2 Makabisi 5
5
Bantu mbobakabona nkondo ameenso abo
1Paciindi ceenka ico Antyokusi wakalwana nkondo kacibiibi acishi caIjipiti. 2Panshiku makumi one, muJelusalemu moonse bantu bakalibonena ameensotuba beshilumamba kabatantite pamaaki kaya cicica kabafwete shagolodi, masumo kaali mumaansa amipeeni. 3Makoto amaaki akalinga mumindando bakalinga kulibambite. Kabacite shakulwanisha masumo, amipeeni kabalwana shakukalisha kashuumana, nkoli kashiloka anga nimfula amifwi kayuuluka. 4Ono bantu boonse kabapaila ayi shoonse isho nshetutoobona mumeensotuba shibaletele shibotu.
Jasoni mbwaaleta nkondo mundabala yaJelusalemu
5Pesule lyakwe Jasoni kwakanyumfwika impuuwo yabubeshi yakwaamba ayi Antyokusi wakafwa. Ono lakwe Jasoni wakabwesa bantu 1,000 mukulwana nkondo kundabala iyo wakakoma bantu bakalinga pa misumba. Pakumana wakakoma ndabala yoonse. Menelasi wakacicila mucaanda cankondo. 6Jasoni wakashikilabo kucaya baJudanyina baanji akutababetaako nkumbu. Akutayeeyako ayi kukoma bantu bamushobo wako ncibiibi abuumbi. Lakwe kwaamba kwakwe ayi ndakooma balwani, akutabonaawo ayi mbamakwabo. 7Sombi wakaalilwa kunyaya bwaami bwacishi, lyalo cibiibi cakwe cakamulensha nsoni, kushikila wakacicila kucishi ca Amoni. 8Kumana kwakwe kwakalinga bobulya, aleta mwaami waba Aluya, wakamubika muntolongo. Bantu boonse bakalinga kumupatite ayi ngushikukaka milawo, alimwi bakalinga kumusampula paceebo cakucaya bantu bamushobo wakwe. Uli woonse wakalinga kumuyandoola, wakalinga kucicila kundabala uku akooku, lyalo pesule wakacicila kuIjipiti. 9Muntu wakwiinga watandaanya bantu baanji mucishi cakwe, lyalo alakwe waya mukufwita kucishi cabweensu. Wakacicila kushika akuSipata kayeeya ayi bantu bakooko balaakumutambula, pakwiinga bakalinga bamukowa womwi, ono cakaala. 10Mboboobo muntu uyo wakacaya bantu baanji, kutababika amushuumbwe, tapakwe akuboneka nabi womwi wakalosha misonshi, taaku wakatambula amalilo akwe, alimwi taakwe koona mucuumbwe ku bashali bakwe.
Antyokusi mbwaakalwana andabala ya Jelusalemu
11Mwaami Antyokusi pakunyumfwa shakalinga kucitika isho, wakayeeya ayi mbaJuda bakacita cibiibi. Lakwe wakapya moyo wakaswa kuIjipiti, kwisa mukunyaya Jelusalemu pakumuuma cankusu. 12Wakaambila beshilumamba bakwe ayi bacaye boonse mbeshi bacane, mutababeti nkumbu, ono beshi kucicila muŊanda mubatimbule panshingo. 13Bakacaya bweenka ubo, bacikula bwangu abacembele, banakashi, banababo bamyooye, alimwi abakateeta boonse bakabacaya. 14Panshiku shotatwe bantu 80,000 bakanyonyooka, 40,000 bakacaikwa munkondo, 40,000 bakoolishikwa busha.
15Sombi Antyokusi taakwe kukuta paceebo ncaakacita. Wakenjila muŊanda yakwe Lesa, Ŋanda Isalalite kwiinda maanda oonse apacishi cino capaanshi, wakalinga kumutanjilila ngu Menelasi, muntu ukaka milawo a cishi cakwe ulya. 16Wakacata shintu shisalalite amaansaakwe abiibi, wakanyaya shintu isho bamaami bamwi shebakapa ayi shikomeneshe bulemu abunenenene bwa muŊanda iyo. 17Antyokusi wakatalika kulitukumuna mumoyo wakwe, kuteshiba ayi Mwaami Lesa ulakukalalila bantu bamundabala umo paciindi ciniinibo. Paceebo cashibiibi shabo. Paceebo ceeco Mwaami Lesa wakacita anga wabalubaako kumusena usalalite uyo. 18BaJuda ndyebakacileka kucita shibiibi shinjiisho, nobamakwesu naakwiinga Lesa taakwe kumuuma Antyokusi akumukasha kucita shakwaambana shakwe, anga nshilya nshakabona Eliodolosi ulya, uyo mwaami Seleukusi ngwaakatuma ayi akabone ndalama sha muŊanda yakwe Lesa. 19Mwaami Lesa taakwe kusala bantu bakwe paceebo camusena weenka uyo, sombi wakasala musena uyo mulandu wabantu bakwe. 20Paceebo ceeco musena uyo awalo wakabona shibiibi isho shakawita bantu pesule pawaawo wakabona shisangalasha shanguwo. Wankusu shoonse wakabashiya ciindi ndyakakalala. Sombi Mwaami Lesa mwiine shoonse wakanyumfwana alimwi abantu bakwe, musena uyo wakaubamba, wakaba wabulemu abuumbi.
Aimwi nkondo njebakalwana muJelusalemu
21Antyokusi wakayumuna makilogilamu 62,000 asilifa muŊanda yakwe Lesa. Wakaboolela bwangu kuAntyoki. Mumoyo wakwe wakalinga kuyeeya sha shimpamya ayi ulakonsha kweensha bwato petala pataapu maanshi bweenka mbobweenda mumaanshi, abalo bantu bakwe kabaya bweenda pamaanshi anga petala. 22Wakashiya beendeleshi ayi banoopensha bantu kucishi coonse. KuJelusalemu wakashiyako Filipo wakuFilijiya uyo wakalinga mukali uyoosha kwiinda wooyo wakamutuma. 23Wakatuma aumwi Andulonikusi kuGelisumu. Pantu pomwi awooyo wakatuma Menelasi uyo wakalinga kupensha bantu bamucishi cakwe kwiinda mbwakalinga kupeshensha bantu bamwi. 24Antyokusi wakalinga kupatite baJuda kwiindaawo, ono wakatuma Apolonyasi, Mutanjilili waku Misiya, wakamupa likoto yabeshilumamba bali 22,000. Wakamwaambila ayi ukacaye abasankwa boonse, akuulisha bakanashi busha abanababo. 25Ndyaakaashika kuJelusalemu, Apolonyasi wakacita anga ulisuni luumuno, kushikila wakalindila kushikila pabushiku busalalite bwa Cibelu. Pabushiku bweenka ubo, bushiku baJuda mbobookesha pakutacata ncito, Apolonyasi wakabika beshilumamba bakwe mumundando kabayumwite shilwanyo shankondo. 26Lakwe wakabaambila ayi acaye bantu boonse nabaswe ayi bebeele beshilumamba mobatokweendela, pesule lyawaawo wakenjila mumushi woonse a beshilumamba aba, wakacaya bantu baanji. 27Ono Judasi Makabisi abantu bosanwe abantu bone wakacicila kuluyanda. Wakekala mutulundu ababye abo anga mbanyama bamuluundu, kaalya shilyo shimenabo muluundu, kuloonda ayi inga walibisha.
Currently Selected:
2 Makabisi 5: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.