Milimo ya Batumwi 7
7
Sitifini mbwaakaambila nkuta
1Lyalo mupailishi munene wakeepusha Sitifini ayi, “Sa ishi shoonse nshebatokwaamba nshalushinisho?”
2Sitifini wakakumbula ayi, “Nobamakwesu anobashali bangu basankwa amunyumfwe, Lesa wa bulemu wakaboneka kuli ishiwesu Abulaamu ndyaakalinga kwikala kuMesopotamya kaatana kulongela kundabala ya Alani. 3Wakamwaambila ayi, ‘Shiya mukowa wako acishi cine mishaanu, uye kucishi nceshi nkakuboneshe.’#Mata 12:1 4Mpamunyaawo Abulaamu wakashiya cishi ca Kaludeya akuya mukwikala kuAlani. Ono baishi ndibakafwa, Lesa wakamulonshesha mucishi cino ncemushiiteemo bulya.#Mata 11:31; Mata 12:4 5Paciindi ico Lesa kaatana kumupa cishi naciceyi, sombi wakamushomesha ayi ulaakupa cishi ici kuli nguwe alimwi alunyungu lwakwe nakubi kwaamba ayi taakalinga kucite mwaana.#Mata 12:7; 13:15; 15:18; 17:8 6Mpeeke Lesa wakamwaambila ayi, ‘Baana ba mulunyungu lwako balaakuya mukwikala kucishi cimwi, uko nkweshi bakabe basha akupenshekwa myaaka ili myaanda yone.#Mata 15:13-14 7Sombi ndaakoombolosha akupa mulandu bantu abo mbweshi bakasebensele cabusha. Kuswawaawo balaakuswaamo mucishi ico alimwi balaakunambila mumusena uno.’#Kulo 3:12 8Lyalo Lesa wakalwiita Abulaamu ayi anoopalula baana basankwa kwaamba ayi cibe citondesho ca cipangano. Paceebo ceeco Abulaamu wakapalula Isaki mwanaakwe ndyaakaba anshiiku shili shosanwe ashotatwe. Isaki alakwe wakapalula Jakobo mwanaakwe, alakwe Jakobo wakapalula bana bakwe basankwa bali likumi abobilo abo bamashali besu bakulukulu.#Mata 17:10-14; Mata 21:2-4; Mata 25:26; Mata 29:31—35:18
9“Bana bakwe Jakobo aba, bakanyumfwila munyono Josefu mukwababo akumuulisha kubantu abo bakaya mukumuulisha ayi akabe musha muIjipiti. Sombi Lesa wakalinga kumucafwa 10akumufuna mumapensho oonse ngaakalinga kubaawo. Josefu ndyaakaboneka kuli Falawo mwaami wa kuIjipiti, Lesa wakamupa busongo ubo bwakalengesha ayi Falawo amusuune. Paceebo ceeco Falawo wakamubika ayi abe mweendeleshi wa cishi cakwe alimwi aŋanda yakwe.#Mata 41:39-41 11Lyalo mwakaba nsala mucishi coonse ca Ijipiti alimwi aKenani, iyo yakaleta mapensho anene kubantu. Bamashali besu bakulukulu tebakalinga kukonsha kucana cakulya.#Mata 42:1-2 12Ono Jakobo ndyaakanyumfwa ayi muIjipiti muli cakulya, wakatuma bana bakwe, bamashali besu bakulukulu, kuIjipiti mulweendo lwabo lutaanshi. 13Mulweendo lwabo lwabili, Josefu wakaliyubulula kubamakwabo akwishibisha Falawo shapabamakwabo.#Mata 45:1; Mata 45:16 14Lyalo Josefu wakatuma maswi kuli ishi Jakobo ayi akese kuIjipiti abamakwabo boonse. Bantu boonse pantu pomwi bakalinga makumi osanwe aobilo alimwi abosanwe.#Mata 45:9-10; 17:18; Mata 46:27 15Mpeeke Jakobo wakaya kuIjipiti, uko lakwe abamashali besu bakulukulu nkobakaya mukufwita.#Mata 46:1-7; Mata 49:33 16Mituntu yabo yakatolwa kuShekemu uko nkobakeefukila mushuumbwe isho nshakoola maali Abulaamu kubana bakwe Amo.#Mata 23:3-16; 33:19; 50:7-13; Joshu 24:32
17“Ono ciindi ndicakasenena kwaamba ayi Lesa acite kweelana ambwaakashomesha Abulaamu, bantu ba mushobo wesu bakafula abuumbi muIjipiti. 18Pesule kwakaba mwaami umwi muIjipiti uyo watakalinga kwishi Josefu.#Kulo 1:7-8 19Mwaami uyo wakacenjeeka akupensha bantu besu ndyaakalinga kubakakatisha ayi banooshiya bakateta pansengwe lya maanda kwaamba ayi bafwe.#Kulo 1:10-11; Kulo 1:22 20Ico nceciindi Mose ncaakashalilwaamo. Wakalinga mwaana mubotu abuumbi, mpeeke banyina bakamulela myeenshi yotatwe.#Kulo 2:2 21Ndibakamushiya pansengwe lya ŋanda, mwanaakwe Falawo mwanakashi wakamubwesa akumulela mbuli mwanaakwe.#Kulo 2:3-10 22Aboobo Mose wakeeya busongo bwa bene Ijipiti, lyalo wakaba muntu munene, ulemekwa mumyaambo amicito.
23“Mose ndyaakaba amyaaka ili makumi one, wakayeeya kufwakashisha bene Isilaelinyina.#Kulo 2:11-15 24Mpomunyaawo wakabona mwine Ijipiti umwi kaapensha mwine Isilaeli. Abone boobo, Mose wakaya mukufuna mwine Isilaelinyina akucaya mwine Ijipiti uyo. 25Lakwe wakayeeya ayi bene Isilaelinyina batooshiba ayi Lesa utoobapulusha kwiinda muli nguwe, sombi tabakwe kwishiba. 26Bushiku bwakaboolaawo, Mose wakacana bene Isilaeli bobilo kabalwana. Mpeeke wakeelesha kubalamwita. Wakabaambila ayi, ‘Mwebo namata, bana muli bamukowa, anu mutoolwaninanshi?’ 27Sombi uyo wakalinga kupensha mubye wakashindika Mose akwaamba ayi, ‘Wakakusala ayi ube mutanjilili wesu alimwi ashikutoombolosha ngani? 28Sa utooyanda kuncaya bweenka mbowakacaya mwine Ijipiti ulya ciilo?’ 29Mose ndyaakanyumfwa boobo, wakacicila kuMidyani uko nkwaakashalila baana basankwa bobilo.#Kulo 18:3-4
30“Ono ndipakeenda myaaka makumi one, munjelo wakaboneka kuli Mose mucikupu cakalinga kunyaka muluyanga, pafwaafwi aKalundu ka Sinayi. 31Mose wakakankamana abuumbi ndyaakabona ceeci. Ono ndyaakasena pafwaafwi ayi aboneshe, wakanyumfwa liswi lya Mwaami Lesa ayi, 32‘Ndime Lesa wa bamashali bako bakulukulu, Lesa wakwe Abulaamu, Isaki alimwi aJakobo.’ Lyalo Mose wakatutuma akuloonda cakwaamba ayi cakaala akulangaako. 33Mpomunyaawo Mwaami Lesa wakamwaambila ayi, ‘Fuula nkwabilo shako mukwiinga apo mpooimfwi mpamusena usalalite. 34Ncakwiila ndaboona mbuli mbobatoopenshekwa bantu bangu muIjipiti. Paceebo ceeco, ndaanyumfwa matongooshi abo, ono ndesa mukubapulusha. Kwesa ono, nkutume kuIjipiti.’#Kulo 3:1-10
35“Uyu ngoMose ngubakakaka bene Isilaeli ndibakeepusha ayi, ‘Wakakusala ayi ube mutanjilili wesu alimwi ashikutoombolosha ngani?’ Ngowooyo Lesa ngwaakatuma ayi abe mutanjilili amupulushi, kwiinda mumunjelo uyo wakaboneka kuli nguwe mucikupu cakalinga kunyaka.#Kulo 2:14 36Mose wakatanjilila bantu aba pakuswa muIjipiti. Wakacita shaankamiko alimwi ashitondesho sha nkusu sha kwiculu muIjipiti, paLweenge Lusalala alimwi amuluyanga myaaka ili makumi one.#Kulo 7:3; 14:21 37Mose uyu ngowooyo wakaambila bene Isilaeli ayi, ‘Lesa ulaakumutumina mulaluki mbuli ndime, eshi akaswe mulunyungu lwanu.’#Duto 18:15, 18 38Ngowooyo wakalinga abene Isilaeli ndibakabungana muluyanga. Ngowakalinga abamashali besu bakulukulu alimwi amunjelo wakalinga kwaamba anguwe paKalundu ka Sinayi. Ncakwiila ngowakatambula maswi abuumi ayi atulwiite.#Kulo 19:1—20:17; Duto 5:1-33
39“Sombi bamashali besu bakulukulu bakakaka kumunyumfwila ceebo myoyo yabo yakalingabo kuIjipiti. 40Lyalo bakaambila Aloni ayi, ‘Tupangile balesa abo beshi batutanjilile mukwiinga tatwishi cacitika kuli Mose uyo wakatukusha muIjipiti.’#Kulo 32:1 41Ici nceciindi ncebakabumba cibumbwabumbwa cakalinga kukoshanya amucende mwaana. Bakatalika kubenga milambu akubamba shakulya shakusekelela mukulemeka ceeco ncebakalipangila beene.#Kulo 32:2-6 42Sombi Lesa wakabafutatila akubaleka ayi banoolambila nyenyeenshi sha mwiculu, kweelana ambuli mbomulembetwe mulibuku lya balaluki bakulukulu ayi,
‘Mwebo nobene Isilaeli! Sa ndime mwakalinga kubengela milambu akupa shipo
kwamyaaka makumi one muluyanga? Sobwe.
43Mwakalinga kunyamuna lesa wanu Moleki mutente
alimwi anyenyeenshi ya lesa wanu Lefani.
Isho shakalinga shibumbwabumbwa
nshemwakapanga ayi munoolambila.
Paceebo ceeco, ndaakumutandila kulaale
kwiindilila kucishi ca Babiloni.’#Amo 5:25-27
44“Bamashali besu bakulukulu bakalinga kucite Tente ya Cipangano yakalinga kutondesha ayi Lesa mpwaali pakati kabo muluyanga. Lyakapangwa kweelana aLesa mbwaakalwiita Mose mucikoshanyo ncaakabona.#Kulo 25:9, 40 45Kuswawaawo, bamashali besu bakulukulu bakashiilwa Tente kuswa kubamashali babo. Mpeeke bakalinga kwiinyamuna ndibakalinga aJoshiwa, pakubwesa cishi ico Lesa ncaakatandamo mishobo imwi kunembo lyabo. Bakekala aTente iyo kushikila amunshiku shakwe Defedi#Joshu 3:14-17 46uyo Lesa ngwaakasuna abuumbi muncito yakwe. Lyalo wakasenga Lesa ayi amusuminishe kumuyakila Ŋanda, lakwe uli ngoLesa wakwe Jakobo.#2 Samwe 7:1-16; 1 Maka 17:1-14 47Sombi nguSolomoni wakamuyakila Ŋanda iyo.#1 Baami 6:1-38; 2 Maka 3:1-17
48“Nakubi boobo Lesa wa kwiculu Wiindaawo taakali mumaanda ayakwa abantu. Kweelana abwakaamba mulaluki mukulukulu ayi,
49‘Mwaami Lesa wakaamba ayi, Liculu ncecuuna cangu ca bwaami,
acalo cishi ca panshi mpopakulyata myeendo yangu.
Ino inga mwanjakila ŋanda ili buyani?
Uli kuli musena umo mweshi nokookeshesha?
50Sa teshi ndime ndakalenga shintu shoonse ishi?’#Isa 66:1-2
51“Mwebo nobeshicimpamya! Myoyo yanu ilibo anga nja bantu batashomi muli Lesa alimwi matwi anu taanyumfwi makani akwe! Mulikoshenyebo abamashali banu bakulukulu mukwiinga amwebo tamunyumfwili Mushimu Usalashi!#Isa 63:10 52Sa kwakalingawo mulaluki bamashali banu bakulukulu ngobatakwe kupensha? Bakacaya batumwi bakwe Lesa abo bakaamba shakwisa kwa musebenshi wakwe ululeme. Ono amwebo mwakamwaaba akumucaya. 53Mwebo ndimwe mwakatambula Milawo yakwe Lesa iyo yakaleta baanjelo mucishi ca panshi, sombi tamukwe kwiikonkela.”
Sitifini mbobakamuuma mabwe
54Ono beendeleshi ba nkuta ndibakanyumfwa maswi akaamba Sitifini, bakakalala abuumbi, kababimbabo. 55Sombi Sitifini ndyaakesushikwa Mushimu Usalashi, wakalanga kwiculu akubona bulemu bwakwe Lesa alimwi aJesu kaaimfwi kululyo lwakwe Lesa. 56Mpeeke wakaamba ayi, “Amunyumfwe! Ndaboona liculu lyacaluka alimwi aMwanaaMuntu uliimfwi kululyo lwakwe Lesa!”
57Mpomunyaawo beendeleshi ba nkuta bakoolobesha akushinka mumatwi. Paciindi ceenka ico, boonse bakamufukukila. 58Kuswawaawo bakamukwelela pansengwe lya ndabala inene akumuuma mabwe. Mpeeke bakamboni bakapa shakufwala shabo sha peculu kumusankwa wacanike wiitwa ayi Saulo ayi abalamineeko. 59Ndibakalinga kumuuma mabwe, Sitifini wakalinga kupaila kaamba ayi, “NoBaami bangu baJesu, amutambule muuya wangu!” 60Kuswawaawo wakafukama akupaila muliswi lya peculu ayi, “Nkambo, amubalekelele cibiibi ici ncebatoocita!” Ndyaakamana kwaamba boobo, wakatula moyo.
Alakwe Saulo wakasumina ayi bacita kabotu kumucaya.
Currently Selected:
Milimo ya Batumwi 7: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
