Matiye 4
4
Satan mitikina Yesu
(Yo pura Mark 1.12-13; Luk 4.1-13)
1Akẽh na, ˀUf ngi Buymisemuŋ a ngi hirnga ti Yesu nga wuzlaɓuh, ɓa Satan a tikinaŋ a diga. 2Yesu a gi dalyam hiipas hiipas kukur mufaɗ, duvuɗ duvuɗ kukur mufaɗ a wuzlaɓuh a diga. A dirba nah na, may a jaŋ. 3Mitikina vu a kirih ng'avaŋ, a ɓaŋ: «Da ki Mangal ngi Buymisemuŋ na, ɓa ɗugur hanayna, ɓa a tiram ɗafahay sini.»
4Yesu a mbiɗaŋ di: «A tohoko na: ‹Mbur a ndir tisiifa ti ɗaf pal naŋ ta, amma ti ɓi gar mabo ti balam Buymisemuŋ.›»
5Dar Satan aru ti Yesu ng'ar walahay Zeruzalem, walahay mipal, a jiɗ di nga hirngi hay ngi Bumbulvuŋ, 6a ɓaŋ: «Da ki Mangal ngi Buymisemuŋ na, hil sar nga ruwuy, asi a tohoko na: ‹Buymisemuŋ a sa ɓa modro naŋhay vur ka, a sa puˀukuw paˀ paˀ a haŋ taŋhay, vur ka masa dunuko sar avu ɗugur.›»
7Yesu a mbiɗaŋ di: «A tohoko ma na: ‹Ki tikina Bumbulvuŋ Buymisemuŋ ɗike ta.›» 8Satan a jiɗ di nga hirnga muwã migila haɗi ma, a bigaŋ buy mazumaka ar duniya gar ati gidaŋ taŋhay, 9a ɓaŋ: «Da ki ra huruk a mbuŋ ɗu, ki ra putukul a mbuŋ ɗu na, i sa vuluw gwat tayna cek da ka.» 10Joˀ Yesu a ɓaŋ: «Kirih kileŋ avu ya, Satan! Asi a tohoko na: «Ki sa putukul a mbuŋ Bumbulvuŋ Buymiseuŋ ɗik, yo kisa huruk huruk a mbuŋ naŋ pal naŋ tewle.» 11Angi nah na, Satan a pulaŋ muduba, joˀ modrohoy a kiraham ng'ava, a gakaŋ gwat naŋ mawuɗo.
Yesu mizla gi slra a Galile
(Yo pura Mark 1.14-15; Luk 4.14-15)
12Ti Yesu micina a jaka Zaŋ le ar dangay na, a cuh nga Galile. 13A pula Nazarete, ara cifi a Kapernahum, walahay misi a mi yam madiɗa, angi hirwuy ngi Zabuloŋ ati Neftali, 14ɓa ɓi ngi mijiviɗ Ezayi miɓa zleˀe na, a gi muduba: 15«Hirwuy ngi Zabuloŋ ati ngi Neftali, i hirwuy misi a ciki jiviɗ ngi mubuliy, hirwuy ngi dubazaw Zurdeŋ, angi hirwuy Galile, sukwi ngi duniyahay micifam angaŋ!
16Mizli micifam ar luvuŋ na, a puram li minjahha le ciɗak ciɗaka. Mizli micifam ar li mitimbiɗim ngi mizli mumucahay na, li minjahha a go le ciɗak ciɗak ar taŋ.»
17Zle ti nah na, Yesu a zla a til mi, a ɓi: «Mbiɗaka mevel kumoyo, asi Zumabuy ngi muŋ a ndilo le gweˀe.»
Yesu mizila mizli miji kilifey mufaɗ
(Yo pura Mark 1.16-20; Luk 5.1-11)
18Ti Yesu macuh deŋŋe ti mi yam madiɗa ngi Galile na, a pur mizli sukumuŋhoy cuw, Simoŋ mazilaka Piyer ati Andre. I miji kilifey, ara hizigam zuva ng'ar yam. 19Dar a ɓa taŋ: «Soko asi ya, yi sa tiri ti kum miji mizli.» 20A pulaka zuva taŋhaya kutum, dar a ram aseˀeŋ. 21Yesu a kirih nga mbuŋ ma na, a pur mizli sukumuŋ mekelemey cuw ma, i Zak ati Zaŋ, ziri ngi Zebedehey. Taŋ ati cine taŋ Zebede a hur palalam taŋ, ara ɗiyam zuva taŋhay. Dar Yesu a zila taŋ. 22Angi nah vuna si na, a pulaka palalam taŋ ati cine taŋ a mi yama, a ram asi Yesu tuwa.
Yesu mudubun gwat da mizli, yo naŋ mumbul misi jijihey
23A dirba nah na, Yesu a bula hirwuy Galile gar, a dubuna gwat da mizli ar hay ngi dira dibiɗ taŋhaya, a til mi ti Ɓimezle ngi Zumabuyo, a mbul misi jijihey wal wal ati misi ble ngi wuzla mizli gar. 24Slimiɗ naŋ a zil asi hirwuy Siri gar. Joˀ a sakaŋ ti mizli masam bonoy ti jijihey wal wal cek, misi setenehey a hirnga, midiɗa kulihey ati mizli muhulɓahay gar, dar Yesu a ɗiya taŋ. 25Zigiduw haɗi maram aseˀe, mizli musoko ti Galile, ti Dekapol, ti Zeruzalem, tir hirwuy Yude waɗ ngi dubazaw Zurdeŋhey.
Currently Selected:
Matiye 4: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
