Matiye 24

Yesu miɓa ɓi ngi taŋ masa mbizlaka hay ngi Bumbulvuŋ

(Yo pura Mark 13.1-2; Luk 21.5-6)

1Yesu a bi tir hay ngi Bumbulvuŋ, ara cuh le. Mizli ngi seˀehey a kiraham ng'ava, ɓa a bigakaŋ Hay ngi Bumbulvuŋ mindiraka na. 2Yesu a sla taŋ di, a ɓa taŋ: «Hana gar na, kum ada puraka takwa? Gisiŋ, yi ɓukum na: ko ɗugur masa ndir jirngasl ar cil naŋ anta, a sa mbizlaka gar avra.»

Bonoy masa gi dumbuŋ ar duniya masa kiɗ mi

(Yo pura Mark 13.3-13; Luk 21.7-19)

3Yesu a cifi le a muwã tutumbur, dar mizli ngi seˀehey a kiraham baˀ pal taŋ ng'avaŋ, a ɓakaŋ: «Gwat nah gar a sa gi ti vunaka? Yo so ɗik ati kiɗa mi ngi duniya vuna, i sa sinaka avu mike? Inga ɓa ndra di.» 4Yesu a mbiɗa taŋ di: «Jam lesl, anja mbur a gukum gilaw ta. 5Asi mizli haɗi a sa soko ti slimiɗ ɗu, a sa ɓam: ‹Yi Kristu.› A sa gam gilaw da mizli haɗi. 6Ki sa cinam mizli maɓam ɓi ngi vurum ati hurum ngi vurumoy. Jam lesl, anja ki zluwunam ta. Mbak a gi, amma i kiɗa mi ngi duniya t'aruŋ ɓula. 7Asi sukwi a sa kiɗam vu ati sukwi mekelem. Buy madiɗahay cuw a sa zliram kiɗa vu ar wala taŋ. May a sa gi ar li wal wal haɗi, yo hirwuy a sa wus hiɓik hiɓik. 8Gwat hana gar na, a sa gi i zli virzi ngi bonoy ngi ngwas mayi. 9Dar mizli a sa vulukum ng'ar bonoy, a sa kuɗukum vagay vagay. Mizli duniyahay gar a sa gam mesene ti kum asi slimiɗ ɗu. 10Ti di nah na, mizli haɗi a sa pulaka tiɓi, a sa vulam vu ar wala taŋ ngi jihey, yo a sa gam mesene ar wala taŋ. 11Mijiviɗ misi slirey haɗi a sa boko, a sa gam gilaw da mizli haɗi. 12Gi gwat malambaˀ a sa ji haɗi wãˀ, hã vendeke ngi mizli anta sa wuɗam vu wãˀ wãˀ mata. 13Amma mbur micici le zlak hã avu kiɗa mi naŋ na, a sa lih. 14Na Ɓimezle hana vur Zumabuy na, a sa tilam di mi ar duniya kurzluˀ gar, ɓa a gaka sedewo naŋ avu sukwi ngi mizli gar ɗagay. A dirba nah so na, i kiɗa mi ngi duniya muduba.

Bonoy madidiɗa mukuyta wãˀ

(Yo pura Mark 13.14-23; Luk 21.20-24)

15«Malambaˀvu mukuy ta wãˀ, mihirya gwat, mijiviɗ Daniyel miɓa ɓi naŋ na, da kisa puraka le ar li mipal na, anja mbur maslufa ɗerewolo, a sla wala naŋ. 16Tapasa, mizli misi a Yude, anja a kilam nga muwãhay. 17Mbur misi a hirnga gbale, anja a po sar ngi zuɓa gwat misi a haya mata. 18Mbur misi ar guva, anja a mi nga dirba ɓa ngi zuɓa godo naŋ mata. 19Angi hin tayna, ngwas misi ti huroy ati misi ziri a dubahay na, kay, taŋ ar bonoy! 20Diram dibiɗ ɓa hin ngi kil kum na, a gi ti hin ngi himiɗ malla ko ti hin ngi sabat ta. 21Asi mike na, tapasa, bonoy madiɗa a sa ndilawa. Zle avu ɗuva virzi ngi duniya hã dana na, ko bonoy migi ɗaˀ kanah anta, yo ko bonoy masa gi kanah anta ma kini. 22Da Buymisemuŋ a juwa ngi ma hin tayna degweleˀ zleˀe ta na, anja ko mbur pal masa lih anta. Amma Buymisemuŋ a ma hin tayna degweleˀ asi mizli naŋ muwuna taŋ. 23«Yo da mbur misa ɓukum le: «Puraka, Kristu n'anihĩ!› malla ‹Nˀani a diga› na, ko ki tiɓaka ta wãˀ. 24Asi Kristu misi slirey ati mijiviɗ misi slirey a sa soko, a sa gam gwat mizli migam ɗaˀ tahay ati cekenehey haɗi, da a gi na, ɓa a zizaka mizli Buymisemuŋ muwuna taŋ na. 25Ani yi ɓukum di le daf dumbuŋ. 26«Da a sa ɓukum le: ‹Nˀani a ɓuh a diga› na, ko ki ram ta. Malla, ‹n'ani silaŋ pal naŋ a diga› kwana, ko ki tiɓaka ta. 27Vuŋ mawucuɗo zle tisi pas ngi miprik hã asi pas ngi pastaˀa na, naŋ kine, Mangal ngi mbur kwana a sa so kanah ya. 28Ar li misi maara ara na, mogodokoy a sa cikilam a diga.

Mo ngi Mangal ngi mbur

(Yo pura Mark 13.24-27; Luk 21.25-28)

29«Neˀ a dirba bonoy ngi hin tayna tuwa na, pas a sa tiri luvuŋ, kiya anta sa pusluɗ mata, wurzlahay a sa diɗoko paɗ ti muŋ, gwat madiɗa ngi muŋhoy, a sa jijikam. 30Dar gwat mabiga Mangal ngi mburo, a sa bugo vu a muŋ. Sukwi ngi mizli ngi si ruwuyoy gar a sa tuwam, a sa puraka Mangal ngi mbur masa sawa, ar gazlavay a muŋ ti gidaŋ waɗ ti dudok naŋ gar. 31Yo a sa slina modro naŋhay misi a muŋ, ɓa a faka tulum a mivay ngi ruwuy mufaɗ taŋ gar. A sa kusoko mizli naŋ muwuna taŋ angi duniya kuɗgulum gar.

Yesu miwa ɓi weˀ ti wi ti urufu

(Yo pura Mark 13.28-31; Luk 21.29-33)

32«Slaka wala ngi ɓi ani avu urufu: da mihaŋ naŋhay a zlaka le ara gam liɓuw liɓuw, yo ara ɗiɗam na, ki sinaka le, mohoro naŋ gweˀe. 33Naŋ kine, kumo kwana, da kisa puraka gwat tayna le gar ara gam na, sinaka sin le, Mangal ngi mburo naŋ gweˀ, a dungufo le si. 34Gisiŋ, yi ɓukum na: gwat hana gar a sa gi mur mizli migwenehey. 35Muŋ ati hirwuy a sa susuymom, amma mingiɓi ɗu anta sa susuyum ta ndiɗaˀ.

Duniya masa kiɗ mi na, i Buymisemuŋ pal naŋ misinaŋ

(Yo pura Mark 13.32-37; Luk 17.26-30,34-36)

36«Amma hin naŋ malla pas naŋ na, ko mbur misina anta, ko modro ngi muŋhoy, ko Mangal, sey Cine pal naŋ tewle misina. 37Gwat migi zleˀe ti hin ngi Nowe na, so ngi Mangal ngi mbur kwana, a sa gi kanah ya. 38Asi mike na, dumbuŋ angi mekepel madiɗa muzuɓ na, mizli ara zumam, ara sam, ara ɗuvam vu, ara vulam ziri ngi hay ziley, hã a ndila hin ngi Nowe mici ng'ar palalama. 39Ko mizli a sinaka neˀ le ta, hã mekepel madiɗa a sawa, a kil taŋ ceke. So ngi Mangal ngi mbur kwana, a sa gi kanah ya. 40Tapasa, mizli cuw ar guva: a sa zuɓaka mekeleme, a sa pulaka numuŋ. 41Yo ngwasay cuw ar li yiˀi: a sa zuɓaka mekeleme, a sa pulaka numuŋ. 42Anja ki hinjam ta so, asi ki sinaka hin ngi Buy kum masa sawa ta. 43Ki sinaka le, da buy ngi hay a si na le, muhul masa so ti duvuɗ na ti pas kahana na, a hinje ta wãˀ, a pula ɓa a slinakaŋ dalama ta. 44Vurˀe, kumo kwana, juwam vu, asi Mangal ngi mbur a sa sawa angi pas kum mawulkam anga ta ya.

Gawla miteŋteŋ ati gawla malambaˀ

(Yo pura Luk 12.41-48)

45«Gawla miteŋteŋ misi lesl i wana ska? I mbur, buy ngi hay mupulaŋ mizli ngi hay naŋhay asi haŋ naŋ, ɓa a vula taŋ gwat ngi zumo kasl kasl angi pas taŋ muwuɗam le. 46Da buy naŋ a so luuma le, ara ga na, a mumul! 47Gisiŋ, yi ɓukum na: buy naŋ a sa pula zlili naŋ gar asi haŋ naŋ. 48Amma da gawla nah i malambaˀa, a wuluk a kwacay naŋ, a ɓi: ‹Ani, buy ɗu a mur le, a so ta›, 49a zla a kiɗa cil naŋhaya, aru ti zum waɗ tisi gwat ati mizli muwam le. 50Da buy naŋ a sa ndilo le angi hin naŋ makutuko ta, yo angi pas naŋ misina ta na, 51a sa ɓulaŋ avra, a sa zum dangay misi purla ati mizli miɓi mi cuw cuwoy, a sa tuwuy, a sa humbuɗ sliŋ.

Currently Selected:

Matiye 24: BEGDC

Highlight

Copy