Filipieŋ 4

1Kəɗey tok na malam a ɗaw i ma wuɗata haɗa na hay, na i ma wuɗey nduk nduk ma da nəkadata na hay, kuray na wuiya ɗaw, gursam a ɗaw aha, ndzam gədaŋ gədaŋ andza neney da mezəley ma Bay’ərlam malam i ma wuɗata na hay.

Ma dzəma mey, wuiya ta zozoy da Bay Yezu

2I həladara bəzay a Ivowdi, i həladara bəzay a Seŋtik, ka ndzam da ma dzəma mey haya haya da mezəley ma Bay’ərlam. 3Kah tey mandala ɗaw dərka dərka na, i tsəhafaka na, hayna dzənata hərway la ka kəɗadəmərawa vaw ba andza yah, ka Mey Wayna, da varay ana asləta andza Klemaŋ, ta sa ma ndaw ana la ma kəmawa mber dzaya na hay tabiyaha, na mezəley ta ma windaya da ɗeriwel ma mendzey ana. 4Da mendzey kwar tabiyaha na, kam wuiya da mezəley ma Bay’ərlam, i madakwar sa, hayna kam wuiya. 5Hayna ndaw hay tabiyaha ka səradama kokwoɗ a kwar. Bay’ərlam ŋga bəse. 6Tek ka da dzəmakwar zlay, amana, zarra na, ta me ɗuley mey, ta me tsəhey amboh, ta ma madara sise ha na, ɓadəmara tek a kwar ana me tsəhey ana a Bay ma Bəla. 7Arka na zozoy ma Bay ma Bəla ma fənatara 'ar a tek me sərey hay tabiyaha na na, a da wafata vaw ka mevel a kwar hay ta me dzeley 'ar a kwar hay da Yezu Kriste. 8Ka sa na na, malam a ɗaw hay, tabiya ha andza na dərka na, na me hesəkey bəzay ana, dzerey ana, tsəzlakka na, təɗe ma wuɗa na, ma sambəra na, na ma zəlamar mendzey hayna na, na təɗe ma sambəra na, tek a neney hay tabiyaha na, ka kam da mendzey kwar. 9Tek a kwar ma tatəkam ka yah, ma ndzafam ka yah, ma tsənadama ka yah, ma nəkadama ka yah, tabiyaha tek a neney hay na, kəmata andza ha. Arka aza Bay ma Bəla ma zozoy a da ndzey ta kuray.

Me key sise ka tek me ndzefey ma hahaya ma Bay'ərlam ana

10I ka key wuiya ba haɗadzidzay da mezəley ma Bay’ərlam, hərway tek a kwar ma kəmiyawa na ka vərzey ba dey mekelehe sa. Ayaw tek akwar na daha, amana, kuray ka ndzafam ma sləradəmiyawa kakay. 11I tsey eɗey na hərway tek a hətsaya ha kakay, hərway da mendzey ɗaw ka waray ka waray na, i ka tatəkada ba me nəkey dey ka vaw ɗaw. 12I sərada me ndzey da mbarga, i sərada me ndzey da zleley kambəlaɓa na. Da na waray waray, ta ndaraw waray waray na, i ka tatəkada ba, i sərada me rəhey ta may me tsey, mandzey da zleley kambəlaɓa na ta me ndzey da tek a hətsey ana. 13I slafa tabiyaha da ndaw ma təradaya gədaŋ aha na. 14Ama kuray na, ma dzənəmaya da viya ɗaw a neney na, kuray ka kam tek ba hayaha. 15Kuray ana ka səradama seŋgey, kuray Filipiyeŋ hay, da ma zlawa ma Mey Wayna na, andza i ma mbəkadərawa Masedowan ba na, kwa Egliz asləta ka nəkey dey ka tek ma merɓey ɗaw ta tek a ɗaw me zəɗey ana na dakay, sey kuray dada. 16Andza i da Tesalonik na, kuray ma slərəmiyaɓa tek na ma saya na ba. 17I key na, i səpey tek ma hayaha kakay, tek aɗaw ma səpey na, tek a kwar andza ma vəlam ka mey ma Bay ma Bəla na na, ka yakwar bəzey adiya kava. 18Akwa ekəɗey na, tek hay a rafəmaya da har daha, ka zəgawa ba na, perzlem kana ma saya na. Ekəɗey na ɗaraya kadəba, andza i ma təɓa tek a kwar ma slərəmiyawa na ba, da har ma Epafrodit na, wurdey ma zey hayna, kuley hayna ma dar ’ar Bay ma Bəla na. 19Arka na, aza Bay ma Bəla a ɗaw a da vəlakwar tek a kwar ma sakwar ana tabiya ha, andza ma zleley ŋga mambay ana da Yezu Kriste. 20Hayna ma hasəkadara bəzay a Bay ma Bəla Baba lakwa da mevey temere da mevey temere. Amen.

Me tsey guma a vaw madakwaydok ana

21Tsadəmatara guma a ndaw Kokwaɗ ana hay ka ndaw ka ndaw da Yezu Kriste. Malam na taya ka tsakay ɗaw ana hay ka tsədəmukuraɓa guma. 22Ndaw Kokwaɗ ana hay tabiyaha, ka tsadəmukuraɓa guma, ɗoh na, ndaw ma 'ay Sezar hay. 23Hayna hahaya ma Bay’ərlam Yezu Kriste ka ndzey ta mesəfrey kwar.

Currently Selected:

Filipieŋ 4: MOF

Highlight

Copy