1 Timotey 4
4
Tek ma Bay ma Bəla ma katərawa tabiyaha na, haya hiya
1Mesəfrey a tsa andza neney na ta har: da har madakwaydok ana hay na, sa ma ndaw hay a da mbəkadama me pey 'ar ata ba, a da tapam ka mesəfrey me təkəney ndaw ana hay, a da səpam me tetəkey na ma sawa da fakalaw ana hay. 2A da zləgam ta mbaɗa mbaɗa ma ndaw malwaɗay ana hay, ma ka zeheɗ ahiya ta ɓərey ta waw aha ŋgəlartata da mendzey ta. 3Taya a hana satsa na, a da təkəmata ndaw hay ba me zəgey ŋgwas, a da təkəmata ndaw ba me zəmey sa ma tek a sa na hay, azlakwa zlay Bay ma Bəla a katərawa na, ma ndaw me pey 'ar ana hay ma səradama dərka haya haya na hay, ka zəmama ta ma madara sise ha kava. 4Hərway tek ma Bay ma Bəla ma katərawa na hay tabiyaha na, haya hiya, tek ma kəley da ɗəma dakay, haɗaw a zəmama ta ma madara sise ha kava na. 5Akwa na, guma ma Bay ma Bəla ta ma ɗula mey na, a tərada haya ha. 6Äadatara tek a neney hay tabiyaha a malam hay: kəɗey na, ka da tərey na, diyakre hayna ma Kriste Yezu, ma rəha vaw aha ta guma ma 'ar me pey, ta me tetəkey hayna na kah ma tsənadərawa tsam tsam ana. 7Ta 'ərmbez a neney malwaɗay ana hay, ta tebeləmey ma madaŋgwas ana hay na, kuyadata ba.
Bay'ərlam Ndaw Mebuwey ndaw hay tabiyaha
Tetəkey na, me ndzey da me tsəney sləmay a Bay'ərlam. 8Akwa ma seɗəkey ma vaw na, a nefey a tek nekəɗey dada, ama me ndzey da me tsəney sləmay a Bay'ərlam na, a nefey da tek hay tabiyaha. Mendzey da me tsəney sləmay na, a vəley mendzey ekəɗey ana, a vəley mendzey na ka mey ana. 9Guma neney na, ka ndzar ba kassla, akwa hayna ndaw hay tabiyaha ka təɓama haya hayaha. 10Kendzey ka yakwama vaw, dakay i kəɗakwama vaw na, na ŋga na na, hərway lakwa ma vəladakwa vaw lakwa ka me pey dey ka Bay ma Bəla na ŋga ta dey ana, ŋga me buwey ma ndaw hay tabiyaha, ɗoh na ma ndaw me pey 'ar ana hay. 11Nəkafa, neney na, tek na a dafa ma tsatar a 'ar, ma kah ka tatəkadatara na.
Tek me tsey dey kava ma ndaw me pey 'ar ana hay
12Hayna ndaw ka da rəsa mevey ɗek ana bəza ha na zlay, dzadzak tərey na tek me tsey dey kava ha, ma ndaw ma pam 'ar ana hay: da guma me tsey, da mendzey ɗek, da ma wuɗa vaw, da me pey 'ar, da mandzara me zləɓey. 13Da ma hutada ma da daɓa ɗaw na, vəlada vaw ɗek na, me dzeŋgey Mewindey Kokwoɗ ana hay, ma həladatara bəzay a ndaw hay, ma tatəkadata ndaw hay. 14Ka da kar masəfaya a tek ma hayaha, ma hahaya a neney da kah ana zlay, ma səkawa a vaw ta guma ma ndaw sek, satsa na, ta har ma ndaw ma səka na hay, ma tsəha ahiya 'ar, ma bazləhafəmaka har ana. 15Nəkafa guma na kah ka wafa 'ar ana: nəkafa hayna kəɗey vaw na, da tek a neney hay. Kəɗey na, me gəley ɗek ana ka mey ka mey ana a da nəkey ka slam dey ma ndaw hay tabiyaha. 16Wey daw ka vaw ka bay ’ar ma vaw ɗek ana ta me tetəkey ndaw eɗek hay. Hayna kəɗey vaw da huɗa. Haɗaw ka key aha andza ha na, ka da buwa bay ’ar ma vaw ɗek ana, ta ndaw ma pafəmaka sləmay ana hay dzay.
Currently Selected:
1 Timotey 4: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
