Mark Ma key ka ’ar ɗaf ma guma
Ma key ka ’ar ɗaf ma guma
Mey Hayna Wayna da Mark na, a tsatar na a kretiyeŋ hay tabiya ta hiya Zuif ahiya kakay ana hay. Ɗeriwel ana na, na degwele ha na. Ma kawa ma bəza hay ma Yezu na, da huɗa daha tikay. Guma ma Yezu ana hay me təkərey zaɗaɗa na hay na, da huɗa daha tikay. Ama dzadzak tok na, a ɓey ɗoh na bəzay ma guma ma me zley ’ar hay, me ndeley ndaw hay, ta me kəɗey waway. Ka slam ana sa na hay na, a ɓey bəzay ma guma ma wandzala hiya na da sa ma ɗeriwel a sa na hay dakay.
Mey Hayna Wayna da Mark a səpey na me key ta na asləta na da ɗeriwel ana makar tsəfəmey ana hay. Ama me təkərey ŋga na na, andza da tek ma ka ha da mey asləta. Zla da mezley ma guma ŋga tsəfəmey ana tsa na, a ɓada Yezu na andza Bəzey ma Bay ma Bəla aha (1.1) ’ar a me ndesley ma ɗeriwel ana na, Bəzey ma Bay ma Bəla ma mətsey, ma dara ha ka ’ar ma tuwaw ma gazləla na (15.39)
Da rita ma ɗeriwel ana tsəfəmey ana na (1.1—8.26), Yezu ka wuɗey ka səradama ŋga na na way tsaray zlay. A ndaladata ndaw dzedzey ana hay, a harata fakalaw hay, a tsey guma ta mazlaɓ aha. Ndaw hay a tsəham ka ’ar vaw ta na hay: «Neney na ndaw mey?», ama Yezu a ləvatar a ndaw ma dzalam ma səradama na hay na: «Ka da ɓadama yah ana na way zlay.»
Tsakay me tsetsew ana ma rita ma ɗeriwel ana (8.27—16.20) A wuɗey ma ɓada na ɗagay Yezu ana na, Bəzey ma Bay ma Bəla na teŋgey.
Da har ana na, ndaw ɗuhwa na ma kadama vaw yawa andza taya ’ərlam ahiya na hay na, a datar ’ar a ndaw me tsekesley kuley ma dala ma Romeŋ ana hay bəza kakay. Ndaw ana hay na a kam tek me gegətsey ’ar ahiya, a hikadəmata, da tek ger ana hay tabiya ha na, ka zəgama ’ar ma sleɗ ba.
Azlakwa tok na, Yezu na Bəzey ma Bay ma Bəla, ŋga ma təɓa ma tərada vaw ŋga kərem ndaw aha, ta ma tsənar sləmay ŋga a Bay ma Bəla. Ha ma husada ka tsetseh, a me mətsey. Kwa gawla ma Yezu na hay tekeɗe na, ka tsənadama deŋŋe ka slam ana tsa kakay. Da har ma ma dzuwama a memətsey na, taya ma mbəkadama Yezu. Ma da ləvey dzadzak: «Neney na Bəzey ma Bay’ərlam dərka na na» bay ma sidzew romeŋ ana daha, andza ŋga ma nəkada Yezu a mətsey aha na.
Andza Yezu a tsey ka bay ’ar ma vaw ŋga na na, a ɓada vaw ŋga na na andza, Bəzey ma Ndaw, bəzay ma guma neney a ɓada na, ndaw na Bay’ərlam ma vəladara bay ŋga tabiya ha a har aŋga na, kwa andza slam har ma key sariya ta me sey yam. A ɓada satsa na Yezu na ka kawa ba ndaw aha dərka na. A ɓada tek na ma kəzla ha ma kəsada bay ’ar ma vaw ŋga na ta meslərey ŋga na.
Mey Hayna Wayna da Mark a tsəhey bəzay ma guma neney: «Ɗagay Yezu ana na way?» Ndaw ma slafa ma mbəɗafa deŋŋe ka slam ana na dakay. Ɗeriwel ma Mark a səpey na tsakay tsəveɗ ma Yezu ma səpawa na. A dzəney ma sərada Yezu ana na way na, nekəɗey nekəɗey.
Currently Selected:
Mark Ma key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun