2 Piyer 2
2
Ndaw me tetəkey maləwaɗay hay
1Zlezle na, ndaw sek maləwaɗay ana hay da səkway daha tiyatsa, andza ha satsa na, ndaw me tetəkey maləwaɗay ana hay ta mahal aha na, a fuləkwadəməraɓa me tetəkey me zəɗey ndaw ana a walaŋ a kwar, ha a da mbəɗamar dəba a Miter ana, ma mbəɗatərawa ba na, a zələmawa ka vaw ta na, me zəɗey ana na ma rawa ləma kakay ana; 2arka ndaw hay haɗadzidzay a da səpəmata da me tsəley ta so lamba na hay: hərway ta na, tsəveɗ ma dərka a da tərey na tek me tseɗey aha, 3arka da tek me sey ta kambəlaɓa na na, a da kadəmakwar tsakana ta guma ta me ŋgəley ndaw ana hay; ma ta zla ekəɗey kakay ana, sariya ta na, a da ndzawa ha kakay, me zəɗey ta na a hutata ha. 4Hərway ma mey na, Bay ma Bəla ka mbəkadata madurlam aŋga ma ŋgəsa na hay kakay, ma kuiyadata a slam ləvaŋ ana ma banay, a padata a huɗa tafa, ma hutada sariya. 5Ŋga ka mbəkadata ndaw ma bəla zle zle na hay kakay, da har ma papəlay ana ŋga na ma rəhada bəla tabiyaha na, a da mbəkey na Noey, ma tsakar ma ndaw ma zarawa na hay, ŋga aŋga na ma tələkada mey ta dzerey ana; 6arka ma dzuwata wuraw ma Sodom ta Gomor ma ka davasam ba, ma ka kam andza pətsaw aha, ma ka təram tek me tsey dey kava ha ma ndaw ma zləɓa na hay ma da yəmawa ka mey ana; 7arka ŋga ma buwərawa Lot ndaw dzerey ana, ma ndza ha ta mevel aha da walaŋ ma ndaw ma kəɗam ndaw vagay ahiya na ta ndaw ma tsəlam so na hay; 8hərway ndaw dzerey a neney ma ndza ha da walaŋ ata, a nəkadata, a tsənadata: ka meney ka meney mezek aŋga ma ndaw dzerey ana na, a sey aha banay, hərway ma tek ata na ma kam hayakakay ana hay. 9Kəɗey tok na, Bay’ərlam a slafa ma badatərawa ndaw dzerey ana hay, da me həley suwet, a padata ndaw dzerey kakay ana hay slam ata gəle, ma da hətata ta pas ma sariya, 10dzadzak na ndaw ma hwam ma səpam tek ma slaw vaw ma satar ana, tek hayakakay ana hay tedehe na hay na, a rəsəmata ɗuhwa ma Bay'ərlam. Taya na waya ɗa ka vaw ta, seweɗ ahiya, zluwer a katar me tseɗey Maram ma 'ərlam hay kakay, 11azlakwa tok na, madurlam hay tekeɗe ma fənəmatar 'ar ta gədaŋ ana hay na, a slafama ma tsafəmata ta me tseɗey aha ka mesəfrey ana hana hay ka slam dey ma Bay’ərlam kakay. 12Ama ndaw ana ŋga na hay na, andza gənaw dəla na hay ma vəlaya ka bəla hərway ma gendeɗ ta tek ma za na hay na, a tsaɗəmata tek na ma səradama kakay ana hay, a da zam na andza ma tek ma ley hay, 13a da ndzafama masa ma dzerey ta kakay ana. A mbafata me key madama ta wuzla rəpas; taya na tek me zləɓey ndaw hay ta kwaskwalay so na hay, maləwaɗay ta na ma tsam ana a mbafata, ke ndzey andza ka zəmam aha hwahwaɓay dzaya ana. 14Dey ma rəha hiya ta me key madama, meŋgəsey a slatar kakay, a pafəmata wuiya ka ndaw ta me dzeley 'ar bəle na hay, ma gawla ley me wuɗey sumkwo ahiya, bəzey ma kəla 'ar ahiya na hay. 15Mbəkaradama tsəveɗ hayna ba na, ma zləgam ta, ma zəgam tsəveɗ ma Balam ma Bozor, na masa hayakakay ana ma zləgadata na. 16Amana ka da ndzefey me hətey ba hərway ma me tsəney sləmay ŋga kakay ana: gənaw me tsəley kava me tsey guma kakay ana, me tsey guma andza ma ndaw, ma lətsada ma mbəɗa 'ar ma ndaw sek ana ŋga na na. 17Ndaw ana ŋga na hay na, andza vəɗiyem mandzara yam ana hay, kal kal ta pazlay memeɗ ma həlawa na: a da ndzafam ma ta na, ləvaŋ tekəɗe feŋfeŋŋe ana. 18Akwa na, ta guma ta na ma dzadzuwam tedehe na hay na, a pətənəmata ta tek me sey ma slaw vaw me key hwaray ana hay, ndaw andza ma bəmawa 'ar ba nekəɗey da walaŋ ma ndaw ma zləga na hay. 19A zlapəmatar waya a da wama 'ar ata, azlakwa zlay taya na na, beke ma tek ma zana hay, hərway ndaw a slafa me tərey beke ma tek ma waka 'ar ana. 20Haɗaw azlakwa ndaw ana ma ləhəmawa vaw ba da me zləɓey ma bəla neney, ta ma səradama Bay’ərlam a lakwa, ta Me buwey lakwa Yezu Kriste na, ka mbəkadama vaw ta ba meŋgəsey ka tarwaɗata, ka watar 'ar satsa na, me ndzey ta na, a da tərey na hayakakay aha a fəna na zlekete na. 21Ŋgama hana ma ta na, ka səradama tsəveɗ ma dzerey ana zlay tabiyaha, ta neney andza ma səradama ba, ma mbəɗamar dəba ba a mey ma mewey kokwoɗ ana ma ɓadəmatara na na. 22A da safatərawa na kassla andza ma guma ma tsam ana: Gədey me mey 'ar ka ma venəhey ŋga, ta na: «Gaduraw ka pəra vaw tsoy na a mey me ney a slam ndəleɓ aha sa.»
Currently Selected:
2 Piyer 2: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
