Kolosieŋ Ma key ka ’ar ɗaf ma guma
Ma key ka ’ar ɗaf ma guma
Kolos na wurow ’ar a mey ŋgwa ma Azi bəza na, Turki ana ekəɗey ana. Pol na dey ta kava ɗaɗa ka daway ma da nəkatərawa kominite ma kretiyeŋ ma wurow ana ŋga hay tikay. Ma zlərawa na Epafras ndaw asləta da walaŋ ma mandala ma mber aŋga hay (1.7; 4.12).
Pol a da tsənada na, ndaw hay daha a zləgaɗəmata ha kretiyeŋ da Egliz ma Kolos. Metəkey ta na na, ta meterŋgəleŋ ka me tələkey mey ma Mey Hayna Wayna ma Yezu Kriste. A ləvəmatar a Kolosieŋ hay na ka səpam na me tsekesley ma tek a ta gurəma na hay, ha dzadzak dzay na, waya ka kəmatar kuley a sa ma gədaŋ ma tek ana sa na hay ma kam mber ka bəla na hay. Pol na ŋga da daŋgay, a slafa me heley kakay. Ma windatar a Kolosieŋ hay tok.
Ɗeriwel ana ma windəmatara a Kolosieŋ ana hay na, a ɓey na me key ma Kriste, ka ləva na, ndaw na Bay ma Bəla ma gaɗəma, ma sləradərawa, ma da buwey ndaw hay ana. Da Kolos na, ndaw hay a wasadəmata ta gədaŋ ma tek ana hay ma nəkam kakay ana, ama na gədaŋ ahiya ka bəla na. Azlakwa tok na, Kriste na, a fənata tek ana ŋga na hay. Da memətsey ŋga ka ’ar ma tuwaw ma gazləla na na, ka zəga gədaŋ ma malay ma ndaw hay ba. Arka na Bay’ərlam ka zəgadatara slam har ma tek gədaŋ ana hay ba tabiya ha, ta tek ma slafama na hay tabiya ha, da ma mbəladərawa Kriste Bəzey ŋga. Kriste na tiytsa na bay ’ar ma Egliz ana, ma ka ha na andza vaw ma ləma ha ta ndaw me pey ’ar hay tabiya ha. Ŋga na bay ma ndaw me pey ’ar ana hay, ka ləva na, ŋga na a kəsadata ndaw hay a mendzey wayna ta Bay ma Bəla. Ta me dzuhəɓey ta na, ndaw me pey ’ar ana hay a dzəmam a memətsey ta mendzey ma Kriste. A təram na ndaw waya ahiya.
Da tsakay ma ɗeriwel ana tsəfəmey ana na (1.1—2.5), walay ana daha a tsakaslada Kriste andza Bay’ərlam ma bəla ta na ma Egliz (1.15-20) amba walay ana na, me ɗula mey ana daha hərway ma Kolosieŋ hay (1.3-14). A dəba ma walay ana na, Pol a madatara me kəɗey vaw ŋga da meslərey ma Egliz. (1.24—2.5).
A dəba na na, ndaw ma windawa ɗeriwel ana ma ləvatar a kretiyeŋ ma Kolos ana hay na, ka wam daw ka vaw (2.6-23). A dafa na, ka da pəmatar sləmay a ndaw me tetəkey ’ar me dzeley so na hay zlay, ama na ka ndzam na, da ’ar ata me pey ma ndzafəmawa na.
Akwa na, ɗeriwel ana a tsey guma a ’ar ma dada mendzey wayna, da kominite, da veɗ ’ay, da mendzey ma ndaw hay (3.1—4.6).
Ɗeriwel ana a ndəvey na ta me tsey guma a vaw (4.7-18).
Mey me meslərey ma ɗeriwel ma kəmatar a Kolosieŋ ana hay na, a key mber kasl ekəɗey ana. Kriste na a ləhadatərawa ndaw hay ba tabiya ha da har ma gədaŋ ma ndaw dugwan hay. Satsa na, a ləhadatərawa da tek a hay tabiya ha ma tsadata ka vaw, ma waɗəkadatara ’ar ana.
Currently Selected:
Kolosieŋ Ma key ka ’ar ɗaf ma guma: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun