Luk 9

Yesu mislina mizli ngi seˀe mukuruˀ nga cuwoy

(Yo pura Mat 10.5-15; Mark 6.7-13)

1Yesu a kuso mizli ngi seˀe mukuruˀ nga cuwoyo, a vula taŋ gidaŋ ngi wi setenehey, yo ɓa a ɓulaka taŋ gar, waɗ ɓa a mbulom misi jijihey. 2A slina taŋ nga tila mi ti ɓi ngi Zumabuy ngi Buymisemuŋ waɗ ngi mbulo misi jijiheye. 3A ɓa taŋ: «Angi zuɓa jiviɗ kumo, ki zuɓam gwat a haŋ ta, ko ganday, ko gabal, ko ɗaf, ko dala, ki zuɓam ta. Anja mbur aru ti zana cuw ta ma. 4Kum misa cam le ar hay wanaka gar na, cifam anga, hã ti kum misa cohom le ti kẽh. 5Da mizli a tuɓukum ta na, ti kum masa bam tir walahay nah na, tukoko lagwada ngi vu sar kumoy avra. A sa tiri i sedewo avu taŋ.»

6Dar mizli ngi seˀehey a cohom, a ram vur walahay vur walahay bal ti tila mi ti Ɓimezle, waɗ ti mbulo misi jijihey ar li gar.

Ɓi ngi Yesu a muɗa didak le da Herodo

(Yo pura Mat 14.1-12; Mark 6.14-29)

7Herod, miwi li ngi Galile, a cine ɓi ngi gwat migi na le gar. A zumaŋ hirnga le, asi mizli mekelemey a ɓam: «Zaŋ a slikiɗ le ti wuzla mumucahaya.» 8Numuŋhoy a ɓam: «I Eli mubugo vu.» Mekelemey a ɓam: «I mijiviɗ misi zleˀe mislikiɗi.» 9Amma Herod a ɓi: «Mubuko hirnga ngi Zaŋ i ya vuna. Na, mbur ya macina ɓi ngi gwat naŋ miga taŋ tayna na, i wa ska?» Dar a wuɗ ɓa a puraŋ.

Yesu mimba mizli durmuk zlum

(Yo pura Mat 14.13-21; Mark 6.30-44; Zaŋ 6.1-14)

10Misliney tuwa mumoko na, gwat taŋ migaka gar, a slufaka da Yesu. Yesu a bi ti taŋ silaŋ pal taŋ nga ciki walahay mazilaka Betsayda. 11Zigiduw misina na, dar a sipaŋ. Yesu a tiɓa taŋ, a ɓa taŋ ɓi ngi Zumabuy ngi Buymisemuŋ, a mbulo mizli muroko ti may ngi mbulo.

12Pas a wuɗ diɗi. Mizli ngi seˀe mukuruˀ nga cuwoy tuwa, a kiraham ng'avaŋ, a ɓakaŋ: «Waha zigiduwo, anja ara hinam ar walahay ati prok migweˀ gweˀheye, yo ɓa a lumam gwat ngi zum a diga. Asi aka, ndra a ɓuh.» 13Amma Yesu a ɓa taŋ: «Kum vuna, vulaka taŋ gwat ngi zumo si.» Dar a ɓam: «Ndra ti ɗaf zlum waɗ kilif cuw tewle. Sey da ndra vuna, i ra hiɗikoko gwat ngi zum da mizli hanayna gar far kwani.» 14Asi ziley a gam gwat ngi mizli durmuk zlum gu.

Yesu a ɓa mizli ngi seˀeheye: «Cifaka taŋ ti ngay ti ngay, mizli kukur zlum kukur zlum.» 15A gaka kanah, dar a cifaka taŋ gar. 16Yesu a hila ɗaf muzlum ati kilif mucuw tuwa, a zuɓa hiri nga muŋ, a ɗuwul mi anga. Joˀ a ngila taŋ, a vula taŋ da mizli ngi seˀeheye, ɓa a wunkaka da zigiduw tuwa. 17Taŋ gar a zumam, hã a mbam. Mizli ngi seˀehey a cikilaka is naŋ mindire, gadagar caɓ caɓ kuruˀ nga cuw.

Piyer miɓa njah, Yesu i Mesi

(Yo pura Mat 16.13-19; Mark 8.27-29)

18Ngi pas numuŋ ada na, Yesu ara dir dibiɗ silaŋ pal naŋ, mizli ngi seˀeheye, t'ada acikeˀeŋ. Joˀ a cufuɗa taŋ: «Mizli a ɓam, yi waka?» 19A mbiɗakaŋ di: «Avu mizli mekelemeye, ki Zaŋ mici mizli ar yam, avu numuŋhoyo, ki Eli, yo avu mekelemeye, ki mijiviɗ misi zleˀe mislikiɗ ti wuzla mumucahay.» 20Yesu a cufuɗa taŋ: «Na kumo, ki ɓam, yi wa ska?» Piyer a slaŋ di: «Ki Mesi ngi Buymisemuŋ.»

Yesu miɓa ɓi ngi muc naŋ ati ngi slikiɗ naŋ ti wuzla mumucahay

(Yo pura Mat 16.20-28; Mark 8.30—9.1)

21Yesu a mbura taŋ himaˀ, ɓa a ɓaka ɓi nah da mbur ta wãˀ. 22A ɓa taŋ ava ma: «Sey Mangal ngi mbur a si bonoy haɗa, mizli micawwahay, masay madiɗahay waɗ buy ngi ɓimujuwahaya, a hizigakaŋ avra, a kiɗakaŋ vagay. Yo angi hin mimakir naŋ na, a slikiɗ a muŋ.»

23Joˀ a ɓa mizli gar: «Da mbur a wuɗ ru le asi ya na, sey a pula wuluk vur hirnga naŋ, a zuɓa dum naŋ mizlira vur hin gar, a sipa sar ɗu. 24Asi ko wa gar muwuɗ laha siifa naŋ le na, a sa zizaŋ. Amma ko wa gar maziza siifa naŋ asi ya na, a sa lahaŋ. 25Da mbur a luuma gwat ngir duniya le gar, amma a hirya vu naŋ le, malla a zizi le na, a lum di mike? 26Asi da mbur ara gi mesem ti ya, yo ti mingiɓi ɗu na, Mangal ngi mburo, tapas naŋ masa mawa angi dudok naŋ, yo angi dudok ngi Cine waɗ ngi modro naŋ muvuku vu taŋ na, a sa gi di mesem aya.

27Gisiŋ, yi ɓukum na: A wuzla mizli misi akahay na, cah mekelemey anta sa micam ta, sey da a puraka Zumabuy ngi Buymisemuŋ le far.»

Vu ngi Yesu mimbiɗi

(Yo pura Mat 17.1-8; Mark 9.2-8)

28Gwat ngi hin dangafaɗ a dirba mingiɓi nah na, Yesu a zuɓa Piyer, Zaŋ waɗ Zak, a jiɗam nga dira dibiɗ a muwã. 29Ti naŋ madir dibiɗ na, mihiri naŋ a mbiɗi pal, zana naŋ a mbiɗi babara ndararara, a wucuɗ wilik wilik ka vuŋ. 30Keɗ na, mizli cuw, ara kiɗam slir ati naŋ, i ti Moyis ati Eli. 31A bugoko vu ti dudoko, a ɓam ɓi ngi naŋ masa cuh, naŋ masa kiɗa mi ngi slra naŋ a Zeruzalem. 32Piyer ati cil naŋhay a hinjam le ɗok ɗok wãˀ, amma taŋ mupuɗkam na, a puraka dudok ngi Yesu waɗ mizli mucuwoy tuwa dedeŋ ati naŋ. 33Mizli mucuwoy tuwa, ti taŋ macohom ti vu Yesu na, Piyer a ɓaŋ: «Buy, ndra misi aka na, naŋ kuy. Ɗiyukum guɗukoy makir, pal da ka, pal da Moyis waɗ pal da Eli.» A sla wala ngi ɓi naŋ miɓa vuna ta.

34Ti naŋ maɓi kanah na, gazlavay a bo hindiˀil, a sirta taŋ. Taŋ macam ng'ar gazlavay tuwa na, zluwun a ga mizli ngi si Yesuhoyo le. 35ˀAy a cino tir gazlavay tuwa, a ɓi: «Mbur hana i Mangal ɗu, i mbur ya muwunaŋ, cinaka mingiɓi naŋ!» 36Hirak ti ˀay macin tuwa na, i Yesu mindir deŋ pal naŋ. Ti hin nah na, mizli ngi seˀeheye, gwat taŋ mupuraka na, a cifam di teteˀ teteˀ, ko a slufaka ɓi nah da mbur t'aruŋ.

Yesu miɗiya mangal misi setene a hirnga

(Yo pura Mat 17.14-18; Mark 9.14-27)

37Li naŋ muwuno, taŋ mupoko sar ti muwã tuwa na, zigiduw haɗi a so ji hirnga ti Yesu. 38Mbur a tulo mi ti wuzla zigiduwo: «Kumani, ambuh, pura mangal ɗu ani, naŋ kpesl kine. 39Setene ada jaŋ, gurjik si na, a widi, a wusaŋ gwic gwic, mbar mbar, yo a gaŋ mongofok kokof kokof avu mi. A sa bi ti vaˀa na, ti tuwaˀ tuwaˀa, a pulaŋ kupuyah ɓaˀ. 40Yi tumbulo mizli ngi si kahaya le, ɓa a ɓulaka setene nah avra, amma a ɓulaka gu ta.» 41Yesu a sla taŋ di: «Kayya, mizli migwene, manja tiɓihey, migi sulomehey! I sa cifi ati kumo, yi sa ɓusukum, hã ti vunaka? So ti mangal ɗik vuna ng'aka.»

42Mangal maso ti so aruŋ si na, setene a hizigiɗa a ruwuy, a wusaŋ gwic gwic, mbar mbar. Amma Yesu a buca setene tuwa, a ɗiya mangala, a vula da cine a muŋ. 43Gidaŋ madiɗa ngi Buymisemuŋ mibigi hana, a zuma hirnga le da mizli gar.

Yesu miɓa ɓi ngi muc naŋ ati slikiɗ naŋ ava ma

(Yo pura Mat 17.22-23; Mark 9.30-32)

Ti taŋ muroko ti lesl welele aruŋ angi gwat Yesu miga gar na, Yesu a ɓa mizli ngi seˀeheye: 44«Cinaka ɓi ya mawuɗ i ɓukum di ani na kuy kuy: A sa vulaka Mangal ngi mburo asi haŋ ngi mizli.» 45Amma taŋ, a slaka wala ngi mingiɓi nah ta, a ndir i ɓi muɗumo, ɓa a si na ka ta Na, a zluwunam cufuɗ naŋ ma.

Madiɗa mifineˀ mizli gar i waka?

(Yo pura Mat 18.1-5; Mark 9.33-37)

46Mizli ngi si Yesuhoy a zlaka ngila mi ar wala taŋ, a ɓam: zliv madiɗa asi taŋ mifineˀ mekelemey, i waka? 47Yesu a si na wuluk taŋ na le. A zuɓ zuŋ, a cica gweˀ ava, 48dar a ɓa taŋ: «Ko wa gar matiɓa zuŋ hana ti slimiɗ ɗu na, a tiɓi di i ya vuna si. Yo ko wa gar matiɓiy na, a tiɓi di i mbur mislino ya. Asi mbur mizlew wãˀ ngi wuzla kum gar na, madiɗa mifineˀ kum gar i naŋ so.»

Mbur misi anta ti ɓi ati kum ta na, i mbur kum

(Yo pura Mark 9.38-40)

49Zaŋ a slaŋ di: «Kumani, ndr'i lumam mbur le, ara ɓul setenehey ti slimiɗ ɗiki. I wuɗam zleˀe i tikakaŋ, asi i mbur ngi si ndra ta.» 50Amma Yesu a ɓi: «Ki tikakaŋ ta, asi mbur misi anta ti ɓi ati kum ta na, i mbur kum.»

Mekelemey a wuzla Samarihey a tiɓaka mulak ngi Yesu ta

51Pas ngi zuɓa Yesu tir duniya ara ndilawa, Yesu a tus mevel ngi ru nga Zeruzalem. 52A slin gawlahay a mbuŋ. Gawlahay tuwa a ram, ara cam angi walahay ngi hirwuy Samari ɓa ngi ɗiyaŋ li vur so naŋ. 53Amma mizli a tiɓakaŋ mulaka ta, asi ara cuh nga Zeruzalem. 54Mizli ngi seˀeheye, Zak ati Zaŋ mupuraka na, a ɓam: «Buy, ki wuɗ le ɓa i ɓam, ɓa vu a diɗo ti muŋ, a zlizlira taŋ kwa?» 55Amma Yesu a mbiɗi hiri ng'avi taŋ, a mbiɗa taŋ hirnga. 56Joˀ a zuɓam jiviɗ ng'ar walahay mekelem.

Mizli mawuɗam ru asi Yesu

(Yo pura Mat 8.19-22)

57Ti taŋ maram a jiviɗe na, mbur a ɓa Yesu: «Ar li ka masa ru gar na, yi sa ru asi ka.» 58Yesu a ɓaŋ: «Biigaɗaya, taŋ ti vigiɗey, yo ɗiyuw ngi ɓuhoyo, taŋ ti hayay, amma Mangal ngi mburo, ko li ki hirnga kwana anta.»

59A ɓa mbur mekeleme: «Sipiy.» Mbur a mbiɗaŋ di: «Kumani, inga puliy, i ra dika baha ɗagay.» 60Amma Yesu a ɓaŋ: «Pula mumucahay a dikaka mumuca taŋhaya. Amma ka, ara til mi ti ɓi ngi Zumabuy ngi Buymisemuŋ.»

61Mbur mekelem a ɓaŋ ma: «Kumani, yi sa supuw. Na so na, puliy jiviɗ nga mbiɗa mi da mizli ngi hay ɗuwoyo ɗagay.» 62Yesu a ɓaŋ: «Mbur mija haŋ le avu gam ngi slahay, yo da ara pur murdirba na, i mbur mizlir avu Zumabuy ngi Buymisemuŋ ta.»

Currently Selected:

Luk 9: BEGDC

Highlight

Copy