1 Timotey 5
5
Mendzey andza da veɗ 'ay ɗuhwa ha
1Ka da kar say ma gədaŋ a ndaw maraw aha zlay, amana, səmada andza kəla ma baba ɗek aha. Kadata bəzey ma mbəlazaw ana hay na, kal kal andza malam hay. 2Ta ŋgwas maraw ana hay na, kəla andza ma maya ahiya. Dem hay andza malam diŋgwas ana hay da mandzara ma zləɓey tabiya ha.
Madakway hay
3Ɗəmatar ndaw a madakway hay, na andza madakway ahiya dərka na hay. 4Kendzey akwa andza madakway ana wawa ŋga hay daha, dakay bəzey ma bəzey ŋga hay daha na, ma da tetəkey ma da nəkafata dey, ka mey ka veɗ 'ay ta na taya, a dəba na na, ka wanəkadəmatara tek ma ndaw ma 'ay ta hay ka sele. Nəkafama dey ta kava, neney na tek na hayna, ka slam dey ma Bay ma Bəla na. 5Na andza madakway aha dərka na, ma ndzaha makəraŋga na na, ma pa dey aha na ka Bay ma Bəla, ma ndzaha na zarra dəvaɗ ta rəpas adzay da me tsəhey amboh, ta ma ɗula mey. 6Dzadzak na, na me dzeley 'ar ka zel ana na, ma mətsa ha ba, kwa andza ŋga ta dey tekeɗe na. 7Nəkafa ka guma kah ma da tsatar a 'ar ana sa, ma ka da ndzam mandzara me ŋgəley bəzay na. 8Haɗaw ndaw ana a wey vaw ka ndaw ma 'ay ŋga na hay kakay na, ɗoh na ka ndaw ma ndza hiya da veɗ 'ay ŋga hay, na ŋga na na, ka mbəɗar dəba ba a me pey 'ar, ŋga na ka fənada ndaw me pey 'ar kakay ana ba. 9A da windama ŋgwas a walaŋ ma madakway hay na, sey mevey ŋga a key dakay dakay na, kokurow mukwa, da ma ndzawa ŋga na na, zel aŋga asləta. 10Hayna ka səradama hərway ma mber aŋga me key hayna hay: ka gəlawa wawa hay ba, ka wey vaw ba ka mbəlak hay, ka pəradatara sek ma ndaw Kokwaɗ ana hay ba, ka dzənata ndaw viya na hay ba, ka vəladərawa vaw ŋga ba, ka sa ma mber ana hayna hay tabiyaha. 11Madakway bəza na hay na, padata slam ata wal, kendzey andza me dzeley 'ar ma zel ka satərawa ba a 'ar na, a mbəɗamar dəba a Kriste, a wuɗam me zəgey zel mekelehe. 12Da me key andza neney kəɗey na, ka pəsladama guma ta, ma tsəmawa tsəfəmey ana ba. 13A fəna sa na, andza mber a rafata dakay na, a tatəkam me tserey 'ay hay. Ma rafata dakay na mber dada tsa kakay, tebəlmey ahiya, mey a ndzatar da huɗa mey kakay, a wudzəvaɗadama guma na, wudzəvaɗ wudzəvaɗ. 14Akwa a saya tok na, madakway bəza na hay na, ka zəgam zel ata hay, ka yam bəza hay, ka wam veɗ 'ay ta hay, kəɗey na ka da vəlamar slam har a me ŋgəley bəzay haya kakay ana ma ndaw dugwan zlay. 15Hərway ma mey na, madakway hay daha nekəɗey ka zəɗam ba da slam me səpey bəzay a Sataŋ. 16Haɗaw ŋgwas me pey 'ar aha madakway hay da 'ay ŋga daha na, hayna ka dzənata, a dafa na, Egliz ka zəgata ka 'ar aŋga zlay, ma aza Egliz ka da slafa me dzəney na, na andza madakway ahiya dərka dərka na hay.
Ndaw ma səka na hay
17Ndaw ma səka na hay, ma kəlam ka mey ma səkway ma Yezu, ma kama mber ata təɗe təɗe na hay na, ka hasəkadəmatara bəzay na dey tsew dzay, ɗoh na, na ma yam vaw hərway ma meslərey ma guma ta me tetəkey ndaw ana hay. 18Mewindey Kokwoɗ ana hay a ləvam akwa na: «Sla a ndərsley aha daw da gəlaŋ na, ka da dzuwadəmara mey zlay. Arka satsa: ndaw me key mber na, a ndzefey tek ma merɓey ŋga.» 19Ka da təɓa guma ma ndaw ma tsafa ka ndaw ma səka ha na, sey seydewe hay ka kam tsew makar. 20Ndaw na ka ŋgəsam ba na hay na, katar say ma dey ma ndaw hay tabiyaha, ma aza sa na hay ka wasam tiyatsa. 21I mbəɗaka ma dey ma Bay ma Bəla ta Kriste Yezu, ta madurlam kokwoɗ ana hay, səpata guma neney hay na, mandzara me weley ndaw ka vaw, mandzara ma kar slef a ndaw naŋgar da huɗa. 22Ka da key tsam tsam ma təke me bezləhey har ka ndaw zlay. Ka da tələkey a meŋgəsey ma ndaw zlay, bay ’ar ma vaw ɗek ana na, ka da zləɓey vaw zlay. 23Ka da sey na yam dada tsa zlay, sey zom nekəɗey hərway ma tesefey ɗek, ta bəle ma vaw ɗek ana, ma ŋgəladaka dey kakay ana. 24Ndaw a sa na hay na, meŋgəsey ta na a nəkey ɓaŋŋa mandzara ka kadəmatara sariya ta na. Ma ndaw sa na hay na, a da nəkey dzadzak na a dəba ma sariya. 25Mber ana hayna hay ma kaya na, andza ha atsa, a nəkam; kwa na ma nəkam kakay ana hay tekeɗe na, a da ndzam aha ma kəzla ahiya kakay.
Currently Selected:
1 Timotey 5: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun
