Milimo ya Batumwi 3
3
Pita mbwaakashilika musankwa mulema myeendo
1Bumwi bushiku Pita aJoni bakaya kuŊanda yakwe Lesa ciindi cakupaila ca 3 koloko malumwi. 2Ono kumwinjililo wa Ŋanda yakwe Lesa wakalinga kwiitwa ayi “Mwinjililo Ubotu,” kwakalinga musankwa mulema myeendo kuswabo kukushalwa kwakwe. Inshiku shoonse musankwa uyu bakalinga kumunyamuna akumukalika kumwinjililo, ayi anoosenga maali kubantu bakalinga kwinjila muŊanda yakwe Lesa. 3Ndyaakabona Pita aJoni kabenjila, wakabasenga ayi bamupeewo cimwi cintu. 4Mpomunyaawo balo bakamulangilishisha, lyalo Pita wakamwaambila ayi, “Tulangilishe!” 5Mpeeke alakwe wakabalangilisha, kaayeeya ayi mpashi batoomupawo cimwi cintu.
6Sombi Pita wakamwaambila ayi, “Nshicite maali akukupa, sombi ntookupa nceencite. Muliina lyakwe Jesu Klistu wa kuNasaleti, ndakwaambila ayi, ‘Nyamuka weende!’ ” 7Lyalo Pita wakamucata kulyaansa lyalulyo akumunyamuna. Paciindi ceenka ico myeendo yakaba ankusu amutupokoso mwakayuma.
8Mpomunyaawo wakasotooka, weemikana akutalika kweendeenda. Kuswawaawo, wakenjila aPita alimwi aJoni muŊanda yakwe Lesa, kaaya bweenda akusotooka kaalumbaisha Lesa. 9Bantu bakalinga muŊanda yakwe Lesa bakamubona kaaenda akulumbaisha Lesa. 10Ono ndibakamwishiba ayi ngomusankwa wakalinga kwikala kuMwinjililo Ubotu wa kuŊanda yakwe Lesa kaasenga maali, boonse bakakankamana akucelemanabo pasheesho shakacitika.
Maswi akaamba Pita muŊanda yakwe Lesa
11Ceebo musankwa uyo wakalinga kucikakatitebo Pita aJoni, bantu boonse bakakankamana akucicila kuli mbabo mumukushi wakalinga kwiitwa ayi wakwe Solomoni, umo mobakalinga. 12Ono Pita ndyaakabona bantu abo, wakabaambila ayi, “Mwebo nobene Isilaelima, nceebonshi mwakankamana pacikani ici akutulangilisha bobulya? Sa mutooyeeya ayi ninkusu shesu nabi mbululami bwesu bwalengesha ayi musankwa uyu eende? 13Mukucita ceeci Lesa wakwe Abulaamu, Isaki alimwi aJakobo, Lesa wa bamashali besu bakulukulu, watondesha bulemu kumusebenshi wakwe Jesu. Mwebo mwakamwaaba mumaansa a beendeleshi alimwi mwakamukaka pameenso akwe Pilato nakubi kwaamba ayi lakwe wakalinga kusuni kumwaangulula.#Kulo 3:15 14Jesu wakalinga muntu usalalite alimwi ululeme. Sombi mwebo mwakamukaka akusenga Pilato ayi amwaangulwite mucayi.#Mate 27:15-23; Maako 15:6-14; Luka 23:13-23; Joni 19:12-15 15Mwebo mwakacaya wooyo upa buumi bwancinencine, sombi Lesa wakamubusha kuswa kubafu. Ono swebo tuli bakamboni pacikani ici. 16Musankwa uyu ngomubwene alimwi ngomwishi, wayuma kwiinda mukushoma liina lyakwe Jesu. Ncakwiila ndushomo lwakwe muli Jesu lwalengesha kwaamba ayi ayume cancinencine kweelana ambomubwene noonse.
17“Ono nobamakwesu, ndishi kwaamba ayi mwebo abamatanjilili banu mwakacita sheeshi kuli Jesu mukutashiba. 18Sombi Lesa wakaambilabo limwi kwiinda mubalaluki bakulukulu boonse, ayi Usalitwe wakwe wakalinga kweelete kupenshekwa, aboobo shakacitika bweenka ubo. 19Anu amusanduke kuswa kushibiibi shanu, musandukile kuli Lesa kwaamba ayi shibiibi shanu shikushikwe. Na mucite boobo, 20Mwaami Lesa ndyeshi akamupe nkusu shipya ciindi aciindi, alimwi ulaakumutumina Usalitwe wakwe, Jesu, uyo ngwaakasala ceebo ca ndimwe. 21Lakwe ulyeelete kunooli kwiculu kushikila ciindi shintu shoonse shikalengwe cipya, kweelana abwakaamba Lesa kalekale, kwiinda mubalaluki bakulukulu basalalite. 22Ceebo Mose wakaamba ayi, ‘Mwaami Lesa wanu ulaakumutumina mulaluki wa mumushobo wanu bweenka mbuli mbwaakantuma. Mulyeelete kunyumfwila shintu shoonse nsheshi akamulwiite.#Duto 18:15, 18 23Uyo woonse eshi akabule kunyumfwila nsheshi akaambe mulaluki uyo, ulaakupansaanishikwa kuswa kubantu bakwe Lesa akunyonyoolwa.’#Duto 18:19 24Ndushinisho balaluki bakulukulu bamwi boonse, kutalikila pali Samwelo abaabo boonse bakesa pesule lyakwe, bakaamba pamakani a nshiku shino. 25Shintu shoonse Lesa nshaakashomesha kwiinda mubalaluki bakulukulu nshanu ceebo muli bamucipangano ico Lesa ncaakacita abamashali banu bakulukulu kweelana ambwaakaambila Abulaamu ayi, ‘Kwiinda mulunyungu lwako ndaakupa coolwe bantu boonse ba mucishi ca panshi.’#Mata 22:18 26Aboobo Lesa wakasala musebenshi wakwe akutaanguna kumutuma kuli ndimwe kwaamba ayi amupe coolwe mukulengesha ayi noonse womwi awomwi musanduke kuswa kushibiibi shanu.”
Currently Selected:
Milimo ya Batumwi 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
