Matiye 25

Diilihey kuruˀu

1«Yo Zumabuy ngi muŋ a sa gi kaɓa ɓi ngi ziri diilihey kuruˀu, muzuɓaka lampe taŋhay, mibam nga ji hirnga ti zil muzuɓ taŋ. 2Diyli zlum ar wala taŋ i gilaway, muzlum mekelemey i werey. 3Gilaw muzlumoy tuwa muzuɓaka lampe taŋhaya na, a wam vu ti mal ar gojogoɗ mekeleley ta. 4Amma diili wer muzlumoy na, a zuɓaka lampe taŋhaya waɗ mal ar gojogoɗ mekelemey a haŋ. 5Zil tuwa a so kutum ta, hinje ara ga taŋ cek, a hinjam. 6Ngi wuzla duvuɗ na, mbur a til mi: ‹Zil a ndilo le, bam, ara jam di hirnga!› 7Joˀ diilihey tuwa a puɗukam cek, a ɗiyaka lampe taŋhaya. 8Diyli gilaway tuwa a ɓaka diili wereye: ‹Inga vulam ndra mal neˀ neˀ avu ngi kumoy na ya takwa, vur lampe ndrahay ara micam.› 9Diyli misi werey a mbiɗaka taŋ di: ‹Kanah ta, asi mal anta haɗa ɓa a tisla ndra gar ati kumo ta. Zuwen ara hiɗikam ngi kumo avu migi tererehey.› 10Diyli gilawaya, ti taŋ maram nga hiɗika mal tuwa na, zil a ndilawa. Diyli werey muwam vu tuwa, a cam ng'ar hay ngi vula ngwasa jom ati zil tuwa. A gicaka mizlingre. 11A dirba nah na, diili gilaway tuwa a ndiloko aya, a ɓam: ‹Buy, Buy, inga wuna ndra mizlingre takwa!› 12Amma zil a mbiɗa taŋ di: ‹Gisiŋ, yi ɓukum na, ko yi sinukum ta.› 13Joˀ Yesu a ɓi ma: «Anja ki hinjam ta so, asi ki sinaka hin ati pas ngi so naŋ ta.»

Ɓi ngi gawlahay makir

(Yo pura Luk 19.11-27)

14«Naŋ kine, ɓi ngi Zumabuy ngi muŋ a sa gi kaɓa mbur mawuɗ ru nga mulak. A zilo gawla naŋhay, a pula zlili naŋ asi haŋ taŋ. 15A vula miliyoŋ zlum da mbur mudumbuŋ, miliyoŋ cuw da mbur numuŋ waɗ miliyoŋ pal da mekeleme ma. A vula da mburo gar avu gidaŋ naŋ. Joˀ a ru. 16Gawla mulum miliyoŋ zlum tuwa, a ru, a mbiɗi di haŋ kutum, a lum yam naŋ miliyoŋ zlum ma. 17Mbur mulum miliyoŋ cuw na kwana, a gi di kanah ya, a lum yam naŋ miliyoŋ cuw ma. 18Amma gawla mulum miliyoŋ pal na, ara li vigiɗ, a ɗumo dala ngi buy naŋ tuwa ɗum anga. 19«A zikam, a dirba nah, buy ngi gawlahay tuwa a ndilawa. Dar a zla ɓa a slufakaŋ ɓi ngi zlili naŋ, taŋ migam di tuwa. 20Gawla mulum miliyoŋ zlum tuwa a kirahawa, a bigaŋ miliyoŋ zlum mekelem ma, a ɓaŋ: ‹Kumani, ki vuliy zleˀe miliyoŋ zlum. Ani yi lum le anga ti slra ɗu miliyoŋ zlum mekelem ma.› 21Buy naŋ a ɓaŋ: ‹Naŋ kuy, gawla mezle miteŋteŋ, ki gi teŋteŋ le ti gwat neˀkini. I sa puluw gwatay haɗi asi haŋ ɗike. Sawa i mumulom bumoˀ ati ya buy ɗike.› 22Gawla mulum miliyoŋ cuw na kwana, a kirahawa, a ɓaŋ: ‹Kumani, ki vuliy miliyoŋ cuw zleˀe, ani yi lum le anga ti slra ɗu miliyoŋ cuw mekelem ma.› 23Buy naŋ a ɓaŋ: ‹Naŋ kuy, gawla mezle miteŋteŋ, ki giteŋteŋ le ti gwat mineˀkini. I sa puluw gwatay haɗi asi haŋ ɗike. Sawa i mumulom bumoˀ ati ya kumani ɗike.› 24Gawla mulum miliyoŋ pal zleˀe na kwana, a kirahawa ya, a ɓaŋ: ‹Kumani, yi si na le, ki mbur mutuwaˀa. Ki gi sifi ngi gwat ar li ka mizliga ta, yo ki kus gwat ngi migam ar li ka mizliɗa hilfa naŋ ta. 25Zluwun a giy le, vurˀe, yi ru, i ra ɗumo dala ɗike ɗum a ruwuy. Pura, zlili ɗike n'ani.› 26Amma kumani naŋ a mbiɗaŋ di: ‹Kay, ki gawla masafaya malambaˀvu! Ki si na le, yi gi sifi ngi gwat ar li ya mizliga ta, yo yi kus gwat ngi migam ar li ya mizliɗa hilfa naŋ ta ngbaŋ. 27Anja ki pa dala ɗu zleˀe angi baŋke ayɗi. Ya mumo ani na, anja yi hila ti yam anga.› 28Dar kumani naŋ tuwa a ɓi: ‹Tuɓaka dala naŋ, vulaka da mbur misi miliyoŋ kuruˀ na. 29Asi ko wa gar misi ti gwat na, a sa vulakaŋ ava ma, hã a sa tiri i mbur misi gwat haɗa. Amma mbur manja gwata, ko gwat naŋ mineˀ vuna, a sa tiɓakaŋ. 30Amma gawla masafaya malambaˀvu hana, hizigaka ng'ar luvuŋ avra. A sa tuwuy, a sa humbuɗ sliŋ a diga.»

Kiita ngi kiɗa mi ngi durba wãˀ

31«Tapas Mangal ngi mbur masa sawa ar dudok naŋ ati modrohoy aseˀe na, a sa cifi ar janga naŋ ngi zumabuy ti dudoko. 32Sukwi ngi mizli gar a sa kusom nga mbuŋ naŋ. Dar a sa gwaha mizli ti wuzla mekelemeye, kaɓa mijigin magwaha tumuŋhoy ti vu away. 33A sa pa tumuŋhoyo tir vay hazum, awaya kwana, tir vay gula. 34Joˀ buy a sa ɓa mizli ngir vay hazum naŋhay tuwa: ‹Kum mizli Baha muɗuwulukum mi, soko, zumam buy, Buymisemuŋ miɗiya vur kum zle ti naŋ muɗuva virzi ngi duniya. 35Asi may a jiy na, ki vulikiy gwat ngi zum le. Yam a giy na, ki vulikiy gwat ngi si le. Yi ru mulak na, ki tiɓikiy mulaka le. 36Ya gulndiŋ kine, ki kikiy zana le. Ya gu ta, ki soko le jinikiy. Ya ar dangay, ki soko le purikiy.› 37Dar mizli mijeŋŋehey a sa mbiɗakaŋ di: ‹Buy, i purukuw ngi vuna zleˀe, may a juw, i vulukuw gwat ngi zum na ka? Yam a guw, i vulukuw gwat ngi si na ka? 38I purukuw ngi vuna zleˀe, ki mulak, i tuɓukuw mulaka na ka? Ka gulndiŋ kine, i kukuw zana na ka? 39I purukuw ngi vuna zleˀe, ka gu ta, malla ka ar dangay, i ram nga pur ɗike na ka?› 40Joˀ Buy a sa mbiɗa taŋ di: «Gisiŋ, yi ɓukum na: gwat kum migaka le, ko ngi vunaka gar da mbur pal a wuzla sukum ɗu mizlew muwãˀ tayna na, kite ki gikiy di da ya vuna si.› 41«A dirba nah na, Buy a sa ɓa mizli ngir vay gula naŋhaya: ‹Kum mizli minisahay, kiraham kileŋ avu ya ng'ar vu ngi sete, miɗiya vur Satan ati modro naŋhay! 42Asi zleˀe, may a jiy na, ko ki vulikiy gwat ngi zum ta. Yam a giy na, ki vulikiy gwat ngi si ta. 43Yi ru mulak na, ki tiɓikiy mulaka ta. Ya gulndiŋ kine, ko ki kikiy zana avu vu ta. Ya gu ta, yo ya ar dangay, ki ram a purikiy ta.› 44Dar a sa mbiɗakaŋ di: ‹Buy, i purukuw ngi vuna zleˀe, may a juw, yam a guw, ki mulak, ka gulndiŋ kine, ka gu ta malla ka ar dangay, ɓa i jinukuw ta na ka?› 45Dar buy a sa mbiɗa taŋ di: ‹Gisiŋ, yi ɓukum na: Ko ngivunaka gar, gwat kum mungumam gi naŋ ta da mbur pal a wuzla sukum ɗu mizlew muwãˀ tayna na, kite ki gaka ta da ya vuna si.› 46Joˀ taŋ a sa ram ng'ar li ngi bonoy ngi sete, yo mizli mijeŋŋeheye, ng'ar li ngi siifa ngi sete.»

Currently Selected:

Matiye 25: BEGDC

Highlight

Copy