Luka 8

Balutundu bakashindikila Jesu

1Kuswawaawo Jesu wakeenda mumandabala amumishi, kaaya cishimikila Makani Abotu a Bweene bwakwe Lesa. Wakalinga abashikwiiya bali likumi abobilo 2pantu pomwi abalutundu bamwi bakakushikwa bashikaswa akuba kabotu kumalwashi apusenepusene. Meena a balutundu abo ngaaya: Maliya wakalinga kuswa kuMagadala uyo Jesu ngwaakakusha bashikaswa bosanwe abobilo, 3Joana muka Kusa musankwa uyo wakalinga kulama shintu sha muŋanda yakwe Elodi, Susana alimwi abamwibo baanji bakalinga kusebensesha shintu shabo kucafwa Jesu abashikwiiya bakwe.#Mate 27:55-56; Maako 15:40-41; Luka 23:49

Cikoshanyo ca mushangi

(Mate 13:1-9; Maako 4:1-9)

4Bantu baanji bakalinga kwisa kuli Jesu kuswa kundabala andabala. Mpeeke ndibakayoboloka, Jesu wakabalwiita cikoshanyo ici ayi, 5“Kwakalinga muntu umwi wakaya mukushanga mbuto. Ono ndyaakalinga kuminsa, shimwi mbuto shakalokela munshila umo moshakalyatoolwa alimwi abayuni bakesa bashilya. 6Shimwi shakalokela pabulongo bwa mabwe. Mboshakamenenabo, busonga bwakatalika kuyuma mukwiinga wakubula katonto mubulongo. 7Shimwi shakalokela pamyuumfwa. Shakakula pantu pomwi amyuumfwa, lyalo myuumfwa yakashitilisha busonga. 8Sombi shimwi mbuto shakalokela pabulongo bubotu. Shakakula, akucata shakacata myaanda myaanda.”

Lyalo Jesu wakamanisha aliswi lya peculu ayi, “Uyo ucite matwi, aanyumfwe.”

Ceebo cinene ca shikoshanyo

(Mate 13:10-17; Maako 4:10-12)

9Bashikwiiya bakwe bakamwiipusha mbocaamba cikoshanyo ici. 10Jesu wakakumbula ayi, “Mwebo mwakapekwa lushibo lwa shintu shishisitwe sha Bweene bwakwe Lesa. Sombi bamwi balaambilwa mushikoshanyo kwaamba ayi, ‘Balangilishishe, sombi babule kubona. Bakutikishe, sombi babule kunyumfwa.’#Isa 6:9

Jesu mbwaakapandulula cikoshanyo ca mushangi

(Mate 13:18-23; Maako 4:13-20)

11“Ono mbulya mbocaamba cikoshanyo. Imbuto ndiswi lyakwe Lesa. 12Isho mbuto shakalokela munshila shileemikanina bantu banyumfwa maswi akwe Lesa, sombi Mubiibi ulesa waakushaamo mumyoyo yabo kwaamba ayi batashomi akupulushikwa. 13Isho mbuto shakalokela pabulongo bwa mabwe shileemikanina baabo banyumfwa maswi akwe Lesa akwaatambula cakusangalala. Sombi taanjili cankusu mumyoyo yabo, balashoma ciindi ciniini, aboobo na basunkwa balawa. 14Isho mbuto shakalokela pamyuumfwa shileemikanina bantu banyumfwa maswi akwe Lesa, sombi kulisukama sha buumi bwa cishi cino, bubile ashakulisangalasha shilabakoma, aboobo tabacati shisepo shikomete. 15Sombi isho shakalokela mubulongo bubotu, mbantu banyumfwa maswi akwe Lesa, baacata cakushomeka mumyoyo yabo ibotu, aboobo balayuminina kushikila bacata shisepo.

Lilampi lifweketwe nongo

(Maako 4:21-25)

16“Taaku muntu unyasha lilampi akulifweka nongo nabi kulibika munshi lya bulo. Sombi ulalibika peculu kwaamba ayi limunikile baabo benjila muŋanda.#Mate 5:15; Luka 11:33

17“Mukwiinga taaku cintu cishisitwe ceshi cikabule kuyubululwa patuba nabi cintu cabushishi ceshi cikabule kushibikwa.#Mate 10:26; Luka 12:2 18Aboobo amucenjele ambomunyumfwa maswi akwe Lesa. Mukwiinga uyo ucite kale ulaakubikilwaawo, sombi ucite kaniini ulaakunyaikwa nabi kaako koonse nkaacite.”#Mate 25:29; Luka 19:26

Banyina abamakwabo Jesu

(Mate 12:46-50; Maako 3:31-35)

19Lyalo banyina abamakwabo Jesu bakashika nkwaakalinga, ono tabakwe kucikonsha kushika pafwaafwi anguwe ceebo bantu bakalinga baanji. 20Mpeeke umwi muntu wakalwiita Jesu ayi, “Banyinawanu abamakwabanu baliimfwi pansengwe, batooyanda kumubona.”

21Sombi Jesu wakabaambila ayi, “Bama abamakwesu mbaabo banyumfwa maswi akwe Lesa akucita mbwaamba.”

Jesu mbwaakoomusha cipuupu

(Mate 8:23-27; Maako 4:35-41)

22Bumwi bushiku Jesu abashikwiiya bakwe bakenjila mubwaato. Jesu wakabaambila ayi, “Atusubukile kwitaleelilya.” Mpomunyaawo bakanyamuka. 23Mpeeke bwaato ndibwakalinga kuya bweenda, Jesu wakoona. Kwakaba cipuupu cinene palweenge. Bwaato bwakatalika kunooya cisula maanshi cakwaamba ayi kabulibo pafwaafwi akwipila. 24Mpomunyaawo bashikwiiya bakaya kuli Jesu akumubusha akwaamba ayi, “Bafundishi, Bafundishi, amubuke twafwa!” Mpeeke Jesu wakabuka, wakalalila cipuupu amaaba. Lyalo shakoomuna. 25Mpomunyaawo Jesu wakaambila bashikwiiya bakwe ayi, “Anu lushomo lwanu luli kuli?” Sombi balo bakaba aboowa akukankamana, kabeepushanya ayi, “Ino uyu ngumuntu uli buyani cakwaamba ayi cipuupu amaaba shilamunyumfwila?”

Jesu mbwaakashilika musankwa wakalinga kucite shikaswa

(Mate 8:28-34; Maako 5:1-20)

26Lyalo bakashika kucishi ca Gelasa cilangenebo acishi ca Galili. 27Jesu ndyaakaswabo mubwaato, musankwa umwi wakaswa mundabala wakakumanya Jesu. Musankwa uyo wakalinga kucite bashikaswa. Liinji wakalinga kweendabo matakosha, taakalinga kwikala muŋanda, sombi kushuumbwe. 28Ndyaakamubonabo Jesu, wakoolobesha akufukama kunembo lyakwe alimwi akwaamba aliswi lya peculu ayi, “Ino utooyanda kuncita buyani webo Jesu oMwanaakwe Lesa wa kwiculu Wiindaawo? Ndakusenga ayi utampenshi.” 29Wakaamba boobo mukwiinga Jesu wakaambila shikaswa ayi asweemo muli nguwe. Mankanda aanji shikaswa uyo wakalinga kumucata. Ono nabi bamwaanga ncetani anshimbi kumaansa akumyeendo ayi bamulaame, wakalinga kusutoola. Lyalo shikaswa wakalinga kumutola muluyanga. 30Kuswawaawo Jesu wakamwiipusha ayi, “Ndiwaani liina?” Alakwe wakakumbula ayi, “Ndime Likoto.” Ceebo wakalinga kucite bashikaswa baanji. 31Kuswawaawo bashikaswa abo bakakombelela Jesu ayi atabatandili mucilindi citeeli. 32Ono mweela kalundu kwakalinga litanga linene lya nkumba kashilya. Mpeeke bashikaswa bakasenga Jesu ayi benjile munkumba isho, alakwe wakabasuminisha. 33Lyalo bakaswaamo mumusankwa uyo akwinjila munkumba, lyalo litanga lyoonse lyakoondomokela kunkunamo lya kalundu akuya mulweenge molyakaya mukulobela.

34Mpomunyaawo abo bakalinga kweembela nkumba isho, ndibakabona bobulya, bakacica akuya mukulwiita bantu bakalinga kwikala mundabala amumishi cakacitika. 35Lyalo bantu bakesa mukubona cakacitika. Ndibakashika bakacana musankwa Jesu ngwaakakusha bashikaswa ulishiite muliimfwa lyakwe, kaafwete, amaano kaakwenebo kabotu. Lyalo bantu bakaloonda. 36Bantu bakabona mbocakacitika bakalwiita bantu mbuli mbwaakaba kabotu musankwa uyo wakalinga kucite bashikaswa. 37Lyalo bantu boonse bakalinga kwikala mucishi ca Gelasa bakakombelela Jesu ayi asweemo mucishi cabo ceebo bakaloonda abuumbi. Mpomunyaawo wakenjila mubwaato akuboolela. 38Musankwa uyo wakakushikwa bashikaswa wakasenga Jesu ayi baye boonse, sombi Jesu wakamukasha akumwaambila ayi, 39“Boolela kumishaanu, uye waambe shintu shoonse Lesa nshaakucitila.” Mpomunyaawo musankwa uyo wakaya mundabala yoonse kuya bwaamba shintu Jesu nshaakamucitila.

Mwanaakwe Jailosi amwanakashi wakacata cisani cakwe Jesu

(Mate 9:18-26; Maako 5:21-43)

40Lyalo Jesu ndyaakaboolela kulubasu lumwi lwa lweenge, bakamutambula cakukondwa mukwiinga boonse bakalinga kumulangila. 41Mpomunyaawo kwakesa muntu wiitwa ayi Jailosi uyo wakalinga mutanjilili umwi wa coonde ca baJuda. Wakesa wafukama kunembo lyakwe Jesu akumukombelela ayi aye kuŋanda yakwe 42mukwiinga mwanaakwe mwanakashi wa myaaka likumi ayobilo lwakalingabo ndufu. Uyo mwaana wakalinga ngomwaana ngwaakalinga kucite eenkabo.

Ono Jesu ndyaakalinga kuya bweenda, bantu baanji bakalinga kumushaankanya. 43Pakalinga mwanakashi umwi wakalinga kuciswa mukunko myaaka likumi ayobilo. Wakamanisha buboni bwakwe boonse mubashiliki, sombi taaku muntu nabi womwi wakakonsha kumushilika. 44Mwanakashi uyo wakesa kwisule lyakwe Jesu akucatabo kweela cisani cakwe, mpeeke mukunko wakamana peenka apo. 45Lyalo Jesu wakeepusha ayi, “Ngani wancata?” Boonse bantu ndibakakaka, Pita wakaamba ayi, “NoBafundishi, kufula bantu bamushingulukite alimwi batoomushaankanya, inga mweepusha buyani ubo?”

46Sombi Jesu wakaamba ayi, “Nkwaali umwi wancata, mukwiinga ndanyumfwa nkusu shimwi shaswa muli ndime.” 47Mpomunyaawo mwanakashi uyo ndyaakabona ayi taayubiteewo, wakaya kuli Jesu kaatutuma, wawa kunembo lyakwe akwaamba boonse kabanyumfwite ncaakacatila Jesu ambwaakaba kabotu ciindi ceenka ico. 48Jesu wakamwaambila ayi, “Nankashi, lushomo lwako lwakupulusha kubulwashi, koya muluumuno.”

49Jesu kaacaamba kwakesa muntu kuswa kuŋanda ya mutanjilili wa coonde ca baJuda akwaambila mutanjilili ayi, “Mwanaanu wafwa kale, mutapenshibo Bafundishi.” 50Jesu ndyaakanyumfwa makani ayo wakaambila Jailosi ayi, “Utaloondi, shomabo, mwanaako utooba kabotu.”

51Jesu ndyaakashika kuŋanda yakwe Jailosi taakwe kusuminisha muntu nabi womwi ayi enjilaakwe, sombibo Pita, Joni, Jemusi alimwi abashali ba mwaana. 52Mpeeke mwakalingabo mibila ceebo ca mulindu uyo wakalinga kufwite. Nakubi boobo Jesu wakabaambila ayi, “Amucileeke kulila ceebo mulindu uyu taafwite, uliletebo.” 53Sombi boonse bakamuweluluka mukwiinga bakalinga kwishi ayi wafwa kale. 54Lyalo Jesu wakacata mulindu uyo palyaansa akwaamba ayi, “Webo ndaba, buka!” 55Mpomunyaawo wakaba abuumi wakabuka akunyamuka. Lyalo Jesu wakabaambila ayi bape cakulya mulindu uyo. 56Bashali ba mwaana uyo bakakankamana. Kuswawaawo Jesu wakabakonkomesha ayi batakalwiiti muntu nabi womwi pacikani ici cacitika.

Currently Selected:

Luka 8: BBBLI

Highlight

Copy