Milimo ya Batumwi 4
4
Pita aJoni mbobakoomboloshekwa ankuta ya baJuda
1Pita aJoni kabacaamba abantu, kwakesa bapailishi, munene wa beshikulindilila kuŊanda yakwe Lesa alimwi abaSaduki bamwi. 2Bantu aba bakakalala mukwiinga batumwi bobilo abo bakalinga kwiisha bantu ayi Jesu wakabuka kuswa kubafu akwaamba ayi paceeco ceeco bafu balaakubuka. 3Aboobo bakabacata akubabika muntolongo kushikila bushiku bwakaboolaawo ceebo lisuba lyakalinga lyepila kale. 4Sombi bantu baanji bakanyumfwa kushimikila kwakwe Pita aJoni bakashoma. Mpeeke basankwa bakashoma bakashika mpashi shuulu shosanwe.
5Bushiku bwakaboolaawo bamatanjilili ba baJuda, bamaloba alimwi abafundishi ba Milawo bakabungana muJelusalemu. 6Bakalinga aAnasi mupailishi munene, Kayafasi, Joni, Alekisanda alimwi abeshikamukowa ba mupailishi munene. 7Bakeemika Pita aJoni kunembo lyabo akubeepusha ayi, “Ino mwakamushilika buyani muntu uyu? Ninkusu shakwe ni nabi ndiina lyakwe ni ndimwakasebensesha?”
8Mpomunyaawo Pita wakesushikwa Mushimu Usalashi, mpeeke wakabakumbula ayi, “Mwebo nobamatanjilili abamaloba, 9sa sunu mutootwiipusha pamulimo ubotu ngotwakacita pamusankwa mulema myeendo ambuli mbwaakaba kabotu? 10Ono mwebo noonse abantu ba muIsilaeli, mulyeelete kwishiba ayi uyu musankwa uliimfwi kunembo lyanu sunu, kaaensene ceebo ca nkusu shakwe Jesu Klistu wa kuNasaleti. Ngowooyo ngomwakapopa pamucilingano, sombi Lesa wakamubusha kuswa kubafu. 11Jesu ngowooyo waambwa muMalembo akwe Lesa ayi,
‘Libwe ndimwakakaka akusuula mwebo nobayaki
lyakaba ndyelibwe liyandika lya mulikonko
lya ŋanda.’#Kulu 118:22
12Lupulusho lulacanikabo muli nguwe eenka mukwiinga taaku liina alimwi mucishi ca panshi Lesa ndyaakapa ayi inga twapulukilaamo.”
13Ono boomboloshi ndibakabona ayi Pita aJoni bakalinga kwaamba cakubula boowa, bakakankamana abuumbi ceebo bakeshiba ayi tebakalinga kwiiteewo, bakalinga bantubo. Mpeeke bakeshiba ayi bakekala bunene aJesu. 14Sombi bakabula cakwaamba mukwiinga bakalinga kumubwene musankwa uyo wakaba kabotu kaaimfwi aPita alimwi aJoni. 15Paceebo ceeco bakabaambila ayi baswe munkuta. Lyalo boomboloshi bakacaala kabalifuyafuya. 16Bakatalika kwiipushanya ayi, “Ino tutoobacita buyani bantu aba? Boonse bantu muJelusalemu balishi kwaamba ayi Pita aJoni mbobakacita caankamiko ici, aswebo inga tatukakiiwo. 17Ono kwaamba ayi cikani ici citanyumfwiki bunene kubantu baanji, atubakonkomeshebo bantu aba ayi batakabooshiiwo lyobilo kwaambila muntu nabi womwi muliina lyakwe Jesu.”
18Ndibakamana kwaamba boobo, bakeeta Pita aJoni akubalwiita ayi batakeeleshi kwaamba nabi kwiisha lyobilo shapali Jesu. 19Sombi Pita aJoni bakabakumbula ayi, “Mwebo nobeene amusale ciluleme pameenso akwe Lesa, na swebo tunyumfwile ndimwe nabi kunyumfwila Lesa. 20Mukwiinga swebo inga tatucilekiiwo kwaamba shintu nshetwakalinga kubona akunyumfwa sobeene.” 21Boomboloshi bakabooshaawo kubakonkomesha akubakonga ayi batakabooshiiwo, mpeeke bakabaleka. Tabakwe kubacanina mulandu ceebo bantu boonse bakalinga kulumbaishabo Lesa pacikani cakacitika. 22Uyo muntu wakaba kabotu munshila ikankamika wakalinga kucite myaaka makumi one aisotoka.
Bashomi mbobakapaila
23Pita aJoni ndibakaangululwabo, bakaboolela kubabyaabo abo bashomi akubalwiita shoonse shakabaambila bamatanjilili ba bapailishi abamaloba. 24Ono bashomi ndibakanyumfwa makani aya, boonse bakapailila pantu pomwi amoyo womwi ayi, “Nkambo Lesa, mwebo nomwakalenga kwiculu, cishi amilonga alimwi ashintu shoonse shiliimo.#Kulo 20:11; Neye 9:6; Kulu 146:6 25Kwiinda muMushimu Usalashi mwakaambilila muli ishiwesu Defedi, musebenshi wanu apo ndyaakaamba ayi,
‘Ino baswamashi bakunsengwe bakakalalanshi?
Bantu abo bakayeeyelanshi shintu shitaaku mboshibete?
26Bamaami ba pacishi bakalibambila,
abalo beendeleshi bakabungana pantu pomwi ayi
babukile Mwaami Lesa alimwi aUsalitwe wakwe.’#Kulu 2:1-2
27Ndushinisho Elodi aPontyasi Pilato bakabungana mundabala inene ino, pantu pomwi abaswamashi bakunsengwe alimwi abene Isilaeli, ayi babukile Jesu, Musebenshi wanu usalalite, uyo ngomwakalengesha ayi abe Usalitwe wanu.#Luka 23:7-11; Mate 27:1-2; Maako 15:1; Luka 23:1; Joni 18:28-29 28Bakabungana pantu pomwi kwaamba ayi bacite shoonse isho mwebo nshemwakalinga kubambite kale kwiinda munkusu shanu alimwi akuyanda kwanu. 29Ono bulya Nkambo, amubone mbobatukonga. Anu amutupe nkusu swebo sobasebenshi banu ayi tushimikile maswi anu cakubula boowa. 30Amutandabike lyaansa lyanu kwaamba ayi mushilike bantu, alimwi mulengeshe kwaamba ayi shitondesho sha nkusu sha kwiculu alimwi ashaankamiko, shicitike kwiinda muliina lya musebenshi wanu usalalite Jesu.”
31Ndibakamana kupaila, pamusena apo mpobakalinga kubungene pakatenkaanishikwa. Lyalo boonse bakesushikwa Mushimu Usalashi akutalika kushimikila maswi akwe Lesa cakubula boowa.
Bashomi mbobakaabana buboni bwabo
32Likoto lyoonse lya bashomi lyakalinga kucitebo moyo womwi amuyeeyo womwi. Tekwakalinga muntu wakalinga kwaamba ayi cintu ncaacite ncaakwe mwiine, sobwe, sombi lyoonse wakalinga kutola shoonse nshaacite kulikoto.#Mili 2:44-45 33Batumwi bakalinga kwaambilisha cankusu kubantu boonse ayi Mwaami Jesu wakabuka kuswa kubafu alimwi Lesa wakalinga kubapa shoolwe abuumbi. 34Tekwakalinga muntu mulikoto lyabo wakalinga kupenga ceebo abo bakalinga kucite myuunda nabi maanda bakalinga kuulisha akutola maali eenga acanika kulikoto. 35Maali ayo akalinga kupekwa mumaansa a batumwi abo bakalinga kwaabanya bantu kweelana akupenga kwabo.
36Anu kwakalinga musankwa umwi wiitwa ayi Josefu, mwine Lefi wakashalilwa kucishi ca Saipulasi, uyo batumwi ngobakalinga kwiita ayi Banabasi, (nkokwaamba ayi, “Injuminishi”). 37Alakwe wakoolisha muunda wakwe akutola maali mumaansa a batumwi.
Currently Selected:
Milimo ya Batumwi 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
