2 Piyer 3
3
Ma rawa ləma ma ma sawa ma Bayərlam
1Dzam a ɗaw hay, neney na ɗeriwel a ɗaw i ma windaɓa dey ma tsetsew ana; da ɗeriwel a neney hay tsew ana na, i wuɗey na ma pərkadərawa ndaw ma me dzeley 'ar a kwar hayna: 2sərafəmata ka guma na hay, na ndaw sek Kokwoɗ ana hay ma tsəmawa zlezle na, ta mey ma mewey ma maslaŋ a kwar hay, na ma Bay’ərlam, Ndaw me buwey. 3Tsufəmey aha hayna səradama ɗagay: ta pas madakwaydok ana hay na, ndaw me kəɗey waway ana hay, ma saŋgəram ka ndaw ana hay a da səmawa, ma da watar 'ar na tek me sey ma vaw ta na, 4a da ləvam: «Tek ma guma ŋga ma tsawa, ma da sawa ŋga na na, ŋga da may tok? Hərway zla ma baba hay ma mətsam ba na, tek hay ma ndza hiya re andza ha, andza na ma me zley ma ma kawa bəla na.» 5Da me tsey ta andza ha na, a mətadama 'ar, zla ekəɗey kakay na, ndasl ma 'ərlam hay, ka zəgawa dala daha, a bəmawa na da yam, ma ndza hiya andza ha na kuse ma guma ma Bay ma Bəla. 6Ta tek ana hana hay haykakay ana hay na, bəla zlezle na, ka davasawa ba, ka vey ba ta yam. 7Mandza ndasl ma 'ərlam ta dala na, guma na asləta a zəgadata, ma wa vaw aya ma waw, a padata ka pas ma sariya ta na, ta me zəɗey ma ndaw ma zləɓa na hay. 8Ka key teŋgey teŋgey na, tek asləta na daha dzam a ɗaw hay, na kuray ka mətadama 'ar zlay ana: ka Bay’ərlam na, pas asləta na andza mevey gabal, mevey gabal na kal kal andza meney asləta. 9Bay’ərlam a da rey aha ləma ka guma ŋga ma tsawa na tikay, ama sa na hay na waya a rawa ha ləma; ama ŋga na a ɓada me zəgey mevel aŋga ka kuray, a wuɗey na, sa ma ndaw hay ka da zəɗam zlay, ama ndaw hay tabiyaha, ka ndzafam ka mbəɗadama mendzey ta. 10Pas ma Bay’ərlam a da sawa na andza ndaw mahal, pas ma həzlay ma 'ərlam ma da devesey ta tek ma dederey gədaŋ ana, tek hay tabiyaha a da davasam ta waw, arka dala ta tek aŋga hay tey na a da kadəmatara sariya ta na. 11Haɗaw azlakwa tek ana hay tabiyaha a da davasam sana, ka da təram na ndaw waray hay? Mendzey kokwoɗ ana waray? Ma tsənar sləmay a Bay ma Bəla waray? 12Kuray a neney ma səpam pas ma Bay ma Bəla ka sawa bəse na hay na, pas ana həzlay ma 'ərlam hay a da lam waw a da davasam, tek ana ma la waw ana hay a da mbaltam! 13i hutakwa na andza ma guma ŋga ma tsawa na: həzlay ma 'ərlam hay waya ahiya ta dala wayaha, dzerey a da ndzey da huɗa.
Me səmey vaw ka mendzey tseker kerre
14Mavəday ma mey tok na dzam a ɗaw hay, kam gədaŋ hayna ka ndzafakwar na da zozoy, kassla, mandzara ka ŋgələmakwar bəzay. 15Ləvam ka 'ar vaw kwar ana na, ma rawa ləma ma Bay’ərlam a neney kambəlaɓa na na me buwey kwar! Pol malam a lakwa, dzam alakwa, a windəkuraɓa na da bəzay ma guma neney, da ma səra 'ar ana ma vələmərawa na. 16Da ɗeriwel aŋga hay tabiyaha me key na, a tsey na andza ha atsa, da sa na hay na, bəzay ma guma na hay na ger ahiya, na ndaw ma sərada tek kakay ana hay, ma tatəkaya kakay ana hay na, a torŋgwaladama bəzay ma guma na ba, kal kal andza na ma kadəmata ta sa ma bəzay ma guma ma Mewindey Kokwoɗ ana hay mekelehe ahiya na satsa, ma da zəɗadatara 'ar ata na ŋga ha. 17Kəɗey tok na dzam a ɗaw hay, ka ɓadəmakwar ba ka vaw: wam daw ka vaw, ka da mbəkadəmatara vaw kwar a ndaw ma zləɓa na hay ka da vahəmakwar ma da zəɗadəmakwar zlay, ka mbəkadəmatara vaw ka da wanəkadəmakwar ba ka vaw ta ma sərada kwar zlay! 18Amana, gəlam da hahaya ta ma sərada Bay’ərlam a lakwa, ta Mebuwey lakwa Yezu Kriste. Ŋga na, a wezley dey zla ekəɗey na, ha kasl ka pas ma me ndəvey kakay ana. Amen!
Currently Selected:
2 Piyer 3: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun