Luk 7
7
Yesu mumbulo gawla ngi madiɗa ngi sojehey
(Yo pura Mat 8.5-13)
1Ti Yesu mikiɗa mi ngi tila mi da mizli na, aru nga Kapernahum. 2Madiɗa ngi soje ngi romahay ada a diga. Gawla naŋ, naŋ mawuɗ haɗa, naŋ gu ta, gweˀ ngi mucu. 3Naŋ micina maɓaka ɓi ngi Yesu na, a slin mizli micawwa ngi Yudehey ng'ava ɓa a tumbulokoŋ, a so mbuloŋ gawla naŋ na. 4Mizli tuwa mindilam avu Yesu na, a tumbulokoŋ hirdam hirdam, a ɓakaŋ: «Mbur nah na, a ndila le ɓa ki jinaŋ. 5Asi ada wuɗ sukwi ndra, yo mindira ndra hay ngi dira dibiɗe i naŋ ma.» 6Dar Yesu a ram bumoˀ. Naŋ mindil gweˀ avu haya na, madiɗa ngi sojehey a slino ngama naŋhay ɓa a ɓakaŋ: «Ki giro vu ta Buy, asi yi ndila ter ɓa ki ci nga viŋ ɗu ta. 7Ya mupura vu ɗu, i ndila ɓa hã ngi ru ng'avi ka ti hirnga ɗu ta na vurˀe. Ɓi ɗaˀ purla si na, gawla ɗu a sa mbul si. 8Naŋ kine, miwi ɗuwoy ada, ya kwana, y'ada ti sojehey, ya muwa taŋ. Yi ɓa numuŋ le: «Aru!» na, a ru. Yi ɓa mekeleme le: «Sawa!» na, a sawa. Yi ɓa gawla ɗu le: «Ga gwat ani» na, a gaŋ.» 9Yesu micina mingiɓi hana na, a hĩyãŋ teˀe. A mbiɗi hiri ng'avi zigiduw masipaŋ na, a ɓa taŋ: «Yi ɓukum na: Ko a wuzla Israyeleye, mbur misi tiɓi kahana, yi lum ɗaˀ ta.»
10Mislin ngi madiɗa ngi sojehey mumam ngi hay na, a lumaka gawla tuwa kuy kuy ti vu naŋ muduba.
Yesu mislikiɗa mangal ngi ngwas wudiga tir mucu
11A dirba nah, Yesu ara ru ng'ar walahay mazilaka Nayin. Mizli ngi seˀehey waɗ zigiduw haɗi ara zuɓam jiviɗ bumoˀ. 12Ti naŋ mindil gweˀ avu mizlingre ngi walahaya#7.12 A zilam mizlingre ngi walahay na, i li mizli mazikam a diga, asi ar hirwuy Israyele, a gunoko walahaya gun gun ti mohol, waɗ mizlingrehey pul pul ava na, kasl ti nah, mizli ara soko ti vagay ngi mbur nga diki. I mangal kirmalay ngi ngwas wudiga. Mizli haɗi ngir walahay ara ram aseˀeŋ. 13Buy Yesu mupura ngwas tuwa na, a puraŋ ˀircece, a ɓaŋ: «Ki tuwuy mata!» 14A kirih, a wusa cacala ngi mbur vagay tuwa. Mijijir naŋhaya cicam. Joˀ a ɓi: «Gawla, i ɓuw, slikiɗi!» 15Dar mbur mumuca tuwa a slikiɗ joˀ, a zla a ɓi, Yesu a vula da mumuŋ a muŋ. 16Zluwun a ga mizli le gar, a hunumaka Buymisemuŋ, a ɓam: «Mijiviɗ madiɗa a bo le ar wala ndra. Buymisemuŋ a so le jina mizli naŋhaya.»
17Gwat Yesu miga na, ara ɓaka ɓi nah asi hirwuy Yude ati prok naŋhay gar.
Zaŋ mislin ng'avu Yesu
(Yo pura Mat 11.2-19)
18Mizli ngi si Zaŋhay a slufaka gwat migam tayna gar da kumani taŋ Zaŋ vuna. Zaŋ a zil mizli cuw a wuzla taŋ, 19a slina taŋ ng'avu Buy Yesu, ɓa a cufuɗakaŋ: «Ki mbur masa so na kwa? Malla sey i kutukom mbur mekelem kwa mbrike?» 20Mizli tayna mindiloko avu Yesu na, a ɓakaŋ: «I Zaŋ mici mizli ar yam mislino ndra ng'avi ka, ɓa i cufuɗukuw: Ki mbur masa so na kwa? Malla sey i kutukom mbur mekelem kwa mbrike kini?»
21Kasl ti nah na, Yesu ara mbul misi jijihey ati misi blehey haɗi, ara ɓul setenehey ti vi mizli, yo ara wun hiri ngi dangaray haɗi. 22Joˀ a mbiɗa da mislin ngi Zaŋhay tuwa: «Gwat kum mupuraka ati ɓi kum micinaka na, a ram, slufaka da Zaŋ: Dangaray ara puram, jegwerey ara ram, misi kukulahay a ɗiyam le, midigizlahay ara cinam kwaŋ kwaŋ, mumucahay ara slikiɗam, yo mizli ara tilam mi ti Ɓimezle da misi murgahaya. 23Mbur mapula tiɓi naŋ asi ya ta na, naŋ ar mumul!»
24A dirba mislin ngi Zaŋhay mucohom na, Yesu a ɓa ɓi ngi Zaŋ da zigiduwo: «Ki ram nga pura mi a wuzlaɓuh ka? Lavaɗ himiɗ mawusa na kwa? 25Na, ki ram nga pura mi ska? Mbur miki zana hirnga kwa? Ani mizli miki zana ngi slimiɗey, yo muroko ar wuya na, t'ani ar mugum ngi buy madiɗahay mayse. 26Na, ki ram nga pura mi ska? Mijiviɗ kwa? Haˀaw, yi ɓukum na: A funa mijiviɗe le ma jaka. 27Asi mike na, Zaŋ i mbur mutohoko ɓi naŋ zleˀe miɓam:
«Ani, i ra slina modro ɗu a mbuŋ ɗike,
a sa ɗiyuw jiviɗ a mbuŋ ɗike.»
28Yi ɓukum na: A wuzla mizli miyaka taŋ ti yi gar na, mifineˀ Zaŋ anta. Amma mbur mizlew wãˀ ar Zumabuy ngi Buymisemuŋ na, a funaŋ le.
29Mizli gar, ko micikila buutuhoy micinam ɓi ava na, a sinaka le, Buymisemuŋ naŋ jeŋŋe, joˀ Zaŋ a ca taŋ ar yam. 30Amma Farisahay ati buy ngi ɓimujuwahaya, gwat Buymisemuŋ muwuɗ vur taŋ na, a hizigaka avra, a ngumam ɓa Zaŋ a ca taŋ ar yama ta. 31Mizli migwenehey na, yi sa wa taŋ ati waka? A bam vu ati wa ska? 32A bam vu ati ziri mujoar li ngi luuma, matilam mi da cil taŋ mekelemey, a ɓaka taŋ:
«I fukum bozloro ngi ɓuruku.
Na, ki ɓurgam ta ma!
I zlukum dimis ngi vagay.
Na, ki tuwam ta ma!»
33Asi mike na, Zaŋ mici mizli ar yama, a so na, anta zum gwat ta, anta si mbaazla ta, joˀ ki ɓam: «Setene ada a hirnga!» 34Mangal ngi mbur a sawa, ara zum gwat, ara si gwat, joˀ ki ɓam: «Puraka misi may ani, a wi ti mbaazla. Ingama ngi micikila buutuhoy ati ngi mizli migi mungrahay ma!» 35Amma mizli gar matiɓaka sin nijileŋ na, a sinaka le, naŋ jeŋŋe.»
Yesu a hay Simoŋ, mbur Farisa
36 Mbur Farisa a zila Yesu nga zuma ɗaf a hay naŋ. Yesu a ci ngi hay mbur Farisa tuwa, a cifi le joˀ ngi zuma ɗafa. 37Ngwas sulome ada ar walahaya, a ndilawa. A cine le zleˀe, Yesu ara zum ɗaf a hay mbur Farisa. A so ti urdi mbaf ar gojogoɗ ngi ɗugur marava. 38A cifi ti dirba, a tuwuy ng'ar sar ngi Yesu, hã a bunaŋ sara ceɗ ceɗ ti tuwuyo. A sumuɗoŋ taŋ ti himac ngi hirnga, a jaŋ saraya paˀ, a pa taŋ urdi tuwa. 39Mbur Farisa muzulo Yesu tuwa mupura na, a ɓi ti kwacay naŋ: «Da mbur hana i mijiviɗ na, ngwas muwusaŋ hana i migi mungra na, anja a si na gu zleˀe.» 40Yesu a slaŋ di: «Simoŋ, y'ada ti ɓi neˀ ngi ɓuw di.» Simoŋ a ɓaŋ: «Kumani, ɓaŋ.» 41Yesu a ɓi: «Mbur ada, naŋ ti misi duvus naŋhay cuw: avu mbur mekeleme, gabal skat skat zlum, avu mbur numuŋ, gabal kukur zlum. 42Taŋ cuw taŋ na, gwat anta ɓa a wurkakaŋ di ta, a pula taŋ duvus misi avu taŋ cuw taŋ gar. Masa wuɗaŋ dum le asi taŋ, i waka?» 43Simoŋ a mbiɗaŋ di: «Yi wa na, i mbur naŋ mupulaŋ duvus naŋ haɗi na.» Yesu a ɓaŋ: «Ki sla ɓi nah le kaslsla.»
44Dar Yesu a mbiɗi hiri ng'avi ngwas tuwa, a ɓa Simoŋ: «Kˀada pura ngwas hana kwa? Yi co a hay ɗike, ki buniy saraya ta, amma naŋ, a buniy saraya le ti tuwuy naŋ, yo a sumuɗiy taŋ le ti himac ngi hirnga naŋ. 45Ki jiy kuɓuy ta, amma naŋ, zle ti naŋ muco na, a ro ti sar ɗuwoyo paˀ paˀa. 46Ki piy mal mazĩˀĩ ndum a hirnga ɗu ta, amma naŋ, a piy urdi le da saraya. 47Da yi ɓuw le, mungra naŋhay mihaɗi na, a puyam le avra na, asi naŋ mibiga wuɗavu naŋ mihaɗa na. Amma mbur mapuyakaŋ mungra naŋ avra neˀkini na, wuɗavu naŋ, naŋ haɗa ta ya.» 48Joˀ a ɓa ngwasa: «Mungra ɗikey a puyam le avra.»
49Mizli miziloko taŋ tuwa, a zlaka a ɓam ar wala taŋ: «I mbur wa hana, ɓa hã a puy mungrahay avra na ka?» 50Dar Yesu a ɓa ngwasa: «Tiɓi ɗik a lihuw le. Aru zuy.»
Currently Selected:
Luk 7: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
