2 Makabisi 4
4
Simoni mbwaakabekesha Onyasi
1Simoni ulya, uyo wakaluula shandalama shilya wabukila cishi cakwe alimwi, wakatalika kubekesha Onyasi. Lakwe wakaamba ayi, ulya wakacenjeeka Eliodolo wakamucatisha shibiibi shoonse shilya. 2Ono Onyasi uyo ucitila ndabala shabululami, wabukila bantu bamucishi cakwe, wakalinga kulama milawo yakwe Lesa. Simoni ulya taakalinga kuloonda ono inga wabukila cishi. 3Kupatana kwakwe kwakakomena ayi womwi wabakwabo Simoni wakacaya bantu bamwi. 4Mpeeke apo Onyasi wakabona ayi kupatana kwabo kwakaloondesha, lyalo ayi Apolonyasi mwanaakwe Menesiteyusi, muleli munene waku Silya aku Fenisha, wakalinga kuyunga Simoni. 5Ono wakaya kumwaami, Teeshi kwaamba ayi akaye mukubekesha bantu mucishi cakwe, sombi nkuyanda bubotu bwa boobo pantu pomwi. 6Lakwe wakabalwiita kabotu ayi pakubula kunyumfwana amwaami, teeshi cintu cibotu, ncintu cibotu kwaamba ayi luumuno lube muno nabi ayi Simoni aleke mikalo yakwe yabushilu. 7Seleuko ulya wakafwa, Antyokusi Epifane ngowakaba mwaami. Ono Jasoni, mukwabo Onyasi, wakamunyaya bunene kumupailishi munene munshila ibiibi. 8Wakaya kumwaami wakalishomesha ayi ndakupa 12,000 makilogilamu silifa alimwi amakilogilamu amwi 2,700 eshi akaswe kumwi. 9Wakashomesha alimwi ayi ulaakumupa 5,000, makilogilamu na akamushomeshe kuyaka cikolo cakwiisha shisekano shishiyene shiyene akulembesha likoto lyabacikula bwangu, alimwi ayi akalembe bantu bakuJelusalemu mulibuku lyamucishi mbuli mbobakacita ku Antyoki.
10Mwaami wakasuminisha, lyalo Jasoni paceebo ca ncito yakwe, wakatalika kwiisha bantu bamucishi ico bwikaalo bwaciGiliki. 11Wakasandula lucafwo ulu ndobakapekwa ciindi cakwe Joni kuswa kubamaami ba bene Silya. Joni uyo wakalinga kucite mwaana wakalinga kwiitwa ayi Eyupolemusi uyo wakaya kuLoma kuya mukunyumfwana kwaamba ayi bapange cibusa abene Loma. Jasoni alakwe wakaka milawo yesu yabuJuda wakaleta milawo iyo yatakalinga kweendelana aMulawo wesu. 12Taakwe kuloonda kuyaka cikolo cakwiishilaamo shisekano pafwaafwi aŊanda yabeshilumamba, alimwi wakacita ayi basankwa babulemu banokwiiyako bwikaalo bwaciGiliki. 13Ono milawo yaciGiliki yakatalika, lyalo baanji bakatalika kukonkela milawo yabatashomi, paceebo cakubica kwakwe Jasoni ulya, watakalinga muntu ushoma Lesa, watakalinga kweelete kuba munene wabapailishi nabi paniini. 14Alimwi pakati kasheesho shibiibi shoonse. Bapailishi bakacileka kusebensa incito ya pabacipaililo. Bakalinga kusampula Ŋanda yakwe Lesa, bakacileka alimwi kupa milambu. Na banyumfwa mulangu wakwiita bantu kushisekano, balo nkucica lubilo kucicila kweenka uko kucitaabo shisekano isho. 15Bakacileka kucita shamubulemu shabashalibabo, sombi bwalo bulemu kababusuni bwaciGiliki. 16Nceceeco ncebakalinga kucanina mapesho aanji. Bantu balya ici ncecalenga mapesho maanji ayo, bakayanda ayi bayande yande nshila, bakaba balwanibabo abo beshi kubalama. 17Ncakwiila, muntu takoonshi kusampula milawo yakwe Lesa akutamupensha. Bulya ishi nsheshakacitika pesule shakaambwa amaswi enkaayo.
18Ciindi cimwi kuTilo kwakalinga shisekano shapa mwaaka wakulenga shosanwe, alakwe mwaami wakalinga kweenka uko. 19Ono Jasoni mubiibi ulya wakatuma mutumwi kweenka uko kuswa kuJelusalemu, bakalembwa anga mbamucishi ca Antyoki. Bakayumuna makilogilamu 10,000 asilifa mukupa milambu wakutola kuli Elikulesi. Sombi shikutola ndalama isho wakayeeya ayi atatoli milambu pakwiinga nkubisha uko, lakwe wakayeeya ayi acite shintu shimwi. 20Bulya ndalama sheenka isho beene bakashituma bakalinga kusuni ayi bakape milambu kumwaami Elikulesi, balo bakashicitila ayi nsha shitabatisho shankondo.
21Apolonyasi, mwanaakwe Menesiteyusi wakamutuma kuIjipiti mukubona bwikaalo bwakubika mwaami Filometa Antyokusi wakanyumfwa ayi mwaami uyo taabusuni bwaami bwakwe Menesiteyusi. Lakwe wakayeeya kukaka paceebo cabuumi bwakwe, lyalo wakaya kuJopa, wakayindilila akuya mukushika kuJelusalemu. 22Jasoni wakamutambula mubulemu, pantu pomwi abantu boonse bamundabala umo. Pakumutambula bantu boonse bakanyasha shimanimweenge akwiimba nyimbo shakumulemenesha pesule Antyokusi wakaya kuFinisha a likoto lyakwe lyabeshilumamba.
Menelasi mbwaakapensha baJuda bamakwabo
23Ndyeepakeenda myaaka yotatwe, Jasoni wakatuma Menelasi, mukwabo Simoni ulya, ayi akatole ndalama kumwaami, ayi asenge maano pamakani amwi anene anene. 24Sombi Menelasi wakesa mukwiimikana pameenso amwaami wakamukusha moyo pakubona mibonekelo yakwe yabuleelo, lyalo wakamunyaya Jasoni cuuna cakwe cakuba munene pabapailishi boonse. Wakamupa 10,000 kilogilamu ya silifa kwiinda pandalama shilya Jasoni nshaakamupa. 25Ndyaakatambula nkalata kuswa ku mwaami wakamwaambila shabunene ubo wakaboolela kuJelusalemu. Taakalinga kuciteewo mibonekelo ili yoonse yakuba Mupailishi Munene, sombi wakalingabo abwikaalo bwabuntu alimwi mukali anga ninkalamu. 26Lyalo Jasoni uyo ngwakanyaya bunene bwa munene wakwe, alakwe umwi wakamunyaya, akucicila kucishi ca Amoni. 27Ono Menelasi ngowakaba Munene wabapailishi, sombi taakwe kumupa ndalama shilya nshaakamushomesha mwaami. 28Nakubi boobo Sositaleti, munene ulama beshilumamba, wakalinga kumwaambila ayi alipile, nabi yakalinga ncito yakwe yakusonkesha musonko, aboobo mwaami wakabeeta boonse bobilo. 29Menelasi wakashiila mukwabo Liyisimakusi kulama cuuna ca Mupailishi Munene mpeeke Sositaleti wakashiila Kalate, munene wankondo yakuKipilo.
30Ciindi ceenka ico bantu bakuTasusi abakuMalusi bakamubukila, pakwiinga mwaami wakapa ndabala shabo shobilo kuli Antyokusi, akasuwa wakwe. 31Mwaami wakaya bwangu ayi aye oomboloshe milandu iyo, wakashiya Andilonikusi, womwi wacinenenene kwaamba ayi eemikane pamusena wakwe. 32Mendasi wakayeeya ayi ici ceenka ceciindi cibotu. Lakwe wakeepa nongo shimwi shobilo sha golodi muŊanda yakwe Lesa, wakashipa cipo kuli Andilonikusi. Shimwi wakashuulisha kale kuTaya akundabala shimwi pafwaafwi anguwe. 33Onyasi ndyaakanyumfwa, ayi mboobulya mbocakacitika, makani wakayubula mubulelo, waya wacicila kuDafine pafwaafwi a Antyokusi. Ono lakwe wakasampula Menelasi. 34Nceceeco Menelasi ncakayumwita Andilonikusi palubasu, akumwaambila ayi acaye Onyasi. Ono Andilonikusi wakaya kuli Onyasi, wamwaambila ayi amupe lyaansa lyakwe lyalulyo kutamubishisha akumulwiita shaluumuno. Nabi boobo Onyasi wakalinga kutonshaanya mumoyo wakwe wakasumina kuswako uko, lyalo Andilonikusi wakamucaya penkaapo. 35Teshibo baJuda beenka, sombi abantu baanji bamushishi shimwi bakanyumfwa buumba bakapenshekwa paceebo cakucaya muntu uli bobulya pataapu mulandu. 36Ilyo mwaami ndyaakesa kuswa kuSilisiya, baJuda bakuAntyoki aba Giliki bamwi bapatite bwikaalo bubiibi, bakesa kumwaami a kutongooka shakufwa kwakwe Onyasi, wakacaikwa pataapu mulandu. 37Antyokusi wakanyumfwa buumba mumoyo wakwe wakapenga abuumbi, wakalila amisonshi pakuyeeya bwikaalo bubotu bwamaano amuntu wakafwa uyo. 38Kakalalite abuumbi, wakamunyaya Andilonikusi cakufwala cakwe cifubelafubela bakamukwamwita shakufwala shakwe, bakeendaakwe mumandabala oonse, kushikila apamusena mpaakamucaila Onyasi. Lyalo apo peenka mpobakamucaila Onyasi. Aboobo bakamucaya muntu ulya wakatila bulowa. Mwaami Lesa wakamupensha mbuli mbocakali kumweelete.
39Nshiku sheenka isho Liyisimakusi mwakeepa shintu shiinji shamuŊanda yakwe Lesa mundabala umo. Mukwabo Menelasi ngowakamucafwa. Mpuuwo iyo yakanyumfwika, bantu bakabungana kumubukila Lisimakeyo pakwiinga nongo shiinji shagolodi shakaluba. 40Ndyaakabona bukali abuunji bwabantu bakamubukila abo, Lisimakeyo wakapa bantu 3,000 sheesho shankondo, wakabaambila ayi babalwaane baJuda abo. Mutanjilili wabeshilumamba wakalingabo muntu umwi liina lyakwe ngu Aulanasi washaaka shiinji waciluyaluya. 41Sombi baJuda bakeshiba ayi nkondo iyo yaswa kuli Lisimakeyo bamwi bakabwesa mabwe, bamwi shisamu, abamwi milota ayalo keeliiwo, shoonse isho kabamuwaala Lisimakeyo abeshilumamba bakwe, kwakalinga yafutula ceema. 42Bakabayasa balwani baanji, bamwi bakabacaya, abalo bamwi boonse bakacica, nabi Lisimakeyo uyo, wakeepa shintu shisalalite, bakamucaya pafwaafwi a cipinda calibokoshi lya ndalama. 43Uyo mulandu wakawita Menelasi. 44Ilyo mwaami ndyaakaswa kuTaya, bantu botatwe abo bakatumwa abanene banene, kwisa mukoombolosha mulandu. 45Wakashibilabo limwi ayi mulandu utoomuwita, Menelasi wakashomesha Potolemeyo, mwanaakwe Dolimenesi ayi wakumupa ndalama shiinji nakamwaambililako kabotu kumwaami. 46Ono Potolemeyo, wakaya amwaami palubasu kumafutila, anga balisuni kookesha mubumpute, lakwe wakacita ayi mwaami asandule miyeeyo yakwe. 47Lyalo mwaami wakayeeya ayi Menelasi teeshi wakutalika, ngowakatalika cibiibi. Pamwi palya wakaamba ayi bakakusha milandu bacaikwe. Ono bantu batacite coolwe bakatongooka kuli Asiti sombi bamwi ayi tabeeleshekwi. 48Bulya bantu abo, beenka bakalinga kuyanda kunyonyoola ndabala shabo abantu bashishi ashintu shisalalite, wakacaikwa bweenka ubo mukufwambaana batakwe akubishaawo cintu cili coonse. 49Ono bantu baku Taya bakacimwa cibiibi ico, alimwi bakapa shipo shabo ayi abo bakafwa babikwe mubulemu. 50Ono Menelasi ulya taakwe ndibakamukusha pamulimo ceebo bacinenenene balela mushishi umo, balisuni bunene ndalama. Kubica kwakwe kwakatolelela kuya bukomena kushikila wakaba mulwani munene wabantu bamushobo wakwe.
Currently Selected:
2 Makabisi 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.