paceebo ceeco abo bainda nshila iyi mbaanji. 14Sombi mulyango utola kubuumi butamaani ulishaankene alimwi nshila iyaako ilishupite. Aboobo bantu baikonkela mbaniini.
Cisamu ashisepo sha ncico
(Luka 6:43-44)
15“Amucenjele abalaluki babeshi. Balesa cakulibombya kuli ndimwe anga nimbelele, anu mukati mbaumpe. 16Mulaakubeshibila kushisepo shabo. Sa inga bantu bayapa minyansa kuswa kucisamu ca myuumfwa nabi kuyapa nkuyu kuswa kukankoloŋonso? 17Aboobo cisamu coonse cibotu cilacata shisepo shibotu, sombi cisamu cibiibi cilacata shisepo shibiibi. 18Anu cisamu cibotu tacikoonshi kucata shisepo shibiibi, acalo cisamu cibiibi tacikoonshi kucata shisepo shibotu. 19Cisamu cili coonse citacati shisepo shibotu cilatemwa akuwaalwa mumulilo.#Mate 3:10; Luka 3:9 20Aboobo, amwebo mulaakubeshibila kumicito yabo.#Mate 12:33
Nshimwishiiwo napaceyi
(Luka 13:25-27)
21“Teshi kwaamba ayi boonse banjita ayi, ‘Nkambo, Nkambo’ balaakwinjila muBweene bwa kwiculu, sombibo wooyo ucita kuyanda kwa baTa bali kwiculu. 22Pabushiku ubo bwakoombolosha, bantu baanji balaakuŋambila ayi, ‘Nkambo, Nkambo, sa tatukwe kushimikila akukusha bashikaswa, alimwi akucita shaankamiko muliina lyanu?’ 23Sombi nebo ndaakubaambila patuba ayi, ‘Nshimwishiiwo napaceyi. Amusweewo apa mwebo nobamucita shibi!’#Kulu 6:8
Shamaanda obilo
(Luka 6:47-49)
24“Aboobo uyo woonse unyumfwa maswi angu aya akwaacita, uli anga ngumuntu ucite maano wakayakila ŋanda yakwe palibwe. 25Ono mfula ndiyakaloka, milonga yakesula kwiindilila alimwi amuuwo wakapuupila kuŋanda iyo, sombi taikwe kuwa mukwiinga yakalinga kuyakitwe palibwe.
26“Sombi uyo woonse unyumfwa maswi angu aya akutaakonkela, uli anga ngumuntu muluya wakayakila ŋanda yakwe pamuseese. 27Ono mfula ndiyakaloka, milonga yakesula kwiindilila alimwi amuuwo wakapuupila kuŋanda iyo, lyalo yakawa. Ncakwiila kuwa kwa njiyo kwakayoosha.”
Kwiisha kwabulemu ankusu
28Ono Jesu ndyaakamanisha kwaamba maswi aya, bantu baanji balya bakakankamana abuumbi pakwiisha kwakwe 29ceebo wakeeisha ankusu, kuteelana abwakalinga kwiisha bafundishi ba Milawo.#Maako 1:22; Luka 13:28
Currently Selected:
Mateyo 7: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
