Esita 5
5
Esita mbwaakaya kumwaami
1Pabushiku bwatatu bwakulikasha kulya Esita wakafwala shakufwala shakwe sha bwaami akuya mukwiimikana kulubansa lwa mukati lwa ŋanda ya bwaami kaalangite kucipinda cinene ca cuuna ca bwaami. Mwaami wakalinga kushiite pacuuna cakwe kaalangite kumulyango. 2Ono mwaami ndyaakabona Esita kaaimfwi mulubansa, wakakondwa akutondeka nkoli yakwe ya golodi kuli nguwe. Lyalo Esita wakaya weecata nkoyakalingila kunembo. 3Mpeeke mwaami wakamwiipusha ayi, “Esita omukaangu, nkucafweeko? Utooyanda kusenganshi? Ncakwiila inga ndakupa nabi waseenga musa wa bwaami bwangu.”
4Alakwe Esita wakakumbula ayi, “Na inga camukonda nobaami, ndisuni kwaamba ayi mwebo alimwi abaAmani mwise mashiku kukusekelela nkondamubambila.”
5Mpomunyaawo mwaami wakeeta Amani kwisa cakufwambaana kwaamba ayi baye kwakabeetila Esita. Aboobo mwaami aAmani bakaya kukusekelela kwakabamba Esita. 6Kabacinwa waini mwaami wakeepusha Esita ayi. “Ndwiite ncoosuni ayi nkucitile. Ntookupa cili coonse ncoosuni nabibo musa wa bwaami bwangu.” 7Mpeeke Esita wakakumbula ayi, 8“Na nobaami inga mwakondwa kunyumfwila nkumbu akumpa nceshi nsenge, ndaseenga kwaamba ayi mwebo aAmani mukese ciilo kukusekelela akumwi uko nkweshi nkamubambile. Paciindi ico ndaakumulwiita nceensuni.”
Amani mbwaakapinga kucaya Modekayi
9Bushiku ubo Amani ndyaakaswa mukusekelela uko, wakalinga kukondetwe alimwi wakalinga kusangalete abuumbi. Sombi ndyaakabona Modekayi pamwinjililo wa ŋanda ya bwaami kaashiite, alimwi ayi taakwe kunyamuka nabi kutondesha bulemu ndyaakalinga kwiinda, Amani wakakalala abuumbi. 10Nakubi boobo wakalicata. Lyalo wakaya kuŋanda yakwe akwiita babye alimwi aSeleshi mukaakwe. 11Mpeeke wakatalika kulyuuma mucaamba pabubile mbwaakalinga kucite, pabana bakwe basankwa baanji, panshila shoonse mwaami nshaakamulemekelaamo alimwi amwaami mbwaakamusumpula kwiinda bacinenenene bakwe bamwi boonse. 12Amani wakeelikaawo ayi, “Teshibo boobo bweenka. BaEsita bayoosha bakubwalo bakeeta ndime neenka kuya aBaami mukusekelela nkobakabamba. Ciilo alimwi ndataambwa pantu pomwi abaami kukusekelela akumwi nkweshi bakabaambe. 13Sombi shoonse ishi taaku mboshibete kuli ndime kulilabo na kaambwene Modekayi muJuda ulya kaashiite pamwinjililo wa ŋanda ya bwaami.”
14Lyalo mukaakwe Seleshi ababye boonse bakamwaambila ayi, “Ceebonshi tamutooshimpikabo shisamu shakwaangililawo bantu shilaampa mamita ali 22? Lyalo ciilo macuunsa mukaambile Baami kwaamba ayi Modekayi acailweewo. Kuswawaawo mukaye kamusangalete abaami kukusekelela.” Makani aya akakonda Amani, aboobo wakacita bweenka ubo.
Currently Selected:
Esita 5: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
