Milimo ya Batumwi 2
2
Kwisa kwa Mushimu Usalashi
1Bushiku bwa Pentekositi ndibwakashika, bashomi boonse bakalinga kubungene muŋanda yomwi.#Bene Lefi 23:15-21; Duto 16:9-11 2Mpomunyaawo bakanyumfwa coongo cakuba anga ncipuupu kuswa kwiculu akususha ŋanda yoonse njebakalingaamo. 3Lyalo bakabona shimwi shakalinga kuboneka anga njimilaka ya mulilo iyo yakaya mukwikala pali womwi awomwi. 4Mpeeke boonse bakesushikwa Mushimu Usalashi akutalika kwaamba mishobo imwi, kweelana ambowakabatanjilila Mushimu uyo.
5MuJelusalemu mwakalinga baJuda bakalinga kulemeka Lesa abo bakaswa mushishi shipusenepusene. 6Ndibakanyumfwa ciyobeyobe ici, bantu baanji baanji bakabungana. Boonse bakakankamana abuumbi ceebo womwi awomwi wakanyumfwa bashomi kabaamba mumulaka wakwe mwiine. 7Cikani ici cakabashingulusha mitwi akwaamba ayi, “Sa te aba bantu boonse batokwaamba bobulya mbene Galili? 8Ino nceebonshi swebo soonse tutoobanyumfwa kabaamba mumishobo yesu? 9Sobamwi tulaswa kucishi ca Paatiya, Mediya akuElamu, kuMesopotamya, Judeya, Kapadosiya, Pontusi alimwi akuEsha. 10Bamwi balaswa kucishi ca Fuligiya akuPamfilya, kuIjipiti alimwi akumisena ili mucishi caLibya kufwaafwi aSailini. Swebo sobamwi tuli beensu tulaswa kuLoma, 11bamwi mbaJuda abaswamashi bakunsengwe bakonkela kwiisha kwa baJuda alimwi swebo sobamwi tulaswa kuKileti akuAlebya. Nakubi boobo soonse tutoonyumfwa kabaamba mishobo yesu shashintu shinene isho Lesa nshaakacita!” 12Ceebo cikani ici cakabashingulusha mitwi, bakatolelela kwiipushanya womwi awomwi ayi, “Ino ici citoocitika cilaambanshi?”
13Sombi bamwi bakatalika kuseka bashomi kabaamba ayi, “Taaku cimbi, mbwalwa bwabakola!”
Pita mbwaakashimikila Makani Abotu
14Mpomunyaawo Pita wakanyamuka abatumwinyina bali likumi awomwi akutalika kwaambila likoto lya bantu muliswi lya peculu ayi, “Mwebo nobaJudama amwebo noonse nomwikala muJelusalemu, amukutike alimwi munyumfwishishe makani aya mbwaabete. 15Aba bantu tabakoletweewo kweelana ambomutooyeeya, ceebo licilibo macuunsa. 16Anu ici ncecakaamba mulaluki mukulukulu Jowelo ayi,
17‘Lesa wakaamba ayi, Munshiku shamamanino,
ndaakutila Mushimu wangu pabantu boonse.
Bana banu basankwa abanakashi balaakwaamba maswi angu.
Bacikula bwangu banu basankwa balaakubona shintu anga muciloto,
abalo bamacembele banu basankwa balaakulota shiloto.
18Ee, ndaakutila Mushimu wangu apabasebenshi bangu,
basankwa abanakashi munshiku isho,
alimwi balaakwaamba maswi angu.
19Ndaakucita shaankamiko kwiculu
alimwi ashitondesho sha nkusu sha kwiculu pacishi ca panshi.
Kulaakuba bulowa, mulilo alimwi ashikunku wa bwiishi.
20Lisuba lilaakuboolabo mbi,
awalo mweenshi ulaakusalalabo pyu anga mbulowa,
kabutana kushikila bushiku bwangu nebo neMwaami Lesa,
ubo bunene bwa bulemu.
21Lyalo uyo woonse usenga ndime neMwaami Lesa ayi mucaafwe,
ncakwiila ulaakupulushikwa.’#Jowe 2:28-32
22“Mwebo nobene Isilaelima, amukutikishe makani aya ngontoomulwiita! Ulya Jesu wa kuNasaleti wakalinga muntu uyo Lesa ngwaakatondesha ayi ngowooyo ngwaakasala akumutuma kuli ndimwe. Lesa wakabonesha cikani ici, kwiinda mushaankamiko ashitondesho sha nkusu sha kwiculu nshaakacita muli Jesu pakati kanu, kweelana ambuli mbomwishi. 23Kweelana akuyanda kwakwe mwiine Lesa, wakabambila limwi ayi Jesu ulaakwaabwa mumaansaanu. Mpeeke mwebo mwakalengesha ayi bamucita shibi bamupope pamucilingano.#Mate 27:35; Luka 23:33; Joni 19:18 24Sombi Lesa wakamwaangulula kushicisa sha lufu akumubusha kuswa kubafu ceebo tecakalinga kukonsheka ayi lufu inga lwamukoma.#Mate 28:5-6; Maako 16:6; Luka 24:5 25Mukwiinga Defedi wakaamba shapali nguwe ayi,
‘Ndakalinga kubona Mwaami Lesa kunembo lyangu lyoonse,
ceebo uli pafwaafwi anebo, aboobo teshi nkapenge.
26Paceebo ceeco moyo wangu wakondwa abuumbi,
alimwi ndisangalete abuumbi bulya ndintokwaamba.
Awalo mubili wangu wa buntu ulaakookesha akulangila muli Lesa.
27Mukwiinga teshi mukandekeleshe ayi nkanoolibo mumusena wa bafu,
nabi kundekelesha neMusebenshi wanu Usalalite ayi mbole.
28Mwebo mwakanshibisha nshila shitola kubuumi,
alimwi ceebo mwebo muli anebo, ndasangalala abuumbi.’#Kulu 16:8-11
29“Nobamakwesu, ndyeelete kumulwiitilisha kabotu pamakani amwaami wesu Defedi mukulukulu. Lakwe wakafwa akufukilwa, alimwi cuumbwe cakwe nkocicili abobulya. 30Ceebo wakalinga mulaluki mukulukulu, wakeshiba ayi Lesa wakamushomesha akumukonkomesha ayi mulunyungu lwakwe mulaakuswa aumwi mwaami ngweshi akabe mbuli nguwe.#Kulu 132:11; 2 Samwe 7:12-13 31Ndyaakeshiba sheshi shikacitike kunembo, Defedi wakaamba shakubuka kwa Usalitwe wakwe Lesa. Wakaamba ayi,
‘Lesa taakwe kumulekelesha ayi ekalilile kumusena wa bafu,
awalo mubili wakwe tookwe kubola.’
32Lesa wakabusha Jesu uyu kuswa kubafu, aboobo swebo soonse tuli bakamboni ba shintu ishi. 33Wakasumpulwa akuba kulubasu lwalulyo lwakwe Lesa akutambula Mushimu Usalashi kuswa kuli Lesa Ishi, kweelana ambwaakamushomesha. Ishi nshemutoobona akunyumfwa, ncipo ca Mushimu Usalashi Jesu ncaatila pali ndiswe. 34Nakubi kwaamba ayi Defedi taakwe kuya kwiculu, sombi wakaamba ayi,
‘Mwaami Lesa wakaambila Mwaami wangu ayi,
Kala kululyo lwangu
35kushikila nkaalule balwani bako
ayi babe mpo pakulyata myeendo yako.’#Kulu 110:1
36“Aboobo mwebo nobene Isilaeli noonse, amwishibishe calushinisho ayi Jesu uyo ngomwakapopa pamucilingano, ngowooyo Lesa ngwaakabika ayi abe ngoMwaami alimwi ngoUsalitwe wakwe!”
37Ono bantu ndibakanyumfwa boobo, bakapenshekwa abuumbi mumyoyo. Lyalo bakeepusha Pita abatumwinyina ayi, “Nobamakwesu, ino tucite buyani?”
38Pita wakabakumbula ayi, “Amusanduke kuswa kushibiibi shanu, mubombekwe muliina lyakwe Jesu kwaamba ayi Lesa amulekelele akumupa Mushimu Usalashi. 39Mukwiinga Lesa nshaakashomesha, wakashomesha ndimwe abana banu alimwi abaabo boonse bali kulaale, abo Mwaami Lesa mbwaaita.”
40Pita wakatolelela kubaambila maswi amwi aanji akubacenjeshaako kaamba ayi, “Amulipulushe kumapensho ayo eshi akacitikile bamucita shibi ba cecino ciindi!” 41Mpeeke bantu baanji bakashoma maswi akaamba Pita. Lyalo bakabombekwa. Alimwi pabushiku bweenka ubo, bantu aba bakaba mulikoto lyabo mpashi bakalinga shuulu shotatwe. 42Ciindi coonse bantu aba bakalinga kubungana pantu pomwi ayi batumwi babeeishe. Bakalinga kwikala mubwanabwankashi akulita pantu pomwi alimwi akupaila.
Bwikaalo bwa bashomi mbobwakalinga
43Bantu boonse bakabona shaankamiko alimwi ashitondesho sha nkusu sha kwiculu Lesa nshaakacita kwiinda mubatumwi, bakakankamana. 44Boonse abo bakalinga kushoma muli Jesu bakatolelela kwikala mubwanabwankashi lyoonse akusebensesha buboni bwabo pantu pomwi.#Mili 4:32-35 45Nkokwaamba ayi bakalinga kuulisha buboni bwabo, ashintu shoonse nshebakalinga kucite akwaabanya maali kweelana akubula kwa muntu womwi awomwi. 46Bushiku abushiku bakalinga kubungana amoyo womwi muŊanda yakwe Lesa akulita pantu pomwi mumaandaabo amyoyo yakusangalala akuliceesha. 47Bakalinga kulumbaisha Lesa, mpeeke abantu boonse bakakondwa ndibakabona ncito yabo. Alakwe Mwaami wakalinga kuletelamo bantu abamwi inshiku shoonse mulikoto lyabo, abo bakalinga kupulushikwa.
Currently Selected:
Milimo ya Batumwi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
