Milimo ya Batumwi 6
6
Mbobakasala bacafwi bosanwe abobilo
1Munshiku isho bashomi bakalinga kuya cifula. Paceebo ceeco baJuda baamba ciGiliki, bakalinga kutongooka ayi baJuda baamba ciJuda, tebakalinga kwaabanya kabotu maali akuula shiyandika lyoonse, kubanakashi bamukalubinje ba mushobo wabo. 2Aboobo batumwi bali likumi abobilo bakabunganya bashomi boonse akubaambila ayi, “Teshi cibotu kwaamba ayi swebo tucileeke kushimikila maswi akwe Lesa akutalika kubona ayi bamukalubinje banakashi batoopekwa shoonse shiyandika mubuumi bwabo. 3Anu nobamakwesu, amusale basankwa bali bosanwe abobilo kuswa mulikoto lyanu, abo bashibikitwe ayi baliswite Mushimu Usalashi alimwi mbasongo kwaamba ayi tubape mulimo uyu. 4Sombi swebo tutoolibenga kumipailo akushimikila maswi akwe Lesa.”
5Mpeeke likoto lyoonse lya bantu lyakakondwa amakani akaamba batumwi. Lyalo bakasala Sitifini, musankwa wakalinga kuswite lushomo alimwi aMushimu Usalashi. Alimwi bakasala Filipo, Pulokolasi, Nikana, Timoni, Pamenasi alimwi aNikolasi wa kuAntyoki, uyo wakalinga kukonkela kwiisha kwa baJuda kalekale. 6Kuswawaawo likoto lyakatola basankwa aba kubatumwi, abo bakapaila akubika maansaabo pali mbabo.
7Lyalo maswi akwe Lesa akanyumfwika kubantu baanji. Mpeeke bashomi bakalinga kuya bufulilakobo alimwi bapailishi baanji bakashoma Makani Abotu.
Mbobakacata Sitifini
8Sitifini wakalinga muntu Lesa ngwaakapa shoolwe ankusu shiinji, aboobo wakacita shaankamiko alimwi ashitondesho sha nkusu sha kwiculu pakati ka bantu. 9Sombi bamwi bantu bakatalika kumupikisha. Aba bakalinga ba mulikoto lya coonde ca baJuda ca Basankwa Bakaangululwa (kweelana ambocakalinga kwiitwa), umo mwakalinga abaJuda ba kuSailini alimwi akuAlekisandiliya. Kwakalinga abamwi baJuda baswa kuSilisiya alimwi aEsha bakamupikisha. 10Nakubi boobo bantu aba bakaalilwa kumukoma ceebo wakaamba mubusongo bwa Mushimu Usalashi. 11Lyalo bakayungoola basankwa bamwi kumapela ayi bakaambe ayi, “Twakamunyumfwa kaamba makani akucobola Mose alimwi aLesa!” 12Mukucita boobo bakakalasha bantu, bamaloba ba baJuda alimwi abafundishi ba Milawo. Kuswawaawo, bakacata Sitifini akumutola kunkuta ya baJuda. 13Lyalo bakaleta bakamboni babeshi abo bakesa mukwaamba ayi, “Uyu muntu lyoonse ulaamba makani akucobola Ŋanda yakwe Lesa isalalite alimwi aMilawo yakwe Mose. 14Mukwiinga twakamunyumfwa kaamba ayi, uyo Jesu wa kuNasaleti ulaakunyonyoola Ŋanda yakwe Lesa akusandula shishiyashiya shakatupa Mose!” 15Mpomunyaawo boonse boomboloshi bakalangilishisha Sitifini, lyalo bakabona ciwa cakwe kaciboneka anga nca munjelo.
Currently Selected:
Milimo ya Batumwi 6: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
