Luk 8

Ngwasay maram asi Yesu

1A dirba nah, Yesu a bula walahay madiɗahay ati prokoy gar, ara til mi, yo ara ɓi Ɓimezle ngi Zumabuy ngi Buymisemuŋ. Naŋ ati mizli ngi seˀe mukuruˀ nga cuwoyo. 2Ngwasay, naŋ muɓula setenehey ti hirnga taŋhay waɗ naŋ mumbulo taŋ tir jijiheye, t'ada ma. I ti: Mariya ngi Magdala, setenehey tarnaˀ mubam ti vaˀa, 3Zan, ngwas ngi Kuza, mbur madiɗa ngi hay Herod, Suzan ati ngwas mekelemey haɗi majinaka taŋ ti zlili taŋhay.

Ɓi ngi mbur mizliɗa hilfa gwat ar guva

(Yo pura Mat 13.1-9; Mark 4.1-9)

4Mizli a soko tir walahayaya gar ng'avu Yesu, zigiduw mukus haɗi na, Yesu a ɓa taŋ ɓi miweˀ ti wi ani:

5«Mbur a bi nga zliɗa#8.5 Angi hirwuy Palestine, alkamari, a zligaka ti zligi ta, amma a zliɗaka ti zliɗ si. hilfa gwat ar guva. Ti naŋ mazliɗa na, mengeleleŋ mekelemey a ndilam aciki jiviɗ, mizli a kirpaka taŋ asi sar, yo ɗiyuw ngi ɓuhoy a ndaka taŋ ceke. 6Numuŋhoy a ndilam ar li ɗugur, a pusam, yo a muˀulom, asi li anta hir ta. 7Mekelemey a ndilam a wuzla hadaw. Ti hadaw magil rak rak ati taŋ na, a vuso taŋ. 8Amma mekelemey a ndilam ar li mezle. A gilam, a gam mengeleleŋ avu taŋ skat skat.» Ar nah na, Yesu a ɓi ˀay paɗ a muŋ: «Mbur misi ti slimiɗ macin na, anja a cin!»

Yesu maɓa ɓi, a wa weˀ ti wi na, vur mike?

(Yo pura Mat 13.10-17; Mark 4.10-12)

9Mizli ngi seˀehey a cufuɗaka mbiɗeˀvra ngi ɓi naŋ miɓa taŋ di weˀ ti wi na. 10Yesu a ɓi: «Ɓi muɗum vur Zumabuy ngi Buymisemuŋ na, a njukukum di le ɓa ki sinaka. Amma mizli mekelemeye, sey yi ɓa taŋ di weˀ ti wi,

ɓa t'ada ngrimme ɓula,

amma anta puraka ta,

yo ɓa a cinam ti cin ɓula,

amma anta slaka wala nah ta.

Mbiɗeˀvra ngi ɓi ngi mbur mizliɗa hilfa gwat ar guva

(Yo pura Mat 13.18-23; Mark 4.13-20)

11Yesu a ɓa mizli ngi seˀeheye: «Ɓi ya muɓukum weˀ ti wi na, mbiɗeˀvra naŋ ani: hilfa, i mingiɓi ngi Buymisemuŋ. 12Mengeleleŋ midiɗ aciki jiviɗ na, i mizli macinam ɓi, dar Satan a sawa, a muɗa mingiɓi tuwa tir mevel taŋ, vur taŋ masa tiɓam, ɓa a laham. 13Numuŋhoy mindilam ar li ɗugur na, i mizli macinam mingiɓi ngi Buymisemuŋ, matiɓaka ti mumul. Amma dimbasl anta avu taŋ ta. A tiɓam ngi hin neˀkini si. Amma gwat mutuwaˀ mindilo le na, a pulaka tiɓi. 14Mindilam angi hadaw na, i mizli macinam ɓi. Yo wuluk, zlili ati gwat macira taŋ hiri a vuso taŋ angi jiviɗ taŋ ngi ru nga mbuŋ nga mbuŋ, mbak a ndilaka hin ɓa a nahama mata. 15Misi angi li mezle na, i mizli macinam mingiɓi tuwa ti mevel mezle, mukuy, yo majaka a hirnga, a hurdumom, hã a sikam.

Ɓi ngi lampe

(Yo pura Mark 4.21-25)

16Mbur a ja vu avu lampe ɓa a ɗupo kisa ara, malla a ca asi arngawo na, a gi ta. Amma a ɗuvaka taˀ ar li ɗuf naŋ, ɓa mizli macam ngi haya, a puraka li njahha. 17Asi gwat miyaŋŋa masa njik ta na anta. Yo gwat muɗumo masa bo bidas ta na anta.

18Kum macinama, mbri mbri na, gam wer so. Asi mbur misi gwata, a sa vulakaŋ ava ma. Yo mbur manja gwata, gwat mineˀ ngi si haŋ naŋ, naŋ misi hiri taˀ ava vuna ma na, a sa tiɓakaŋ di.»

Sukum ngi Yesuhoy ati mumuŋ naŋ

(Yo pura Mat 12.46-50; Mark 3.31-35)

19Sukum ngi Yesuhoy ati mumuŋ a soko ɓa a purakaŋ, amma a ndilam gbaˀ ava gu ta, asi zigiduw haɗa. 20Mizli a ɓaka Yesu: «Ti munuk ati sukum ɗikeye, t'ani dedeŋ avra, a wuɗam pur ɗike.» 21A mbiɗa taŋ di: «Maha ati sukum ɗuwoy, i mizli macinam mingiɓi ngi Buymisemuŋ, yo majaka a hirnga.»

Yesu ɓi micica burkataŋ

(Yo pura Mat 8.23-27; Mark 4.35-41)

22Ngi hin mekelem ada na, Yesu a cam palalam ati mizli ngi seˀeheye, a ɓa taŋ: «Tuwuɗukum nga dubazaw vay diga.» Joˀ ara tuwuɗam. 23Ti taŋ matuwuɗam ti palalam na, Yesu ara hinje. Himiɗ a curbuɗ ar yama, hã yam a naha palalama, a ndir mata ɓa a zizam. 24Mizli ngisi Yesuhoy a kiraham ng'ava, a puɗkakaŋ, dar a ɓakaŋ: «Buy, Buy, i ra zizam.» Yesu a puɗuk, a buca himiɗ tuwa ati diɓel ngi yama. Himiɗ a cici, diɓel ngi yam a mbizli kip, waɗ li a cici kiŋ. 25Dar a ɓa taŋ: «Tiɓi kum ama ani ska?» Zluwun a ga taŋ le, a zuma taŋ hirnga le, a ɓam ar wala taŋ: «I mbur wa hana ska, a ɓa himiɗ ati yama ɗaˀ na, a cinakaŋ mi?»

Yesu miɗiya mbur misi setene a hirnga

(Yo pura Mat 8.28-34; Mark 5.1-20)

26Yesu ati mizli ngi seˀehey a ndilam le angi hirwuy ngi Gerasenihey, puɗak ar Galile. 27Ti naŋ mabi tir palalama na, mbur ada angi walahaya, a so ji di hirnga, i mbur misi setene a hirnga. A zik le, naŋ anta ki zana avu vu ta, anta cifi a haya ta, sey angi zivihey. 28Naŋ mupura Yesu keɗ na, a diɗ asi sar naŋ ti widi, a ɓi ˀay paɗ a muŋ: «Yesu, Mangal ngi Buymisemuŋ Mimadiɗa, ki wuɗ mi avu ya ka? Ambuh, anja ki giy bonoy ta!» 29Yesu a ɓa setene tuwa ɗaˀ, ɓa a bi ti vu mbur nah. Asi setene a hizigiɗaŋ le is mbeˀ mbeˀe. Mizli a juwakaŋ ti celeluhoy ati sesele ɓa a ndir joˀo. Amma a mburca celeluhoyo, setene a bi di nga pala. 30Yesu a cufuɗaŋ: «Slimiɗ ɗike mbrike?» A mbiɗaŋ di: «Zigiduw», asi setenehey micam a hirnga naŋ na, taŋ haɗa. 31Joˀ setenehey a tumbuloko Yesu, ɓa a ɓula taŋ ng'ar heleleŋ ta.

32Naɓa fedemey ada taˀ gezleŋ akẽh, ara jiginaka taŋ ar li miɗingir. Setenehey a tumbuloko Yesu, ɓa a pula taŋ jiviɗ, ara cam ar fedemey tuwa. A pula taŋ jiviɗe. 33Setenehey a bam tivu mburo, ara cam a hirnga fedemeye. Fedemey mitaˀ gezleŋ tuwa, a kilam wuw tir li miɗingire, ara ndilam griv griv ng'ar yam madiɗa, yam a nda taŋ cek.

34Mijigina fedemey mupuraka gwat migi nah na, a kilam ti labara nah ng'ar walahay ati prokoy gar. 35Mizli a ram ɓa ara puraka gwat migi vuna. A ndilam avu Yesu, a lumaka mbur misi setenehey mubam ti vaˀa tuwa, naŋ da asi sar ngi Yesu, ti zana ɓaˀ avu vu, yo naŋ ti lesl naŋ kuy kuy muduba. Zluwun a ga taŋ. 36Mbur misi setenehey a hirnga miɗiyi na, mizli mupur naŋhay a slufaka taŋ ɓi nah, a cuh kahana kahana. 37Akẽh na, mizli ngi hirwuy Gerasenihey gar a ɓaka Yesu ɓa a cuh, a pula taŋ, asi zluwun a ga taŋ le haɗi. Joˀ naŋ, a ci palalam, a mi a muŋ. 38Mbur misi setenehey mubam ti va tuwa, a tumbuloŋ ɓa a aru aseˀeŋ. Amma Yesu a ɓaŋ: 39«Mi ngi hay, gwat Buymisemuŋ muguw di gar na, slufa ɓi nah da mizli.» Mbur a ru, a bula walahaya gar ti tila mi ti ɓi ngi gwat Yesu migaŋ di tuwa gar.

Yesu mumbulo zuŋ ngi Zayirus, yo naŋ miɗiya ngwas muwusa zana naŋ

(Yo pura Mat 9.18-26; Mark 5.21-43)

40Ti Yesu mumo na, zigiduw a tiɓaŋ mulaka, asi mizli gar ara kutukokoŋ zleˀe. 41Mbur mekelem ada, a ndilawa, a zilaka Zayirus. I buy ngi hay ngi dira dibiɗ. A hin kuɓ asi sar ngi Yesu, a tumbuloŋ ɓa a so ngi hay naŋ. 42Asi zuŋ naŋ kirmalay ada, vi naŋ a gi gwat ngi kuruˀ nga cuw gu, ara mucu.

Ti Yesu maru nga diga na, zigiduw ara ngislaŋ ka ngi ɓutoŋ. 43Ngwas mekelem ada akẽh ma, ara si bonoy ti nguf, anta sli sleˀ le ta, a gi di le vi kuruˀ nga cuw. A tika zlili naŋ le gar da doftoroy, ko mbur pal mumbuloŋ gu anta. 44A gumbuˀ ng'avu Yesu ti dirba, a wusaŋ avu mi ngi zana. A haŋhaŋ si na, pumbus tuwa a sli. 45Yesu a cufuɗ vu: «Muwusiy i waka?» Piyer mupura mizli gar majam mi na, a ɓaŋ: «Buy, i zigiduw mugun hirnga ɗik mangisluw ti ka, ti ka na.» 46Amma Yesu a ɓi: «Mbur a wusiy le, yi cine le, gidaŋ a bi le ti vu vu ɗu.» 47Ngwas tuwa mupura a sumuɗ gu mata na, a so ti jijik, a hin kuɓ asi sar ngi Yesu. Ɓi naŋ muwusaŋ hĩˀĩ aseˀe ati naŋ miɗiyi a haŋhaŋ gar na, a slufa a mbuŋ mizli gar. 48Dar Yesu a ɓaŋ: «Zuŋ ɗu, tiɓi ɗik a lihuw le. Aru zuy.»

49Ti naŋ mira ɓi aruŋ na, mbur ngi hay Zayirus, buy ngi hay ngi dira dibiɗ tuwa, a ndilawa, a ɓa Zayiruso: «Zuŋ ɗik a muc le, anja ki gira Kumani mata.» 50Amma Yesu a cine le, a ɓa Zayiruso: «Ki zluwun ta, ka tiɓi a mevel ɗike si. Zuŋ a sa mbul.» 51Yesu mindil a haya na, a pul mbur pal ɓa a ci aseˀe ta, sey Piyer, Zaŋ ati Zak waɗ cine ati mumuŋ ngi zuŋ. 52Mizli gar ara hislikam ti tuwuy asi zuŋ tuwa. Yesu a ɓa taŋ: «Ki tuwam ta, a muc ta, a hinje ti hinje.» 53Joˀ mizli a singiram araŋ, asi a sinaka le, zuŋ a muc le. 54Amma Yesu a ja haŋ ngi zuŋ tuwa kaw, a zilaŋ: «Zuŋ ɗu, puɗuku!» 55Musuwun naŋ a mo le, zuŋ a slikiɗ a haŋhaŋ si. Dar Yesu a ɓi ɓa a vulakaŋ gwat ngi zum. 56Ɓi nah a zuma hirnga le da miyi naŋhaya, Yesu a ɓa taŋ ɗaˀ le, anja a ɓaka ɓi nah da mbur ta.

Currently Selected:

Luk 8: BEGDC

Highlight

Copy