Matiyew 28

Yezu ŋga da tsəvay dakay

(Mk 16.1-8; Lk 24.1-11; Zŋ 20.1, 11-18)

1A dəba ma mesley, zla ta ləmɗa, pas ma zlar me mbəsley meney ma luma tsəfəmey ana na, Mariya ma Magdala ta Mariya naŋgar, ma dawam ma da nəkawa ɗay tsəvay. 2Arka tsa na, dala ma dederey: arka madurlam ma Bay’ərlam ma harɗawa da 'ərlam; ma sawa ma bədəŋgwala beleler ma tsəvay ana, me ndzey kava. 3A nəkey andza meweteɗey ma yam. Zana ŋga na na, babara ha tiya andza mekwekulek. 4da zluwer ana ma katar a sudze ana hay na, ma gagətsata, taya ma təraya andza taya ma mətsa hiya. 5Ama madurlam a hana ma zlar me tsey guma ma ləvatar a ŋgwas a hana hay: «Kuray na ka wasam zlay, hərway i sərada ka səpam na Yezu ana ŋga na, ma daradama na. 6Ŋga ka sləna dasakay, hərway ŋga ka mbəlawa tsoy, andza ma ŋga, ŋga na ma ləvawa na. Səmawa, nəkafama ka slam aŋga na, ma padama kava na kwa. 7Arka tok na, tsam tsam, hwam da ɓadəmatara a gawla ŋga hay, ləvəmatar na: ‹Ka mbəlawa ba da walaŋ ma ndaw ma mətsa na hay. Ekəɗey na, ŋga ka dafakwar ba ka mey a Galiley; ka da nəkadama na da huɗa.› Nəkafama, i ka ɓadakwar ba.»

Yezu ma sawa ma da zlam 'ar ta ŋgwas hay

8Taya ma mbəkadəmərawa ɗay tsəvay ana tsam tsam, ta me wesey aha. Amana ta wuiya ɗuhwa ha; ma hwam ma da ɓadəmatara mey ana wayna a gawla ŋga hay. 9Dekeslef a da sərafama na, Yezu a sawa ha ka mey ta, ma ləvatar: «I ka tsadakwar guma aha.» Taya na ma gurafama, ma zəgama da sek aŋga na, ma gərdam ma namar dəba. 10Arka Yezu ma ləvatar: «Ka wasam zlay, dawam ɓadəmatara a malam a ɗaw hay, ləvəmatar ka dawam a Galiley, a da nəkadəmaya na da huɗa.» 11Andza taya ka tsəveɗ na, arka ndaw hay da walaŋ ma sidzew ma dzaɗam ɗay tsəvay ana hay, ma səmawa a wuraw, ma da təkəradatara a baba ɗukwa na me key kuley ana hay tek ana hay ma kəmawa na. 12Taya ma tsəham 'ar andza ndaw ma səka na hay, ma ŋgəlam mawa, ma vələmatar sumkwo haɗadzidzay a sidzew ma dzaɗam ɗay tsəvay ana hay. 13Ta bəzay ma guma neney: «Aza ka ləvam andza neney: ‹Gawla ŋga hay ma səmawa ta dəvaɗ, ma hulama vagay ana ba, la na na, ma nara hiya.› 14Kendzey andza guma na ka husey ba ka guverner na, ma da ɓaɓukwa guma na na la na, la da kam na mala guma na ka da nəkafakwar dey zlay» 15Taya na ma təɓama sumkwo na hana, ma kam andza ma ta ma ləvəmatar ana. Ha guma na me pey mey da 'ay Zuif hay, ha kasl ka pas ma teseɗey.

Ndaw ma mbəlawa na, ma sləradata gawla ŋga hay

16Arka gawla ma Yezu kurow kava kasləta ana hay ma dawam a Galiley, a mamba na Yezu ma ləvatar, ka dawam a huɗa na. 17Arka, andza taya ma nəkadama ba na, taya ma gərdam ma namar dəba, ama sa na hay na a kəɗam aha waway. 18Arka, Yezu ma gurey ka tsakay ta, ma tsadatara guma neney hay: «Slam har ma vəla ha tsoy tabiyaha da har aɗaw, na ma 'ərlam, ta na ma dala adzay. 19Arka tok na: dawam ka ndaw ma dala hay tabiyaha na, təradəmata gawla ɗaw ahiya, dzuhəɓadəmata ta mezəley ma Baba, ta Bəzey ana, ta Mesəfrey Kokwoɗ ana. 20Tatəkadəmatara, ka wafama vaw ka mewey ɗaw na, i ma ɓadakwar ana hay tabiyaha. Yah ana tey na, i daha ta kuray ka pas ka pas aha, kasl ka me ndəvey ma bəla.»

Currently Selected:

Matiyew 28: MOF

Highlight

Copy