Esita 4
4
Modekayi mbwaakasenga kucafwikwa kuli Esita
1Ono Modekayi ndyaakanyumfwa shoonse shakacitwa, wakakwamoona shakufwala shakwe ceebo ca buumba, wafwala masaka, wanana milota akwiinda mundabala ya Susa kaalila cakooloma alimwi cakucisa moyo abuumbi. 2Wakaya mukweela kumwinjililo wa ŋanda ya bwaami ceebo tebakalinga kusuminisha muntu ufwete masaka kwinjila muŋanda ya bwaami. 3Anu kushipansha shoonse sha cishi uko kwakashika mulawo wa mwaami uyo, kwakaba kuungumana kunene pakati ka baJuda. Bakalikasha kulya, kulila buumpute akooloma alimwi baanji bakafwala masaka akoona mumilota.
4Lyalo basebenshi banakashi bakwe Esita abasankwa bakwe abo bakacaikwa lushalo ndibakamwaambila shakacita Modekayi, wakapenshekwa abuumbi mumoyo. Mpeeke wakamutumina shakufwala ayi afwale kuleka masaka, sombi lakwe wakakaka. 5Mpomunyaawo Esita wakeeta Ataki, womwi wa basankwa bakacaikwa lushalo uyo wakatumwa kuswa kumwaami ayi anoosebensela Esita. Mpeeke wakamutuma ayi eepushe capensha Modekayi. 6Aboobo Ataki wakaya kuli Modekayi kulubansa lwa ndabala ulo lwakalinga kumwinjililo wa ŋanda ya bwaami. 7Lyalo Modekayi wakaamba shoonse shakamucitikila amweelo wa maali ayo Amani ngwaakashomesha kupa kuŋanda yakusungilako buboni bwa kubwalo kwaamba ayi baJuda bacaikwe. 8Wakamupa acipepala apo pakalinga kulembetwe mulawo wakunyonyoola uyo wakaambilishikwa kuSusa kwaamba ayi atondeshe Esita akumusansulwita. Lyalo wakamwaambila ayi alwiite Esita kuya kumwaami mukupapaata akusengelako nkumbu bantu bene mishaabo.
9Mpomunyaawo Ataki wakaya mukwaambila Esita bwakaamba Modekayi. 10Alakwe Esita wakamukumbula ayi, 11“Bacinenenene boonse ba mwaami abantu bamwi boonse bekala mushipansha sha cishi, balishi kwaamba ayi musankwa uli woonse nabi mwanakashi uyo weenga wenjila mulubansa lwa mukati muŋanda ya mwaami kwakuteetwa, ulyeelete kucaikwa. Uyu ngomulawo uliiwo. Sombi na mwaami watondeka muntu uyo nkooli ya bwaami ya golodi, inga taacaikwi. Ono peenda nshiku makumi otatwe mwaami ndyaakaswa mukunjitaawo.”
12Ono Modekayi ndyaakanyumfwa maswi akwe Esita, 13wakakumbula ayi, “Utayeeyi kwaamba ayi webo weenka pamushobo wa baJuda ulaakupuluka ceebobo cakwaamba ayi uli muŋanda ya bwaami. 14Nkokwaamba ayi na uumunebo paciindi ca mushobo uyo, lucafwo lulaakuswa kwiculu pabaJuda, balaakupulushikwa. Sombi webo ulaakufwa pantu pomwi abamumukowa wa baiso. Ngani wishi, mpashi ici nceciindi ncewakabeta muka mwaami?”
15Mpeeke Esita wakamukumbula ayi, 16“Kamuya mukabunganye baJuda boonse bali muSusa, mulikaashe kulya akumpaililaako. Mutakali nabi kunwa cintu cili coonse kwanshiku shili shotatwe. Nebo alimwi abasebenshi bangu banakashi tulaakunoocita bweenka ubo. Kuswawaawo ndaakuya kumwaami nabi mulawo ulakasha. Na cilaamba kufwa, ankafwebo!”
17Lyalo Modekayi wakaya akucita shoonse isho shakamwaambila Esita.
Currently Selected:
Esita 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
