LEVIHEY 8

CI MIGI MASAY MUDUMBUŊHOY AR SLRA

Mezegwel ngi vula slra

1Bumbulvuŋ a ɓa Moyis na: 2«Zila Aroŋ ati ziri naŋhaya, hila zana ngi mezegweleye, zuɓa mal ngi vula slra, ji gusoŋ ngi gi mikuli ngi pula mungra ati zlengerekey cuw, waɗ kiɗgil misi ɗaf manja ˀis araŋ. 3Yo kuso zigiduwo cek cek nga mizlingre guɗuk ngi zlir ti ya Bumbulvuŋ.»

4Moyis a ga kaɓa Bumbulvuŋ miɓaŋ di ɗaˀ le tuwa, joˀ zigiduwo cek cek a kusom nga mizlingre guɗuk ngi zlir ti ya. 5Akẽh na, Moyis a ɓa zigiduwo: «Gwat, Bumbulvuŋ miɓiy di ɗaˀ le ɓa yi ga na, i hana.» 6Moyis a so ti Aroŋ ati ziri naŋhaya, dar a buna taŋ ti yam ngi mezegwel. 7A ka jibe da Aroŋ, a juwaŋ kanda hirlak, a kaŋ dawra ati jampa ɓaˀ a hirnga naŋ, waɗ a juwaŋ di hirlak ti zeweɗ ngi jampa vuna. 8A luwaŋ jiiba law a didaka waɗ a paŋ Urim ati tumime sek ar jiiba ngi didak tuwaŋ. 9A tuwuɗaŋ loppol a hirnga, waɗ a gaŋ wuya ti mbuŋ gunno ti mufuyuk ngi ɓiri, gwat ngi wuya mabiga a zla slra le, Moyis a ga kaɓa Bumbulvuŋ miɓaŋ di ɗaˀ le. 10Moyis a zuɓa mal ngi vula slra, a pa da guɗuk ngi zlir ti Buymisemuŋ waɗ da gwat ngi huroˀohoyo gar, dar a tiri taŋ i ngi Buymisemuŋ. 11A kuca li gi mikuli ti mal tuwa hã is tarnaˀ, yo gwat ngi gi slra naŋhaya gar, waɗ kisa ngi bun ati gwat ngi ɗuv naŋ ma, a tiri taŋ i ngi Buymisemuŋ. 12A pa mal ngi vula slra tuwa pulaˀa nga hirnga Aroŋ, ɓa a tiri di mbur ngi Buymisemuŋ. 13Moyis a so ti ziri ngi Aroŋhoy ng'ava. A ka taŋ jibehey, a juwa taŋ di wak wak ti kanda, waɗ a ca taŋ jiiku a hirnga, kaɓa Bumbulvuŋ miɓaŋ di ɗaˀ le.

14A ɓa mizli, a kirohoko gusoŋ ngi gi mikuli ngi pula mungra. Aroŋ ati ziri naŋhay a bucaka haŋ a hirnga gusoŋ tuwa. 15Moyis a slaˀay ngi gusoŋ, a tiɓa pumbus naŋ. Li gi mikuli, mivay naŋhay muyoŋ yoŋ yoŋ kaɓa durumoyo, Moyis a ca muzuŋ haŋ yop ar pumbuso, a ga taŋ di njoffo njoffo, ɓa ngi bi ti hiryi naŋ avra, waɗ is naŋ sek ng'asi virzi ngi li gi mikuli, a vula da Buymisemuŋ ti gi mezegwel ngi pula mungra. 16Moyis a hila mungul ngi hur kwacay gusoŋ tuwa, guzluzluk ngi mevele torro, ɗugur dubahaya cuw taŋ ti mungul taŋhaya, a wura taŋ ar li gi mikuli. 17Gusoŋ vuna gbingbiŋ, gara ka, useˀ naŋ ati gwat ngi kwacay naŋhaya, a wuraka taŋ a duba gala, kaɓa Bumbulvuŋ muɗuva da Moyis tuwa.

18Moyis a biga zlengerek ngi zlum zlam zlama. Aroŋ ati ziri naŋhay a bucaka haŋ a hirnga zlengerek tuwa. 19Moyis a sla ˀay naŋ, a kuca ciki li gi mikuli gun gun zlar ti pumbus naŋ. 20A puwa zlengereke paw paw. Hirnga naŋ, useˀ mupuwahay ati mungul naŋhaya, dar a wura taŋ. 21Gwat ngi hur kwacay ati poprokoyo, Moyis a buna taŋ, dar a zluma zlengereke sir wãˀ ar li gi mikuli. Nah na, i mikuli mizlam zlam wãˀ, misi zĩˀĩ naŋ a tisl mevel, i gwat ngi zum mizlam zlam wãˀ da Bumbulvuŋ kaɓa naŋ muɗuva da Moyis tuwa.

22Moyis a biga zlengerek mucuw naŋ, i zlengerek ngi gi mezegwel ngi vula slra. Aroŋ ati ziri naŋhay a bucaka haŋ a hirnga zlengereke. 23Moyis a slaˀay naŋ, a tiɓa pumbus naŋ, a ga avu mukutuk ngi slimiɗ vay hazum ngi Aroŋ, avu muzuŋ haŋ naŋ madiɗa vay hazum waɗ avu muzuŋ sar madiɗa vay hazumo ma. 24Akẽh na, Moyis a ɓa ziri ngi Aroŋhoyo, ɓa a kirohoko ng'ava, a ga taŋ pumbus tuwa avu mukutuk ngi slimiɗ taŋhay vay hazumoyo, avu muzuŋ haŋ taŋ madiɗahay vay hazumoyo, waɗ avu muzuŋ sar taŋ madiɗahay vay hazumoyo ma. Dar Moyis a kuca ciki li gi mikuli tuwa gun gun zlar ti pumbuso. 25A hila li misi malaya: dangwal naŋ, mungul ngi hur kwacaya gar, muguzlurvuy ngi mevele torro ati ɗugur dubahaya cuw taŋ jom ti mungul naŋhaya, waɗ tuwal naŋ vay hazumo. 26Yo angi kiɗgil ngi ɗaf manja ˀis ara misi a mbuŋ Bumbulvuŋ na, hapa mufukuɗa manja ˀis ara tos tos ar vu ati mida deˀdeˀ ti mal waɗ helelem mikefer kefere, a zuɓ pal pal avu taŋ, a pa taŋ sek nga hirnga mungul ati tuwal vay hazum tuwa. 27A vula taŋ gar a haŋ Aroŋ ati ziri naŋhaya. A vula a mbuŋ Bumbulvuŋ, kaɓa magam mezegwel ngi vula gwat. 28Akẽh na, Moyis a tiɓa gwat ngi vul ngi mikuli tayna tuwa tisi haŋ taŋ a muŋ, a wura taŋ ar li gi mikuli jom ati useˀ ngi zlum ti zlumo. Hana i mikuli ngi vula slra. I urdi matisl mevel, mikuli ngi gwat ngi zum mizlam zlam wãˀ, misi zĩˀĩ naŋ a tisla mevel da Bumbulvuŋ. 29Moyis a zuɓa didak ngi zlengereke, a vula ti gi mezegwel ngi vula gwat a mbuŋ Bumbulvuŋ. Zlengerek ngi mezegwel ngi vula slra na, mi ngi Moyis i nah, kaɓa Bumbulvuŋ miɓaŋ di ɗaˀ le tuwa.

30Mal ngi vula slra waɗ pumbus misi angi li gi mikuli tuwa, Moyis a zuɓa taŋ, a kuca da Aroŋ waɗ da zana naŋhaya. Yo a kuca da ziri ngi Aroŋhoy waɗ da zana taŋhaya ma. Naŋ mitiri ti Aroŋ ati zana naŋhaya, ziri ngi Aroŋhoy ati zana taŋhaya, ɓa a ndiram da Buymisemuŋ na, naŋ kahana so.

31Moyis a ɓa Aroŋ ati ziri naŋhaya: «Daka useˀ ngi zlengerek mucuw naŋ na a mizlingre guɗuk ngi zlir ti Buymisemuŋ na, ɓa kisa zumaka a diga ti ɗaf misi ar kiɗgil ngi mezegwel ngi vula slra na, kaɓa ya miɓa ɗaˀ le, i ɓi: ‹I Aroŋ ati ziri naŋhay masa zumaka useˀ nah tuwa.› 32Is ngi useˀ ati ɗaf, kisa wuraka taŋ avra. 33Kum anta sa kiraham kirah le avu mizlingre guɗuk ngi zlir ti Buymisemuŋ na ta, hã hin tarnaˀa, sey da hin ngi mezegwel ngi ci kum ar slra kum mikiɗ mi le, asi ci kum ar slra na, sey a gi hin tarnaˀa. 34Bumbulvuŋ a ɓa le ɗaˀ le ɓa i gaka, kaɓa ndra migaka ngadana na, ɓa a pulukum mungra kumoy avra. 35Kum ada mizlingre guɗuk ngi zlir ti Buymisemuŋ duvuɗ ati papas, hã hin tarnaˀa. Kanah so na, kisa gaka slra ngi Bumbulvuŋ gu, manja ki micam. I naŋ miɓiy ɓi nah ɗaˀ le kanah.» 36Ɓi Bumbulvuŋ miɓa ɗaˀ le gar da Moyis, ɓa a ɓa da Aroŋ ati ziri naŋhaya na, taŋ a gaka kanah so.

Currently Selected:

LEVIHEY 8: BEGDC

Highlight

Copy